« ⵉⵏⵎⵓⵔⵉⵏ ⴷ ⵡⴰⵎⵓⵏⵏ ⵉⴼⵔⵉⵇⵏ  ⵖⵓⵔⵙⵏ ⴰⵣⵔⴼ ⴰⵎⵎ ⵎⴷⴷⵏ ⴰⴽⴽⵯ, ⴳ ⵍⴰⵏⵜⵉⵔⵏⵉⵜ ⵏ ⵍⴰⵎⴰⵏ ⴷ ⵢⴰⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⵓⵟⵟⵓⵏ ⵉⵍⴻⵍⵍⵉ, ⴳ ⵜⵍⵍⴰ ⵜⵏⴼⵔⵓⵜ ⴷ ⵍⴰⵎⴰⵏ ⵎⴳⴰⵍ ⵉⵎⵉⵣⵉⵢⵏ » ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵉⵙⵡⵓⵔⵉⵏ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ (RIARC) ⵉⵡⵏⴰⵏ ⵏ ⵓⵏⵏⵓⵕⵥⵎ ⵏ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⵎⴰⴹⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⵙⵙⴰⵏ ⵏ 27 ⴷ 28 ⵉⴱⵔⵉⵔ 2023 ⴳ ⴼⴰⵙ. « ⵎⴽ ⴷⴰ ⵏⵇⵇⴰⵔ ⵉ ⵜⵉⴹⴰⴼ ⵏ ⵜⵉⵍⴰⵡⵉⵏ ⵜⵉⴼⵔⵉⵇⵉⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵏⴰⵎ ⴰⵏⵉⵎⴰⵏ ⴰⵎ ⵡⵏⵏⴰ ⵉⵜⵜⵓⵙⵡⵓⵔⵉⵏ ⵖⵓⵔ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⴷ ⵓⵏⵏⴰⵔ ⵏ ⵓⵙⵏⴰⵎ ⴰⵎ ⵡⵏⵏⴰ ⵉⵇⵇⴰⵏ ⴰⴷ ⵉⵜⵜⵓⵙⵡⵓⵔⵉ ⴳⵔ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵙⴰⵍⵉⵡⵉⵏ, ⵓⵔ ⴷⴰ ⵏⵜⵜⴻⵜⵜⵓ ⵉⵎⵏⵣⴰⵢ ⵏ ⵜⵍⴻⵍⵍⵉ ⵏ ⵓⵡⵏⵏⵉ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ » ⴰⵢ ⵜⵔⵏⴰ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.

ⴰⵔ ⵜⵙⵏⵎⵎⵉⵔ ⵜⵉⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵢⵓⵣⵏⵏ ⵉⴳⵏⵙⴰⵙ ⵏⵏⵙⵏ ⵖⵔ ⵜⵉⵏⴰⵡⵜ ⵏ ⴼⴰⵙ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ « ⵓⵔ ⵉⴳⵉ ⴰⵙⵙⵓⵎⵓ ⴰⴷⴷⴰⵢ ⵉⵍⵍⴰⵏ ⵉⵙⵏⵉⴼⵉⵍⵏ ⴳⵔ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⴷ ⵉⵎⵙⵏⴰⵎⵏ ⵏ ⵜⵎⵏⴰⴹⵉⵏ ⵢⴰⴹⵏ ⵏ ⵓⵎⴰⴹⴰⵍ ⴰⵎ ⵜⵉⵏ ⵓⵕⵓⴱⴱⴰ, ⵏⵜⵜⴰ ⵀⴰⵏ ⵉⵎⵙⵏⴰⵎⵏ ⵉⴼⵔⵉⵇⵏ ⵍⵍⴰⵏ ⴳ ⵜⵎⴰⵔⴰ ⵏ ⴰⴷ ⴰⴼⵏ ⵉⵎⵙⵙⵉⵡⵍⵏ ⴰⵛⴽⵓ ⵜⵉⵙⵉⵍⴰⵡⵉⵏ ⵓⵔ ⵖⵓⵔⵙⵏ ⴰⵔ ⴰⵙⵙⴰ ⵖⴰⵙ ⵉⵜⵙ ⵏ ⵉⴳⵏⵙⴰⵙⵏ ⵓⵣⵔⵉⴼⵏ ⴳ ⵓⵎⵏⵥⴰⵡ ».

ⵎⵓⵏⵏ ⴳ ⵜⵉⵏⴰⵡⵜ ⴰⴷ ⵜⴰⵎⴰⴹⵍⴰⵏⵜ ⴽⵉⴳⴰⵏ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵏ 20 ⵏ ⵜⵎⵓⵔⴰ ⵜⵉⴼⵔⵉⵇⵉⵏ ⵉⵙⴰⵡⴰⵍⵏ ⵜⵉⵏⴳⵍⵉⵣⵜ, ⵜⴰⴱⵕⵟⵇⵉⵙⵜ, ⵜⴰⴼⵕⴰⵏⵙⵉⵙⵜ ⴷ ⵜⵄⵔⴰⴱⵜ ⴷ ⵉⴳⵏⵙⴰⵙⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⴰⵎ ⵎⵉⵟⴰ ⴷ ⵜⵉⴽ ⵟⵓⴽ, ⵜⴰⵏⴰⵡⵜ ⴰⴷ ⵜⴻⵜⵜⵓⵙⵏⵎⴰⵍⴰ ⴳ ⵓⵡⵜⵜⴰⵙ ⵏ ⵓⵙⵙⴳⵎ ⵏ ⵢⴰⵏ ⵓⵣⵓⵔⵜ ⵏ ⵓⵙⵏⴰⵎ ⵉⵣⴷⵉⵏ ⴷ ⵜⵖⴰⵔⵉⵡⵉⵏ ⴷ ⵓⵙⵙⵓⵎⵓ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ. ⴰⴼⴰⴷ ⴰⴷ ⵏⵏⴰⵍⵏ ⵜⵉⵅⵉⵜⵔⵜ ⵏ ⵜⵓⵎⴰⵢⵉⵏ ⴷ ⵜⵡⵓⵔⵉⵡⵉⵏ ⵓⵔ ⵉⵖⵓⴷⴰⵏ ⴰⴳⵓⵏⵙ ⵏ ⵉⵥⴹⵡⴰⵏ ⵉⵏⴰⵎⵓⵏⵏ ⴷ ⴰⴷ ⴼⵔⴳⵏ ⵉ ⵜⵍⴻⵍⵍⵉ ⵏ ⵓⵡⵏⵏⵉ ⴷ ⵓⵎⵙⴰⵡⴰⵍ ⴳⵔ ⵉⵎⵙⵏⴰⵎⵏ ⴷ ⵉⵎⴰⵣⵣⴰⵍⵏ ⵉⵎⵓⵟⵟⵓⵏⵏ, ⴳⴰⵏ ⵉⴳⵎⴰⵎⵏ ⵏ RIARC ⵢⴰⵜ ⵜⵖⴰⵔⴰⵙⵜ ⵏ ⵜⵢⴰⴼⵓⵜ ⵜⴰⵎⴰⵜⴰⵢⵜ. ⵜⵉⵏⴰⵡⵜ ⵏ ⴼⴰⵙ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴳⴰ ⴰⵎⵙⴳⵔⴰⵡ ⴰⵎⵣⵡⴰⵔⵓ ⴰⵙⵉⵏⵔⴰⵏ ⴳⵔ ⵓⵥⵟⵟⴰ ⴰⴼⵔⵉⵇ ⵏ ⵉⵎⵙⵏⴰⵎⵏ ⴷ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ.