ⵉⵍⵓⵍⴰ ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵓⴹⴰⵀⵉⵔ ⴰⴳⵍⴷⴰⵏ ⵓⵟⵟⵓⵏ 1-02-212 ⵏ ⵡⴰⵙⵙ 31 ⵖⵓⵛⵜ 2002, ⵢⴰⴷⵉⴼ ⴳ ⴷⴷⵓⵙⵜⵓⵔ ⴰⵙⴳⴳⵯⴰⵙ ⵏ 2011.

ⵉⴳⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵙ ⵓⵢⵏⵏⴰ ⵉⵍⵍⴰⵏ ⴳ ⵓⵙⵍⴳⵏ ⵓⵟⵟⵓⵏ 11-15, ⵜⵉⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵜⴰⵙⵉⵎⴰⵏⵜ ⵢⵓⴳⴳⴰⵏ ⵅⴼ ⵓⵙⵍⴳⵏ ⵏ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵔ ⵉⵜⵜⴰⴳⴰ ⵅⴼ ⵓⴼⵔⴰⴳ ⵏ ⴰⴷ ⵜⴳ ⵜⵍⴻⵍⵍⵉ ⴳ ⵜⵎⵙⴽⵔⵜ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵎⵏⵣⴰⵢ ⴰⴷⵙⵍⴰⵏ.

ⴰⵔ ⵜⵜⴰⴳⴳⴰ ⴷⵉⵖ ⵅⴼ ⵓⵣⵔⴰⴽ ⵏ ⵜⵎⴰⴳⵓⵜ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⴷ ⵜⵙⵔⵜⵉⵜ ⵏ ⵡⴰⵎⵓⵏ ⴰⵎⵖⵔⴰⴱⵉ, ⴷ ⵓⵡⵏⵏⵉ ⴰⵎⴰⴳⵓⵜ ⵏ ⵉⵎⵣⴰⵣⵏ ⵏ ⵜⴰⵏⵏⴰⵢⵜ ⴷ ⵜⵡⵏⴳⵉⵎⵜ, ⴷ ⵓⵣⵔⴼ ⴳ ⵓⵏⵖⵎⵉⵙ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⴰⵢⴰ, ⴰⴳⵓⵏⵙ ⵏ ⵓⵙⴰⵜⵉ ⵏ ⵓⵣⵔⴰⴽ ⵏ ⵡⴰⵜⵉⴳⵏ ⵉⵖⵔⵎⴰⵏⵏ ⵉⴷⵙⵍⴰⵏⵏ ⴷ ⵉⵍⵓⴳⵏⵏ ⵏ ⵜⴳⵍⴷⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵢⵏⵏⴰ ⵉⵍⵍⴰⵏ ⴳ ⴷⴷⵓⵙⵜⵓⵔ ⵙ ⵓⴱⵔⵉⴷ ⵏ ⵉⵎⴰⵙⵙⵏ ⵉⵙⵍⵉⵥⵉⵕⵏ ⵉⵙⵉⵎⴰⵏⵏ ⵉⵣⵔⵔⴽⵏ ⵉⵎⵏⵣⴰⵢⵏ ⵏ ⵓⵙⵏⴱⴹ ⵉⵖⵓⴷⴰⵏ.

ⵉⵙⵏⵉ ⵓⴳⵔⴰⵡ ⴰⵎⴰⵜⵜⴰⵢ ⵙ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵏⴰ ⵉⴳⴰⵏ ⴰⵍⵍⴰⵍ ⵉⵎⵉⵍⵖ, ⴷ ⵜⵎⵀⵍⴰ ⵜⴰⵎⴰⵜⵜⴰⵢⵜ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵏⴰ ⵉⴳⴰⵏ ⴰⵍⵍⴰⵍ ⴰⵎⵙⵙⵓⴳⵓⵔ ⴷ ⴰⵜⵉⵇⵏⵉ.