ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 30 ⵉⴱⵔⵉⵔ 2025 ⴳ ⵓⵙⵇⵇⵉⵎ ⵏ ⵜⵎⵔⵙⵍⵜ ⵎⴰⵙⵙ ⴷⴰⵎⵉⵢⴰⵏ ⴷⵓⵏⵓⴼⴰⵏ ⴰⵎⵙⵇⴰⴷ ⵏ ⵓⵙⵟⵕⴰⵍⵢⴰ ⴳ ⵍⵎⵖⵔⵉⴱ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⵉⴷ ⵎⴰⵙⵙⴰ ⴰⵅⴰⵔⴱⴰⵛ ⵉ ⵓⴷⵉⴱⵍⵓⵎⴰⵙⵉ ⵏ ⵓⵙⵟⵕⴰⵍⵉⵢⴰ ⵢⴰⵜ ⵜⴰⵏⵏⴰⵢⵜ ⵅⴼ ⵓⵣⵣⵉⴳⵣ ⵏ ⵓⵙⴷⵔⴼⵉ ⵏ ⵢⵉⴳⵔ ⴰⵙⵍⵉⵥⵕ ⴳ ⵍⵎⵖⵔⵉⴱ ⴷ ⵉⵙⵜⴰⵢⵏ ⵉⵙⵔⵜⴰⵏⵏ ⴷ ⵉⴷⵉⵎⵓⵇⵕⴰⵟⵉⵢⵏ ⵏⵏⴰ ⵙ ⵉⵜⵜⵓⵚⴽⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵢⴰⵜ ⵜⵎⵔⵙⵍⵜ ⴰⵏⵉⵎⴰⵏⵜ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ, ⵢⴰⴳⴳ ⵅⴼ ⵓⴼⵔⴰⴳ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⴷ ⵜⵏⴰⴼⵓⵜ ⵜⴰⵎⴰⵜⴰⵢⵜ ⴰⵔ ⵉⵜⵜⴹⵎⴰⵏ ⵉ ⵓⴳⴷⵓⴷ ⴰⵎⵖⵔⴰⴱⵉ ⴰⴷⴰⴼ ⵖⵔ ⵢⴰⵏ ⵓⵙⴽⴰⵏ ⴰⵙⵍⵉⵥⵕ ⴰⵎⵢⴰⵏⴰⵡ, ⴰⵎⴰⴳⵓⵜ ⵉⵍⴰⵏ ⴰⵜⵉⴳ.
ⵜⵙⵎⵏⵉⴷ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ ⵉ ⵓⴷⵉⴱⵍⵓⵎⴰⵙⵉ ⴰⵓⵙⵟⵕⴰⵍⵉ ⵉⵜⵙ ⵏ ⵜⵙⵎⵉⴳⵍⵉⵏ ⵏ ⵜⵎⵔⵙⵍⵜ ⵙ ⵉⵎⵥⵍⵉ ⴰⴹⵎⴰⵏ ⵏ ⵡⴰⴷⴰⴼ ⵏ ⵓⴳⴷⵓⴷ ⵖⵔ ⵜⵎⴰⴳⵓⵜ ⵏ ⵓⵡⵏⵏⵉ ⴷ ⵜⵎⵣⴰⵣⵉⵏ ⵏ ⵜⴰⵏⵏⴰⵢⵜ ⴳ ⵓⵣⵎⵣ ⵏ ⵉⵙⵜⴰⵢⵏ ⴷ ⵓⵣⵎⵣ ⵓⵏⵣⵉⵍ ⵏⵖ ⴷⵉⵖ ⴰⵙⵉⵍⵉ ⵙ ⵜⵎⵢⴰⵏⴰⵡⵜ ⵜⴰⴷⵍⵙⴰⵏⵜ ⴷ ⵓⵙⵏⵉⵍⵙ ⴳ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵜⵉⵏⴰⵎⵓⵔⵉⵏ.
ⵜⵙⴰⵡⵍ ⴷⵉⵖ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵓⵏⵜⴰⵢ ⵏⵏⵙ ⵉ ⵢⵉⵔⵎ ⵏ ⵓⵙⵟⵕⴰⵍⵢⴰ ⴳ ⵢⵉⴳⵔ ⵏ ⵓⵙⵍⴳⵏ ⴰⵎⵓⵟⵟⵓⵏ. ⵜⵙⴰⵡⵍ ⵅⴼ ⵜⵓⵎⵙⵉⵙⵜ ⵏ ⵓⵙⵍⴳⵏ ⵉⵜⵜⵓⵙⵔⵙⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⵎⴳⴳⵉ ⴷ ⵉⵣⵔⴼⴰⵏ ⵉⵜⵜⵉⵏ ⵏ ⵓⵙⵏⵖⵎⵙ ⴷ ⵉⵎⵣⵔⴰⴳ ⵏ ⵜⵏⵖⵎⴰⵙⵜ ⵜⵓⵙⵟⵕⴰⵍⵉⵜ ⴷⴰⵜ ⵏ ⵜⵣⵎⵔⵜ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⴹⵍⴰⵏⵉⵏ ⴷ ⵜⵎⵙⴽⴰⵔⵉⵏ ⵏⵏⵙⵏⵜ ⵉⵕⵥⵥⴰⵏ ⵉⴳⵔ ⵏ ⵓⵙⵏⵖⵎⵙ, ⵙ ⵉⵎⵥⵍⵉ ⴳ ⵓⵢⵏⵏⴰ ⵉⵣⴷⵉⵏ ⵙ ⴱⵟⵟⵓ ⵏ ⵜⵏⴰⴼⵓⵜⵉⵏ ⵜⵉⵙⵓⵙⵙⴰⵏⵉⵏ ⴷ ⵓⵙⵉⵜⴳ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵜⵉⵥⵓⵕⴰⵏⵉⵏ.
ⴳ ⵜⴳⵉⵔⴰ ⵏ ⵓⵔⵣⴰⴼ ⵏⵏⵙ, ⵉⵎⵎⵥⵕⴰ ⵓⵎⵙⵇⴰⴷ ⴷⵓⵏⵓⴼⴰⵏ ⴷ ⵉⵎⵙⵜⴳⴳⴰⵔⵏ ⵏ ⵜⵣⵓⵏⵉ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⴷ ⵜⵣⵓⵏⵉ ⵏ ⵉⵏⴳⵔⴰⵡⵏ ⵏ ⵓⵙⵏⵖⵎⵙ ⴳ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.