“ⵜⵉⴽⵕⴹⵉ ⵜⴰⵎⵓⵟⵟⵓⵏⵜ: ⵜⴰⵕⵓⵥⵉ ⵏ ⵉⴼⵙⵜⵉ ⵙ ⵜⵏⴼⵓⵙⵜ ⵜⴰⵎⴰⵏⵓⵖⵜ” ⵉⴳⴰ ⴰⵣⵡⵍ ⵏ ⵜⵏⴼⵓⵙⵜ ⵜⴰⵎⴰⵏⵓⵖⵜ ⵏⵏⴰ ⵉⵥⵕⴳ ⵓⴳⵔⴰⵡ ⵏ ⵜⵡⵓⵔⵉ “ⴰⵙⵍⴳⵏ ⴷ ⵓⵙⵏⵖⵎⵙ ⴰⵎⵓⵟⵟⵓⵏ” ⵏⵏⴰ ⵜⵏⵙⵙⵉⵅⴼ ⵎⴰⵙⵙⴰ ⵏⴰⵕⵊⵉⵙ ⵕⴰⵖⴰⵢ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⵜⴰⵏⴼⵓⵙⵜ ⵜⴰⵎⴰⵏⵓⵖⵜ ⴰⴷ ⵖⵓⵔⵙ ⵙⵉⵏ ⵉⵡⵜⵜⴰⵙⵏ: ⵜⴰⵕⵓⵥⵉ ⵏ ⵉⴼⵙⵜⵉ ⵉⵜⵜⵉⵏ ⵉ ⵜⴽⵕⴹⵉⵡⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵓⵔ ⵙⴰⵔ ⵉⴳⵉⵏ ⵜⵉⴳⵉⵔⴰ, ⴷ ⴰⴷ ⵜⵙⴼⴰⵡ ⵅⴼ ⵜⵖⴰⵔⴰⵙⵉⵏ ⴷ ⵉⵎⴰⵙⵙⵏ ⵏ ⵓⴼⵔⴰⴳ ⴰⴼⴰⴷ ⴰⴷ ⵏⴻⵏⵏⴰⵍ ⵜⵉⴽⵕⴹⵉ ⵜⴰⵎⵓⵟⵟⵓⵏⵜ.
ⵉⵡⵏⴰⵏ ⵏ ⵜⴼⵍⵡⵉⵏ, ⵢⴰⵜ ⵜⵏⴼⵓⵙⵜ ⵜⴻⵜⵜⵓⵡⴰⵍⵙ. ⴽⵓ ⴰⴽⵓⴷ ⴷⴰ ⵉⵙⵔⵓⵙ ⴷⴰⵜ ⵢⴰⵜ ⵜⴰⵍⵖⴰ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵏⵏⴰ ⵔⴰⴷ ⵉⵏⵏⴰⵍ ⵢⴰⵏ ⵏⵖ ⵡⴰⵢⴹ ⴳ ⵉⵡⵔⵉⴽⵏ ⵏ ⵜⵏⴼⵓⵙⵜ ⵜⴰⵎⴰⵏⵓⵖⵜ. ⴰⴷⵍⴰⴳ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵖⵓⵔⵙ ⴽⵉⴳⴰⵏ ⵏ ⵡⵓⴷⵎⴰⵡⵏ. ⵎⴽ ⵜⴻⵜⵜⵓⵣⵔⵓ ⵜⵎⵉⴽⴰⵏⵉⴽⵜ ⵏ ⵜⴽⵕⴹⵉ ⴰⴼⴰⴷ ⴰⴷ ⵜⵣⵣⴼ ⵅⴼ ⵜⵖⴰⵔⴰⵙⵉⵏ ⵏⵏⵙ, ⵉⵎⴰⵙⵙⵏ ⵏ ⵓⴼⵔⴰⴳ ⵙⴳ ⴷⵉⴳⵙ, ⴰⵎⵏⵏⵓⵖ ⴷ ⵉⵣⵎⴰⵣ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵙ ⵜⴰⵍⵖⵉⵡⵉⵏ ⵏⵏⵙ ⴰⴽⴽⵯ ⵜⵜⵓⵎⵍⵏ ⴳ ⵢⴰⵜ ⵜⵣⴳⴰⵡⵜ ⵏ ⵉⵎⴰⵙⵙⵏ ⴳ ⵜⴳⵉⵔⴰ ⵏ ⴽⵓ ⵜⵉⴼⵍⵓⵜ.
“ⵜⵉⴽⵕⴹⵉⵡⵉⵏ ⵜⵉⵎⵓⵟⵟⵓⵏⵉⵏ ⴳⴰⵏⵜ ⵢⴰⵜ ⵜⵎⵓⴽⵔⵉⵙⵜ ⵜⴰⵎⴰⴹⵍⴰⵏⵜ ⵉⵜⵜⴹⴰⵚⵏ ⵉⴷ ⵍⵄⵎⵕ ⴰⴽⴽⵯ, ⴰⵏⴰⵡⵏ ⵉⵏⴰⵎⵓⵏⵏ ⴰⴽⴽⵯ. ⵎⴽ ⴷⴰ ⵢⴰⴽⴽⴰ ⵍⴰⵏⵜⵉⵔⵏⵉⵜ ⵉⴱⵖⵓⵔⵏ ⴱⵍⴰ ⵜⵉⴳⵉⵔⴰ ⵏ ⵓⵙⵍⵎⴷ, ⴰⵎⵢⴰⵡⴰⴹ ⴷ ⵓⵙⵏⴰⵎⵓⵏ, ⵉⴳⴰ ⴰⵡⴷ ⵏⵜⵜⴰ ⵢⴰⵏ ⵓⵙⴰⵢⵔⴰⵔ ⵉⵡⵀⵏⵏ ⴰⴷ ⵉⵕⵕⵥ ⵉ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ, ⵜⵉⴽⵕⴹⵉ ⵉⵚⴽⴰⵏ ⵅⴼ ⵡⴰⵏⴰⵡ ⵏⵏⴰ ⵜⵙⵙⵡⵀⵏ ⵜⵜⵉⴽⵏⵓⵍⵓⵊⵉⵜ (VBGFT) ⵜⴳⴰ ⵢⴰⵜ ⵜⵖⴰⵡⵙⴰ ⵉⵜⵜⵅⵉⵜⵉⵔⵏ”, ⴰⵢ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⵏ ⵜⵡⵓⵔⵉ “ⴰⵙⵍⴳⵏ ⴷ ⵓⵙⵏⵖⵎⵙ ⴰⵎⵓⵟⵟⵓⵏ”.
ⵜⵉⴽⵕⴹⵉⵡⵉⵏ ⴰⴷ, ⵏⵏⴰ ⴷⴰ ⵉⵜⵜⵣⵎⴰⵣ ⵓⵣⵔⴼ, ⵓⵎⴰⵏⵜ ⵜⵉⵔⴳⴳⴰⵎ, ⴰⴽⵔⴰⵀ, ⴰⵙⵙⵉⵡⴷ, ⵜⵉⴽⵕⴹⵉ ⵙ ⵍⵉⵏⵜⵉⵔⵏⵉⵜ, ⴰⵙⴷⵉⴷⴷⵢ, ⴰⵣⵓⵣⵣⵔ ⵏ ⵉⵏⵖⵎⵉⵙⵏ ⵏ ⵜⴽⵔⴽⴰⵙ, ⴰⵣⵓⵣⵣⵔ ⵏ ⵜⵡⵍⴰⴼⵉⵏ ⵜⵉⵏⵉⵎⵍⴰⵏⵉⵏ, ⴰⴷⴳⴰⵔ ⵅⴼ ⵉⴼⵉⵍⵉ, ⴱⵍⴰ ⴰⴷ ⵏⵜⵜⵓ ⵜⴰⵍⵖⵉⵡⵉⵏ ⵏ ⵜⴽⵕⴹⵉ ⵏⵏⴰ ⵉⵜⵜⵓⵙⴽⴰⵔⵏ ⵉ ⵉⵛⵉⵔⵔⴰⵏ ⴷ ⵉⵄⵔⵔⵉⵎⵏ ⵏⵏⴰ ⵉⴳⴰⵏ ⴰⵡⵜⵜⴰⵙ ⵉⵡⵀⵏⵏ ⵖⵓⵔ ⵍⵓⵃⵓⵛ ⴳ ⵉⴼⵉⵍⵉ.
ⴰⴼⴰⴷ ⴰⴷ ⵏⴰⴽⵣ ⵜⴰⵎⵙⵍⴰⵢⵜ ⵉⵎⵎⴽⵛⴰⵎⵏ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ, ⵜⴰⵏⴼⵓⵙⵜ ⵜⴰⵎⴰⵏⵓⵖⵜ ⴰⴷ ⴷ ⵉⴼⴼⵖⵏ ⵙ ⵜⵓⵜⵍⴰⵢⵜ ⵜⴰⴼⵔⴰⵏⵙⵉⵙⵜ ⴷ ⵜⵄⵔⴰⴱⵜ, ⵜⵓⵏⵖⵉⵍⵜ ⵜⴰⵎⴰⵣⵉⵖⵜ ⵔⴰⴷ ⴷ ⵜⴼⴼⵖ ⴳ ⵎⴰ ⴷ ⵢⵛⴽⴰⵏ, ⴰⵡⵜⵜⴰⵙ ⵏⵏⵙ ⵉⴳⴰ ⴰⴷ ⵜⵕⵕⵥ ⵜⵓⴼⵔⴰ ⵏ ⵜⴽⵕⴹⵉⵡⵉⵏ ⵜⵉⵎⵓⵟⵟⵓⵏⵉⵏ ⴷ ⵓⵙⵏⵢⵓⴷⴷⵓ ⵏ ⵓⵣⵔⴼ ⴳ ⵓⴼⵔⴰⴳ ⴷ ⵜⵖⴷⵎⵜ. ⵉ ⵎⴷⴷⵏ ⴰⴽⴽⵯ, ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ, ⵉⵎⵥⵢⴰⵏⵏ ⴷ ⵉⵅⴰⵜⴰⵔⵏ, ⵡⵉⵏⵏⴰ ⵉⵣⵔⵉⵏ ⴷⴰⵜ ⵜⴽⵕⴹⵉⵡⵉⵏ, ⵜⴰⵏⴼⵓⵙⵜ ⴰⴷ ⵜⴰⵎⴰⵏⵓⵖⵜ ⵜⴳⴰ ⵢⴰⵜ ⵜⵖⴰⵔⴰⵙⵜ ⵙ ⴰⵙⵏ ⵏⵙⵙⴽⵜⴰⵢ ⵉⵙ ⵓⵔ ⵉⵇⵇⴰⵏ ⴰⴷ ⵉⴷⵓⵎ ⵎⴽⵕⴹⵓⵍ ⵏⵏⵙⵏ ⵙ ⵉⴼⵙⵜⵉ, ⴰⵔ ⴰⵙⵏ ⵏⵜⵜⵉⵏⵉ ⵉⵙ ⵍⵍⴰⵏ ⵉⵎⴰⵙⵙⵏ ⵉⵣⵔⴼⴰⵏⵏ ⵏ ⵓⴼⵔⴰⴳ ⵏ ⵡⴰⴷⴷⵓⵔ, ⵏ ⵜⵓⴷⵔⵜ ⵜⵓⵙⵍⵉⴳⵜ ⴷ ⵉⵙⴼⴽⴰ ⵉⵙⵉⵎⴰⵏⵏ.
“ⴰⵡⴷ ⵢⴰⵏ ⵓⵔ ⵉⵍⵍⵉ ⴳ ⵓⵙⵏⴼⵢ ⵏ ⵜⴽⵕⴹⵉⵡⵉⵏ ⵜⵉⵎⵓⵟⵟⵓⵏⵉⵏ, ⵢⴰⵜ ⵜⵙⵎⵉⴳⵍⵜ ⵜⴰⵎⴳⵔⴰⵡⵜ ⵜⵇⵇⴰⵏ ⵏ ⵉ ⵜⵓⵚⴽⴰ -ⵜⴰⵏⴱⴰⴹⵜ ⵜⴰⴳⴷⵓⴷⴰⵏⵜ, ⵜⵉⵎⵙⵙⵏⵜⵉⵢⵉⵏ ⵜⵉⵜⵉⴽⵏⵓⵍⵓⵊⵉⵏ ⴷ ⵉⵎⵙⵡⵓⵔⴰ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ- ⵜⵓⵚⴽⴰ ⵏ ⵢⴰⵜ ⵜⵡⵏⵏⴰⴹⵜ ⴳ ⵉⴼⵉⵍⵉ, ⵏ ⵍⴰⵎⴰⵏ, ⵉⵜⵜⴹⵎⴰⵏⵏ ⴰⵙⵡⵓⵔⵉ ⴰⵣⵔⴽⴰⵏ ⵏ ⵓⵎⵓⵟⵟⵓⵏ”, ⴰⵢⴰ ⴰⵢ ⵙ ⵜⵙⴳⴳⵔⴰ ⴳ ⵡⴰⵡⴰⵍ ⵏⵏⵙ ⵎⴰⵙⵙⴰ ⵏⴰⵕⵊⵉⵙ ⵕⴰⵖⴰⵢ.
ⴰⴷ ⵏⵙⵙⴽⵜⵉ ⴳ ⵜⴳⵉⵔⴰ ⵉⵙ ⴷ ⵉⵙⵙⵓⴼⵖ ⵓⴳⵔⴰⵡ ⵏ ⵜⵡⵓⵔⵉ “ⴰⵙⵍⴳⵏ ⴷ ⵓⵙⵏⵖⵎⵙ ⴰⵎⵓⵟⵟⵓⵏ” ⵏⵏⴰ ⵜⵏⵙⵙⵉⵅⴼ ⵎⴰⵙⵙⴰ ⵏⴰⵕⵊⵉⵙ ⵕⴰⵖⴰⵢ ⵙⵉⵏ ⵉⵏⵎⵎⴰⵍⵏ: “ ⴰⴷ ⵜⵉⵍⵉⴷ ⴳ ⵉⴼⵉⵍⵉ ⵙ ⵍⴰⵎⴰⵏ: ⵉ ⵓⵙⵡⵓⵔⵉ ⵏ ⵓⵎⵓⵟⵟⵓⵏ ⵖⵓⵔ ⵓⴳⴷⵓⴷ ⴰⵎⵥⵢⴰⵏ” ⴳ ⵓⵙⴳⴳⵯⴰⵙ 2021 ⴷ “ⴰⵏⵎⵎⴰⵍ ⵏ ⵓⵎⵏⵏⵓⵖ ⵎⴳⴰⵍ ⵉⵏⵖⵎⵉⵙⵏ ⵏ ⵜⴽⵔⴽⴰⵙ: ⵜⵉⵙⵓⵖⴰⵍⵉⵏ, ⵜⵉⵎⵙⴽⴰⵔⵉⵏ ⴷ ⵉⵎⴰⵙⵙⵏ” ⴰⵙⴳⴳⵯⴰⵙ ⵏ 2022 ⴰⵡⴷ ⵜⴰⵖⵓⵔⵉ “ⵜⵉⵖⵉⵙⵜ ⵜⵉⵎⵍⵥⵉⵜ ⴷ ⵓⵙⵢⴰⴼⵓ ⴰⵙⵍⵉⵥⵕ ⴷ ⵓⵎⵓⵟⵟⵓⵏ ⴳ ⵍⵎⵖⵔⵉⴱ - ⵜⵓⵙⵓⵔⵉⵏ ⵏ ⵓⵙⵎⵓⵜⵜⵢ ⴰⵜⵉⴽⵏⵓⵍⵓⵊⵉ” ⴳ 2024.
ⵜⴰⵏⴼⵓⵙⵜ ⵜⴰⵎⴰⵏⵓⵖⵜ “ⵜⵉⴽⵕⴹⵉ ⵜⴰⵎⵓⵟⵟⵓⵏⵜ: ⵜⴰⵕⵓⵥⵉ ⵏ ⵉⴼⵙⵜⵉ ⵙ ⵜⵏⴼⵓⵙⵜ ⵜⴰⵎⴰⵏⵓⵖⵜ” ⵉⵍⵍⴰ ⴳ ⵓⵙⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, www.haca.ma/

ⴰⴳⵎ ⵜⴰⵏⴰⴹⵜ