ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 02 ⵉⴱⵔⵉⵔ 2024, ⴳ ⵓⵙⵖⵉⵎ ⵏⵏⵙ ⵏ ⵕⵕⴱⴰⵟ, ⵢⴰⵜ ⵜⵙⴰⵡⵔⵜ ⵜⴰⵎⵢⴰⵖⵜ ⵉ ⵓⵙⵎⵏⵉⴷ ⵏ ⵜⵖⵓⵔⵉ ⵏⵏⴰ ⵜⵙⵙⴽⵔ ⵅⴼ “ ⴰⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵓⵙⵙⵏ ⴰⵙⵍⵉⵥⵕ” ⵙⴳ ⵓⵙⴼⵙⵉ ⵏ ⴽⵉⴳⴰⵏ ⵏ ⵉⵙⴳⴳⵯⴰⵙⵏ ⴷ ⵓⴳⴰⵔ ⵏ 750 ⵏ ⵉⴳⵣⵣⵓⵎⵏ ⵉⵙⵓⵙⵙⴰⵏⵏ ⵉⵜⵜⵓⵣⵓⵣⵣⵔⵏ ⴳ ⵜⴷⴰⴱⵓⵜⵉⵏ ⵏ ⵓⵜⵉⵍⵉⴼⵉⵣⵢⵓⵏ ⴰⴳⴷⵓⴷⴰⵏ ⴳ ⵉⵣⵎⵣⵏ ⵏ ⵜⴰⵏⵏⴰⵢⵜ ⵜⴰⵅⴰⵜⴰⵔⵜ ⵉⵡⵏⴰⵏ ⵏ ⵡⴰⵢⵢⵓⵔ ⵏ ⵕⵎⴹⴰⵏ ⵏ ⵉⵙⴳⴳⵯⴰⵙⵏ 2020, 2021, 2022, ⴷ 2023.

ⵜⵉⵢⴰⴼⵓⵜⵉⵏ ⵜⵉⴷⵙⵍⴰⵏⵉⵏ ⵏ ⵜⵖⵓⵔⵉ ⵢⴰⴷ ⵉⵜⵜⵓⵙⴽⵔⵏ ⴳ ⵓⵙⴰⵜⵉ ⵏ ⵜⵎⵔⵉⵙⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵜⴷⵍⵙⴰ ⵏ ⵓⵙⵉⴽⵙⵍ ⴷ ⵍⵍⵉⴳ ⵉⵍⵍⴰ ⴳⵔ ⵡⵉⵏⵏ ⵉⵙⴳⵎⴹⵏ ⵏ ⵜⵙⴳⵓⵔⵉ ⵏ ⵎⵕⵕⴰⴽⵛ ⵏⵏⴰ ⵜⵙⵙⵏⵜⵉ ⵍⴰⵍ ⵏ ⵡⴰⴷⴷⵓⵔ ⴰⴳⵍⴷⴰⵏ, ⵜⴰⴳⵍⴷⵓⵏⵜ ⵍⴰⵍⵍⴰ ⵎⵔⵢⵎ, ⵜⴰⵏⵙⵙⵉⵅⴼⵜ ⵏ ⵜⴰⵎⵓⵏⵜ ⵜⴰⵏⴰⵎⵓⵔⵜ ⵏ ⵜⵎⵖⴰⵔⵉⵏ ⵏ ⵍⵎⵖⵔⵉⴱ, ⴰⴼⴰⴷ ⴰⴷ ⵜⵙⵎⵓⵙⵙ ⵜⴰⵣⵎⵔⵜ ⵜⴰⵏⴰⵎⵓⵔⵜ ⴳ ⵢⵉⴳⵔ ⵏ ⵓⵎⵏⵏⵓⵖ ⵎⴳⴰⵍ ⵜⵉⴽⵕⴹⵉ ⵉⵜⵜⵓⴳⴰⵏ ⵉ ⵜⵎⵖⴰⵔⵉⵏ, ⵜⵙⵎⴷⵏ ⵜⵏⵜ ⵙ ⵓⵣⵎⵣⵣⵓ ⵢⴰⴷ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.

ⵙ ⵓⵢⴰⴷ, ⵜⵙⵙⴽⵏ ⵜⵖⵓⵔⵉ ⵢⴰⴷ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴳ ⵓⵙⵓⵙⵙⵏ ⴰⵙⵍⵉⵥⵕ ⵉⵣⵣⵉⴳⵣⵏ ⵓⵎⵏⴳⵏ ⵎⴰⵛⴰ ⵜⵙⵙⴽⵏ ⴰⵡⴷ ⵜⴰⵙⵓⵍⵜ ⴰⴳⵓⵏⵙ ⵏ ⴽⵉⴳⴰⵏ ⵏ ⵉⵎⵢⴰⵡⴰⴹⵏ ⵏ ⵓⵙⵓⵙⵙⵏ ⵢⴰⵏ ⵓⵙⵏⵓⵃⵢⵓ ⵏ ⵓⵙⵎⴷⵢⴰ ⵏ ⵜⵎⵖⴰⵔⵉⵏ. ⴰⵣⵣⵉⴳⵣ ⴰⴷⵙⵍⴰⵏ ⵉⵣⴷⵉ ⵙ ⵓⵙⵙⴷⵔⵉⵙ ⵏ ⵓⵎⴹⴰⵏ ⵏ ⵉⵙⵓⵙⵙⵏⵏ ⴳ ⵍⵍⴰⵏⵜ ⵜⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵏ ⵡⴰⵏⴰⵡ. ⵜⵉⵡⵉ ⴷ ⵜⵖⵓⵔⵉ ⵢⴰⴷ ⵉⵙ ⴳ 9 ⵏ ⵉⵙⴳⴳⵯⴰⵙⵏ, ⴰⵎⵓⵔ ⵏ ⵉⵙⵓⵙⵙⵏⵏ ⴳ ⵓⵔ ⵍⵍⵉⵏⵜ ⵜⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵉⵜⵜⵓⵙⵢⵓⴳ ⵙ ⵙⵎⵎⵓⵙ ⵏ ⵜⵉⴽⴽⴰⵍ, ⵉⵣⵔⵉ ⵙⴳ 9% ⴳ 2014 ⵖⵔ 51% ⴳ 2023. ⵉⵥⵕⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵜ ⵜⵡⴰⴷⴰ ⵖⵔ ⵡⵓⵛⵓⵔ ⴷ ⵓⵎⵢⴰⵙ ⴳ ⵓⵙⵎⴷⵢⴰ ⵏ ⵜⵎⵖⴰⵔⵉⵏ ⴷ ⵡⵉⵏ ⵉⵔⴳⴰⵣⵏ ⵉⵙⵓⵙⵙⵏⵏ ⵏ ⵉⵜⵙ ⵏ ⵢⵉⴳⵔⴰⵏ.

ⵎⴰⵛⴰ, ⵎⵇⵇⴰⵔ ⵜⵍⵍⴰ ⵜⴷⵔⵙⵉ ⵢⴰⴷ ⴳ ⵉⵙⵓⵙⵙⵏⵏ ⴳ ⵉⵍⵍⴰ ⵓⵙⵏⵓⵃⵢⵓ ⵉⵚⴽⴰⵏ ⵅⴼ ⵡⴰⵏⴰⵡ, ⵜⵉⵡⵍⴰⴼⵉⵏ ⵜⵉⵔⵉⵙⴰⵏⵉⵏ ⵍⴰⵏⵜ ⵜⵓⴷⵔⵜ ⵉⵛⵇⴰⵏ ⴳ ⵓⵙⵓⵙⵙⵏ ⵙ ⵓⵢⵏⵏⴰ ⵙⵙⴼⵙⵉⵏ ⵉⴳⵔⴰⵡⵏ ⵏⵜⵎⵔⵙⵍⵜ ⵏ ⵓⵙⵍⴳⵏ. ⵙ ⵜⵉⴷⵜ, ⵜⵙⵓⵍ ⵜⴰⵎⵖⴰⵔⵜ ⵜⵣⴷⵉ ⵙ ⵓⵎⴰⵜⴰ ⵖⴰⵙ ⵙ ⵜⴳⵎⵎⵉ ⵎⵇⵇⴰⵔ ⵜⵍⵍⴰ ⵢⴰⵜ ⵜⵉⵔⵏⵉ ⵏ ⵓⵙⵎⴷⵢⴰ ⵏⵏⵙ ⴳ ⵢⵉⴳⵔ ⴰⵣⵣⵓⵍⴰⵏ. ⵉⵔⴳⴰⵣⵏ ⴷⴰ ⵜⵜⵓⵙⵎⴷⵢⴰⵏ ⵓⴳⴰⵔ ⴳ ⵉⴷⵖⴰⵔⵏ ⵏ ⵜⵏⴱⴰⴹⵜ ⴷ ⵜⵉⴹⴰⴼ ⴷ ⵜⵎⵖⴰⵔⵉⵏ ⴷⴰ ⵜⵜⵓⵙⵎⴷⵢⴰⵏⵜ ⴳ ⵉⴷⵖⴰⵔ ⵉⵣⴷⵔⵏ ⵉⴹⴼⴰⵕⵏ. ⴷⵉⵖ, ⴽⵉⴳⴰⵏ ⵏ ⵉⵎⵢⴰⵡⴰⴹⵏ ⵏ ⵓⵙⵓⵙⵙⵏ ⴷⵉⴳⵙⵏ ⴽⵔⴰ ⵏ ⵜⵉⴱⵔⴰⵜⵉⵏ, ⴰⵔ ⴷ ⵜⵜⴰⵡⵉⵏ ⵉⵙⵓⴼⵓⵖⵏ ⵏ ⵉⵙ ⵜⴳⴰ ⵜⵎⵖⴰⵔⵜ ⵜⴰⵔⵙⵍⵜ ⵏ ⵜⴰⵡⵊⴰ, ⴷ ⵉⵙ ⵏⵜⵜⴰⵜ ⴰⵢ ⵢⵓⵙⵉⵏ ⴰⴳⴳⵯⴰ ⵏ ⵜⴰⵡⵊⴰ, ⴷ ⵜⵡⵓⵔⵉⵡⵉⵏ ⵏ ⵜⴳⵎⵎⵉ ⴷ ⵜⵉⴹⴰⴼ ⵅⴼ ⵡⴰⵔⵔⴰⵡ…

ⴳ ⵜⴳⵉⵔⴰ ⵏ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰⴷ ⴳ ⴰⵎⵓⵏ ⴽⵉⴳⴰⵏ ⵏ ⵉⵎⴰⵣⵣⴰⵍⵏ ⴷ ⵜⵎⵔⵙⴰⵍ ⵉⵣⴷⵉⵏ ⵙ ⵓⵙⴳⵓⵎ ⴰⴷ : ⵉⵎⵍⵖⴰ, ⵜⵉⵙⵏⵓⵔⴰⵢⵉⵏ ⵏ ⵓⵙⵓⵙⵙⵏ, ⵉⵙⵏⵖⵎⵙⵏ ⵉⵙⵍⵉⵥⵕⵏ, ⵜⵉⵎⵙⵎⵓⵏⵉⵏ ⵏ ⵜⵎⵖⴰⵔⵜ, ⵜⵉⵎⵔⵙⴰⵍ ⴷ ⵉⵎⴰⵣⵣⴰⵍⵏ ⵏ ⵉⵣⵔⴼⴰⵏ ⵉⵏⴼⴳⴰⵏⵏ… ⵜⵖⵔⴰ ⵎⴰⵙⵙⴰ ⴰⵅⴰⵔⴱⴰⵛ ⵖⵔ ⵢⴰⵏ ⵓⵙⵎⵓⵙⵙ ⴰⵎⴳⵔⴰⵡ ⴳ ⵓⴱⵖⵓⵔ ⵏ ⵓⵙⵎⴷⵢⴰ ⵓⵣⵔⵉⴼ ⵏ ⵜⵎⵖⴰⵔⵜ ⴰⴳⵓⵏⵙ ⵏ ⵓⵙⵏⵖⵎⵙ. « ⴰⵙⵎⴷⵢⴰ ⵙ ⵓⵙⵏⵓⵃⵢⵓ ⴷ ⵜⵡⵍⴰⴼⵜ ⵜⴰⵙⵏⴰⵡⵢⵜ ⵏ ⵜⵎⵖⴰⵔⵉⵏ ⴷ ⵜⵉⵏ ⵉⵔⴳⴰⵣⵏ ⴳ ⵓⵙⵏⵖⵎⵙ ⴷⴰ ⵉⵙⵏⵏⴳⵣⴰ ⵜⴰⵣⵎⵔⵜ ⵏ ⵡⴰⵎⵓⵏⵏ ⴳ ⵢⵉⴳⵔ ⵏ ⵜⵉⴳⵎⵉ ⴷ ⵜⴷⵉⵎⵓⵇⵕⴰⵟⵉⵢⵜ, ⴰⵢ ⵜⵏⵏⴰ ⵜⵏⵙⵙⵉⵅⴼⵜ ; ⴳ ⵓⵣⵎⵣ ⴳ ⵜⵏⵏⵓⵔⵥⵎ ⵜⵙⴰⵢⵡⵔⵜ ⵏ ⵓⵙⵏⴰⵎ ⵏ ⵍⵎⵓⴷⵡⵡⴰⵏⴰ ⴳ ⵜⵎⵓⵔⵜ ⵏⵏⵖ, ⴰⵙⴷⵓⵙ ⵏ ⵜⴷⵍⵙⴰ ⵏ ⵓⵙⵓⵎⵓ, ⵏ ⵜⵎⵢⴰⵏⴰⵡⵜ ⴷ ⵓⵙⵉⴽⵙⵍ ⴳⵔ ⵉⵏⵎⵓⵔⵉⵏ ⵉⴳⴰ ⵢⴰⵏ ⵢⵉⴳⵉ ⴰⵎⵖⵉⵡⵍ ⴷ ⵢⴰⵏ ⵡⵓⵎⵄⵉⵏ ⴰⴷⵙⵍⴰⵏ ⴳ ⵓⵎⵓⵔⵙ ⵏ ⵉⵙⵏⴰⵎⵏ ⴷ ⵓⵙⵓⵍ ⵏ ⵉⵎⵄⵉⵏⵏ ⵉⵍⵍⴰⵏ ⵢⴰⴷ ⴳ ⵢⵉⴳⵔ ⴰⴷ ».