“ⵜⴰⵡⴰⵍⵉⵜ ⴷ ⵜⵉⴳⵯⵜ ⵏ ⵉⵎⵉⵣⴰⵏ ⵉⵎⵓⵟⵟⵓⵏⵏ ⵢⵉⵡⴹ ⵢⴰⵜ ⵜⵉⵣⵉ ⴳ ⵡⴰⵎⵓⵏⵏ ⴰⴽⴽⵯ ⴳ ⵏ ⵉⵇⵇⴰⵏ ⴰⴷ ⵢⵉⵍⵉ ⵓⵎⵙⴰⵡⴰⵍ ⴰⴽⴷ ⵜⵉⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⴳ ⵓⴱⵔⵉⴷ ⵏ ⵜⵎⵙⵜⴳⴳⴰⵔⵜ ⴷ ⵜⵎⵔⵉⵙⵉⵏ ⵜⵉⵙⵉⵍⴰⵡⵉⵏ ⵙⴳ ⵖⵓⵔ ⵉⵎⵡⵓⵔⴰ ⵏ ⵜⴻⵜⵉⴽⵏⵓⵍⵓⴳⵉⵜ ⵜⴰⵅⴰⵜⴰⵔⵜ” ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 27 ⵢⵏⵏⴰⵢⵔ 2025 ⴳ ⵜⵙⵓⵜⵍⵜ ⵜⵉⵙⵙ 8 ⵏ ⵜⵉⵏⴰⵡⵜ ⵏ ⵉⵏⵙⵙⵉⵅⴼⵏ ⵏ ⵓⵥⵟⵟⴰ ⴰⴼⵔⴰⵏⴽⵓⴼⵓⵏⵉ ⵏ ⵉⵙⵍⴳⴰⵏⵏ ⵏ ⵓⵙⵏⵖⵎⵙ (REFRAM) ⵉⵜⵜⵓⵙⵏⵎⴰⵍⴰⵏ ⵓⵙⵙⴰⵏ ⵏ 27 ⴷ 28 ⵢⵏⵏⴰⵢⵔ ⴳ ⴹⴰⴽⴰⵕ. “ⵜⵉⵎⵔⵓⵔⵉⵏ ⵜⵉⴽⵎⴰⵎⵉⵏ ⴷ ⵜⵎⵔⵉⵙⵉⵏ ⵉⵥⵍⵉⵏ ⴰⵢ ⵏ ⵉⵇⵇⴰⵏⵏ ⵜⵉⵙⵉⵍⴰⵡⵉⵏ ⴰⴼⴰⴷ ⴰⴷ ⴹⵎⵏⵏⵜ ⵢⴰⵏ ⵓⵙⵍⴳⵏ ⴰⵙⵉⵎⴰⵏ ⴷ ⵢⴰⵏ ⵓⵙⵍⴳⵏ ⵉⵕⵡⴰⵏ ⵉⴼⵔⵔⴳⵏ ⵉ ⵉⵎⵙⵡⵓⵔⴰ ⴰⵔ ⵉⵜⵜⵔⴰⵔ ⵅⴼ ⵜⵏⵥⵕⵉⵏ ⵉⵣⴷⵉⵏ ⵙ ⵜⵙⵉⵎⴰⵏⵜ ⵜⴰⵎⵓⵟⵟⵓⵏⵜ ⴷ ⵜⵖⴰⵔⵉⵡⵉⵏ ⵏ ⵜⴻⵜⵉⴽⵏⵓⵍⵓⵊⵉⵜ ⴳⵔ ⵉⵎⵙⵍⴳⵏⵏ ⴳ ⵜⵎⵓⵔⴰ ⴰⴽⴽⵯ  ⵙ ⵉⵎⵥⵍⵉ ⵜⴰⴼⵔⵉⵇⵜ” ⴰⵢ ⵜⵔⵏⴰ ⵜⵎⵙⴰⵢⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵉⵙⴰⵡⵍⵏ ⵉⵡⵏⴰⵏ ⵏ ⵜⵙⵓⵜⵍⵜ ⵉⵥⵍⵉⵏ ⵉ ⵓⴹⴼⴼⵓⵕ ⵏ ⵓⵎⵙⴰⵡⴰⵍ ⴳⵔ ⵉⵎⵙⵍⴳⵏⵏ ⵏ ⵓⵙⴰⵢⵔⴰⵔ ⴰⴼⵔⴰⵏⴽⵓⴼⵓⵏ ⴷ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ, ⵉⵜⵜⵓⵙⵖⵉⵡⵙⵏ ⴳ ⵓⵙⴰⵜⵉ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵙⵍⴳⵏ ⵏ ⵓⵙⵍⵉⵥⵕ ⵏ ⵙⵉⵏⵉⴳⴰⵍ ⵙ ⵓⵣⵡⵍ ⵏ ⵜⵎⵙⵙⴽⵜⵉⵜ ⵏ REFRAM ⵏⵏⴰ ⵉⵙⵎⵓⵏⵏ ⵉⵏⵙⵙⵉⵅⴼⵏ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⵏ ⵎⵔⴰⵡ ⴷ ⵙⵎⵎⵓⵙ ⵏ ⵜⵎⵓⵔⴰ.
ⵜⴱⴷⵔ ⴽⵔⴰ ⵏ ⵉⵏⵖⵎⵉⵙⵏ ⵏ ⵉⵅⴰⵜⴰⵔⵏ ⵏ ⵓⵎⵓⵟⵟⵓⵏ ⴳ ⵍⵍⴰⵏ ⵡⵉⵏⵏⴰ ⵉⵙⵙⴷⵔⵙⵏ ⵉⵍⵓⴳⵏⵏ ⵏⵏⵙⵏ ⵉⵣⴷⵉⵏ ⵙ ⵜⵓⵎⴰⵢⵉⵏ ⴼⵍⵏ ⵉⵏⴳⵔⴰⵡ ⵏⵏⵙⵏ ⴰⵣⵣⵔⴰⵢ ⵅⴼ ⵉⵏⵖⵎⵉⵙⵏ ⵏⵏⴰ ⵙⵡⵓⵔⵉⵏ ⵉⵏⵖⵎⴰⵙⵏ ⵉⵣⵣⵓⵍⴰⵏⵏ ⴷ ⵉⵎⵓⵣⴰⵢ,  ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ “ⵜⴰⵖⵜⵙⵜ ⴰⴷ ⵜⵣⴷⵉ ⴷⵖⵉ ⵙ ⵓⴳⴰⴷⴰⵣ ⵏ ⵎⴰⵔⵉⴽⴰⵏ, ⵎⴰⵛⴰ ⵔⴰⴷ ⵜⴰⵡⴹ ⴰⴽⴽⵯ ⵜⵉⵙⴳⴳⵯⵉⵏ ⵏ ⵓⵎⴰⴹⴰⵍ ⵙ ⵉⵎⵉⵣⴰⵏ ⵏ ⵜⵕⵓⵥⵉ ⵏ ⵉⵍⵓⴳⵏⵏ ⵉⵎⴰⵜⴰⵢⵏ ⴳ ⵢⵉⴳⵔ ⵏ ⵜⵖⵢⴰⵙⵜ ⵏ ⵜⵓⵎⴰⵢⵉⵏ”.
“ⵜⴰⵎⴰⵙⵙⵉⵜ ⴰⴷ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⴹⵍⴰⵏⵉⵏ ⵉⵔⴰⵏ ⴰⴷ ⵉⴼⵔⴳ ⵉ ⵡⴰⵢⵍⴰ ⵏⵏⵙⵏⵜ ⴰⴷⴰⵎⵙⴰⵏ ⵙ ⵓⵙⵎⵓⵜⵜⵢ ⵏ ⵜⵙⵔⵜⵉⵜ ⵏⵏⵙⵏⵜ ⵙ ⵓⵢⵏⵏⴰ ⵉⵏⵎⵏ ⴷ ⵜⴰⵙⵙⴰⵙⵜ ⵜⴰⵙⵔⵜⴰⵏⵜ ⴷ ⵜⴷⴰⵎⵙⴰⵏⵜ ⵏ ⵉⵎⵏⴰⴹⵏ ⵉⴷⵖⵔⴰⵏⵏ ⵉⵖⵉⵢ ⴰⴷ ⵉⴹⵕⵕⵓ ⵙ ⵉⵣⵔⴼⴰⵏ ⵏ ⵉⵎⵙⵡⵓⵔⴰ ⴳ ⴽⵉⴳⴰⵏ ⵏ ⵜⵙⴳⴳⵯⵉⵏ ⵏ ⵓⵎⴰⴹⴰⵍ ⴰⵎ ⵓⵎⵏⵥⴰⵡ ⴰⴼⵔⵉⵇ” ⴰⵢ ⵜⵔⵏⴰ ⵎⴰⵙⵙⴰ ⴰⵅⴰⵔⴱⴰⵛ. ⵜⵙⵙⴽⵜⵉ ⴷ ⴷⵉⵖ ⵉⵙ “ⴰⵥⵟⵟⴰ ⴰⴼⵕⴰⵏⴽⵓⴼⵓⵏ ⴰⵎ ⵓⵥⵟⵟⴰ ⴰⴼⵔⵉⵇ ⵏ ⵉⵎⵙⵍⴳⵏⵏ ⵏ ⵓⵙⵏⵖⵎⵙ ⵉⵇⵇⴰⵏ ⵜⵏ ⴰⴷ ⵎⵓⵏⵏ ⴷ ⵜⵙⴰⵍⵉⵡⵉⵏ ⵜⵉⵎⵓⵟⵜⵓⵏⵉⵏ ⴰⵔ ⵢⴰⵜ ⵜⵎⵔⵉⵙⵜ ⵜⴰⵎⵇⵔⴰⵏⵜ ⵏ ⵓⵎⵏⵏⵓⵖ ⵎⴳⴰⵍ ⵉⵅⵕⵕⵉⵇⵏ ⴷ ⵓⴼⴹⴰⵃ ⵏ ⵜⵙⵔⵜⵉⵜ ⵏ ⵙⵉⵏ ⵡⴰⵍⵓⴳⵏ ⵏⵏⴰ ⴷⴰ ⵉⵜⵜⵓⵙⴽⴰⵔⵏ ⴳ ⴽⵉⴳⴰⵏ ⵏ ⵉⵙⵡⵉⵔⵏ: ⴰⵙⵎⴷⵢⴰ ⵓⵣⵔⵉⴳ ⴳ ⴽⵉⴳⴰⵏ ⵏ ⵜⵎⵓⵔⴰ, ⵉⵎⴰⵙⵙⵏ ⵉⵜⵜⵓⴼⴽⴰⵏ ⵉ ⵜⵖⵢⴰⵙⵜ, ⴰⵙⵡⵓⵔⵉ ⵏ ⵜⵓⵜⵍⴰⵢⵉⵏ ⵜⵉⴷⵖⵔⴰⵏⵉⵏ ⵙ ⵉⵎⵥⵍⵉ ⴳ ⵜⴼⵔⵉⵇⵜ...ⴰⵜⴳ.”
ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⴳⵉⵔⴰ ⵏ ⵡⴰⵡⴰⵍ ⵏⵏⵙ ⵉⵙ ⵏ ⵉⵇⵇⴰⵏ ⴰⴷ ⵜⵉⵍⵉ ⵢⴰⵜ ⵜⵎⵙⵜⴳⴳⴰⵔⵜ ⵜⴰⵅⴰⵜⴰⵔⵜ ⵏ ⵜⵙⴰⵍⵉⵡⵉⵏ ⵜⵉⵅⴰⵜⴰⵔⵉⵏ ⴳ ⵓⵙⴰⵜⵉ ⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵎⴰⵜⴰⵢⵜ ⴷ ⵜⵉⴳⴰⵡⵜ ⵏ ⴽⵉⴳⴰⵏ ⵏ ⵜⵙⴳⴳⵯⵉⵏ ⴳ ⵢⵉⴳⵔ ⵏ ⵓⵙⵍⴳⵏ ⴰⵎⵓⵟⵟⵓⵏ.
ⴳ ⵜⴳⵉⵔⴰ ⵏ ⵜⵉⵏⴰⵡⵜ ⴰⴷ, ⵙ ⵓⵢⵏⵏⴰ ⵉⵏⵎⴷ ⴷ ⵉⵍⵓⴳⵏⵏ ⵏ REFRAM, ⵉⵜⵜⵓⵙⴽⵔ ⵢⴰⵏ ⵓⵣⵣⵔⴰⵢ ⵏ ⵜⵏⴱⴰⴹⵜ ⴳⵔ ⵓⵏⵙⵙⵉⵅⴼ ⵏ ⵓⴳⵔⴰⵡ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵎⵓⵟⵟⵓⵏ ⵏ ⴼⵕⴰⵏⵙⴰ, ⵎⴰⵙⵙ ⵕⵓⵛ-ⵓⵍⵉⴼⵉⵢⵉ ⵎⴰⵢⵙⵜⵔ, ⴰⵏⵙⵙⵉⵅⴼ ⵏ REFRAM , ⴷ ⵡⵉⵏⵏⴰ ⵖⵉⴼⵙ ⵢⵓⵎⵥⵏ, ⵎⴰⵙⵙ ⵎⴰⵎⴰⴹⵓ ⵄⵓⵎⴰⵔ ⵏⴷⵉⵢⴰ, ⴰⵏⵙⵙⵉⵅⴼ ⵏ CNRA ⵏ ⵙⵉⵏⵉⴳⴰⵍ. ⵉⵜⵜⵓⵙⵜⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵎⵓⵕⵉⵟⴰⵏⵢⴰ ⴰⴷ ⵉⴳ ⴰⵎⴰⵔⴰ ⵏ ⵓⵏⵙⵙⵉⵅⴼ ⵏ ⵓⵥⵟⵟⴰ ⴰⴼⵔⴰⵏⴽⵓⴼⵓⵏ  ⵙ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵎⵓⵃⴰⵎⴷ ⴰⴱⴷⴰⵍⵍⴰⵀⵉ ⵍⴰⵃⴱⵉⴱ.
ⵜⵎⵓⵏ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⵊⴰⵄⴼⴰⵕ ⴽⴰⵏⵙⵓⵙⵙⵉ ⴷ ⵎⴰⵙⵙⴰ ⴼⴰⵟⵉⵎⴰ ⴱⴰⵕⵓⴷⵉ, ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⴰⴳⵓⵏⵙ ⵏ ⵜⵎⵔⵙⵍⵜ.