ⵢⴰⵎⵓ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵙⵙ ⵏ 14 ⵏⵓⵡⴰⵏⴱⵉⵔ 2024 ⴳ ⴱⴰⵕⵙⴰⵍⵓⵏ, ⴳ ⵓⵎⵙⴳⵔⴰⵡ ⴰⵎⴰⵜⴰⵢ ⵏ ⵜⵙⵉⵍⴰⵡⵉⵏ ⵏ ⵉⵎⵙⵍⴳⵏⵏ ⵉⵙⵍⵉⵥⵕⵏ ⵉⴱⵉⵔⵓ ⵎⴰⵔⵉⴽⴰⵏⵏ (PRAI) ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵙⵍⵉⵥⵕ ⵏ ⴽⴰⵟⴰⵍⵓⵏⵢⴰ.

ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵙⴽⵔ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵏ ⴽⴰⵟⴰⵍⵓⵏⵢⴰ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵏⵜⵜⴰⵜ ⴷ ⵜⵏⵙⵙⵉⵅⴼⵜ ⵏ PRAI ⵉ ⵉⵙⴳⴳⵯⴰⵙⵏ 2022-2024, ⵢⴰⵏ ⵓⵙⵎⵏⵉⴷ ⵅⴼ “ⴰⵙⴳⵔⴰⵡ ⴰⵎⴰⴹⵍⴰⵏ ⵏ ⵜⴹⵡⴰⵏ”, ⵏⵏⴰ ⵜⵙⵙⵏⵜⵉ ⵍⵓⵏⵉⵙⴽⵓ ⴳ ⵢⵓⵏⵢⵓ 2024 ⵜⵙⵙⴽⵔ ⴷⵉⴳⵙ ⵢⴰⵏ ⵓⵙⴰⵢⵔⴰⵔ ⵏ ⵓⵎⵛⴰⵡⴰⵕ ⴷ ⵓⵎⵔⴰⵔⴰ ⵏ ⵉⵙⵡⵉⵏⴳⵉⵎⵏ ⴳ ⵢⵉⴳⵔ ⵏ ⵜⵉⵏⵏⵓⴱⴹⴰ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⴳⵔ ⵉⵎⵙⵍⴳⵏⵏ ⵉⴳⴰⵏ ⴰⴳⵎⴰⵎⵏ ⵏ ⵉⵥⴹⵡⴰⵏ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴳ ⵉⵍⵍⴰ PRAI, ⴰⵥⵟⵟⴰ ⴰⴼⵔⵉⵇ RIARC, ⴰⵥⵟⵟⴰ ⴰⴼⵔⵉⵇ REFRAM ⴷ ⵓⵥⵟⵜⴰ ⴰⴳⵔⴰⴽⴰⵍ RIRM, ⴳⵔ ⵡⵉⵢⴰⴹ. ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵍⵓⵏⵉⵙⴽⵓ, ⵏⵏⴰ ⴳ ⵉⵜⵜⵓⵙⵏⵜⵉ ⵓⵙⴳⵔⴰⵡ ⴰⴷ.

ⵉⵜⵜⵓⵔⵛⵎ ⵓⴳⵔⴰⵡ ⴰⵎⴰⵜⴰⵢ ⵏ PRAI ⵙ ⵢⵉⵍⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵜⵉⵍⵉⴼⵉⵣⵢⵓⵏ ⵏ ⵛⵛⵉⵍⵉ (CNTV) ⵖⵔ ⵜⵏⵙⵙⵉⵅⴼⵜ ⵏ PRAI ⵉ ⵉⵙⴳⴳⵯⴰⵙⵏ ⵏ 2024-26. ⵉⵏⵙⵙⵉⵅⴼⵏ ⵉⵎⴰⵔⴰⵏ ⵏ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⴳⴰⵏ: ⵜⴰⵙⵇⵇⵉⵎⵜ ⵏ ⵓⵙⵍⴳⵏ ⵏ ⵉⵎⵢⴰⵡⴰⴹⵏ (CRC) ⵏ ⴽⵓⵍⵓⵎⴱⵢⴰ ⴷ ⵓⵙⵇⵇⵉⵎ ⴰⵎⵛⵛⵉⵡⵕ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ (CONCORTV) ⵏ ⵍⴱⵉⵔⵔⵓ. ⵜⵉⵎⵔⵙⴰⵍ ⴰⴷ ⵙ ⴽⵕⴰⴹⵜ ⵉⴳⴰⵏ ⵉⴳⵎⴰⵎⵏ ⵔⴰⴷ ⵙⵙⴽⵔⵏⵜ ⵢⴰⵜ ⵜⵙⵇⵇⵉⵎⵜ ⵜⴰⵎⴰⵢⵏⵓⵜ ⵏ ⵉⵏⵎⵀⴰⵍⵏ ⵏ ⵓⵥⵟⵟⴰ ⵉⵡⵏⴰⵏ ⵏ ⵙⵉⵏ ⵉⵙⴳⴳⵯⴰⵙⵏ ⴰⴷ ⴷ ⵉⴷⴷⴰⵏ.
ⴰⴷ ⵏⵙⵙⴽⵜⵉ ⵉⵙ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴳⵎⴰⵎ ⵉⵎⵏⵥⵉ ⴰⴳⵓⵏⵙ ⵏ PRAI. ⵙⴳ ⵓⵎⵙⴳⵔⴰⵡ ⴰⵎⴰⵜⴰⵢ ⵏ ⵜⵙⵉⵍⴰ ⴰⴷ ⵉⵜⵜⵓⵙⵏⵎⴰⵍⴰⵏ ⴳ ⴽⵓⵍⵓⵎⴱⵢⴰ ⴳ ⵡⴰⵢⵢⵓⵔ ⵏ ⵛⵜⴰⵎⴱⵉⵔ 2014, ⵜⵓⴷⴼ ⵜⵎⵔⵙⵍⵜ ⵏ ⵍⵎⵖⵔⵉⴱ ⴳ ⵉⵣⵎⵣⵣⵓⵜⵏ ⴷ ⵜⵡⵓⵔⵉⵡⵉⵏ ⵏ PRAI, ⵢⴰⵎⵓ ⴳ ⵜⴳⵎⵉ ⵏ ⵜⵓⵙⵙⵏⴰ ⵉⵛⵛⴰⵔⵏ ⴳⵔ ⵜⵎⵔⵙⴰⵍ ⵉⴳⵎⴰⵎⵏ ⵏ PRAI ⴷ ⵢⵉⴽⵏⵏ ⵏⵏⵙⵏ ⵉⴳⵎⴰⵎⵏ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ (RIARC).

ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ ⴰⵎⴰⵜⴰⵢ, ⵉⴳⵏⵙⴻⵙ ⵎⴰⵙⵙ ⴰⵎⵉⵏ ⵄⵣⵣⵉⵎⴰⵏ, ⴰⵏⵎⵀⴰⵍ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵉⴳⵏⵙⴻⵙ ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ  ⴰⵙⵍⵉⵥⵕ.

ⵜⵍⵓⵍⴰ ⴷ ⴳ ⵓⵙⴳⴳⵯⴰⵙ ⵏ 2010 ⴳ ⵛⵛⵉⵍⵉ, ⵜⵓⵎⵥ PRAI ⴰⴷⵖⴰⵔ ⵏⵏⵙ ⴳ ⵜⵎⵓⵖⵍⵉ ⵜⴰⵎⴰⴹⵍⴰⵏⵜ ⵏ ⵓⵙⵍⴳⵏ, ⵜⴳ ⴰⵙⴰⵜⵉ ⵏ ⵓⵙⵏⵉⴼⵍ ⵏ ⵉⵏⵖⵎⵉⵙⵏ ⴷ ⵢⵉⵔⵎⵏ ⴳⵔ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵉⵏⵉⵎⴰⵏⵏ ⵏ ⵎⴰⵔⵉⴽⴰⵏ ⵏ ⵡⴰⵎⵎⴰⵙ ⴷ ⵜⵉⵏ ⵓⵖⵍⵍⵓⵢ ⴷ ⵜⵎⴳⵣⵉⵔⵜ ⵜⵉⴱⵉⵔⵉⵜ (ⵚⴱⴰⵏⵢⴰ ⴷ ⵍⴱⵓⵕⵜⵓⵖⴰⵍ). ⵜⵏⵏⵓⵕⵥⵎ PRAI ⵅⴼ ⵓⵔⵣⵣⵓ ⴰⴽⴰⴷⵉⵎⵉ ⴳ ⵢⵉⴳⵔ ⵏ ⵓⵙⵏⵖⵎⵙ ⴷ ⵓⵙⵍⴳⵏ, ⴰⵢⴰ ⵢⵉⵡⵉ ⵜⵜ ⵖⵔ ⵢⴰⵏ ⵓⵙⵍⴳⵏ ⵉⵕⵡⴰⵏ ⴰⵏⵉⵎⴰⵏ ⵏ ⵓⵙⵏⵖⵎⵙ, ⵉⵚⴽⴰⵏ ⵅⴼ ⵉⵎⵏⵣⴰⵢ ⵏ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏ ⵜⵎⵢⴰⵏⴰⵡⵜ ⵜⴰⴷⵍⵙⴰⵏⵜ.