ⴳ ⵡⴰⴽⵓⴷ ⴳ ⵉⵙⵙⵏⵜⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵏ ⵉⵎⵉⵔ ⵏ ⵓⵎⴷⵉⵡⵍ ⴰⴼⴰⴷ ⴰⴷ ⵉⵙⵎⴰⵢⵏⵓ ⵜⵓⵔⴰⴳⵉⵏ ⵏ ⴽⵉⴳⴰⵏ ⵏ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ, ⵉⴳⴰ ⵓⴱⵖⵉⵔ ⴰⴷ ⵏⴱⴹⵓ ⴷ ⵜⴰⵏⵏⴰⵢⵜ ⵜⴰⴳⴷⵓⴷⴰⵏⵜ ⴽⵔⴰ ⵏ ⵢⵉⴳⵉⵜⵏ ⵉⵣⴷⵉⵏ ⴷ ⵓⵣⵣⵉⴳⵣ ⵏ ⵜⵎⵓⵖⵍⵉ ⵜⴰⵏⵣⵡⴰⵢⵜ ⵜⴰⵎⵖⵔⴰⴱⵉⵢⵜ ⴳ 15 ⵏ ⵉⵙⴳⴳⴰⵙⵏ ⵏ ⵓⵙⴷⵔⴼⵉ.

ⵎⴽ ⵜⵓⵢⴰⵙⵙⵏ ⵖⵓⵔ ⴽⵓ ⵢⴰⵏ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵏ ⵓⵙⵍⵉⵥⵕ ⴳ ⵜⵓⵚⴽⴰ ⵏ ⵓⵏⴳⵔⴰⵡ ⴰⵖⵎⵙⴰⵏ ⴰⵏⴰⵎⵓⵔ ⵉⵕⵡⴰⵏ, ⵀⴰⵏ ⴰⵜⵉⴳ ⴰⵎⵔⵏⵓ ⵏ ⵓⵙⴽⴰⵏ ⴰⵙⵍⵉⵥⵕ ⵓⵙⵍⵉⴳ ⵉⵇⵇⴰⵏ ⵏ ⴰⴷ ⵜⵜⵓⵢⴰⵙⵙⵏ ⵜⵜⵓⵙⴷⵓⵙ ⵓⴳⴰⵔ.

ⵉⵜⵜⵓⵢⴰⵙⵙⵏ ⴷⵉⵖ ⵉⵙⴷ ⵙ ⵜⴼⴰⴷⴰ ⵏ ⵜⵎⵥⵍⵉⵢⵉⵏ ⴷ ⵓⵣⵣⵉⴳⵣ ⵏ ⵓⵏⴳⵔⴰⵡ ⵏⵏⵖ ⴰⵙⵍⵉⵥⵕ, ⴰⴷⴷⴰⴷ ⵏ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⴰⵢⴷ ⴰⵖ ⵉⵜⵜⴰⴷⵊⴰⵏ ⴰⴷ ⵏⵙⵇⵙⴰ ⵏⵉⵙⵉⵏ ⵉⵔⵎ ⵏ ⵓⵙⴷⵔⴼⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵖⵜⵙⵜ ⵜⴰⵙⵔⵜⴰⵏⵜ ⵜⴰⵙⵟⵕⴰⵜⵉⵊⵉⵜ ⵏⵏⴰ ⵉⵜⵜⵓⵢⴰⵙⵉⵏ ⴳ ⵓⵎⵏⴰⴹ ⵏ ⵓⵙⵎⵓⵜⵜⵢ ⴰⴷⵉⵎⵓⵇⵕⴰⵟⵉ ⵏ ⵜⵎⵓⵔⵜ. ⵜⴰⵏⵣⵡⴰⵢⵜ ⵜⵓⵙⵍⵉⴳⵜ ⵜⴳⴰ ⵓⴷⵎ ⴰⵅⴰⵜⴰⵔ ⵏ ⵜⵎⵓⵖⵍⵉ ⵜⴰⵖⵎⵙⴰⵏⵜ ⵜⴰⵎⵖⵔⴰⴱⵉⵢⵜ  ⵏⵏⴰ ⵉⵜⵜⵓⵙⴷⵔⴼⵉⵏ.

ⵙ ⵓⵢⴰ, ⵙⴳ 2006, ⴰⵙⴰⴽⵓⴷ ⵏ ⵜⵓⴽⴽⵉ ⵏ ⵜⵓⵔⴰⴳⵉⵏ ⵜⵉⵎⵣⵡⵓⵔⴰ, ⵓⴷⴼⵏⵜ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⴳ ⵜⵓⴷⵔⵜ ⵏ ⴽⵓ ⵢⴰⵙⵙ ⵏ ⵉⵎⵖⵔⴰⴱⵉⵢⵏ ⴷ ⵡⵉⵏⵏⴰ ⴰⴽⴽⵯ ⵉⵣⴷⵖⵏ ⴳ ⵜⵎⵓⵔⴰ ⵢⴰⴹⵏ. ⵜⵉⵏⵣⵡⴰⵢⵉⵏ ⴰⴷ, ⵣⴷⵉⵏⵜ ⵢⵏ ⵓⵥⵟⵟⴰ ⵉⴷⵓⵙⵏ, ⵙ ⵓⴱⵔⵉⴷ ⵏ ⵍⴰⵏⵜⵉⵔⵏⵉⵜ, ⴰⴽⴷ ⵉⵎⵣⴷⴰⵖ ⵉⴳⴳⵓⵜⵏ ⵏ ⴱⵕⵕⴰ, ⴽⵉⴳⴰⵏ ⵏ ⵉⵣⴷⴰⵢⵏ.

ⴳ 15 ⵏ ⵉⵙⴳⴳⵯⴰⵙⵏ ⵏ ⵓⵙⴷⴼⵔⴼⵉ, ⵜⵍⵓⵍⴰ ⴷ ⵢⴰⵜ ⵜⵎⵓⵖⵍⵉ ⵜⴰⵏⵣⵡⴰⵢⵜ ⵜⴰⵎⴰⵢⵏⵓⵜ, ⵜⵎⵢⴰⵏⴰⵡ ⴰⵔ ⵜⵙⵙⴽⴰⵏ ⴽⵉⴳⴰⵏ ⵏ ⵜⴷⵉⵏⴰⵎⵉⵢⵜ ⴷ ⵜⵥⴹⵕⵜ ⵎⵇⵇⴰⵔ - ⵛⵛⵉⵍ ⵉ ⵜⴰⵏⵏⴰⵢⵜ ⵏⵏⵖ ⴷ ⵜⵎⵙⴰⴳⴰⵔⵜ ⵏⵏⵖ ⵜⴰⵎⵓⵏⴰⵏⵜ ⵏ ⴰⴷ ⵏⴰⴽⵣ ⴰⵢⴰⴷ - ⵜⵙⵓⵍ ⵜⵅⴰⵜⵔ ⵜⵙⴳⴰ ⵏ ⵓⵙⵍⵍⵡⵓ, ⵏ ⵓⵙⵖⵓⴷⵓ ⴷ ⵓⵙⵏⵓⵍⴼⵓ ⴳ ⵢⵉⴳⵔ ⴰⴷ.

ⵢⴰⵏ ⵓⵙⴽⴰⵏ ⴰⵏⵣⵡⴰⵢ ⵉⴼ-ⵉⵎ ⴳ ⵓⵣⵉⴳⵣ

ⴳ ⵜⴳⵉⵔⴰ ⵏ 2021, ⵜⴰⵏⴰⴼⵓⵜ ⵜⴰⵏⵣⵡⴰⵢⵜ ⵜⴰⵏⴰⵎⵓⵔⵜ ⵜⵓⵙⵍⵉⴳⵜ ⵓⵙⵉⵏⵜ 13 ⵏ ⵉⵎⵙⵡⵓⵔⴰ ⵉⵜⵜⴷⵉⵢⵢⴰⵣⵏ 20 ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵉⴼ-ⵉⵎ, ⴷⵉⴳⵙⵏⵜ 7 ⵏ ⵜⵏⵣⵡⴰⵢⵉⵏ ⵙ ⵜⴷⵓⵍⵉ ⵜⴰⵏⴰⵎⵓⵔⵜ, 4 ⵏ ⵜⵏⵣⵡⴰⵢⵉⵏ ⵙ ⵜⴷⵓⵍⵉ ⵏ ⴽⵉⴳⴰⵏ ⵏ ⵜⵎⵏⴰⴹⵉⵏ, 2 ⵏ ⵉⵥⴹⵡⴰⵏ ⵏ 8 ⵏ ⵜⵏⵣⵡⴰⵢⵉⵏ ⵜⵏⵎⵏⴰⴹⵉⵏ, 1 ⵏ ⵜⵏⵣⵡⴰⵢⵜ ⴳ ⴽⵉⴳⴰⵏ ⵏ ⵉⴷⵖⴰⵔⵏ ⵔⵏⵓ ⵢⴰⵜ ⵜⴰⴷⵍⴰ ⵏ 11 ⵏ ⵜⵏⵣⵡⴰⵢⵉⵏ ⵉⵣⵓⵣⵣⵓⵔⵏ ⵅⴼ ⵍⴰⵏⵜⵉⵔⵏⵉⵜ. ⵜⵉⵏⴰⴼⵓⵜⵉⵏ ⴰⴷ ⵜⵓⵙⵍⵉⴳⵉⵏ, ⵉⴷⵍⴰⵏ ⵢⴰⵜ ⵜⵙⵉⵍⴰ ⵜⴰⵏⵙⴳⵓⵎⵜ, ⴰⵎⵓⵏ , ⵉⵏⵖⵎⵉⵙⵏ, ⴰⵥⴰⵡⴰⵏ, ⵜⵓⵏⵏⵓⵏⵜ, ⵜⴰⴷⴰⵎⵙⴰ, ⵜⴰⴷⵍⵙⴰ, ⵜⴰⴽⵔⵣⴰ, ⵜⴰⵥⵓⵕⵉ ⵏ ⵜⵓⴷⵔⵜ, ⴰⵜⴳ., ⴷⴷⴰⵏ ⴷ ⴰⴷ ⴽⵎⵎⵍⵏⵜ ⴰⵙⴽⴰⵏ ⴰⴳⴷⵓⴷⴰⵏ ⴳ ⵍⵍⴰⵏⵜ 5 ⵏ ⵜⵏⴰⴼⵓⵜⵉⵏ ⵜⵏⵣⵡⴰⵢⵉⵏ ⵉⴷⵍⴰⵏ ⵜⴰⵎⵓⵔⵜ ⴷ 11 ⵏ ⵜⵏⴰⴼⵓⵜⵉⵏ ⵜⵉⵏⵎⵏⴰⴹⵉⵏ.

ⴳ ⵓⵙⵡⵉⵔ ⵏ ⵡⴰⴷⴰⴼ ⵖⵔ ⵜⵏⵣⵡⴰⵢⵜ, ⵜⵓⴷⵔⵜ ⵏ ⵓⵏⵎⵓⵔⵉ ⴰⵎⵖⵔⴰⴱⵉ ⵉⵙⵡⵓⵔⵉⵏ ⵜⵉⵏⵣⵡⴰⵢⵉⵏ ⵜⴻⵜⵜⵙⵏⴼⵍ ⴽⵉⴳⴰⵏ ⵙⴳ ⵓⴽⵓⴷ ⵏ ⵜⵕⵓⵥⵉ ⵏ ⵜⵓⵙⵙⵔⴰ ⵏ ⵓⴽⵡⴰⵛ ⵏ ⵓⵡⴰⵏⴽ ⵖⴼ ⵓⵙⵍⵉⵥⵕ ⴷ ⵓⵙⴷⵔⴼⵉ ⵏ ⵢⵉⴳⵔ ⴰⴷ. ⴰⵙⵙⴰ, ⵅⴼ ⵓⴳⴰⵔ ⵏ 80% ⵏ ⵜⵎⵓⵔⵜ ⵜⴰⵏⴰⵎⵓⵔⵜ, ⵉⵎⵙⵙⴼⵍⵉⴷⵏ ⵖⵓⵔⵙⵏ ⴰⵙⵜⴰⵢ ⴳⵔ 11 ⴷ 20 ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵉⴼ-ⵉⵎ, ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ. ⴳ ⵜⵎⵏⴰⴹⵉⵏ ⵢⴰⴹⵏ ⵓⵔ ⵡⴰⵍ ⵉⴷⵍⵉⵏ, ⴰⵙⴽⴰⵏ ⴰⵏⵣⵡⴰⵢ ⵉⵖⵉⵢ ⴰⴷ ⵢⴰⵡⴹ ⴰⵔ 10 ⵏ ⵜⵏⴰⴼⵓⵜⵉⵏ.

ⴰⴼⴰⴷ ⴰⴷ ⵉⵅⵉⵜⵔ ⵓⴱⵖⵓⵔ ⵏ ⵓⵙⴷⵔⴼⵉ ⵏ ⵜⵎⵣⴰⵣⵉⵏ ⵉ ⵉⵏⵎⵓⵔⵉⵏ ⴰⴽⴽⵯ, ⴰⵙⵎⵖⵔ ⵏ ⵜⴷⵓⵍⵉ ⵜⴰⵎⵓⵔⴰⵏⵜ ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵉⵍⵍⴰ ⵉⵣⵣⵉⴳⵉⵣ ⴽⵓ ⵢⴰⵙⵙ ⵙ ⵜⵎⵙⵙⵓⵎⴰⵏⵜ ⵏⵏⴰ ⵉⵜⵜⴳⴳⴰ ⵉⴳⵊⴷⵉ ⴰⴳⴷⵓⴷⴰⵏ ⴷ ⵉⵎⵡⵓⵔⴰ ⵓⵙⵍⵉⴳⵏ ⴳ

 

ⵓⵢⵏⵏⴰ ⵉⵣⴷⵉⵏ ⴷ ⵓⵙⵖⵓⴷⵓ ⵏ ⵉⵥⴹⵡⴰⵏ ⵏ ⵓⵣⵓⵣⵣⵔ. ⴳ ⵜⵙⴳⴰ ⵢⴰⴹⵏ, ⴰⵎⴰⵡⴰⵙ ⴰⴷⵉⵏⴰⵎⵉ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⵔⴰⴷ ⵉⵙⵙⴱⵖⵓⵔ ⴰⵙⴷⴷⵉ ⵏ ⵉⵙⵏⴰⴳⴰⵔⵏ ⴰⵏⴰⵎⵓⵔ ⵏⵏⴰ ⵏ ⵉⵇⵇⴰⵏⵏ ⵉ ⵓⵙⵖⵓⴷⴰ ⵢⴰⴷ.

ⵙ ⵓⵙⵓⵖⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵣⵎⵎⴰⵔ ⵏ ⵉⵎⵡⵓⵔⴰ, ⴽⵉⴳⴰⵏ ⵏ ⵡⴰⵍⴰⵢⵏ ⴰⵢ ⵜⵜⵓⵙⴽⵔⵏ ⴳ ⵓⵖⴰⵡⴰⵙ ⵏ ⵓⵙⵓⵎⵓ ⴰⵎⵓⵔⴰⵏ ⵏ ⵜⴷⵓⵍⵉ ⵜⴰⵏⵣⵡⴰⵢⵜ ⵜⵓⵙⵍⵉⴳⵜ. ⴳⵔ 2007 ⴷ 2021, ⵉⴼⴽⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ 491 ⵏ ⵉⵙⵏⴰⴳⴰⵔⵏ ⵉ ⵓⵣⵓⵣⵣⵔ ⵏ ⵜⵏⴰⴼⵓⵜⵉⵏ ⵜⵉⵏⵣⵡⴰⵢⵉⵏ ⵜⵓⵙⵍⵉⴳⵉⵏ.

ⵙ ⵜⵉⴳⴰⵡⵜ ⵏⵏⵙ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵉⵏⵣⵡⴰⵢⵏ, ⵢⵓⵙⵉ ⴰⵀⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴰⵖⵜⵙⵜ ⵏ ⵜⵎⴷⵔⴰⵡⵜ ⵏ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⴳ ⵜⵙⵎⵉⴳⵍⵉⵏ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ. ⵜⴰⵎⴷⵔⴰⵡⵜ ⵏ ⵜⵏⵣⵡⴰⵢⵉⵏ ⴳ ⵜⵣⵎⵎⴰⵔ ⵜⵉⵏⴰⵎⵓⵔⵉⵏ ⵏ ⵓⵎⵢⴰⵡⴰⴹ ⴰⴳⴷⵓⴷⴰⵏ ⴳ ⵓⵎⵏⵏⵓⵖ ⵎⴳⴰⵍ ⴰⵟⵟⴰⵏ ⵏ ⴽⵓⴼⵉⴷ ⵉⴳⴰ ⵢⴰⵏ ⵓⵎⴷⵢⴰ ⴳⵔ ⵡⵉⵢⴰⴹ ⴳ ⵢⵉⴳⵔ ⵏ ⵓⵎⵢⴰⵡⴰⵙ. ⵜⴰⵎⵙⵙⴰⵏⵓⵏⵜ ⵏ ⵜⴷⵓⵍⵉ ⵜⴰⵖⵎⵙⴰⵏⵜ ⵏ ⵉⵙⵜⴰⵢⵏ ⵉⵎⴰⵜⴰⵢⵏ ⵏⵏⴰ ⵜⵙⵏⵎⴰⵍⴰ ⵜⵎⵓⵔⵜ ⵏⵏⵖ ⴳ 8 ⵛⵜⴰⵎⴱⵉⵔ ⴷⴷⵖ ⴰⵎⴳⴳⴰⵔⵓ, ⵉⵙⴼⴰⵡ ⴷⵉⵖ ⵜⵉⵍⴰⵍⵜ ⵏ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⴳ ⵜⵏⴽⵔⴰ ⵙ ⵓⵡⵏⵏⵉ ⵏ ⵜⵎⴰⴳⵓⵜ ⵏ ⵜⴰⵏⵏⴰⵢⵜ.

ⴰⴷⴰⵙ ⴰⴽⴷ ⵉⵏⵎⵓⵔⵉⵏ

ⵉⵡⴹⵏⵜ ⵜⵏⵣⵡⴰⵢⵉⵏ ⵜⵓⵙⵍⵉⴳⵉⵏ ⵜⵉⵎⵖⵔⴰⴱⵉⵢⵉⵏ ⴰⴷ ⵚⴽⵓⵏⵜ ⵢⴰⵏ ⵓⵣⴷⴰⵢ ⵏ ⵡⴰⴷⴰⵙ ⴰⵅⴰⵜⴰⵔ ⴷ ⵓⵣⴷⴰⵢ ⴰⵏⵙⵏⴽⵛⴰⵎ ⴰⴽⴷ ⵉⵏⵎⵓⵔⵉⵏ ⵙ ⵓⵕⵥⵥⵓⵎ ⵏ ⵓⵡⵏⵏⵉ ⵏ ⵉⵎⵢⴰⵏⴰⵡⵏ ⴰⴽⴽⵯ : ⵓⵜⵍⴰⵢⵏ, ⵉⵎⵓⵔⴰⵏ, ⴰⵢⵍⴰⵏ, ⵉⵏⴰⵎⵓⵏⵏ, ⵉⴷⵍⵙⴰⵏⵏ, ⴰⵜⴳ.

ⵉⵙⵓⵖⵏⵏ ⵏⵏⵙⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵜⵏⴽⵔⴰ ⵙ ⵓⵙⵢⴰⴼⵓ ⵏ ⵉⵡⵏⵏⵉⵜⵏ ⵉⴷⵍⵙⴰⵏⵏ, ⵙ ⵓⵢⵏⵏⴰ ⵉⵍⵍⴰⵏ ⴳ ⵉⵍⵓⴳⵏⵏ ⵏ ⵡⴰⴳⴳⵯⴰⵜⵏ ⵏⵏⵙⵏ, ⵓⴷⵊⵊⴰⵏ ⵙ ⵓⵎⴷⵢⴰ ⴰⴷ ⵙⵎⵓⵙⵙⵏ ⵉⴳⵔ ⵏ ⵜⵎⴳⵓⵔⵉ ⵜⴰⵥⴰⵡⴰⵏⵜ ⵜⴰⵏⴰⵎⵓⵔⵜ, ⴷ ⵓⵙⵍⵍⵡⵓ ⴷ ⵜⴰⵎⵓⵏⵜ ⵏ ⵉⵏⴰⵥⵓⵕⵏ ⵉⵎⴰⵢⵏⵓⵜⵏ ⴷ ⵜⵍⴰⵍⵉⵜ ⵏ ⵜⵔⴳⴳⵯⵉⵏ ⵜⵉⵥⴰⵡⴰⵏⵉⵏ ⵜⵉⵎⵙⵏⵓⵍⴼⴰ ⴷ ⵜⵉⵏⵏⴰ ⵖⵔ ⴷⴰ ⵜⵜⵇⵇⵍⵏ ⵉⵄⵔⵔⵉⵎⵏ.

ⵎⴰⵛⴰ ⵎⵇⵇⴰⵔ ⴰⴽⴽⵯ ⴷ ⵉⵎⵄⵉⵏⵏ ⴰⴷ, ⴷ ⵡⴰⵍⴰⵢⵏ ⴰⴷ ⴳ ⵓⴱⴰⵖⵓⵔ ⵏ ⵡⴰⵎⵓⵏ ⴷ ⵉⵏⵎⵓⵔⵉⵏ, ⵜⵉⴳⵎⵉ ⵏ ⵓⵙⴽⴰⵏ ⴰⵏⵣⵡⴰⵢ ⵓⵙⵍⵉⴳ ⵉⵜⵜⵓⴽⵔⴼ ⵙ ⴽⵉⴳⴰⵏ ⵏ ⵉⵎⵙⴽⴰⵔⵏ. ⵜⵉⵎⵓⴽⵔⵉⵙⵉⵏ ⵜⵉⴷⴰⵎⵙⴰⵏⵉⵏ ⵢⴰⴹⵏ ⵉⵣⴷⵉⵏ ⴷ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵙⵙⴽⵏⵏⵜ ⴰⵙⵙ ⵢⴰⴹⵏ, ⴷ ⵉⵏⵖⴷⵏ ⵉⴳⴳⵓⵜⵏ ⴳ ⵢⵉⴳⵔ ⵏ ⵜⵏⵣⵡⴰⵢⵜ ⵜⵓⵙⵍⵉⴳⵜ ⴳ ⵜⵎⵓⵔⵜ ⵏⵏⵖ.

ⵜⵉⴳⵎⵉ ⵜⴰⵏⵎⵔⵉⵜ

ⴰⵖⴰⵡⵍ ⴰⴷⴰⵎⵙⴰⵏ ⵉⵍⵍⴰⵏ ⴳ ⵢⵉⴳⵔ ⴰⴷ, ⴷⴰ ⵢⴰⵖ ⵉⵇⵇⴰⵔ ⴰⴷ ⵏⵙⵎⵖⵓⵔ ⴰⵙⵡⵉⵔ ⴰⵣⵣⵓⵍⴰⵏ ⴷ ⵓⵙⵔⵔⵓⵙ ⵏ ⵉⵏⴱⴰⴹⵏ ⵉⴳⴷⵓⴷⴰⵏⵏ ⴰⴳⵓⵏⵙ ⵏ ⵢⴰⵜ ⵜⵎⵓⵖⵍⵉ ⵜⴰⴳⵣⵍⴰⵏⵜ, ⵜⴰⵏⴰⵎⵎⴰⵙⵜ ⴷ ⵜⵉⵏ ⵡⴰⴽⵓⴷ ⵉⴳⴳⵓⵜⵏ ⴰⴼⴰⴷ ⴰⴷ ⵏⵎⵓⵏ ⴷ ⵉⵙⵏⵉⴼⵉⵍⵏ ⵉⵎⵓⵟⵟⵓⵏⵏ ⵏ ⵜⵎⵙⵙⵏⵜⵉⵢⵉⵏ ⵏ ⵢⵉⴳⵔ ⴷ ⵜⵏⴽⵔⴰ ⵙ ⵡⴰⵏⴰⵡ ⴰⴷⴰⵎⵙⴰⵏ ⵏⵏⵙⵏⵜ.

ⵜⴰⵎⵓⵏⵜ ⴰⴷ ⵜⴰⴳⴷⵓⴷⴰⵏⵜ ⵉⴳⴰⵏ ⵢⴰⵜ ⵜⵣⵎⵔⵜ ⵏ ⵜⵓⵚⴽⴰ ⵏ ⵓⵏⴳⵔⴰⵡ ⴰⵖⵎⵙⴰⵏ ⴰⵎⵖⵔⴰⴱⵉ ⵉⵊⵊⵉⵏ ⴰⵔ ⵉⵜⵜⵎⵣⴰⵣⵣⴰⵍ, ⵉⴳⴰ ⴷⵉⵖ ⵢⴰⵜ ⵜⵎⵙⴽⴰⵔⵜ ⵏ ⵜⵙⵓⵍⴰⵏⵜ ⵏ ⵜⵏⴼⵔⵓⵜⵏ ⵜⵉⴷⵙⵍⴰⵏⵉⵏ ⵏ ⵢⵉⵔⵎ ⵏ ⵓⵙⴷⵔⴼⵉ ⵏ ⵜⵎⵙⵙⵏⵜⵉⵢⵉⵏ ⴷ ⵜⵉⴷⵜ ⵏ ⵜⵍⴻⵍⵍⵉ ⵏ ⵜⵉⵔⵔⴰ ⵉ ⵜⵏⵣⵡⴰⵢⵉⵏ ⵏⵏⴰ ⵎⵉ ⵙⵙⴼⵍⵉⴷⵏ ⵙⵉⵏ ⵉⵎⵖⵔⴰⴱⵉⵢⵏ ⵙⴳ ⴽⵕⴰⴹ, ⵙ ⵉⵣⵡⵉⵍⵏ ⵏ 2021 ⵏⵏⴰ ⵜⵙⵙⵣⵔⴳ ⵡⴰⵎⵎⴰⵙ ⴰⴳⵔ-ⴰⵣⵣⵓⵍⴰⵏ ⵏ ⵓⵙⵇⵇⵓⵍ ⵏ ⵓⵙⵙⴼⵍⴷ ⴰⵏⵣⵡⴰⵢ. ⵜⴳⴰ ⴰⵢ ⴳⴰⵏ ⴰⵙⴼⵍⵙ ⴰⵎⵢⵓⴼ ⵏⵏⴰ ⵏⵖⵉⵢ ⴰⴷ ⵏⴼⴽ ⵉ ⵜⵏⵣⵡⴰⵢⵉⵏ ⵉⵍⵍⴰⵏ ⴷ ⵜⵉⵏⵏⴰ ⵔⴰⴷ ⵉⵍⴰⵍ ⵉⵎⴰⵍ, ⴰⵛⴽⵓ ⴰⵙⴷⵔⴼⵉ ⵏ ⵜⵎⵣⴰⵣⵉⵏ ⵉⴳⴰ ⵢⴰⵏ ⵓⵙⵜⴰⵢ ⴰⴷⵉⵎⵓⵇⵕⴰⵟⵉ ⵏⵏⴰ ⴳ ⵓⵔ ⵉⵍⵍⵉ ⵡⵓⵖⵓⵍ.

ⴰⵏⴰⵡ ⴰⴷⴰⵎⵙⴰⵏ ⵏ ⵜⵏⵣⵡⴰⵢⵜ ⵜⴰⴽⵍⴰⵙⵉⴽⵉⵜ, ⵢⵓⵜⴳⵏ ⵅⴼ ⵓⵙⵥⵕⴼ ⵙ ⵓⵙⵙⵓⵙⵏ, ⵜⵍⵍⴰ ⴳ ⵓⴱⵔⵉⴷ ⵉⵇⵇⵏⵏ. ⵜⵓⴼⴰ ⴳⴰⵔ ⵜⴰⵣⵎⵔⵜ ⵏⵏⵙ ⴷⴰⵜ ⵓⴳⴰⴷⴰⵣ ⴰⵙⵙⵓⵙⴰⵏ ⵏⵏⴰ ⵜⵙⵙⴽⵔ GAFAM ⴷ ⵏⵏⴰ ⵉⵇⵇⴰⵏ ⴰⴷ ⵎⵓⵏⵏⵜ ⵙ ⵓⵖⴰⵡⵍ ⴷ ⵉⵙⵏⵉⴼⵉⵍⵏ ⵏ ⵜⵖⴰⵔⴰⵙⵉⵏ ⵏ ⵓⵙⵙⵎⵓⵔ ⵏ ⵓⵙⵏⵖⵎⵙ ⴷ ⵓⵎⵣⴰⵣⵣⴰⵍ ⴰⵅⴰⵜⴰⵔ ⵏ ⵡⴰⵏⴰⵡⵏ ⵉⵎⵓⵟⵟⵓⵏⵏ.

 

 

ⴰⵙⵅⵉⵜⵔ ⵏ ⵓⵣⵓⵛⵛⵍ ⴰⵖⴰⵔⴰⵏ

ⴳ ⵜⴰⵏⵏⴰⵢⵜ ⵏ ⵓⵎⵙⵏⴰⵎ ⴰⵙⵏⵉⵎⴰⵏ ⵏⵏⴰ ⵉⴳⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵜⵉⴳⵎⵉ ⵏ ⵢⵉⴳⵔ ⵏ ⵜⵏⵣⵡⴰⵢⵜ ⵜⵓⵙⵍⵉⴳⵜ ⴳ ⵍⵎⵖⵔⵉⴱ ⵓⵔ ⵜⵣⴷⵉ ⵖⴰⵙ ⴷ ⵜⵔⵙⴰⵍ ⵜⵉⵥⵕⴼⴰⵏⵉⵏ, ⵜⵉⴷⴰⵎⵙⴰⵏⵉⵏ ⴷ ⵜⵉⵏ ⵜⵎⵙⵙⵏⵜⵉⵜ ⵏⵏⴰ ⵏ ⵉⵇⵇⴰⵏ ⴰⴷ ⵜⵜⵓⵙⵔⵙ ⵏⵖ ⴰⴷ ⵜⵜⵓⵙⵏⴼⵍ. ⴰⵙⴷⵓⵙ ⵏ ⵜⵏⴼⵔⵓⵜ ⴳ ⵜⵖⴰⵔⵉⵡⵉⵏ ⵜⵉⵣⵣⵓⵍⴰⵏⵉⵏ ⵏ ⵜⵏⵣⵡⴰⵢⵜ ⴷ ⵜⵏⴽⵔⴰ ⵙ ⵜⵖⴰⵎⵙⴰ ⵉⵖⵓⴷⴰⵏ ⴳⴰⵏ ⴷⵉⵖ ⵜⵉⴳⵉⵡⵉⵏ ⵏ ⵓⵙⴷⵓⵙ ⵏ ⵓⵣⴷⴰⵢ ⴰⴽⴷ ⴰⵏⵎⵓⵔⵉ, ⵙ ⵉⵎⵥⵍⵉ ⴳ ⵓⵎⵏⴰⴹ  ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ ⴰⵎⴰⵜⴰⵢ, ⴰⵏⴰⴱⴰⴹ ⴷ ⵓⵔ ⵉⵍⵍⵉⵏ ⴷⴷⴰⵡ ⵉⵍⵓⴳⵏⵏ.

ⴳ ⵓⵎⵏⵉⴷ ⴰⴷ ⴷ ⵙ ⵜⴰⵏⴰⴼⵓⵜ ⵏⵏⵙ ⵜⴰⵙⴱⴷⴰⴷⵜ ⴰⵡⴷ ⵙ ⵉⵙⵖⵍⴰⴼ ⵏⵏⴰ ⴷⴰ ⵜⵜⵉⵏⵉ, ⵏⵏⴰ ⴷⴰ ⵉⵙⵙⵓⵜⵓⵔ ⴽⵓ ⵜⵉⴽⴽⵍⵜ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷ ⵉⵜⵜⵓⵙⴷⵓⵙ ⵓⵙⵏⴰⵎ ⴰⵏⵉⵎⴰⵏ ⴰⴳⵓⵏⵙ ⵏ ⵉⴳⵔⴰⵡⵏ ⵏ ⵜⵉⵔⵔⴰ. ⵔⵏⵓ ⵉ ⵜⵖⵜⴰⵙⵉⵏ ⵏⵏⴰ ⵢⵓⵙⵉⵏ ⵉⵎⵡⵓⵔⴰ, ⵜⵉⵢⴰⴹ ⵔⴰⴷ ⵙⴷⵓⵙⵏⵜ ⵜⵉⴹⴰⴼ ⵜⵉⵣⵣⵓⵍⴰⵏⵉⵏ ⴰⴼⴰⴷ ⴰⴷ ⴹⵎⵏⵏⵜ ⴰⵣⵔⴰⴽ ⵏ ⵓⵣⵔⴼ ⵏ ⵓⵎⵙⵙⴼⵍⴷ ⴳ ⵢⴰⵜ ⵜⵓⵎⴰⵢⵜ ⵜⴰⵖⵎⵙⴰⵏⵜ ⵉⵕⵡⴰⵏ ⵉⵍⴰⵏ ⴰⵜⵉⴳ.

ⵉⵜⵜⵓⵙⵔⵖⵓⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵉⵣⴷⴰⵢⵏ ⵏ ⵜⴼⵍⵙⵜ ⴷ ⵓⵎⵓⵣⵣⵓ ⵏⵏⴰ ⵜ ⵉⵣⴷⵉⵏ ⵙⴳ ⵣⵉⴽ ⴷ ⵉⵎⵡⵓⵔⴰ ⵉⵙⵍⵉⵥⵕⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⴰⵔ ⵉⵜⵜⵉⵏⵉ ⴷⵉⵖ, ⵙ ⵓⵣⵎⵣⵣⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵜⵏⵣⵡⴰⵢⵜ ⵉⴳⴰⵏ ⴰⵙⵏⵖⵎⵙ ⴰⵎⵣⵔⴰⵢ ⴷ ⵡⵉⵏ ⵉⵎⴰⵍ, ⴰⵙⵓⵖⵏ ⵏⵏⵙ ⵜⴰⵙⴳⴰ ⵏ ⵜⵓⵚⴽⴰ ⵏ ⵢⴰⵜ ⵜⵎⵓⵖⵍⵉ ⵜⴰⵖⵎⵙⴰⵏⵜ ⵜⴰⵎⵖⵔⴰⴱⵉⵢⵜ ⵜⴰⵏⵎⵓⵔⵉⵜ ⵏⵏⴰ ⵖⵓⵔ ⵍⵍⴰⵏ ⵉⵎⴰⵙⵙⵏ ⴷ ⵜⵣⵎⵎⴰⵔ ⵏⵏⴰ ⵉⵅⵚⵚⴰⵏ ⴰⴼⴰⴷ ⴰⴷ ⵜⵙⵙⴽⵔ ⵜⵉⵍⴰⵍⵜ ⵏⵏⵙ. ⵜⴰⵎⵓⵖⵍⵉ ⵜⴰⵖⵎⵙⴰⵏⵜ ⴰⴷ, ⵔⴰⴷ ⵜⵎⵢⴰⵏⴰⵡ, ⵔⴰⴷ ⵜⴷⵓⵙ ⴰⴳⵓⵏⵙ ⵏ ⵢⴰⵜ ⵜⴷⴰⵎⵙⴰ ⵏ ⵜⵉⴷⵜ ⵏ ⵓⵙⵍⵍⵡⵓ , ⴷ ⴰⴷ ⵜⵉⵍⵉ ⴳ ⵜⵏⴰⴼⵓⵜ ⵏ ⵜⵎⵓⵔⵜ, ⵏ ⵜⴰⵎⵓⵏⵜ ⵏⵏⵙ ⵜⴰⵏⴰⵎⵓⵏⵜ, ⵜⴰⵡⴰⵍⵉⵜ ⵏⵏⵙ ⵜⴰⴷⵍⵙⴰⵏⵜ ⴷ ⵓⵙⵙⴼⴰⵡ ⵏⵏⵙ ⴰⴳⵔⴰⵖⵍⴰⵏ.