ⴰⵙⴳⵎⴹ ⴳ ⴱⴰⴽⵓ ⵅⴼ ⵢⴰⵏ ⵓⵎⵇⵇⵓⵏ ⵏ ⵓⵎⵢⴰⵡⴰⵙ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵢⵉⴽⵏ ⵏⵏⵙ ⵉⴳⴰⵏ ⴰⵙⵇⵇⵉⵎ ⴰⵙⵍⵉⵥⵕ ⵏ ⴰⵣⵉⵔⴱⴰⵢⴷⵊⴰⵏ 17 ⴷⵓⵊⴰⵎⴱⵉⵔ 2024
ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵏ ⴰⵣⵉⵔⴱⴰⵢⴷⵊⴰⵏ ⵎⴰⵙⵙ ⵉⵙⵎⴰⵜ ⵙⴰⵜⵜⴰⵕⵓⴼ, ⵙⵙⴳⵎⴹⵏ ⴰⵙⵙ ⵏ 17 ⴷⵓⵊⴰⵎⴱⵉⵔ 2024 ⴳ ⴱⴰⴽⵓ ⵅⴼ ⵢⴰⵏ ⵓⵎⵇⵇⵓⵏ ⵏ ⵓⵎⵢⴰⵡⴰⵙ ⴳⵔ ⵜⵎⵔⵙⴰⵍ ⴰⴷ ⵏ ⵓⵙⵍⴳⵏ.
ⴰⵎⵇⵇⵓⵏ ⴰⴷ, ⵉⴳⴰⵏ ⴰⵎⵣⵡⴰⵔⵓ ⵏⵏⴰ ⵉⵙⴳⵎⴹ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵜⵜⴰ ⴷ ⵢⴰⵜ ⵜⵎⵔⵙⵍⵜ ⵏ ⵓⵙⵍⴳⵏ ⴳ ⵜⵎⵏⴰⴹⵜ ⵏ ⵍⴽⵓⴽⴰⵣ, ⵉⵙⵔⵙ ⵢⴰⵏ ⵓⵙⴰⵜⵉ ⵏ ⵜⵎⴷⵔⴰⵡⵜ ⵉⵚⴽⴰⵏ ⵅⴼ ⵜⴷⵉⵏⴰⵎⵉⵢⵜ ⵏ ⵓⵙⵏⵉⴼⵍ ⴰⵙⵉⵏⵔⴰⵏ ⴷ ⵓⵎⵛⴰⵡⴰⵕ ⴰⵙⵓⵍⴰⵏ ⴳ ⵓⵡⵜⵜⴰⵙ ⵏ ⵓⵙⴷⵓⵙ ⵏ ⵉⵣⴷⴰⵢⵏ ⵏ ⵓⵎⵢⴰⵡⴰⵙ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵍⴳⵏ ⵏ ⵓⵙⵏⵖⵎⵙ. ⵜⴰⵏⵜⴰⵎⵜ ⴰⴷ ⵜⵉⵡⵉ ⴷ ⵅⴼ ⵓⵙⵡⵓⵔⵉ ⵏ ⵢⴰⵜ ⵜⵎⵙⴽⵜⵉⵜ ⵉⵛⵛⴰⵔⵏ ⵏ ⵓⵙⵎⵓⵜⵜⴳ ⴰⵙⵓⵍⴰⵏ ⴷ ⵓⵙⵏⵉⴼⵍ ⵏ ⵉⵔⵣⴰⴼⵏ ⵉⵣⵣⵓⵍⴰⵏⵏ ⵉⵣⴷⵉⵏ ⵙ ⵜⵏⴽⵔⴰ ⵙ ⵉⵎⴰⵙⵙⵏ ⴷ ⵜⵖⴰⵔⴰⵙⵉⵏ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴷ ⵜⵏⴰⵎⵉⵜ ⵏⵏⵙⵏ ⵉ ⵉⵎⵓⵜⵜⵓⵢⵏ ⵉⵎⵇⵔⴰⵏⵏ ⵏ ⵜⵡⵏⵏⴰⴹⵉⵏ ⵜⵉⵙⵍⵉⵥⵕⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ.
ⵉⵡⵏⴰⵏ ⵏ ⵜⴼⵓⴳⵍⴰ ⵏ ⵓⵙⴳⵎⴰⴹ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⴰⵙⴷⵓⵙ ⵏ ⵉⵙⵏⵉⴼⵉⵍⵏ ⴷ ⵉⵎⵎⵣⴷⴰⵢⵏ ⵉⵣⵣⵓⵍⴰⵏⵏ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⵏ ⵓⵙⵍⴳⵏ (ⵀⴰⴽⴰ) ⴷ (ⴰⴽⵔⴰ) ⵢⵓⵙⴰ ⴷ ⴳ ⵢⴰⵏ ⵓⵎⵏⴰⴹ ⵏ ⵓⵙⵎⴰⵜⴰⵢ ⵏ ⵓⵙⴰⵢⵔⴰⵔ ⴰⵙⵏⵖⵎⴰⵙ ⴷ ⵜⵍⴰⵍⵉⵜ ⵏ ⵢⵉⴹⵉⵙ ⵏ ⵉⵡⵔⵉⴽⵏ ⵉⵜⵉⴽⵏⵓⵍⵓⵊⵉⵢⵏ ⴳ ⵜⵉⴳⴰⵡⵜ ⵓⵔ ⵉⵍⵉⵏ ⵉⵡⵜⵜⴰⵙ ⴷ ⵜⵣⵎⵔⵜ ⵜⴰⵅⴰⵜⴰⵔⵜ ⵏ ⵓⴳⴰⴷⴰⵣ; ⴰⵢⴰ ⴰⵢ ⵢⵉⵡⵉⵏ ⵜⴰⴳⵔⴰⵡⵜ ⵏ ⵉⵙⵍⴳⴰⵏⵏ ⴳ ⵓⵎⴰⴹⴰⵍ ⴰⴷ ⵜⵙⴳⵓⵜ ⴳ ⵉⵙⵡⵉⵏⴳⵎⵏ ⵉⵎⴳⵔⴰ.
ⵜⵙⵙⴽⵜⵉ ⴷ ⵎⴰⵙⵙⴰ ⴰⵅⴰⵔⴱⴰⵛ ⵏⵜⵜⴰⵜ ⴷ ⵢⵉⴽⵏ ⵏⵏⵙ ⴰⵣⵉⵔⵉ ⵉⵙ ⵜⵉⵎⵍⴷⵉⵡⵉⵏ ⵏ ⵓⵎⵛⴰⵡⴰⵕ ⴷ ⵓⵎⵢⴰⵡⴰⵙ ⴳⵔ ⵙⵏⴰⵜ ⵜⵎⵔⵙⴰⵍ ⴽⴽⴰⵏⵜ ⴰⵡⴷ ⴳ ⵓⵙⴰⵜⵉ ⵏ ⵓⵙⴳⵔⴰⵡ ⵏ ⵉⵙⵍⴳⴰⵏⵏ ⵉⵙⵍⵉⵥⵕⵏ ⵏ ⵜⵎⵓⵔⴰ ⵜⵉⴳⵎⴰⵎⵉⵏ ⵏ ⵓⵙⵏⵎⴰⵍⴰ ⵏ ⵓⵎⵢⴰⵡⴰⵙ ⴰⵏⵙⵍⵎ. ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵜⵜⴰ ⴷ (ⴰⴽⵔⴰ) ⵎⵙⴰⵙⴰⵏ ⴰⴽⴷ ⵜⵉⵎⵔⵙⴰⵍ ⵢⴰⴹⵏ ⵏ ⵜⵙⵉⵍⴰ ⵢⴰⴷ ⵅⴼ ⴽⵉⴳⴰⵏ ⵏ ⵜⵎⵙⴰⵍ ⵉⵣⴷⵉⵏ ⵙ ⵓⵙⴷⵓⵙ ⵏ ⵓⵙⴰⵢⵔⴰⵔ ⴰⵙⵏⵖⵎⴰⵙ ⴰⵎⴰⵜⴰⵢ ⵏ ⵡⴰⵍⴰⵙⵏ ⵉⵜⵜⴼⴹⴰⵃⵏ ⴷ ⵉⵏⴰⵡⵏ ⵎⴳⴰⵍ ⵍⵉⵙⵍⴰⵎ ⴷ ⵢⵉⴹⵉⵙ ⵏ ⵡⴰⵜⵉⴳⵏ ⵏ ⵜⵓⴷⵔⵜ ⵜⴰⵎⴷⵔⴰⵡⵜ ⴷ ⵓⵎⵢⴰⵏⴰⵡ ⴰⵏⴼⴳⴰⵏ ⴷ ⵓⴷⵍⵙⴰⵏ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ ⴳ ⴱⴰⴽⵓ, ⵜⴰⵎⵓ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵢⴰⵜ ⵜⵉⵏⴰⵡⵜ ⵜⴳⵔⴰⵖⵍⴰⵏⵜ ⵅⴼ ⵉⵎⵙⴰⵔⴰⵙⵏ ⵉⵎⴰⵢⵏⵓⵜⵏ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵉⵏⵖⵎⵉⵙⵏ, ⴰⴽⴰⴱⴰⵕ ⴰⵎⵖⵔⴰⴱⵉ ⵉⵍⵍⴰ ⴷⵉⴳⵙ ⴰⵡⴷ ⵎⴰⵙⵙ ⵄⴰⴱⴷⵍⵍⴰⵟⵉⴼ ⵄⴰⴷⵉⵍ ⴱⵏⵃⴰⵎⵣⴰ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵔⵉⵇ ⴽⴰⵔⵉⵎⵉ, ⴰⵙⴰⵜⵉ ⴰⵎⴰⵜⵜⴰⵢ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ.