ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 23 ⵎⴰⵢⵓ 2023, ⵎⴰⵙⵙ ⴽⵉⵢⵓⵏⴳ ⵛⵓⵏⴳ, ⴰⵎⵙⵇⴰⴷ ⵏ ⵜⴳⴷⵓⴷⴰⵏⵜ ⵏ ⴽⵓⵔⵉⵢⴰ ⴳ ⵕⵕⴱⴰⵟ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵙⵎⵏⵉⴷ ⵎⴰⵙⵙⴰ ⴰⵅⴰⵔⴱⴰⵛ ⵉ ⵓⴷⵉⴱⵍⵓⵎⴰⵙⵉ ⴰⴽⵓⵔⵉ ⵉⵛⴰⵕⵉⴹⵏ ⵉⵅⴰⵜⴰⵔⵏ ⵏ ⵜⵎⴰⵙⴰⵢⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵜⴰⵙⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵢⵉⴳⵔ ⴰⵙⵍⵉⵥⵕ, ⵜⵙⵙⴽⵏ ⴳ ⴷⴰⵜ ⵜⵉⵍⴰⵍⵜ ⵏ ⵜⵎⵔⵙⵍⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⴼⵔⴰⴳ ⵏ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⴹⵎⴰⵏ ⵏ ⵉⵣⵔⴼⴰⵏ ⵏ ⵉⵏⵎⵓⵔⵉⵏ - ⵉⵙⵡⵓⵔⵉⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵉⵜⵜⵣⵔⴰⴽⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ.

ⴳ ⵜⵙⴳⴰ ⵢⴰⴹⵏ, ⵜⴱⴷⵔ ⵎⴰⵙⵙⴰ ⴰⵅⴰⵔⴱⴰⵛ ⵏⵜⵜⴰⵜ ⴷ ⵓⴷⵉⴱⵍⵓⵎⴰⵜ ⴰⴽⵓⵔⵉ ⵉⵙⵓⵔⵙⵏ ⵉⵎⴰⵢⵏⵓⵜⵏ ⵉⵍⵍⴰⵏ ⴷⴰⵜ ⵉⵎⵙⵏⴰⵎⵏ ⵏ ⵓⵙⵏⵖⵎⵙ ⴳ ⵓⵎⴰⴹⴰⵍ ⴳ ⵓⵎⵏⴰⴹ ⵏ ⵓⵙⵏⵉⴼⵍ ⴰⵎⵓⵟⵟⵓⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ, ⴰⵙⴷⵉⴷⴷⵢ ⵏ ⵓⵙⵡⵓⵔⵉ ⴰⵙⵏⵖⵎⴰⵙ ⴷ ⵜⵅⵉⵜⵔⵜ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ. ⵜⵙⴰⵡⵍ ⵅⴼ ⵙⵉⵏ ⵉⵙⵇⵙⵉⵜⵏ ⵉⴷⵙⵍⴰⵏⵏ ⴳ ⵜⵙⵎⴽⵜⵉⵜ ⵏ ⵉⵎⵙⵏⴰⵎⵏ ⴰⴽⴽⵯ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ : ⴰⵙⵉⴽⵙⵍ ⵏ ⵉⵙⴰⵜⵉⵢⵏ ⵓⵣⵔⵉⴼⵏ ⵉⵜⵜⵓⵙⵎⴽⵍⵏ ⵅⴼ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵏⵖⵎⴰⵙ ⴷ ⵓⵙⴷⵖⵉ ⵏ ⵜⵖⴰⵔⴰⵙⵉⵏ ⴷ ⵉⵎⴰⵙⵙⵏ ⵏ ⵓⵙⵏⴰⵎ ⴰⴼⴰⴷ ⴰⴷ ⵔⴰⵔⵏ ⵅⴼ ⵓⴳⴰⵏⵏⵉ ⵏ ⵡⴰⵎⵓⵏⵏ ⴷ ⵓⵏⵏⴰⵍ ⵏ ⵉⵎⵉⵣⵉⵜⵏ ⵉⵎⵓⵟⵟⵓⵏⵏ ⴱⵍⴰ ⴰⴷ ⵜⵜⵓⴹⴰⵙⵏ ⵉⵍⴻⵍⵍⵉⵢⵏ ⵉⴷⵙⵍⴰⵏⵏ.

ⵙ ⵓⵢⴰⴷ, ⵜⵙⵙⵎⵏⵉⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⵉⵣⵎⵎⴰⵔ ⵏⵏⴰ ⵜⵙⵙⴽⵔ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵜⵉⴹⴰⴼ ⵜⵉⵣⵣⵓⵍⴰⵏⵉⵏ ⵏⵏⵙ, ⴰⵔ ⵜⵙⵙⴽⴰⵏ ⵜⵉⵖⵉⵢⵜ ⵏⵏⵙ ⵏ ⵓⵎⵢⴰⵡⴰⵙ ⴰⴽⴷ ⵜⵎⵔⵙⵍⵜ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⵜⴰⴽⵓⵔⵉⵢⵜ, ⵜⴰⵎⵓⵔⵜ ⵏ ⵜⵎⵖⵔ ⴰⵜⵉⴽⵏⵓⵍⵓⵊⵉ ⴷ ⵓⵙⵍⵍⵡⵓ.

ⴳ ⵜⵙⴳⴰ ⵏⵏⵙ, ⵉⵙⵙⵎⵏⵉⴷ ⵎⴰⵙⵙ ⴽⵉⵢⵓⵏⴳ ⵛⵓⵏⴳ ⵙ ⵓⵖⵉⵡⵍ ⵜⴰⵎⵓⵖⵍⵉ ⵜⴰⴽⵓⵔⵉⵢⵜ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵓⵙⵡⵉⵔ ⵏ ⵜⴷⴰⵎⵙⴰ ⴷ ⵡⵉⵏ ⵜⵓⵎⴰⵢⵉⵏ ⴰⵔ ⵉⵜⵜⵉⵏⵉ ⵉⵙ ⵢⵓⴽⵣ ⵜⴰⵏⴰⴼⵓⵜ ⵜⴰⵙⵉⵏⵔⴰⵏⵜ ⴳ ⵓⵎⵢⴰⵡⴰⵙ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵢⴰⵜ ⴳ ⵜⴳⵔⴰⵡⵉⵏ ⵜⵉⴳⴷⵓⴷⴰⵏⵉⵏ ⵏ ⵓⵙⵏⴰⵎ ⵉⵙⵡⵓⵔⵉⵏ ⴳ ⴽⵓⵔⵉⵢⴰ.

ⴰⴷⵉⴱⵍⵓⵎⴰⵙⵉ ⴰⴽⵓⵔⵉ ⵉⴱⴷⵔ ⴳ ⵡⴰⵡⴰⵍ ⵏⵏⵙ ⵉⵜⵙ ⵏ ⵜⵎⵥⵍⵉⵢⵉⵏ ⵏ ⵜⵎⵓⵖⵍⵉ ⵜⴰⵙⵏⵖⵎⴰⵙⵜ ⵜⴰⴽⵓⵔⵉⵢⵜ ⵏⵏⴰ ⵉⵏⵏⴰ ⵉⵙ ⵜⵜⵓⵢⴰⵙⵙⵏ ⵙ ⵓⵎⵣⴰⵣⵣⴰⵍ ⴳⵔ ⵉⵙⵏⵖⵎⵉⵙⵏ ⵉⴽⵍⴰⵙⵉⴽⵉⵢⵏ ⴷ ⵉⵙⵏⵖⵎⵉⵙⵏ ⵉⵜⵔⴰⵔⵏ.
ⵉⵔⵣⴼ ⵓⵎⵙⵇⴰⴷ ⴽⵉⵢⵓⵏⴳ ⵛⵓⵏⴳ ⴳ ⵎⴰ ⵢⴹⴼⴰⵕⵏ ⴽⵉⴳⴰⵏ ⵏ ⵜⵉⵣⵓⵏⵉⵏ ⴷ ⵜⵏⴰⴼⵓⵜⵉⵏ ⵜⵉⵜⵉⵇⵏⵉⵢⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.