ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 05 ⵉⴱⵔⵉⵔ 2022 ⴳ ⵓⵙⵖⵉⵎ ⵏ ⵜⵎⵔⵙⵍⵜ ⵢⴰⵏ ⵡⴰⵏⵙⴰⵢ ⵏ ⵓⵙⴳⵎⴹ ⵏ ⵓⵍⵓⴳ ⴰⵎⴰⵢⵏⵓ ⵏ ⵡⴰⴳⴳⵯⴰⵜⵏ ⵏ ⵕⴰⴷⵢⵓ ⵉⵎ ⵉⴼ ⵉⵎ. ⵢⵓⵙⴰ ⴷ ⵓⵍⵓⴳ ⴰⵎⴰⵢⵏⵓ ⴰⴷ ⵏ ⵡⴰⴳⴳⵯⴰⵜⵏ ⴳ ⵓⵙⴰⵜⵉ ⵏ ⵓⵙⵎⴰⵢⵏⵓ ⵙⴳ ⵖⵓⵔ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵏ ⵜⵓⵔⴰⴳⵜ ⵏ ⵓⵙⵡⵓⵔⵉ ⵏ ⵕⴰⴷⵢⵓ ⵉⵎ ⵉⴼ ⵉⵎ ⵏⵏⴰ ⵉⵎⴷⴰⵏ.

ⵜⴻⵜⵜⵓⵙⴽⵔ ⵜⵎⵙⴰⵔⵜ ⴰⴷ ⵙ ⵢⵉⵍⵉ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ, ⴰⵏⵎⵀⴰⵍ ⴰⵎⴰⵜⴰⵢ, ⵉⵏⵎⵀⴰⵍⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⴷⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⵔⵜ ⵕⴰⴷⵢⵓ ⵉⵎ ⵉⴼ ⵉⵎ, ⵜⴰⵎⵙⵙⵓⵔⵜ ⵏⵏⴰ ⵎⵓ ⵖⵓⵔ ⵜⵍⵍⴰ ⵜⵓⵔⴰⴳⵜ.

ⴰⵍⵓⴳ ⴰⵎⴰⵢⵏⵓ ⵏ ⵡⴰⴳⴳⵯⴰⵜⵏ ⵏ ⵕⴰⴷⵢⵓ ⵉⵎ ⵉⴼ ⵉⵎ ⵢⵓⵎⵥ ⴳ ⵜⵖⴰⵔⴰⵙⵜ ⵏⵏⵙ ⵏ ⵜⵏⴰⴼⵓⵜ ⵜⴰⵏⵣⵡⴰⵢⵜ ⵜⴰⵎⴰⵜⴰⵢⵜ ⵏ ⵜⵏⵎⴰⵍⴰⵢⵜ, ⴷ ⵜⵓⴽⴽⵉ ⵏ ⵉⵖⴰⵡⴰⵙⵏ ⵉⵥⵍⵉⵏ ⵉ ⴽⵓ ⵜⴰⵎⵏⴰⴹⵜ ⵏⵏⴰ ⵢⵉⵡⴹ ⵓⵏⵣⵡⴰⵢ ⴰⴷ. ⴷⴰ ⵉⵙⴷⵓⵙ ⴷⵉⵖ ⵜⵉⵎⵙⵜⴳⴳⴰⵔ ⵏ ⵕⴰⴷⵢⵓ ⵉⵎ ⵉⴼ ⵉⵎ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵖⴰⵔⴰ ⵏ ⵉⵖⴰⵡⴰⵙⵏ, ⵙ ⵓⵢⵏⵏⴰ ⵉⵜⵜⵓⵔⵏⴰⵏ ⴳ 2015 ⴷ 2016 ⴳ ⵓⵍⵓⴳⵏ ⵓⵟⵟⵓⵏ 77-03 ⵉⵣⴷⵉⵏ ⴷ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⴳ ⵓⵍⵓⴳⵏ ⵓⵟⵟⵓⵏ 11.15 ⵉⵣⴷⵉⵏ ⴷ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.

ⴳ ⵡⴰⵏⵙⴰⵢ ⴰⴷ, ⵜⵙⵙⵉⵔⵎ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵜⴰⵟⵉⴼⴰ ⴰⵅⴰⵔⴱⴰⵛ, ⴰⵣⵣⵉⴳⵣ ⵉⵖⵓⴷⴰⵏ ⵉ ⵕⴰⴷⵢⵓ ⵉⵎ ⵉⴼ ⵉⵎ ⵜⵉⴼⵉ ⴷ ⵓⵥⵥⵉⴹⵕ ⵏⵏⵙ ⴷ ⵓⵙⵎⵓⵙⵙ ⵏⵏⵙ ⴰⵎⵎ ⵉⵎⵡⵓⵔⴰ ⵉⵏⴰⵎⵓⵔⵏ ⴳ ⵓⵣⵎⵣ ⵏ ⵜⴰⵙⵙⴰⵙⵜ ⵏ ⵓⴽⵓⴼⵉⴷ 19. ⵜⵙⵙⵉⵔⵎ ⴷⵉⵖ ⵉ ⵕⴰⴷⵢⵓ ⵉⵎ ⵉⴼ ⵉⵎ, ⵏⵏⴰ ⴷ ⵉⵍⵓⵍⴰⵏ ⴳ ⵜⵙⵓⵜⴰ ⵜⴰⵎⵣⵡⴰⵔⵓⵜ ⵏ ⵜⵓⵔⴰⴳⵉⵏ ⵏⵏⴰ ⵉⴼⴽⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⴳⴳⵯⴰⵙ ⵏ 2006, ⴰⴷ ⵉⵙⵙⵎⵖⵓⵔ ⵉⵔⵎ ⵏⵏⵙ ⴰⴼⴰⴷ ⴰⴷ ⵉⵙⵅⵉⵜⵔ ⵜⴰⵏⴰⴼⵓⵜ ⴳ ⵓⴱⴰⵖⵓⵔ ⵏ ⵉⵏⵎⵓⵔⵉⵏ ⵉⵎⵙⵙⴼⵍⵉⴷⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵖⴰⵔⴰ ⵏ ⵜⵓⴽⴽⵉ ⴷ ⵜⵏⵎⴰⵍⴰⵢⵜ ⵜⴰⴷⵍⵙⴰⵏⵜ ⴷ ⵜⵊⵉⵢⵓⴳⵔⴰⴼⵉⵢⵜ.

ⵙⴳ ⵜⵙⴳⴰ ⵏⵏⵙ, ⵉⵙⵙⵎⵖⵓⵔ ⵎⴰⵙⵙ ⴽⴰⵎⴰⵍ ⵍⴰⵃⵍⵓ, ⴰⵙⵍⵡⴰⵢ ⴰⵏⵎⵀⴰⵍ ⴰⵎⴰⵜⴰⵢ ⵏ ⵕⴰⴷⵢⵓ ⵉⵎ ⵉⴼ ⵉⵎ ⵜⵉⴼⵉ, ⵙ ⵜⵖⴰⵔⴰ ⵏ ⵉⵣⴷⴰⵢⵏ ⵉⵎⵔⵙⴰⵍⵏ ⵏⵏⴰ ⵉⵍⵍⴰⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵉⵎⵡⵓⵔⴰ ⴰⴽⴽⵯ ⵉⵙⵍⵉⵥⵕⵏ ⴳ ⵉⵍⵍⴰ ⵕⴰⴷⵢⵓ ⵉⵎ ⵉⴼ ⵉⵎ ⵜⵉⴼⵉ ⴳ ⵓⵡⵜⵜⴰⵙ ⵏ ⵓⵙⵡⵓⵔⵉ ⴳ ⵓⵙⴷⵓⵙ ⵏ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵏⴰⵎⵓⵔⵜ.

ⵢⴰⴷⴷ ⴷⵉⵖ ⵅⴼ ⵓⵙⵓⵖⵏ ⵏ ⵉⵎⴰⵙⴰⵢⵏ ⴷ ⵉⵎⴰⵡⴰⵙⵏ ⵏ ⵕⴰⴷⵢⵓ ⵄⵎ ⵉⴼ ⵉⵎ ⴳ ⵜⴳⵎⵉ ⵏ ⵓⵙⵖⵉⵡⵙ ⵏ ⵜⵏⵎⴰⵍⴰ ⴷ ⵜⵖⴰⵔⴰ ⴰⴼⴰⴷ ⴰⴷ ⵜⵔⴰⵔ ⵅⴼ ⵉⵏⵓⵔⵣⵏ ⵏ ⵉⵏⵎⵓⵔⵉⵏ ⴷ ⵡⵉⵏ ⵡⴰⵎⵓⵏ.