ⴳ ⵓⵙⴰⵜⵉ ⵏ ⵓⵏⵏⵓⵕⵥⵎ ⵏⵏⵙ ⵅⴼ ⵓⵎⴰⴹⴰⵍ ⴰⴽⴰⴷⵉⵎⵉ, ⵉⵙⵏⵓⴱⴳ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⵏ 28 ⵏⵓⵡⴰⵏⴱⵉⵔ 2023, ⵢⴰⵏ ⵓⴽⴰⴱⴰⵕ ⵏ ⵉⵎⵃⴹⴰⵕ ⵏ ⵓⵙⵉⵏⴰⴳ ⴰⵎⴰⵜⵜⴰⵢ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ (ISIC) ⴳ ⵕⵕⴱⴰⵟ.
ⵉⵡⵏⴰⵏ ⵏ ⵓⵔⵣⴰⴼ ⴰⴷ, ⵃⴰⴹⵕⵏ ⵉⵎⵃⴹⴰⵕⵏ ⵏⵉⵜⵏⵉ ⴷ ⵉⵙⵍⵎⴰⴷⵏ ⵏⵏⵙⵏ ⵉ ⵓⵙⵎⵏⵉⴷ ⵅⴼ ⵜⵙⵎⵉⴳⵍⵉⵏ, ⵜⵉⵡⵓⵔⵉⵡⵉⵏ ⴷ ⵓⵙⵏⵎⴰⵍⴰ ⴷ ⵓⵙⵡⵓⴷⴷⵓ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ  ⵉⴳⴰⵏ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵜⴰⵙⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ. ⵉⵡⵏⴰⵏ ⵏ ⵓⵔⵣⴰⴼ ⵏ ⵉⴷⵖⴰⵔⵏ ⴷ ⵉⵙⵔⵔⵓⵙⵏ ⵉⵜⵉⵇⵏⵉⵢⵏ ⵏ ⵜⵎⵔⵙⵍⵜ, ⵙⵙⴼⵍⴷⵏ ⵉ ⵉⵏⵖⵎⵉⵙⵏ ⵅⴼ ⵜⵡⵓⵔⵉⵡⵉⵏ ⵏ ⵉⵎⴰⵙⵙⵏ ⵏⵏⴰ ⵜⵙⵙⴽⵔ ⵜⵎⵔⵙⵍⵜ ⴰⴼⴰⴷ ⴰⴷ ⵜⵙⵡⵓⴷⴷⵓ ⵉⵖⴰⵡⴰⵙⵏ, ⵙ ⵉⵎⵥⵍⵉ ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ  ⴳ ⵢⵉⴳⵔ ⵏ ⵓⴹⵎⴰⵏ ⵏ ⵓⵡⵏⵏⵉ ⴰⵎⴰⴳⵓⵜ ⵏ ⵜⵎⵣⴰⵣⵉⵏ ⵏ ⵜⴰⵏⵏⴰⵢⵜ ⴰⴳⵓⵏⵙ ⵏ ⵜⵏⵣⵡⴰⵢⵜ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵙⵍⵉⴳⵏ, ⴳ ⵓⵣⵎⵣ ⴰⵎⵢⵓⵔ ⴷ ⵉⵣⵎⵣⵏ ⵏ ⵉⵙⵜⴰⵢⵏ.
ⵜⵜⵓⵙⵏⵓⴱⴳⵏ ⴷⵉⵖ ⵉⵎⵃⴹⴰⵕⵏ ⴰⵡⴷ ⵖⵓⵔ ⵎⴰⵙⵙ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏⵏⴰ ⵢⴰⵙⵏ ⵉⵙⵙⴽⵜⵉⵏ ⵉⵛⴰⵕⵉⴹⵏ ⵉⵅⴰⵜⴰⵔⵏ ⵏ ⵜⵙⵎⵉⴳⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ  ⴳ ⵢⵉⴳⵔ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴰⴳⵓⵏⵙ ⵏ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ. ⵉⵙⵙⴽⵜⵉ ⵉ ⵉⵎⵃⴹⴰⵕⵏ ⴷⵉⵖ ⴰⵙⵉⵜⴳ ⵏ ⵜⵎⵔⵙⵍⵜ ⵉ ⵜⵡⵓⵔⵉⵡⵉⵏ ⵏⵏⵙⵏ ⵉⵣⴷⵉⵏ ⵙ ⵓⵔⵣⵣⵓ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵡⵉⵏ ⵓⵙⵍⴳⵏ.