ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵙⴳⵔⴰⵡ ⴰⵎⴰⴹⵍⴰⵏ ⵏ
ⵓⵙⵏⵖⵎⵙ ⵏⵏⴰ ⵜⵙⵏⵎⴰⵍⴰ ⴷⵓⵜⵛⵉ ⴼⵉⵍⵍⵉ ⴳ ⴱⵓⵏ ⵓⵙⵙⴰⵏ ⵏ 19 ⴷ 20 ⵢⵓⵏⵢⵓ 2023 

ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴰⵙⵙ ⵏ 19 ⵢⵓⵏⵢⵓ 2023 ⴳ ⴱⵓⵏ, ⵉⵡⵏⴰⵏ ⵏ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵜⵖⴰⵎⵙⴰ ⵏⵏⴰ ⵜⵙⵏⵎⴰⵍⴰ ⴷⵓⵜⵛⵉ ⴼⵉⵍⵍⵉ, ⴳ ⵓⴱⵖⵓⵔ ⵏ ⵢⴰⵜ ⵜⵉⴳⵉ ⵜⴰⴳⵔⴰⵖⵍⴰⵏⵜ ⵅⴼ ⵓⵙⴼⴰⴹ ⵏ ⵜⴷⵔⵙⵉ ⵏ ⵜⵖⴰⵎⵙⴰ ⴳ ⵢⵉⴳⵔ ⵏ ⵜⵎⴰⵙⴰⵢⵜ ⴷ ⵓⵙⴰⵢⵔⴰⵔ ⵏ ⵓⵎⴷⵉⵡⴰⵍ ⴰⴳⴷⵓⴷⴰⵏ ⴷⴰⵜ ⵜⵅⵉⵜⵔⵜ ⵏ ⵜⴰⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵉⴳⴰⵏ ⴰⵙⴰⴳⵎ ⵏ ⵉⵏⵖⵎⵉⵙⵏ. ⴳ ⵜⴳⵓⵔⵉ ⵏⵏⵙ ⴳ ⵜⵙⵓⵜⵍⵜ ⵏ «  ⵉⵎⵏⵉⴷⵏ ⵏ ⵓⵙⵏⵖⵎⵙ ⵉⵣⴷⵉⵏ ⴷ ⵉⵎⵏⵉⵔⵏ ⵏ ⵍⵓⵏⵉⵙⴽⵓ ⵉ ⵓⵙⵏⴰⵎ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ » ⵜⵏⵏⴰ ⵉⵙ « ⴰⵙⵡⵓⵔⵉ ⵉⵕⵡⴰⵏ ⴰⴷⵉⵎⵓⵇⵕⴰⵟⵉ ⵉⵇⵇⴰⵏ ⵜ ⵉⵏ ⵓⵙⴷⵓⵙ ⵏ ⵓⵎⴷⵉⵡⴰⵍ ⴰⴳⴷⵓⴷⴰⵏ ⵉⴳⴰⵏ ⴰⵍⵍⴰⵍ ⵏ ⵜⵓⵚⴽⴰ ⵏ ⵓⵎⵙⴰⵙⴰ ⴷ ⵓⵙⵏⵎⴰⵍⴰ ⴰⴳⵔⴰⵡⴰⵏ ⴳ ⵉⵖⵉⵢ ⵓⵏⵖⵎⴰⵙ ⴰⴷ ⵢⵓⵔⴰⵔ ⵜⵉⵍⴰⵍⵜ ⵏ ⵓⵎⵙⵡⵉⵏⴳⵎ ⴷ ⵓⵎⵙⴼⵔⵉ ⴰⴷⵙⵍⴰⵏ ». ⵜⵏⵏⴰ ⴷⵉⵖ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵏ ⵓⵙⵏⴰⵎ ⴰⵎⵖⵔⴰⴱⵉ, « ⵎⵛ ⴷ ⵉⵡⵉⵏ ⵉⵥⴹⵡⴰⵏ ⵉⴳⴷⵓⴷⴰⵏⵏ ⵉⵣⵎⴰⵣ ⵏ ⵓⵙⵏⵖⵎⵙ ⴷ ⵜⵍⴻⵍⵍⵉ ⵏ ⵓⵡⵏⵏⵉ, ⵀⴰⵜ ⴷⵉⵖ ⵙⵏⵓⵍⴼⴰⵏ ⴷ ⵢⴰⵏ ⵓⵙⴰⵢⵔⴰⵔ ⴰⵎⴰⵢⵏⵓ ⵏ ⵓⵎⵢⴰⵖ ⴷ ⵢⵉⵔⵎ ⵏ ⵡⴰⵡⴰⵍ ⴰⴳⴷⵓⴷⴰⵏ ⴳ ⵅⴰⵜⵔⵏ ⴽⵉⴳⴰⵏ ⵏ ⵜⵎⵢⵓⵔⵉⵏ ⴳ ⵓⴷⵖⴰⵔ ⵏ ⵜⴷⵍⵙⴰ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ. ⵙ ⵓⵎⴷⵢⴰ, ⵉⵕⵕⵥⴰ ⵓⵎⴷⵉⵡⴰⵍ ⴰⴳⴷⵓⴷⴰⵏ ⴰⵔ ⵉⵜⵜⴷⵔⵉⵙ ⵙ ⵉⵥⴹⵡⴰⵏ ⵉⵏⴰⵎⵓⵏⵏ ⵏⵏⴰ ⵢⴰⵖⵓⵍⵏ ⴳⴰⵏ ⵢⴰⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴳ ⵜⵜⵓⵙⵎⵖⵓⵔⵏⵜ ⵜⴱⴰⵙⵍⵉⵡⵉⵏ, ⵉⵏⴰⵡⵏ ⵏ ⵓⴽⵙⴰⵏ, ⴳⴰⵔ ⴰⵡⴰⵍ, ⴰⵙⵍⴻⵍⵍⵉ ⵏ ⵓⴼⵔⴰⴽ… ⴰⵜⴳ. »
ⵜⵙⵏⵎⵎⵔ ⵜⵉⴳⵣⵉ ⵏ ⵓⵙⵎⵉⵜⵜⵔ ⴰⵎⴰⴹⵍⴰⵏ ⵏⵏⴰ ⵜⵙⵙⴽⵔ ⵍⵓⵏⵉⵙⴽⵓ ⵅⴼ ⵓⵙⵏⴰⵎ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ « ⵎⵛ, ⴰⵎⵎ ⵓⵢⵏⵏⴰ ⵎⵉ ⵜⵇⵇⴰⵔ ⵍⵓⵏⵉⵙⴽⵓ, ⴰⵏⵖⵎⵉⵙ ⵉⵇⵇⴰⵏ ⴰⴷ ⵢⴰⵖⵓⵍ ⵖⵔ ⴰⴷⴷⴰⴷ ⵏⵏⵙ ⵏ ⵓⴱⴰⵖⵓⵔ ⴰⴳⴷⵓⴷⴰⵏ, ⵜⴰⵖⴰⵎⵙⴰ ⵏ ⵜⵎⵢⴰⵎⴰⵏⵜ ⵉⵇⵇⴰⵏ ⵏ ⴰⴷ ⵜⴳ ⵜⴰⵣⵣⵓⵍⴰⵏⵜ ⴷ ⵜⴷⴰⵎⵙⴰⵏⵜ ⴳ ⵓⵙⴰⵢⵔⴰⵔ ⴰⵎⴰⵜⴰⵢ ⵏ ⵓⵙⵏⵖⵎⵙ ».
ⵜⵉⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⵎⴰⵜⴰⵢ ⵏⵏⴰ ⴷⴰ ⵉⵜⵜⵓⵙⵏⵎⴰⵍⴰⵏ ⴽⵓ ⴰⵙⴳⴳⵯⴰⵙ ⵙⴳ 2007, ⵜⵜⵓⵕⵥⵎⵏⵜ ⵙ ⵜⴳⵓⵔⵉⵡⵉⵏ ⵏ ⵜⵎⴰⵡⵙⴰⵙⵜ ⵜⴰⵍⴰⵎⵎⴰⵏⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⵎⴰⵙⵙⴰ ⴰⵏⵉⵍⵉⵏⴰ ⴱⵉⵔⴱⵓⴽⵜ ⴷ ⵎⴰⵙⵙ ⴱⵉⵜⵔ ⵍⵉⵎⴱⵓⵔⴳ, ⴰⵏⵎⵀⴰⵍ ⴰⵎⴰⵜⴰⵢ ⵏ ⴷⵓⵜⵛⵉ ⴼⵉⵍⵍⵉ. ⴰⵎⵓⵏ ⴳ ⴽⵉⴳⴰⵏ ⵏ ⵉⵔⵣⵣⵓⵜⵏ ⵏ ⵜⵉⵏⴰⵡⵜ ⴳ ⴽⵉⴳⴰⵏ ⵏ ⵉⵎⵓⵣⴰⵢ ⵉⵎⵏⵥⴰⵡⵏ, ⵉⵎⵙⵜⴳⴳⴰⵔⵏ ⵏ ⵍⵓⵏⵉⵙⴽⵓ ⴷ ⴽⵉⴳⴰⵏ ⵏ ⵉⵏⵖⵎⴰⵙⵏ ⵉⵎⵥⵍⴰⵢⵏ ⴳ ⵜⴻⵜⵉⴽⵏⵓⵍⵓⵊⵉⵢⵜ ⵏ ⵓⵏⵖⵎⵉⵙ.