ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵙⵣⵉⵣⵣⵍ ⵏ 16 ⵏ ⵡⵓⵙⵙⴰⵏ ⵏ ⵓⵙⵎⵓⵙⵙⵓ ⵎⴳⴰⵍ ⵜⵉⴽⵕⴹⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⴷ ⵜⵛⵉⵔⵔⴰⵜⵉⵏ, ⵏⵏⴰ ⵙⵏⵎⴰⵍⴰⵏⵜ ⴰⵙⴳⴳⵯⴰⵙ ⴰⴷ ⵜⵎⵜⵜⵉⵏ ⵎⵓⵏⵉⵏ ⵏ ⵜⵎⵖⴰⵔⵉⵏ ⴷⴷⴰⵡ ⵜⵥⵓⴳⴰⵢⵜ « ⵏⵎⵓⵏ ⴰⴽⴽⵯ ! ⴰⴼⵔⴰⴳ ⵎⴳⴰⵍ ⵜⵉⴽⵕⴹⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⴷ ⵜⵛⵉⵔⵔⴰⵜⵉⵏ ». ⴰⵎⵣⵉⵣⵣⵍ ⵏ ⵓⵙⵎⵓⵙⵙⵓ ⵉⵙⵙⵏⵜⵉ ⴰⵙⵙ ⵏ 25 ⵏⵓⵡⴰⵏⴱⵉⵔ, ⴰⵙⵙ ⴰⴳⵔⴰⵖⵍⴰⵏ ⵏ ⵡⵓⴽⵓⵙ ⵏ ⵜⴽⵔⴹⵉ ⵎⴳⴰⵍ ⵜⵉⵎⵖⴰⵔⵉⵏ, ⴰⵎⵣⵉⵣⵣⵍ ⴰⴷ ⵔⴰⴷ ⵉⵎⴷⵓ ⴰⵙⵙ ⵏ 10 ⴷⵓⵊⴰⵎⴱⵉⵔ, ⴰⵙⵙ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⵎⴷⴰⵏ.

ⵜⴰⵥⵕⵉⴳⵜ ⵏ 2023 ⵏ ⵓⵎⵣⵉⵣⵣⵍ ⴰⴷ ⵏ ⵜⵎⵜⵜⵉⵏ ⵎⵓⵏⵉⵏ ⵉⵚⴽⴰ ⵅⴼ ⵓⵙⵎⵓⵙⵙⵓ ⵅⴼ ⵜⵎⵓⴽⵔⵉⵙⵜ ⵏ ⵓⵙⵥⵕⴼ ⵉⵜⵜⵓⵡⴰⵍⴰⵏ ⵉ ⵓⵎⵏⵏⵓⵖ ⵎⴳⴰⵍ ⵜⴰⴽⵕⴷⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ. ⴰⵙⴳⵓⵎ ⴰⴷ ⵉⵍⵍⴰ ⵉⴳⴰ ⴰⵎⵣⵡⴰⵔⵓ ⵖⵓⵔ ⵓⴳⵔⴰⵡ ⵏ  ⵜⵎⵙⵓⵜⵍⵜ ⵏ ⵜⵎⵖⴰⵔⵜ ⵏⵏⴰ ⵜⵥⵕⴰ ⵉⵙ ⵉⵇⴰⵏ ⴰⴷ ⵜⵙⵎⵓⵙⵙ « ⵜⴰⵙⴽⵔⴰⵡⵜ ⵏ ⵓⵙⵉⴽⵙⵍ ⴼⵔ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⴷ ⵜⵙⵉⵎⴰⵏⵉⵜ ⵏ ⵜⵎⵖⴰⵔⵉⵏ ⴰⴽⴽⵯ ⴷ ⵜⵛⵉⵔⵔⴰⵜⵉⵏ ⵙ ⵓⵎⵏⵏⵓⵖ ⵎⴳⴰⵍ ⴰⵥⵍⴰⴹ ⴷ ⵓⵙⴷⵓⵙ ⵏ ⵜⵎⵔⵙⴰⵍ ⴷ ⵓⵙⵥⵕⴼ ⴰⴳⵓⵏⵙ ⵏ ⵢⴰⵏ ⵓⵎⵏⵉⴷ ⵏ ⵓⵙⵉⴽⵙⵍ ⴳⵔ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ».

ⴰⵙⵎⵓⵙⵙⵓ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵙⴰⵜⵉ ⵏ ⵓⵎⵣⵉⵣⵣⵍ ⴰⴷ ⵏ ⵜⵎⵜⵜⵉⵏ ⵎⵓⵏⵉⵏ ⴷⴰ ⵉⵙⵙⴽⴰⵏ ⵜⴰⵎⵔⵉⵙⵜ ⵏⵏⵙ ⵜⴰⵙⵓⵍⴰⵏⵜ ⴳ ⵓⴱⵖⵓⵔ ⵏ ⵓⵙⵉⴽⵙⵍ ⵏ ⵉⵏⵎⵓⵔⵉⵏ ⴳ ⵓⵙⴰⵜⵉ ⵏ ⵜⵎⴰⵙⴰⵢⵜ ⵏⵏⵙ ⵜⴰⵎⵔⵙⴰⵍⵜ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵜⴷⵍⵙⴰⵏ ⵓⵙⵉⴽⵙⵍ ⴷ ⵓⵙⵙⵓⵎⵓ ⴷ ⵓⵎⵏⵏⵓⵖ ⵎⴳⴰⵍ ⴰⵏⴰⵡⵏ ⴰⴽⴽⵯ ⵏ ⵓⵙⵏⵓⵃⵢⵓ ⴷ ⵜⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵉⵙⵙⴷⵔⵉⵙⵏ ⴳ ⵡⴰⵜⵉⴳ ⴷ ⵡⵓⴷⴷⵓⵔ ⵏ ⵜⵎⵖⴰⵔⵉⵏ.

ⵜⴰⵎⵓ ⵜⵎⵔⵙⵍⵜ ⵏ ⵓⵙⵍⴳⵏ ⴳ ⵓⵎⵣⵉⵣⵣⵍ ⴰⴷ ⵙ ⵢⵉⵡⵙ ⵏⵏⵙ ⵉ ⵉⵣⵎⵓⵣⵣⴰ ⵉⵅⴰⵜⴰⵔⵏ ⵏⵏⴰ ⵙⵏⵎⴰⵍⴰⵏⵜ ⵙ ⵓⵣⵎⵣⵣⵓ ⵢⴰⴷ  ⵜⵎⵜⵜⵉⵏ ⵎⵓⵏⵉⵏ ⵏ ⵜⵎⵖⴰⵔⵉⵏ, ⵙ ⵜⵎⴷⵔⴰⵡⵜ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ, ⵙ ⵓⵥⵕⴰⴳ ⵏ ⵜⴱⵔⴰⵜⵉⵏ ⴷ ⵉⵙⴼⴽⴰ ⵏ ⵓⵎⵣⵉⵣⵣⵍ ⵉⵣⴷⵉⵏ ⵙ ⵡⴰⵏⴰⵡⵏ ⴷ ⵡⵓⵖⵓⵍⵏ ⵏ ⵜⴽⵕⴷⵉⵡⵉⵏ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ ⵙ ⵓⵙⴽⴰⵏ ⵏ ⵉⵖⵎⵉ ⴰⵍⵜⵛⵉⵏ ⵉⴳⴰⵏ ⵜⴰⵎⴰⵜⴰⵔⵜ ⵏ ⵓⵎⵣⵉⵣⵣⵍ ⴰⴷ ⴰⴳⵔⴰⵖⵍⴰⵏ.