ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴰⵙⵙ ⵏ 29 ⵎⴰⵢⵓ 2023 ⴳ ⵓⵙⴰⴳⵓⵔ ⵏ ⵜⵎⵔⵙⵍⵜ, ⵎⴰⵙⵙ ⵙⴰⵍⵉⵙⵓ ⴰⴷⴰ, ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ ⴳ ⵍⵎⵖⵔⵉⴱ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⵉⴷ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉ ⵓⵎⵙⵇⴰⴷ ⴰⵏⵉⵊⵉⵔⵉ ⵜⴰⵎⴰⵙⴰⵢⵜ ⴷ ⵡⴰⴷⴷⴰⴷ ⵏ ⵜⵎⵔⵙⵍⵜ ⴷ ⵜⵎⵥⵍⵉⵢⵉⵏ ⵏⵏⵙ ⵜⵉⴷⵙⵍⴰⵏⵉⵏ ⴰⵛⴽⵓ ⵜⴳⴰ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵜⴰⵙⵏⵉⵎⴰⵏⵜ ⵏ ⵓⵙⵏⴰⵎ ⴷ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ.
ⵍⵍⵉⴳ ⵜⵙⵙⵉⴽⵣ ⵜⵕⵡⵉ ⴷ ⵜⴷⵉⵏⴰⵎⵉⵜ ⵏ ⵉⵣⴷⴰⵢⵏ ⵉⵍⵍⴰⵏ ⴳⵔ ⵍⵎⵖⵔⵉⴱ ⴷ ⵏⵏⵉⵊⵉⵔ, ⴷ ⵜⵉⵏⵏⴰ ⵉⵣⴷⵉⵏ ⴰⴳⵔⴰⵡ ⴰⵎⴰⵜⵜⴰⵢ ⴷ ⵢⵉⴽⵏ ⵏⵏⵙ ⴰⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴳ ⵏⵏⵉⵊⵉⵔ, ⵜⵙⵙⴽⵏ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵜⴰⵙⵉⵎⴰⵏⵜ ⵏ ⵉⴳⵔⴰⵡⵏ ⵏ ⵓⵙⵏⴰⵎ ⴷ ⵓⵎⵢⴰⵡⴰⴹ ⵉⴳⴰⵏ ⴰⵍⵓⴳⵏ ⴰⴷⵙⵍⴰⵏ ⵉ ⵓⴹⵎⴰⵏ ⵏ ⵜⵖⵥⵏⵜ ⵏ ⵜⵡⵓⵔⵉ ⵏⵏⵙ ⵉ ⵜⵏⴰⴼⵓⵜ ⵏ ⵓⵏⵎⵓⵔⵉ ⴰⴼⵔⵉⵇⵉ ⵏⵏⴰ ⵉⵙⵡⵓⵔⵉⵏ ⵉⵎⴰⵙⵙⵏ ⵏ ⵓⵙⵏⵖⵎⵙ.
ⴳ ⵜⵙⴳⴰ ⵏⵏⵙ, ⵉⵙⵙⵎⵖⵓⵔ ⵓⵎⵙⵇⴰⴷ ⵙⴰⵍⵉⵙⵓ ⴰⴷⴰ ⵙ ⵜⵉⴹⴰⴼ ⵏ ⵓⴳⵔⴰⵡ ⴰⵎⴰⵜⵜⴰⵢ ⵅⴼ ⵓⴼⵔⴰⴳ ⵉ ⵓⵙⵡⵉⵔ ⴰⵏⴰⴼⵍⵍⴰ ⵏ ⵉⵙⵏⵉⴼⵍⵏ ⴷ ⵢⵉⵔⵎⵏ ⴷ ⵓⵎⵛⴰⵡⴰⵕ ⴰⴽⴷ ⵉⴽⵏ ⵏⵏⵙ ⴰⵏⵉⵊⵉⵔⵉ. ⴰⵔ ⵉⵙⵙⴼⴰⵡ ⵅⴼ ⵜⵎⴷⵔⴰⵡⵜ ⵜⴰⴷⵙⵍⴰⵏⵜ ⵏ ⵉⴳⵔⴰⵡⵏ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵓⵙⴷⵓⵙ ⵏ ⵜⵡⵓⵔⵉ ⵜⴰⴷⵉⵎⵓⵇⵕⴰⵟⵉⵢⵜ ⵏ ⵡⴰⵎⵓⵏⵏ. ⴷⴼⴼⵉⵔ ⴰⵢⴰ, ⵉⵔⵣⴼ ⵓⵎⵙⵇⴰⴷ ⴰⵏⵉⵊⵉⵔⵉ ⵉ ⵜⵏⵎⵀⴰⵍⵉⵏ ⴷ ⵜⵏⴰⴼⵓⵜⵉⵏ ⵜⵉⵜⵉⵇⵏⵉⵢⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ.