ⴷⵉⴳⵙ ⴳ ⵢⵉⴳⵔ ⴰⵙⵍⵉⵥⵕ ⴰⴳⴷⵓⴷⴰⵏ ⵢⵓⵎⴰⵏ ⵙⵏⴰⵜ ⵜⵓⵛⵛⵔⴽⵉⵡⵉⵏ ⵜⵉⵏⴰⵎⵓⵔⵉⵏ ⵉⴳⴰⵏ ⵜⴰⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⵚⵓⵕⵢⴰⴷ-ⴰⵙⴰⵔⵓ ⵡⵉⵙⵙ ⵙⵉⵏ ⴰⵙⵙⴰ ⵓⴳⴰⵔ ⵏ ⴽⵔⴰⴹ ⵉⵙⵓⵔⴰ ⵉⵜⵉⵍⵉⴼⵉⵣⵢⵓⵏⵏ ⴷ ⵙⴹⵉⵙ ⵏ ⵜⵏⵣⵡⴰⵢⵉⵏ ⴷⴰ ⵣⵓⵣⵣⵓⵔⵏⵜ ⵙ ⵓⴱⵔⵉⴷ ⵏ ⴽⵉⴳⴰⵏ ⵏ ⵜⵖⴰⵔⴰⵙⵉⵏ ⵜⵉⵜⵉⵇⵏⵉⵢⵉⵏ ⴷⵉⴳⵙⵏⵜ ⵜⵏⵏⴰ ⵉⴳⴰⵏ ⵜⵉⵔⵡⵙⴰⵏⵉⵏ ⴷ ⵜⵏⵏⴰ ⵉⴳⴰⵏ ⵜⵉⵎⵓⵟⵟⵓⵏⵉⵏ ⵜⵉⵏ ⵡⴰⴽⴰⵍ ⴷ ⵜⵉⵏⵏⴰ ⵉⵣⴷⵉⵏ ⴷ ⵚⴰⵟⵉⵍⵉⵜ.

ⴰⵙⴳⴳⵯⴰⵙ ⵏ 2006 ⵉⵏⵏⵓⵕⵥⵎ ⵉⵎⵙⴷⴷⵉ ⵏ ⵡⴰⵍⴰⵙ ⵏ ⵓⵥⵟⵟⴰ ⴰⵎⵔⵙⴰⵍ ⴷ ⵡⵉⵏ ⵓⵙⵏⵎⴰⵍⴰ ⵎⵉ ⵉⴳⴰ ⵓⵡⵜⵜⴰⵙ ⴰⵙⵏⴼⵍ ⵏ ⵢⵉⴳⵔ ⴰⴷ ⵖⵔ ⴰⴳⵊⴷⵉ ⴰⵙⵍⵉⵥⵕ ⴰⴳⴷⵓⴷⴰⵏ ⵙ ⵜⵖⵜⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙ ⵓⵙⵙⴽⵏ ⵏ ⵎⴰⵙⵙ ⴼⴰⵢⵚⵍ ⵍⵄⵕⴰⵢⵛⵉ ⴰⵏⵙⵙⵉⵅⴼ ⵅⴼ ⵜⵎⵔⵙⴰⵍ ⵙ ⵙⵏⴰⵜ ⵜⵉⵏⴰⵎⵓⵔⵉⵏ.

ⴷⴼⴼⵔ ⴰⵎⵛⴰⵡⴰⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵓⵢⴰ, ⵉⵏⵏⴰ ⵓⵙⵇⵇⵉⵎ ⵜⴰⵏⵏⴰⵢⵜ ⵏⵏⵙ ⴰⵔ ⴷⵉⴳⵙ ⵉⵜⵜⴰⵍⵙ ⵅⴼ ⵡⴰⵜⵉⴳ ⵎⵇⵇⵓⵔⵏ ⵏ ⵜⵍⴰⵍⵉⵜ ⵏ ⵓⴳⵊⴷⵉ ⴰⴳⴷⵓⴷⴰⵏ ⴰⵏⴰⵎⵓⵏ ⵉ ⵓⵣⵣⵉⴳⵣ ⵏ ⵓⵎⵓⵖⵍⵉ ⴰⵙⵍⵉⵥⵕ ⴰⴽⴽⵯ.

ⵉⵥⵕⴰ ⵓⵙⵇⵇⵉⵎ ⴰⵎⴰⵜⵜⴰⵢ ⴳ ⵜⴰⵏⵏⴰⵢⵜ ⵏⵏⵙ ⴰⴷ ⵢⴰⵡⵉ ⵡⴰⵍⴰⵙ ⵏ ⵓⵥⵟⵟⴰ ⴰⵎⵔⵙⴰⵍ ⵖⵔ ⵜⵍⴰⵍⵉⵜ ⵏ ⵜⵎⵙⵙⵓⵔⵜ ⵜⴰⵏⴰⵎⴰⵥⵜ ⵉⵣⴷⵉⵏ ⴷ ⵓⴳⵊⴷⵉ ⴰⵙⵍⵉⵥⵕ ⴰⴳⴷⵓⴷⴰⵏ ⴳ ⵍⵍⴰⵏⵜ ⵜⴳⵔⴰⵡⵉⵏ ⵉⵙⵏⵎⴰⵍⴰⵢⵏ ⵜⴰⵣⵣⵓⵍⵉⵏ (ⵜⵉⵍⵉⴼⵉⵣⵢⵓⵏ, ⵜⵉⵏⵣⵡⴰⵢⵉⵏ, ⴰⵙⵢⴰⴼⵓ ⵏ ⵓⵙⵉⵙⵙⵏ, ⴰⵔⵛⵉⴼ ⴷ ⵓⵙⵡⵡⵇ…) ⵜⵉⵖⵉⵢ ⴰⴷ ⵜⵓⵔⴰⵔ ⵜⵉⵍⴰⵍⵜ ⵉⵕⵡⴰⵏ ⴳ ⵓⴱⵔⵉⴷ ⵏ ⵜⵉⴳⵎⵉ ⵏ ⵢⵉⴳⵔ ⴰⵙⵍⵉⵥⵕ ⵙ ⵓⵢⵏⵏⴰ ⵙ ⵉⵡⵚⵚⴰ ⵓⵙⵇⵇⵉⵎ ⵏ ⴰⴷ ⵉⵜⵜⵓⵡⴰⵍⵙ ⵓⵥⵟⵟⴰ ⵙ ⵜⵖⴰⵔⴰⵙⵜ ⵏ ⵉⵎⵉⴽ-ⵉⵎⵉⴽ ⴳ ⵜⵉⵣⵡⵉⵔⵉ ⵙ ⵜⵍⴰⵍⵉⵜ ⵏ ⵡⴰⴳⴳⴰⵢ ⴰⵏⵎⵀⴰⵍ ⵉⵎⵓⵏⵏ ⴰⴼⴰⴷ ⴰⴷ ⵜⴼⴽ ⴰⵣⵎⵣ ⵏ ⵓⵎⵓⵔⵙ ⵉ ⵓⵥⵟⵟⴰ ⵢⴰⴷ. ⵔⴰⴷ ⵜⴳ ⵜⵡⵓⵔⵉ ⵏ ⵜⵎⵔⵙⵍⵜ ⴰⴷ, ⴰⵙⵡⵡⵇ ⴳⵔ ⵉⵙⴳⵔⵏ ⵏ ⵓⴳⵊⴷⵉ ⴰⴳⴷⵓⴷⴰⵏ ⵔⵏⵓ ⵢⴰⵙ ⴰⵎⵏⵍⵍⵉ ⵏ ⵓⵙⵙⵓⴷⵓ ⵏⵏⵙ ⴷ ⵓⵙⵏⵎⴰⵍⴰ ⵏⵏⵙ ⴷ ⵓⵙⵉⴽⵙⵍ ⵏ ⵜⵙⵟⵕⴰⵜⵉⵊⵉⵢⵜ ⵏⵏⵙ.

ⵜⵏⵏⵓⵕⵥⵎ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⴰⵎⵖⵔⴰⴱⵉ ⵙ ⵓⵣⵎⵣⵣⵓ ⵏ ⵜⴼⵓⴳⵍⴰ ⵏ ⵓⴷⴰⴱⵓ ⴳ ⵎⴰⵕⵚ 1962, ⵜⵍⵍⴰ ⵜⵣⴷⵉ ⴷ ⵜⵎⴰⵡⴰⵙⵜ ⵏ ⵓⵙⵏⵖⵎⵙ ⴷⴰⵜ ⵏ ⴰⴷ ⵜⴰⵖⵓⵍ ⴷⴼⴼⵔ ⴽⵓⵥ ⵏ ⵉⵙⴳⴳⵯⴰⵙⵏ ⴷⴷⴰⵡ ⵜⵎⴰⵡⴰⵙⵜ ⴰⴷ ⵖⵔ ⵢⴰⵜ ⵜⵎⵔⵙⵍⵜ ⵜⴰⴳⴷⵓⴷⴰⵏⵜ ⵖⵓⵔ ⵜⵍⵍⴰ ⵜⵏⵉⵎⴰⵏⵜ ⵜⴰⵡⵏⴳⵉⵎⴰⵏⵜ ⴷ ⵜⵥⵕⴼⴰⵏⵜ (ⴰⵙⵍⴳⵏ ⵏ 1978 ⴷ 1994).

ⵙ ⵓⵙⵍⴻⵍⵍⵉ ⵏ ⵢⵉⴳⵔ ⴰⵙⵍⵉⵥⵕ ⴰⵎⵖⵔⴰⴱⵉ, ⵜⴰⵖⵓⵍ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⴰⵎⵖⵔⴰⴱⵉ ⴳ ⵉⴱⵔⵉⵔ 2005 ⵜⴳⴰ « ⵜⴰⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ » ⵜⴳⴰ ⵜⴰⵎⵙⵙⵓⵔⵜ ⵜⴰⵎⴷⵔⴰⵡⵜ ⵕⴰⵙⵍⵎⴰⵍ ⵏⵏⵙ ⵉⴳⴰ ⵡⵉⵏ ⵓⵡⴰⵏⴽ. ⵉⴷⴷⴰ ⴷ ⵓⵙⵏⵉⴼⵍ ⴰⴷ ⵙ ⵓⵣⵣⵔⴰⵢ ⵏ ⵓⵙⵍⴳⵏ 77.03 ⵉⵣⴷⵉⵏ ⴷ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵜⵜⵓⵥⵕⴳⵏ ⴳ ⵓⵖⵎⵉⵙ ⵓⵏⵚⵉⴱ ⴰⵙⵙ ⵏ 23 ⴷⵉ ⵍⵃⵉⵊⵊⴰ 1425 ⵉⵎⵙⴰⵙⴰⵏ ⴷ 3 ⴼⴱⵕⴰⵢⵕ 2005 ⴰⴼⴰⴷ ⴰⴷ ⵖⵓⵔⵙ ⵜⵉⵍⵉ ⵜⵍⴻⵍⵍⵉ ⵓⴳⴰⵔ ⵏ ⴰⴷ ⵜⴰⵙⵉ ⵜⴰⵖⵜⵙⵜ ⵜⴰⵎⵓ ⴳ ⵜⵏⴽⵔⴰ ⵙ ⵜⵢⴰⴼⵓⵜ ⵜⴰⵙⵍⵉⵥⵕⵜ ⵜⴰⵏⴰⵎⵓⵔⵜ ⵜⵙⵙⴽⵔ ⵜⴰⵡⵓⵔⵉ ⵉⵖⵓⴷⴰⵏ ⵉ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⴳ ⵓⵢⵏⵏⴰ ⵉⵣⴷⵉⵏ ⵜⴰⴷⵍⵙⴰ ⴷ ⵓⵙⵙⴳⵎⵉ ⴷ ⵓⵙⵏⵖⵎⵙ ⴷ ⵡⵓⵔⴰⵔ ⵖⵓⵔ ⵓⴳⴷⵓⴷ.

ⵙ ⵜⴰⵏⵏⴰⵢⵜ ⴰⴷ, ⵜⵙⵔⵙ ⵜⵏⴱⴰⴹⵜ ⵢⴰⵏ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⴷⵉⴳⵙ ⵉⵙⵓⵖⵏⵏ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵉⵎⵙⴰⵙⴰ ⵖⵉⴼⵙ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 04 ⵉⵏⵏⴰⵢⵔ 2006 (ⴰⴳⵎ ⴷⴰ - ⵜⴰⵖⵜⵙⵜ ⵏ ⵓⵙⵇⵇⵉⵎ ⴰⵎⴰⵜⴰⵢ) ; ⴰⵎⵇⵇⵓⵏ ⴰⵖⴰⵡⵙⴰⵏ ⴰⵎⴰⴳⵓⵜ ⵏ ⵉⵙⴳⴳⵯⴰⵙⵏ ⵏⵏⴰ ⵉⵣⴷⵉⵏ ⵜⴰⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⴷ ⵜⵏⴱⴰⴹⵜ ⴷⴰ ⵉⵜⵜⵕⵛⴰⵎ ⵜⵉⵡⵓⵔⵉⵡⵉⵏ ⵏⵏⵙ ⴷ ⵉⵙⵓⵖⴰⵏ ⵏⵏⵙ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⴷⵓⵍⵉ ⵏ ⵡⴰⴽⴰⵍ ⴰⵏⴰⵎⵓⵔ ⵙ ⵉⵎⴰⵙⵙⵏ ⵉⵜⵉⴽⵏⵓⵍⵓⵊⵉⵢⵏ ⴰⴼⴰⴷ ⴰⴷ ⵜⴳⴳⴰⴷⵉ ⵎⵖⵓⵔⵏⵜ ⵜⵏⴰⴼⵓⵜⵉⵏ ⴷ ⵓⵙⴱⵓⵖⵍⵓ ⵏ ⵜⵢⴰⴼⵓⵜ ⵜⴰⵏⴰⵎⵓⵔⵜ ⴷ ⵜⵓⵏⵏⵓⵏⵜ ⴷ ⵓⵙⵡⵓⴷⴷⵓ ⵏ ⵉⵖⴱⵓⵍⴰ ⵉⵏⴼⴳⴰⵏⵏ ⴷ ⵓⵙⵜⵔⴰⵔ ⴷ ⵓⵙⵏⵎ ⵏ ⵓⵙⵡⵓⴷⴷⵓ…

ⵜⴰⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵜⵉⵍⵉⴼⵉⵣⵢⵓⵏ ⵜⴳⴰ ⵜⴰⵎⵙⵙⵓⵔⵜ ⵜⴰⴳⴷⵓⴷⴰⵏⵜ ⴷⴰ ⵜⵜⴹⵎⴰⵏ ⵜⵉⵙⵏⵙⵉ ⵏ ⵜⵙⵔⵜⵉⵜ ⵏ ⵓⵡⴰⵏⴽ ⴳ ⵢⵉⴳⵔ ⵏ ⵓⵣⵓⵣⵣⵔ ⴰⵏⵣⵡⴰⵢ ⴷ ⵓⵜⵍⴼⴰⵣ. ⵙ ⵓⵢⴰ, ⵜⵙⵎⵢⴰⵏⴰⵡ ⵜⵎⵙⵙⵓⵔⵜ ⵉⵙⴽⴰⵏⵏ ⵏⵏⵙ ⵙ ⵓⵙⴰⵔⵓ ⴰⵜⵍⴼⴰⵣ ⴰⵎⴰⵜⴰⵢ « ⴰⵎⵣⵡⴰⵔⵓ » ⵏⵏⴰ ⵉⵙⵎⵓⵏⵏ ⵉⵏⵖⵎⵉⵙⵏ ⴷ ⵜⴷⵍⵙⴰ ⴷ ⵡⵓⵔⴰⵔ, ⵜⴰⵖⵓⵍ ⴷⵖⵉ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⴷⴰ ⵜⵙⵏⵎⴰⵍⴰ ⵙⵎⵎⵓⵙ ⵏ ⵉⵙⵓⵔⴰ ⵉⵜⵍⴼⴰⵣⵏ ⵢⴰⴹⵏ : « ⵜⵉⵏ ⵜⵓⵏⵏⵓⵏⵜ » ⴷ ⵓⵙⴰⵔⵓ ⴰⵏⴰⵎⵓⵔ ⵉⴳⴰⵏ ⵡⵉⵏ ⵜⴷⵍⵙⴰ ⴷ ⵓⵙⴳⵎⵉ « ⵜⵉⵙⵙ ⴽⵓⵥ » ⴷ ⵓⵙⴰⵔⵓ ⴰⵎⵙⵢⴰⵔⴰⵔ ⵉⵜⵜⵓⵙⴽⵔⵏ ⵉ ⵉⵎⵖⵔⴰⴱⵉⵢⵏ ⵏ ⴱⵕⵕⴰ « ⵍⵎⵖⵔⵉⴱⵢⴰ » ⵔⵏⵓ ⵢⴰⵙ ⴰⵙⴰⵔⵓ ⵏ ⵓⵙⵖⴷ « ⵜⵉⵙⵙ ⵙⴹⵉⵚ » ⴷ ⵓⵙⴰⵔⵓ ⵏ ⵉⴷ ⵍⴼⵉⵍⵎ « ⴰⴼⵍⴰⵎ ».

ⵉⵙⵙⵏⵜⵉ ⵓⵙⴰⵔⵓ ⵡⵉⵙⵙ ⵙⵉⵏ « ⴷⵓⵣⵉⵎ », ⴰⵙⴰⵔⵓ ⴰⵙⵖⵏⵣⵉ ⴰⵎⵣⵡⴰⵔⵓ ⵉⵥⵍⵉⵏ ⵙ ⵍⵎⵖⵔⵉⴱ ⴷ ⵉⴼⵔⵉⵇⵉⵢⴰ ⴷ ⵓⵎⴰⴹⴰⵍ ⴰⵄⵔⴰⴱ, ⵉⵙⵙⵏⵜⵉ ⴰⵣⵓⵣⵣⵔ ⴰⵙⵙ ⵏ 4 ⵎⴰⵕⵚ 1989 ⴷⴼⴼⵔ ⵜⴰⵍⴰⵍⵉⵜ ⵏⵏⵙ ⵙ ⵓⵎⵇⵇⵓⵏ ⵏ ⵓⵖⵍⵍⴰ ⵏⵏⴰ ⵜⵙⵙⴽⵔ ⵜⵎⵙⵙⵓⵔⵜ ⵏ ⵜⵖⵓⵔⵉⵡⵉⵏ ⴷ ⵜⵡⵓⵔⵉⵡⵉⵏ ⵜⵉⵙⵍⵉⵥⵕⵉⵏ (ⵚⵓⵔⵢⴰⴷ » ⵏⵜⵜⴰⵜ ⴷ ⵓⵡⴰⵏⴽ ⴰⵎⵖⵔⴰⴱⵉ, ⴰⵎⵇⵇⵓⵏ ⴰⴷ ⵢⵉⵡⵉ ⴷ ⵅⴼ ⵓⵣⵓⵣⵣⵔ ⵏ ⵓⵙⴰⵔⵓ ⵢⴰⴷ ⴰⵎⴰⵢⵏⵓ ⵉⵖⴰⵡⴰⵙⵏ ⵏⵏⵙ ⵙ ⵡⵓⵏⵜⵉⵍ ⴷ ⵙⵉⵏ ⵉⵣⵎⵣⵏ ⴽⵓ ⵢⴰⵙⵙ ⵙ ⵡⴰⵔⵓⵏⵜⵉ. ⴰⵛⴽⵓ ⵜⴳⴰ ⵜⴰⵏⴰⴼⵓⵜ ⵜⴰⵜⵍⴼⴰⵣⵜ ⵙ ⵜⵉⵖⵔⴰⴷ, ⵔⴰⴷ ⵖⵓⵔⵙ ⵉⵍⵉⵏⵜ ⴽⵔⴰ ⵏ ⵜⵎⵓⴽⵔⵉⵙⵉⵏ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⵏⵏⴰ ⵔⴰⴷ ⵜⵜ ⵢⴰⴷⵊ ⴷⴼⴼⵔ ⵙⵎⵎⵓⵙ ⵏ ⵉⵙⴳⴳⵯⴰⵙⵏ ⴰⴷ ⵜⵣⵔⵉ ⵙⴳ ⵢⴰⵜ ⵜⵎⵓⵖⵍⵉ ⵜⴰⵙⴳⵓⵎⴰⵏⵜ ⵜⴰⵎⴰⴹⵍⴰⵏⵜ ⵏⵏⴰ ⵜⵔⴰ ⵉ ⵉⵅⴼ ⵏⵏⵙ ⵙⴳ ⵜⵉⵣⵡⵉⵔⵉ ⵖⵔ ⵢⴰⵏ ⵡⵓⴷⵎ ⵢⴰⴹⵏ ⴰⴳⴷⵓⴷⴰⵏ ⴰⴼⴰⴷ ⴰⴷ ⵜⵙⵙⴽⵏ ⵢⴰⵜ ⵜⵡⵍⴰⴼⵜ ⵜⴰⵣⴷⴳⴰⵏⵜ ⵙⵔⵙ ⵉⵥⵍⵉⵏ.

ⴷⴼⴼⵔ ⴽⵔⴰ ⵏ ⵜⵎⵓⴽⵔⵉⵙⵉⵏ ⵜⵉⵥⵕⴼⴰⵏⵉⵏ ⵏⵏⴰ ⵖⵉⴼⵙ ⵉⴽⴽⴰⵏ, ⴰⴷ ⵜⵙⵏⴼⵍ ⵜⵎⵙⵙⵓⵔⵜ ⵜⴰⵎⴷⵔⴰⵡⵜ ⵏⵏⵙ ⵜⴰⵎⵣⵡⴰⵔⵓⵜ ⵉⴳⴰⵏ « ⵜⴰⵎⵙⵙⵓⵔⵜ ⵓⵎⵏⵢⵓⵎ ⵉⴼⵔⵉⵇⵉⵢⴰ ⵏ ⵓⵥⵥⵍⵎⴹ » (ⵓⵏⴰ) ⴷ ⵜⵉⵍⵉⴼⵉⵣⵢⵓⵏ ⴰⴼⵔⴰⵏⵙⴰⵡⵉ ⵜⴼ1 ⴷ ⵜⴳⵔⴰⵡⵜ ⵜⴰⴽⴰⵏⴰⴷⵉⵢⵜ « ⴼⵉⴷⵢⵓⵟⵕⵓⵏ » ⴷ ⵜⵎⵙⵙⵓⵔⵜ « ⵙⵓⴼⵉⵔⴰⴷ » ⴰⴷⴷⴰⵢ ⴷ ⵉⵙⵙⴰⵖⵓⵍ ⵓⵡⴰⵏⴽ ⴰⵎⵖⵔⴰⴱⵉ ⵜⴰⵏⴱⴰⴹⵜ ⴳ ⵙⵓⵔⵢⴰⴷ-ⴰⵙⴰⵔⵓ ⵡⵉⵙⵙ ⵙⵉⵏ ⴰⵙⵙ ⵏ 19 ⵢⵓⵏⵢⵓ 1996 ⵙ ⵜⵖⴰⵔⴰⵙⵜ ⵏ ⵜⵓⵙⵖⴰ ⵏ 68% ⵏ ⵔⴰⵙⵍⵎⴰⵍ. ⴰⴷ ⵢⴰⵡⵉ ⵓⵙⵏⴰⵎ ⵏ ⵜⴷⵔⵉⵎⵜ ⵏ ⵜⵎⵙⵙⵓⵔⵜ ⵜⴰⵎⵙⵙⵓⴷⵓⵜ ⵏ ⵓⵙⴰⵔⵓ ⵙ ⵓⵎⴷⵔⴰⵢ ⵏ ⵓⴼⵏⵉⵇ ⵏ ⵢⵉⵡⵙ ⵏ ⵜⵙⵢⴰⴼⵓⵜ ⵜⴰⵙⵍⵉⵥⵕⵜ ⵜⴰⵏⴰⵎⵓⵔⵜ, ⴰⵙⵎⵓⵙⵙⵓ ⵏ ⵓⴳⴰⴷⴰⵣ ⵏ ⵓⵙⵉⵙⵙⵏ ⴳ ⵓⵙⴰⵔⵓ ⴰⵀⵉⵔⵜⵣⵉ ⴰⵏⴰⵎⵓⵔ ⴰⴳⴷⵓⴷⴰⵏ ⵏⵏⴰ ⵢⴰⵖⵓⵍⵏ ⴷⴰ ⵜⵣⵓⵣⵣⵓⵔ ⵙ ⵡⴰⵔⴰⵏⵜⴰⵍ ⴷⵔⵓⵖ ⵅⴼ ⵡⴰⴽⴰⵍ ⴰⴽⴽⵯ ⴰⵏⴰⵎⵓⵔ.

ⴰⵙⵙⴰ, ⴷⴰ ⵉⵙⵙⴽⴰⵔ ⵓⵙⴰⵔⵓ ⵡⵉⵙⵙ ⵙⵉⵏ ⵜⴰⵏⴰⴼⵓⵜ ⵜⴰⵜⵍⴼⴰⵣⵜ ⵜⵉⵙⵙ ⵙⵏⴰⵜ, ⵜⴰⵎⵓ ⴳ ⵓⵎⵢⴰⵏⴰⵡ ⵏ ⵓⵙⵙⴽⵏ ⴰⵜⵍⴼⴰⵣ ⴰⵎⵖⵔⴰⴱⵉ ⵙ ⵓⵢⵏⵏⴰ ⵉⵍⵍⴰⵏ ⴳ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⵏⵏⴰ ⵜⵙⵔⵙ ⵜⵏⴱⴰⴹⵜ ⵉⵎⵙⴰⵙⴰ ⵖⵉⴼⵙ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵣⵎⵣ ⵏ 27 ⵢⵓⵍⵢⵓⵣ 2005. (ⴰⴳⵎ ⴷⴰ - ⵜⴰⵖⵜⵙⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ). ⴷⵉⵖ, ⴰⵙⴰⵔⵓ ⵚⵓⵕⵢⴰⴷ-ⴰⵙⴰⵔⵓ ⵡⵉⵙⵙ ⵙⵉⵏ ⴷⴰ ⵉⵣⵓⵣⵣⵓⵔ ⵢⴰⵜ ⵜⵏⴰⴼⵓⵜ ⵜⴰⵏⵣⵡⴰⵢⵜ ⵜⴰⵎⴰⵜⴰⵢⵜ ⴳ ⵍⵍⴰⵏ ⵉⵙⴰⵔⴰⴳⵏ ⵏ ⵓⵥⴰⵡⴰⵏ ⴷ ⵉⵏⵖⵎⵉⵙⵏ ⴷ ⵉⵖⴰⵡⴰⵙⵏ ⵉⵥⵍⵉⵏ ⵙ ⵓⵢⵏⵏⴰ ⵔⴰⵏ ⵉⵔⵔⵉⵎⵏ ⴷ ⵓⵢⵏⵏⴰ ⵉⵙⴷⵓⵙⵏ ⵜⵉⵏⵓⵔⵣⵉⵡⵉⵏ ⵏ ⵉⵎⵥⵢⴰⵏⵏ ⴷ ⵓⵥⴰⵡⴰⵏ ⴰⵎⴰⵢⵏⵓ ⴷ ⵜⴷⵍⵙⴰ ⴷ ⵓⵢⵏⵏⴰ ⵉⵣⴷⵉⵏ ⴷ ⵜⵔⴰⵎⵓⵙⵉⵏ ⴷ ⵜⵓⵏⵏⵓⵏⵜ.