ⴰⵙⵖⵉⵎ ⵏ ⵍⵓⵏⵉⵙⴽⵓ ⵏ ⵓⵙⴳⵎⵉ ⵅⴼ ⵓⵎⵢⴰⵡⴰⴹ ⴷ ⵓⵙⵏⵖⵎⵙ ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⵏⴰⵡⵜ « ⴰⵙⴳⵎⵉ ⵅⴼ ⵓⵙⵏⵖⵎⵙ : ⵉⵙⵓⵔⵙⵏ ⵉⴳⴷⵓⴷⴰⵏⵏ ⴷ ⵉⵎⵓⵙⵙⵓⵜⵏ ⵉⴽⴰⴷⵉⵎⵉⵢⵏ » ⵜⴰⵙⴷⴰⵡⵉⵜ ⵜⴰⴳⵔⴰⵖⵍⴰⵏⵜ ⵏ ⵕⵕⴱⴰⵟ, 14 ⴷⵓⵊⴰⵎⴱⵉⵔ 2022
ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵏⵏⴰ ⵜⵙⵎⴷⵢⴰ ⵎⴰⵙⵙⴰ ⵍⴰⵟⵉⴼⴰ ⵜⴰⵢⵀ, ⵜⴰⵏⵎⵀⴰⵍⵜ ⵏ ⵜⵣⵓⵏⵉ ⵏ ⵜⵖⵓⵔⵉⵡⵉⵏ ⴷ ⵜⴳⵎⵉ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵏ ⵜⵖⵓⵔⵉ « ⴰⵙⴳⵎⵉ ⵅⴼ ⵓⵙⵏⵖⵎⵙ : ⵉⵙⵓⵔⵙⵏ ⵉⴳⴷⵓⴷⴰⵏⵏ ⴷ ⵉⵎⵓⵙⵙⵓⵜⵏ ⵉⴽⴰⴷⵉⵎⵉⵢⵏ » ⵏⵏⴰ ⵉⵙⵏⵎⴰⵍⴰ ⴰⵙⵙ ⵏ 14 ⴷⵓⵊⴰⵎⴱⵉⵔ 2022, ⵓⵙⵖⵉⵎ ⵏ ⵍⵓⵏⵉⵙⴽⵓ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⴷ ⵜⴼⴳⴰⵏⵉⵜ ⵜⴰⵎⵓⵟⵟⵓⵏⵜ ⴰⴽⴷ ⵜⴰⵙⴷⴰⵡⵉⵜ ⵜⴰⴳⵔⴰⵖⵍⴰⵏⵜ ⵏ ⵕⵕⴱⴰⵟ.
ⵜⵉⵡⵓⵔⵉⵡⵉⵏ ⵏ ⵜⵉⵏⴰⵡⵜ ⴰⴷ ⵓⵏⴼⵏⵜ ⴰⵙⵇⵙⵉ ⵅⴼ ⵡⴰⴷⴷⴰⴷ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴳ ⵍⵎⵖⵔⵉⴱ ⴷ ⵓⵎⵙⴳⴷⴰⵍ ⵅⴼ ⵉⵎⵏⵉⴷⵏ ⵏⵏⵙ ⴷⴰⵜ ⵉⵙⵎⴽⵍⵏ ⵉⵎⵙⵏⵓⵍⴼⵏ ⵉⴳⵔⴰⵖⵍⴰⵏⵏ.
ⵉⵎⵔⴰⵔⴰⵏ ⵕⵥⵎⵏ ⴷⵉⵖ ⴰⵙⵡⵉⵏⴳⵎ ⵅⴼ ⵜⵉⵍⴰⵍⵜ ⵏ ⵜⵙⴷⴰⵡⵉⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵎⵏⵏⵓⵖ ⵎⴳⴰⵍ ⴳⴰⵔ ⴰⵙⵏⵖⵎⵙ ⴰⵎⴰⵙⵙⴰⵏ ⵙ ⵓⵙⴼⵙⵔ ⵏ ⴽⵔⴰ ⵏ ⵉⵣⵓⵔⵜⵏ ⵅⴼ ⵓⵙⵎⴷⵢⴰ ⴰⵖⵎⵙⴰⵏ ⵏ ⵡⴰⵏⴰⵡ, ⴷ ⵉⵙⵇⵙⵉⵜⵏ ⵅⴼ ⵓⵣⵡⴰⴳ ⴷ ⵢⵉⴳⵉ ⴰⵙⴳⴰⴷ.
ⵉⵡⵏⴰⵏ ⵏ ⵜⴳⵓⵔⵉ ⵏⵏⵙ, ⵜⵙⵙⴽⵏ ⵎⴰⵙⵙⴰ ⵜⴰⵢⵀ ⴰⵎⵏⵉⴷ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵡⵜⵜⴰⵙⵏ ⴷ ⵉⵙⵓⵔⵙⵏ ⵉⵎⴰⵢⵏⵓⵜⵏ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ. ⵜⵙⵙⴽⵏ ⵙ ⵉⵎⵥⵍⵉ ⵜⴰⵎⵔⵉⵙⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵏ ⵓⵙⵏⴰⵎ ⵏ ⴰⴷ ⵢⵉⵍⵉ ⵢⵉⴳⵉ ⴷ ⵓⵎⵏⵣⴰⵢ ⵏ ⵓⵙⵏⴰⵎ ⵖⵓⵔ ⵉⵏⵎⵓⵔⵉⵏ ⴰⴽⴽⵯ ⴷ ⵓⵎⵙⵡⵓⵔⴰ ⵏ ⵓⵙⵏⵖⵎⵙ.
ⴰⵎⵓⵏ ⴳ ⵜⵉⵏⴰⵡⵜ ⴰⴷ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⵙ ⵜⵎⴷⵔⴰⵡⵜ ⵏ ⵓⵙⵉⵏⴰⴳ ⵏ ⵜⵖⵓⵔⵉⵡⵉⵏ ⵜⵉⵎⴰⵜⵜⴰⵢⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⵏ ⵉⴼⵔⵉⵇⵉⵢⴰ ⴷ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵉ ⵓⵙⴳⵎⵉ, ⵜⵓⵙⵙⵏⴰ ⴷ ⵜⴷⵍⵙⴰ, ⴽⵉⴳⴰⵏ ⵏ ⵉⵎⵉⵏⵉⴳⵏ ⵉⴽⴰⴷⵉⵎⵉⵢⵏ, ⵉⵎⵓⵣⴰⵢ ⵉⴳⵔⴰⵖⵍⴰⵏⵏ, ⵉⵙⵎⴷⵢⴰⵜⵏ ⵏ ⵜⵣⵓⵏⵉⵏ ⵜⵉⵎⴰⵡⵙⴰⵙⵉⵏ, ⵉⵣⵣⵓⵍⴰⵏⵏ ⵏ ⵓⵙⵏⵖⵎⵙ ⴷ ⵉⵎⴳⴳⴰⵢ ⵉⵎⵙⵎⵓⵏⵏ.