ⵉⵔⵣⴼ ⵢⴰⵏ ⵓⴳⵔⴰⵡ ⵏ ⵉⵎⵉⵏⵉⴳⵏ ⴷ ⵉⵙⵍⵎⴰⴷⵏ ⵉⵎⵙⴷⴰⵡⵏ ⵏ ⵜⵖⵉⵡⴰⵏⵜ ⵏ ⵜⵏⵖⵎⴰⵙⵜ ⴷ ⵓⵎⵢⴰⵡⴰⴹ ⵏ ⵜⵙⴷⴰⵡⵉⵜ ⵏ ⵚⵓⴼⵉⵢⴰ ⴳ ⴱⵍⵖⴰⵔⵉⵢⴰ ⴰⵙⵙ ⵏ 12 ⴷ 13 ⴷⵓⵊⴰⵎⴱⵉⵔ 2022, ⴳ ⵓⵙⵖⵉⵎ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵔⵣⴰⴼ ⴰⴷ ⵉⴳⴰ ⵡⵉⵏ ⵓⵙⵏⵖⵎⵙ ⴳ ⵓⵙⴰⵜⵉ ⵏ ⵓⵙⵖⵏⵓ ⵏ ⵓⵔⵣⵣⵓ ⵏⵏⴰ ⵉⵙⵙⵥⵕⴼ ⵡⴰⵎⵓⵏ ⵓⵕⵓⴱⴱⵉ ⴳ ⵓⵢⵏⵏⴰ ⵉⵣⴷⵉⵏ ⴷ ⵢⵉⴳⵔ ⵏ ⵓⵙⵏⵖⵎⵙ ⴰⵙⵍⵉⵥⵕ ⴷ ⵜⵎⴳⵓⵔⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵜⵉⵙⵍⵍⵡⴰⵢⵉⵏ ⴳ ⵍⵎⵖⵔⵉⴱ.

ⵉⵜⵜⵓⵙⵏⵓⴱⴳ ⵓⴳⵔⴰⵡ ⴰⴱⵍⵖⴰⵔⵉ ⴰⵙⵙ ⵏ 12 ⴷⵓⵊⴰⵎⴱⵉⵔ ⵖⵓⵔ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴷ ⵓⵏⵎⵀⴰⵍ ⴰⵎⴰⵜⴰⵢ, ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ ⵙ ⵓⵃⵉⴹⵕ ⵏ ⵓⵎⵙⵇⴰⴷ ⵏ ⴱⵍⵖⴰⵔⵉⵢⴰ ⴳ ⵍⵎⵖⵔⵉⴱ ⵎⴰⵙⵙ ⴱⴰⵍⵎⴻⵏ ⵜⵥⵓⵍⵓⴼ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵙⵎⵏⴷ ⵎⴰⵙⵙⴰ ⴰⵅⴰⵔⴱⴰⵛ ⵉ ⵉⵏⴳⴱⵉⵡⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵜⴰⵡⵓⵔⵉ ⵏ ⵜⵎⵔⵙⵍⵜ ⵉⴳⴰⵏ ⵜⴰⴷⵓⵙⵜⵓⵔⵉⵜ ⵜⴰⵏⵉⵎⴰⵏⵜ ⵏ ⵓⵙⵏⴰⵎ ⴷ ⵓⵏⴱⴰⴹ ⵉⵕⵡⴰⵏ ⴳ ⵢⵉⴳⵔ ⵏ ⵜⴳⵎⵉ ⴷ ⵓⵙⵉⵜⴳ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵙ ⵡⴰⵜⵉⴳⵏ ⴷ ⵉⵎⵏⵣⴰⵢ ⵏ ⵜⵍⴻⵍⵍⵉ ⵏ ⵓⵡⵏⵏⵉ, ⵏ ⵜⵎⴰⴳⵓⵜ ⵏ ⵓⵡⵏⵏⵉ ⵏ ⵜⵎⵣⴰⵣⵉⵏ ⵏ ⵓⵙⵡⵉⵏⴳⵎ ⴷ ⵜⴰⵏⵏⴰⵢⵜ, ⵏ ⵓⵎⵢⴰⵏⴰⵡ ⴰⴷⵍⵙⴰⵏ, ⴰⵏⴼⴳⴰⵏ, ⵓⵜⵍⴰⵢ ⴷ ⵓⵎⵏⵏⵓⵖ ⵎⴳⴰⵍ ⵉⵡⵏⵏⵉⵜⵏ ⵏ ⵓⴽⵙⴰⵏ ⴷ ⵜⵡⵍⴰⴼⵉⵏ ⵏ ⵡⴰⵏⴰⵡ.

ⴰⵎⵓⵏ ⴷⵉⵖ ⵉⵎⵉⵏⵉⴳⵏ ⵉⴱⵍⵖⴰⵔⵉⵢⵏ ⴳ ⴽⵉⴳⴰⵏ ⵏ ⵉⵎⵙⴳⵔⴰⵡⵏ ⴰⴽⴷ ⵉⵏⵎⵀⴰⵍⵏ ⴷ ⵉⵎⵓⵣⴰⵢ ⵉⵜⵉⵇⵏⵉⵢⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵔⵣⴼⵏ ⴷⵉⵖ ⴰⵎⵎⴰⵙ ⵏ ⵓⵎⵙⵙⴰⵏⵓⵏ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ.

ⵉⵡⵏⴰⵏ ⵏ ⵜⵣⴷⵓⵖⵜ ⵏⵏⵙ ⴳ ⵍⵎⵖⵔⵉⴱ, ⵉⵎⵍⴰⵍⴰ ⵓⴳⵔⴰⵡ ⴰⴱⵍⵖⴰⵔⵉ ⴰⴽⴷ ⵎⴰⵙⵙ ⵎⵓⵙⵟⴰⴼⴰ ⵄⴰⵍⴰⵡⵉ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵡⴰⵎⵎⴰⵙ ⴰⵣⵣⵓⵍⴰⵏ ⵏ ⵓⵙⵙⴼⵍⴷ ⵏ ⵉⵙⵏⵖⵎⵙⵏ (CIAUMED), ⵏⵏⴰ ⴰⵙ ⵉⵎⵍⵏ ⵙ ⵓⵣⵎⵣⵣⵓ ⵢⴰⴷ, ⴰⴷⴷⴰⴷ ⵏ ⵓⵙⵖⴰⵍ ⵏ ⵓⵙⴼⵍⴷ ⴳ ⵍⵎⵖⵔⵉⴱ ⴷ ⵜⵣⵎⵎⴰⵔ ⵏⵏⴰ ⴷⴰ ⵉⵙⵙⴽⴰⵔ ⵡⴰⵎⵎⴰⵙ ⴳ ⵓⴱⵔⵉⴷ ⵏ ⵜⴳⵎⵉ ⵏ ⵓⴳⴰⴷⴰⵣ ⵏ ⵓⵙⵙⵉⵙⵏ ⵉⴳⴰⵏ ⵜⴰⵔⵙⵍⵜ ⵜⴰⴷⵙⵍⴰⵏⵜ ⵏ ⵓⵙⵥⵕⴼ ⵏ ⵉⵎⵡⵓⵔⴰ ⵉⵙⵍⵉⵥⵕⵏ.

ⵉⵎⵏⴳⴳⴰⵔ ⴷⵉⵖ ⵓⴳⵔⴰⵡ ⴰⴱⵍⵖⴰⵔⵉ ⴰⴽⴷ ⵎⴰⵙⵙ ⵄⴱⴷⵍⵇⴰⴷⵔ ⵔⵜⵏⴰⵏⵉ, ⴰⵙⵍⵡⴰⵢ ⵡⵉⵙⵙ ⵙⵉⵏ ⵏ ⵜⴰⵎⵓⵏⵜ ⵏ ⵜⵎⵙⴳⵓⵔⵉⵏ ⵜⵉⴷⵍⵙⴰⵏⵉⵏ ⴷ ⵜⵎⵙⵍⵍⵡⵉⵏ (FICC) ⵏ ⵜⴰⵎⵓⵏⵜ ⵜⴰⵎⴰⵜⴰⵢ ⵏ ⵜⵎⵙⵙⵏⵜⵉⵢⵉⵏ ⵏ ⵍⵎⵖⵔⵉⴱ ( CGEM), ⵎⴰⵙⵙⴰ ⴰⵎⵉⵏⴰ ⴱⵏⵊⵍⵍⵓⵏ, ⵜⴰⵏⵙⵙⵉⵅⴼⵜ ⵜⵉⵙⵙ ⵙⵏⴰⵜ ⵢⵓⴳⴳⴰⵏ ⵅⴼ ⵓⵙⴰⴽⴰ ⵏ ⵓⵙⵍⵉⵥⵕ ⴷ ⵎⴰⵙⵙ ⵀⵉⵛⴰⵎ ⴰⴱⴽⴰⵔⵉ, ⴰⵏⵙⵙⵉⵅⴼ ⵡⵉⵙⵙ ⵙⵉⵏ ⵢⵓⴳⴳⴰⵏ ⵅⴼ ⵓⵙⴰⴽⴰ ⵏ ⵓⵥⴰⵡⴰⵏ. ⴰⵎⵔⴰⵔⴰ ⴳⴰⵔⴰⵙⵏ ⵉⵣⴷⵉ ⴷ ⵡⴰⴷⴷⴰⴷ ⴷ ⵉⵎⵏⵉⴷⵏ ⵏ ⵜⴳⵎⵉ ⵏ ⵜⵎⴳⵓⵔⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵉⵙⵍⵍⵡⵓⵜⵏ ⴳ ⵍⵎⵖⵔⵉⴱ.