ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵙ ⵢⴰⵏ ⵓⴽⴰⴱⴰⵕ ⴳ ⵜⵍⵍⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⴷ ⵎⴰⵙⵙ ⴰⵎⵉⵏ ⵍⴱⵓⵄⵣⵣⴰⵡⵉ, ⴰⵙⴰⵜⵉ ⴰⵅⴰⵜⴰⵔ ⴳ ⵜⵏⵎⵀⴰⵍⵜ ⵏ ⵓⵎⵢⴰⵡⴰⵙ ⴰⵎⴰⴹⵍⴰⵏ, ⴳ ⵜⵡⵓⵔⵉⵡⵉⵏ ⵏ ⵜⵙⵇⵇⴰⵢⵎⵓⵜ ⵏⵏⴰ ⵜⵙⵏⵎⴰⵍⴰ ⵜⵏⵎⵍⴰⵢⵜ ⵜⴰⵎⴰⴹⵍⴰⵏⵜ ⵏ ⵜⴼⵕⵓⵏⴽⵓⴼⵓⵏⵉⵜ ⵅⴼ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ, ⴰⵙⵙ ⵏ 21 ⴼⴱⵕⴰⵢⵕ 2023 ⴳ ⵓⵙⵇⵇⵉⵎ ⵏ ⵜⵏⵎⵍⴰⵢⵜ ⴳ ⴱⴰⵔⵉⵣ.

ⴰⵎⴰⴳⵔ ⴰⴷ ⵉⵜⵜⵓⵙⴽⵔⵏ ⴰⴼⴰⴷ ⴰⴷ ⵉⵙⵙⵓⵊⴷ ⵉ ⵓⴳⵔⴰⵡ ⴰⴳⵔⴰⵖⵍⴰⵏ ⵏ ⵍⵢⵓⵏⵉⵙⴽⵓ « ⴳ ⵓⵡⵜⵜⴰⵙ ⵏ ⵍⴰⵏⵜⵉⵔⵏⵉⵜ ⵏ ⵜⵎⵢⵉⵎⴰⵏⵜ : ⴳ ⵓⴱⵔⵉⴷ ⵏ ⵉⵎⵏⵣⴰⵢ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⴳ ⵓⵡⵜⵜⴰⵙ ⵏ ⵢⴰⵏ ⵓⵙⵏⵖⵎⵙ ⵉⴳⴰⵏ ⴰⵢⵍⴰ ⴰⵎⴰⵜⴰⵢ », ⴰⵎⴰⴳⵔ ⴰⴷ ⴰⵎⵓⵏⵜ ⴷⵉⴳⵙ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵏ ⵓⵙⵏⵖⵎⵙ, ⵉⵎⵓⵣⴰⵢ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ ⴷ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵙⵎⵓⵙⵓⵜⵏ ⴳ ⵢⵉⴳⵔ ⵏ ⵓⵏⴱⴰⴹ ⵏ ⵢⵙⴰⵢⵔⴰⵔ ⴰⵎⵓⵟⵟⵓⵏ.

ⵉⵡⵏⴰⵏ ⵏ ⵜⴳⵓⵔⵉ ⵏⵏⵙ, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉⵙ « ⴰⵍⵎⴰⴷ ⵏ ⵜⵏⵎⵓⵔⵉ ⵜⴰⵎⵓⵟⵟⵓⵏⵜ ⵙ ⵉⵎⴰⵙⵙⵏ ⵉⵙⵏⵖⵎⴰⵙⵏ ⵔⴰⴷ ⵢⴰⵡⵙ ⵉⵎⵙⵡⵓⵔⴰ ⴰⴷ ⴰⵎⵓⵏ ⵙ ⵡⵓⴷⵎ ⵉⵕⵡⴰⵏ ⴳ ⵓⵙⵏⴰⵎ ⵉⵛⵛⴰⵔⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ, ⴷ ⵓⵙⴷⵓⵙ ⵏ ⵓⵙⵡⵓⵔⵉ ⵉⵚⴽⴰⵏ ⵅⴼ ⵉⵎⵏⵣⴰⵢ ⵏ ⵜⴷⵉⵎⵓⵇⵔⴰⵜⵉⵜ ⴷ ⵓⵍⵜⴰⵖ ⵓⵖⵔⵉⵎ ⴷ ⵜⵓⴷⵔⵜ ⵉⵛⵛⴰⵔⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⵓⵟⵟⵓⵏ ⴰⵎⴰⵢⵏⵓ ».

ⵜⵔⵏⵓ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵏⵏⴰ ⵉⵙ ⵏ ⵉⵇⵇⴰⵏ ⴰⴷ ⵏⵙⵡⵓⵔⵉ ⵓⴳⴰⵔ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵙⵓⵎⵓ ⵏ ⵜⵙⵓⵜⵉⵡⵉⵏ ⴷ ⵡⴰⵎⵓⵏ ⴳ ⵢⵉⴳⵔ ⵏ ⵜⵓⵙⵙⵏⴰ ⵜⴰⵙⵏⵖⵎⴰⵙⵜ ⴷ ⵜⵎⵓⵟⵟⵓⵏⵜ, ⵜⵔⵏⵓ ⵜⵏⵏⴰ : « ⵎⴽ ⵉⴳⴰ ⵓⵙⵏⵖⵎⵙ ⴰⵢⵍⴰ ⴰⵎⴰⵜⴰⵢ, ⵀⴰⵏ ⵜⵓⵙⵙⵏⴰ ⵜⴰⵙⵖⵎⵙⴰⵏⵜ ⵜⴰⵎⵓⵟⵟⵓⵏⵜ ⵜⴳⴰ ⵢⴰⵏ ⴳ ⵉⵣⵓⵛⵛⴰⵍ ⵏ ⵉⵣⵔⴼⴰⵏ ⵏ ⵓⵎⴷⴰⵏ ⵏⵏⴰ ⵎⵉ ⵉⵇⵇⴰⵏ ⴰⴷ ⵜⵔⴰⵔ ⵜⵏⴱⴰⴹⵜ ⵜⴰⵖⴹⴼⵜ.

ⴳ ⵜⴳⵉⵔⴰ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⴰⵢⵎⵓⵜ ⴰⴷ, ⵜⵢⴰⵔⴰⵏⵜ ⴽⵉⴳⴰⵏ ⵏ ⵜⵖⵍⴰⴼ ⴰⴼⴰⴷ ⴰⴷ ⵉⵍⵉⵏⵜ ⴳ ⵜⵏⵜⴰⵎⵜ ⵏ ⵍⵓⵏⵉⵙⴽⵓ ⵉⵥⵍⵉⵏ ⵙ ⵉⵎⵏⵣⴰⵢ ⵉⵎⵙⵙⴼⴰⵡⵏ ⵏ ⵓⵙⵏⴰⵎ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⴳ ⵓⵡⵜⵜⴰⵙ ⵏ ⵢⴰⵏ ⵓⵙⵏⵖⵎⵙ ⵉⴳⴰⵏ ⴰⵢⵍⴰ ⴰⵎⴰⵜⴰⵢ.
ⵣⴷⵉⵏⵜ ⵜⵖⵍⴰⴼ ⴰⴷ ⴷ ⵜⵎⵙⴰⵍⵉⵏ ⵏ ⵜⵙⵏⵉⵎⴰⵏⵜ ⵏ ⵉⴳⵔⴰⵡⵏ ⵏ ⵓⵙⵏⴰⵎ, ⵓⵖⵓⴷ ⵏ ⵉⵙⵜⴰⵢⵏ, ⵜⵓⵙⵙⵏⴰ ⵜⴰⵙⵏⵖⵎⴰⵙⵜ ⴷ ⵜⵎⵓⵟⵟⵓⵏⵜ ⴷ ⵓⴼⵔⴰⴳ ⵏ ⵉⵎⵙⵡⵓⵔⴰ.