ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⵏⴰⵡⵜ ⵜⴰⵙⴳⵯⵙⴰⵏⵜ ⵜⵉⵙⵙ 31 ⵏ ⵜⵉⵏⴰⵡⵜ ⵜⴰⵙⵓⵍⴰⵏⵜ ⵏ ⵓⵙⵍⵉⵥⵕ ⴰⴳⵔⴰⴽⴰⵍ (COPEAM), ⵏⵏⴰ ⵉⵜⵜⵉⵙⵏⵎⴰⵍⴰⵏ ⵓⵙⵙⴰⵏ ⵏ 18 ⴷ 19 ⵉⵔⵉⵔ 2024, ⴳ ⵜⵎⴷⵉⵏⵜ ⵏ ⵏⴰⴱⵓⵍⵉ ⴳ ⵉⵟⴰⵍⵢⴰ, ⴷⴷⴰⵡ ⵓⵙⴳⵓⵎ ⵏ « ⵜⵉⵙⵓⵜⵉⵡⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⴳⵎⵉ ⵅⴼ ⵓⵙⵏⵖⵎⵙ : ⴰⵙⴷⵓⵙ ⵏ ⵉⴼⵔⴰⴽⵏ ⴷ ⵜⵡⵏⴳⵉⵎⵜ ⵜⴰⵎⵣⵖⴰⵏⵜ ⵖⵓⵔ ⵉⵄⵔⵔⵉⵎⵏ ».

ⵉⵡⵏⴰⵏ ⵏ ⵜⵙⵓⵜⵍⵜ ⵏ ⵓⵏⵏⵓⵕⵥⵎ, ⵙⵙⵎⵏⴷⵏ ⵉⴳⵏⴰⵙⴰⵙⵏ ⵏ ⵍⵓⵏⵉⵙⴽⵓ, ⵡⵉⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵡⵉⵏ ⵜⵙⴷⴰⵡⵉⵜ ⵜⴰⵍⵓⴱⵏⴰⵏⵉⵜ ⴷ ⵜⵎⵉⵔⵉⴽⴰⵏⵉⵢⵜ, ⵙⵙⵎⵏⴷⵏ ⵉⵔⵎⵎⵓⵙⵏ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵓⵏⵖⵎⵉⵙ, ⵙ ⵜⵎⵉⵜⴰⵔ ⴷ ⵉⵣⵓⵔⵜⵏ ⵏⵏⵙⵏ, ⵙⵙⵎⵏⴷⵏ ⴰⵡⴷ ⵜⵉⵖⴰⵔⴰⵙⵉⵏ ⵏ ⵜⵎⵙⴽⵔⵜ ⴷ ⵓⵙⵡⵓⵔⵉ ⵏⵏⵙⵏ.

ⵉⵡⵏⴰⵏ ⵏ ⵓⵎⵔⴰⵔⴰ ⵏ ⵕⵕⴰⵢ ⴷ ⵉⵎⵙⴳⴷⴰⵍⵏ ⴳⵔ ⵉⵎⴷⵔⴰⵡⵏ ⵏ ⵜⵉⵏⴰⵡⵜ ⴰⴷ, ⵜⵜⵓⴱⴷⵔⵏⵜ ⴽⵉⴳⴰⵏ ⵏ ⵜⵖⴰⵔⴰⵙⵉⵏ ⵏ ⵜⵉⴳⴰⵡⵜ, ⵏ ⵓⵙⵡⵉⵏⴳⵎ ⴷ ⵓⵙⵎⵓⵙⵙⵓ ⵏ ⵉⵎⴷⴰⵏⵏ ⴷ ⵡⴰⵎⵓⵏⵏ ⵅⴼ ⵜⵓⴷⵔⵜ ⴳ ⵓⵣⵎⵣ ⵏ ⵓⵎⵓⵟⵟⵓⵏ, ⵙ ⵉⵎⵥⵍⵉ ⴷⴰⵜ ⵓⵣⵣⵉⴳⵣ ⵏ ⵜⵉⵖⵉⵙⵜ ⵜⵉⵎⵍⵥⵉⵜ, ⵎⴰⵛⴰ ⴳ ⵓⴱⵔⵉⴷ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵙ ⵓⵙⵙⴰⴽⵉ ⵏ ⵜⵖⴹⴼⵜ ⵏⵏⵙⵏ ⵅⴼ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⴷ ⵜⴽⵏⴷⴰⵡⵜ ⴷ ⵉⵡⵏⵏⵉⵜⵏ ⵏ ⵓⴽⵙⴰⵏ. 

ⵜⵜⵓⵙⵙⵎⵏⵉⴷⵏ ⴰⵡⴷ ⵉⵜⵙ ⵏ ⵢⵉⵔⵉⵎⵏ ⵉⵙⵏⵖⵎⴰⵙⵏ ⴷ ⵉⵎⵔⵙⴰⵍⵏ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵉⵍⵉ ⵏ ⵜⴷⵍⵙⴰ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ, ⵙ ⵉⵎⵥⵍⵉ ⵉⵔⵉⵎⵏⵏ ⵜⴷⴰⴱⵓⵜ ⵜⴰⵜⵍⴼⴰⵣⵜ ⴳ ⵉⵟⴰⵍⵢⴰ, ⵜⵉⵍⵉⴼⵉⵣⵢⵓⵏ ⵏ ⴼⵕⴰⵏⵚⴰ, ⵡⵉⵏ ⵜⵏⵣⵡⴰⵢⵜ ⵏ ⴼⵕⴰⵏⵚⴰ ⴷ ⵜⵉⵏ ⵕⴰⴷⵢⵓ ⵜⵉⵍⵉⴼⵉⵣⵢⵓⵏ ⵜⴰⵎⵓⵏⵜ ⵏ ⵓⵕⵓⴱⴱⴰ.

ⵉⵜⵜⵓⵙⵎⴷⵢⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵎⴰⵙⵙ ⵄⴱⴷⵍⵊⴰⵍⵉⵍ ⵍⵃⴰⵎⵎⵓⵎⵉ, ⴰⵏⵎⵀⴰⵍ ⴰⵎⴰⵜⴰⵢ ⴰⵎⴰⵡⴰⵙ, ⴷ ⵎⴰⵙⵙ ⵅⴰⵍⵉⴷ ⵡⴰⵔⵢⵉ, ⴰⵅⴰⵜⴰⵔ ⵏ ⵓⴱⵔⵙⵉⵔⴰ ⵏ ⵜⵏⵙⵙⵉⵅⴼⵜ.

ⵉⵜⵜⵓⵙⵎⴷⵢⴰ ⵍⵎⵖⵔⵉⴱ ⴳ ⵜⵉⵏⴰⵡⵜ ⴰⴷ ⴷ ⴳ ⵓⴳⵔⴰⵡ ⴰⵎⴰⵜⴰⵢ ⵏ COPEAM ⵙ ⵎⴰⵙⵙ ⵙⴰⵍⵉⵎ ⵛⵛⵉⵅ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵚⵓⵔⵉⵢⴰⴷ 2M  ⵉⵎⵓⵏ ⴷ ⵉⵎⵙⵜⴳⴳⴰⵔⵏ ⵏ ⵜⴷⴰⴱⵓⵜ, ⵢⵉⵍⵉ ⴰⵡⴷ ⵎⴰⵙⵙ ⴰⵃⵎⴷ ⴱⵍⵅⵉⵢⴰⵟ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵉⵏⵎⵍ ⵜⴰⵎⴰⵜⵜⴰⵢⵜ ⵏ ⵜⵥⵓⵕⵉⵡⵉⵏ ⵜⵉⵎⴰⵏⵏⴰⵢⵉⵏ ⵏ ⵎⵕⵕⴰⴽⵛ.

ⴰⴷ ⵏⵙⵙⴽⵜⵉ ⵉⵙ ⵜⴻ ⵜⵜⵓⵚⴽⴰ ⵜⵉⵏⴰⵡⵜ ⵜⴰⵙⵓⵍⴰⵏⵜ ⵏ ⵓⵙⵍⵉⵥⵕ ⴰⴳⵔⴰⴽⴰⵍ (COPEAM) ⴳ ⵍⵇⴰⵀⵉⵕⴰ ⴰⵙⴳⴳⵯⴰⵙ ⵏ 1996, ⵢⵉⵍⵉ ⵖⵓⵔⵙ ⵓⵙⵖⵉⵎ ⵏ ⵜⵡⵓⵔⵉ ⴳ ⵕⵓⵎⴰ, ⵜⴳⴰ ⵢⴰⵜ ⵜⵙⵏⵎⴰⵍⴰⵢⵜ ⵡⴰⵔ ⵓⵔⵔⵉⵣ ⵉⵅⴷⴷⵎⵏ ⴳ ⵓⵙⵉⵍⵉ ⵏ ⵓⵎⵙⴰⵡⴰⵍ ⴳⵔ ⵜⴷⵍⵙⵉⵡⵉⵏ ⴷ ⴳ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳⵔ ⵉⵎⴰⵣⵣⴰⵍⵏ ⵏ ⵢⵉⴳⵔ ⵏ ⵓⵙⵍⵉⵥⵕ ⴷ ⵓⵙⵏⵖⵎⵙ ⴰⴳⵓⵏⵙ ⵏ ⵜⵎⵓⵔⴰ ⵉⵜⵜⵉⵏ ⵉ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ. ⵜⵙⵎⵓⵏ ⴰⵙⵙⴰ ⴰⵜⵜⴰⵢⵏ ⵏ 60 ⵏ ⵉⵎⴷⵔⴰⵡⵏ ⵙⴳ 27 ⵏ ⵜⵎⵓⵔⴰ ⵉⵜⵜⵉⵏ ⵉ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⴷⵉⴳⵙⵏ ⴰⵜⵜⴰⵢⵏ ⵏ ⴽⵕⴰⴹⵜ ⵜⵎⵔⴰⵡⵉⵏ ⵏ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ.