ⵉⵙⵙⵉⵖⵥⵉⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵡⵏⴰⵏ ⵏ ⵓⵎⵙⴳⵔⴰⵡ ⵏⵏⵙ ⵓⵙⵎⵉⴷ ⴰⵙⵙ ⵏ 28 ⴽⵜⵓⴱⵕ 2024, ⴰⵙⵙⵏⵜⵉ ⵏ ⵓⵙⵎⵎⵓⴷ ⵏ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⵉⵣⴷⵉⵏ ⵙ ⵓⵙⵍⵍⵡⵓ ⵏ ⴽⵓⵥⵜ ⵏ ⵜⴷⴰⴱⵓⵜⵉⵏ ⵜⵉⵎⴰⵢⵏⵓⵜⵉⵏ ⵜⵉⴳⴷⵓⴷⴰⵏⵉⵏ ⵏ ⵓⵜⵉⵍⵉⴼⵉⵣⵢⵓⵏ ⵉⵥⵍⵉⵏ ⵙ ⵜⵓⵏⵏⵓⵏⵜ.

ⵢⵓⵣⵏ ⵜ ⵉ ⵓⵙⵙⵖⵥⵏ ⵖⵓⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵓⵢⵏⵏⴰ ⵉⵍⵍⴰⵏ ⴳ ⵓⵎⴳⵔⴰⴷ 49  ⵏ ⵓⵙⵍⴳⵏ ⵓⵟⵟⵓⵏ 77.03 ⵉⵣⴷⵉⵏ ⵙ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙⵏⵜⵉ ⵢⴰⴷ ⵉⵡⴰⵜⵙ ⴰⵏⵏⵓⵕⵥⵎ ⵏ ⴽⵓⵥⵜ ⵏ ⵜⴷⴰⴱⵓⵜⵉⵏ ⵜⵉⵎⴰⵢⵏⵓⵜⵉⵏ

« ⴰⵔⵔⵉⵢⴰⴹⵉⵢⴰ1 », « ⴰⵔⵔⵉⵢⴰⴹⵉⵢⴰ2 », « ⴰⵔⵔⵉⵢⴰⴹⵉⵢⴰ3 » ⴷ « ⴰⵔⵔⵉⵢⴰⴹⵉⵢⴰ4», ⵏⵏⴰ ⵔⴰⴷ ⵉⵣⵓⵣⵣⵔ 24/24 ⵙ ⵓⴱⵔⵉⴷ ⵏ ⵓⵚⴰⵟⵉⵍⵉⵜ ⵏⵖ ⵙ ⵓⴱⵔⵉⴷ ⵏ ⴽⵔⴰ ⵏ ⵜⵖⴰⵔⴰⵙⵜ ⵜⴰⵜⵉⵇⵏⵉⵜ ⵢⴰⴹⵏ.

ⵙ ⵓⵣⵎⵣⵣⵓ ⵢⴰⴷ, ⵉⵙⵙⵔⵖⵓⴷ ⵜⵉⵣⵎⵎⴰⵔ ⵏⵏⴰ ⵙⵙⴽⵔⵏⵜ ⵜⵎⵙⵙⵓⵔⵉⵏ ⵜⵉⵏⴰⵎⵓⵔⵉⵏ ⵏ ⵓⵙⵍⵉⵥⵕ ⴰⴳⴷⵓⴷⴰⵏ ⴳ ⵢⵉⴳⵔ ⵏ ⵜⴳⵎⵉ ⵏ ⵡⴰⴷⴰⴼ ⵏ ⵓⵏⵎⵓⵔⵉ ⴰⵎⵖⵔⴰⴱⵉ ⵖⵔ ⵉⵏⵖⵎⵉⵙⵏ ⴷ ⵓⵙⵙⴰⵔⵓⵔ ⴰⵎⴰⵏⵓⵏ ⵙ ⵓⴱⵔⵉⴷ ⵏ ⵜⴷⵓⵍⵉ ⵜⴰⵙⵍⵉⵥⵕⵜ ⵏ ⵜⵎⵣⴰⵣⵣⴰⵍⵉⵏ ⵜⵉⵎⴰⵏⵓⵏⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ.

ⵙ ⵡⴰⵜⵜⴰⴳ ⵅⴼ ⴽⵉⴳⴰⵏ ⵏ ⵉⵎⵏⵣⴰⵢⵏ ⵏ ⵜⵙⵎⵉⴳⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵖⵔⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵉ ⵓⵙⴷⵓⵙ ⵏ ⵜⵓⴽⴽⵉ ⵜⴰⵖⵎⵙⴰⵏⵜ ⵜⴰⵏⴰⵎⵓⵔⵜ ⵉⵣⴷⵉⵏ ⵙ ⵜⵓⵏⵏⵓⵏⵜ. ⴰⵙⴷⵓⵙ ⴰⴷ, ⵔⴰⴷ ⵉⵎⵓⵏ ⴷ ⵡⴰⵙⵙⴰⵙ ⴰⵎⴰⵏⵓⵏ ⵏⵏⴰ ⵜⴷⴷⵔ ⵜⵎⵓⵔⵜ ⵏⵏⵖ ⴳ ⵍⵍⴰⵏⵜ ⴽⵉⴳⴰⵏ ⵏ ⵜⵎⵣⴰⵣⵣⴰⵍⵉⵏ ⵜⵉⵎⵇⵔⴰⵏⵉⵏ ⵜⵉⵎⴰⵏⵓⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵎⵏⵥⴰⵡⵉⵏ : ⴰⵎⴰⴹⵍⴰⵏ ⵏ ⵜⴽⵓⵔⵜ ⵏ ⵓⴹⴰⵕ 2030, ⴰⴽⴰⵙ ⵏ ⵜⴼⵔⵉⵇⵜ ⵏ ⵜⵎⵜⵜⵉⵏ 2025, ⵜⵉⵙⵓⵜⴰⵍ 2025-2029 ⵏ ⵓⴽⴰⵙ ⵏ ⵓⵎⴰⴹⴰⵍ ⵏ ⵜⵛⴰⵎⵎⴰ ⵓⴹⴰⵕ ⵏ ⵜⵎⵖⴰⵔⵉⵏ U17…ⴰⴳⵜ.

ⵉⵥⵕⴰ ⴷⵉⵖ ⵓⵙⵇⵇⵉⵎ ⵉⵙ ⴰⴷ ⵙⵖⵓⴷⴰⵏⵜ ⵜⴷⴰⴱⵓⵜⵉⵏ ⴰⴷ ⵜⵉⵎⴰⵢⵏⵓⵜⵉⵏ ⵏⵏⴰ ⵔⴰⴷ ⵉⵜⵜⵓⵔⵏⴰⵏ ⵉ ⵔⵔⵉⵢⴰⴹⵉⵢⴰ, ⵜⴰⵏⴰⴼⵓⵜ ⵜⴰⴳⴷⵓⴷⴰⵏⵜ ⵏ ⵓⵙⵍⵉⵥⵕ, ⵙ ⵓⵙⵎⴽⵜⴰⵢ ⴷ ⵓⵏⵎⴰⵎⴽ ⴳ ⵜⵉⴳⴰⵡⵜ ⵏⵏⵙ ⵏ ⵢⵉⴳⵔ ⵏ ⵓⵙⵏⵖⵎⵙ ⴷ ⵡⵉⵏ ⵓⵙⴱⵓⵖⵍⵓ ⵏ ⵜⵓⵏⵏⵓⵏⵜ ⵜⴰⵎⵖⵔⴰⴱⵉⵢⵜ ⴳ ⵓⵙⴰⵢⵔⴰⵔ ⴰⵏⴰⵎⵓⵔ, ⴰⵏⵎⵏⴰⴹ ⴷ ⵓⴷⵖⵔⴰⵏ. ⴰⵡⵜⵜⴰⵙ ⵏ ⵓⵙⵙⵏⵜⵉ ⵢⴰⴷ ⵉⴳⴰ ⴰⵙⴷⵓⵙ ⵏ ⵜⵉⵍⴰⵍⵜ ⵏ ⵓⵙⵏⵖⵎⵙ ⴰⵙⵍⵉⵥⵕ ⴰⴳⴷⵓⴷⴰⵏ ⴳ ⵓⵙⴱⵓⵖⵍⵓ ⵏ ⵡⴰⵜⵉⴳⵏ ⵓⵎⵏⵉⴳⵏ ⴷ ⵜⴼⵉⵍⴰⵡⵜ ⵏ ⵜⵓⵏⵏⵓⵜ ⴳ ⵜⴰⵎⵓⵏⵜ ⵜⴰⵏⴰⵎⵓⵏⵜ, ⴰⴷⴰⴼ ⴰⵏⴰⴽⴰⵍ, ⵜⴰⵎⵓⵏⵜ ⴷ ⵜⵎⴰⴳⵉⵜ ⵜⴰⵏⴰⵎⵓⵔⵜ.

ⵢⵓⴽⵣ ⵓⵙⵇⵇⵉⵎ ⴰⵎⴰⵜⵜⴰⵢ ⵜⵉⵙⵓⵔⵉⴼⵉⵏ ⵜⵉⵎⵇⵔⴰⵏⵉⵏ ⵏ ⵓⵃⵉⴹⵕ ⵏ ⵜⵎⵖⴰⵔⵜ ⴳ ⵓⴰⵙⵔⴰⵔ ⴰⴳⴷⵓⴷⴰⵏ ⴰⵎⴰⵏⵓⵏ, ⴰⵔ ⵉⵇⵇⴰⵔ ⵉ ⵢⴰⵜ ⵜⵎⵣⵉⵣⵔⵜ ⵏ ⵜⵓⵏⵏⵓⵏⵜ ⵏ ⵜⵎⵖⴰⵔⵉⵏ ⴷ ⵜⴷⵓⵍⵉ ⵜⴰⵖⵎⵙⴰⵏⵜ ⵜⴰⵙⵓⵎⵓⵜ ⵏ ⵢⵉⵔⵎ ⵏ ⵜⵎⵖⴰⵔⵉⵏ ⴳ ⵢⵉⴳⵔ ⴰⴷ. ⵜⴰⵣⵎⵔⵜ ⵏ ⵓⵙⵎⵓⵜⵜⵔ ⴷ ⵓⵙⵔⵎⵓⵏ ⵏ ⵜⵓⵏⵏⵓⵏⵜ ⴰⴷ ⵢⴰⵡⵉ ⵖⵔ ⵜⴷⵍⵙⴰ ⵏ ⵓⵙⵓⵎⵓ ⴷ ⵓⵙⵉⴽⵙⵍ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ ⴰⴳⵓⵏⵙ ⵏ ⵡⴰⵎⵓⵏ ⴰⵎⵖⵔⴰⴱⵉ.