« ⵢⴰⵜ ⵜⵖⴹⴼⵜ ⵉⵥⵍⵉⵏ ⵉⵇⵇⴰⵏ ⵏ ⴰⴷ ⵜⵜⵓⴼⴽ ⵉ ⵢⵉⴳⵔⴰⵏ ⴰⴽⴽⵯ ⵉⵣⴷⵉⵏ ⴷ ⵡⴰⴷⴰⴼ ⵖⵔ ⵜⵓⵙⵙⵏⴰ. ⵙ ⵓⵣⵎⵣⵣⵓ ⵏ ⵜⴳⵔⴰⵡⵍⴰ ⵜⴰⵜⵉⴽⵏⵓⵍⵓⵊⵉⵜ ⴷ ⵓⵎⵓⵜⵜⵢ ⴰⵎⵓⵟⵟⵓⵏ ⵏ ⵓⵎⵢⴰⵡⴰⴹ, ⴰⴷⴰⴼ ⵖⵔ ⴰⵏⵖⵎⵉⵙ ⴷ ⵓⵙⵎⵓⵜⵜⴳ ⵓⵔ ⵢⴰⴷ ⴷⴰ ⵜⵜⵓⴳⴰⵏ ⴳ ⵓⵙⴰⵜⵉ ⵏ ⵜⵉⵏⵎⵍ ⵏⵖ ⵜⵉⵖⵓⵔⵉⵡⵉⵏ ⵜⵉⵎⵙⴷⴰⵡⵉⵏ. ⴰⵙⵎⴰⴹⴰⵍ ⵏ ⵓⵎⵢⴰⵡⴰⴹ ⴷ ⵓⵎⵎⵓⵜⵜⵢ ⴰⵎⵓⵟⵟⵓⵏ ⵙⵙⵓⴼⵖⵏ ⴷ ⵜⴰⵍⵖⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵓⵙⵙⵏⴰ ⴷ ⵜⵙⵓⴳⴰⵔ ⵙⵏⵓⵍⴼⴰⵏ ⵉⵙⴰⵢⵔⴰⵔⵏ ⵉⵎⴰⵢⵏⵓⵜⵏ ⵏ ⵓⵙⵏⵉⴼⵍ ⴷ ⵓⵎⵢⴰⵖ ⴰⵏⴼⴳⴰⵏ », ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵜⵉⵏⴰⵡⵜ ⵏⵏⵙ ⴳ ⵓⵙⴰⵜⵉ ⵏ ⵓⴳⵔⴰⵡ ⵉⵙⵙⵓⵊⴰⴷⵏ ⵉ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵜⵉⵙⵙ ⵙⴰ ⵅⴼ ⵓⵙⴳⵎⵉ ⵏ ⵉⵅⴰⵜⴰⵔⵏ, ⵉⵜⵜⵓⵙⵏⵎⴰⵍⴰⵏ ⴳ ⵛⴼⵛⴰⵡⵏ ⴰⵙⵙ ⵏ 6 ⵢⵓⵏⵢⵓ 2022.

ⵜⴰⴷⴷ ⵎⴰⵙⵙⴰ ⴰⵅⴰⵔⴱⴰⵛ ⴷⵉⵖ ⵅⴼ «  ⴰⵎⵎ ⵉⵎⵓⵏⵏ ⵢⴰⴹⵏ, ⴰⵎⵓⵏ ⴰⵎⵖⵔⴰⴱⵉ ⵉⵇⵇⴰⵏ ⵜ ⵉⵏ, ⴷⴰⵜ ⵓⵎⵎⵓⵜⵜⵢ ⵏ ⵓⵎⵢⴰⵡⴰⴹ ⴷ ⵓⵙⵏⵖⵎⵙ, ⴰⴷ ⵉⵏⵏⴰⵍ ⵉⵙⵏⵉⴼⵉⵍⵏ ⴷ ⵓⵣⵣⵉⴳⵣ ⴳ ⵉⵙⵡⵉⵔⵏ ⵉⴳⴳⵓⵜⵏ : ⴳ ⵓⵙⵡⵉⵔ ⵏ ⵓⵙⵖⴰⵏ ⴰⵏⴰⵎⵓⵏ, ⵜⵉⵖⴰⵔⴰⵙⵉⵏ ⵏ ⵡⴰⴷⴰⴼ ⵖⵔ ⵜⵓⵙⵙⵏⴰ, ⴰⵜⵉⴳⵏ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ, ⴷ ⵜⴷⵉⵏⴰⵎⵉⵢⵜ ⵏ ⵓⵍⵜⴰⵖ ⴷ ⵜⵎⴰⵙⴰⵢⵜ ⵜⴰⵏⴰⵎⵓⵏⵜ ⴷ ⵜⵉⴷⵢⵓⵍⵓⵊⵉⵜ… ».

ⵙⴳ ⵓⵢⴰ, ⵜⵏⵏⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵏ ⵉⵇⵇⴰⵏ ⴰⴷ « ⵏⵙⴷⵓⵙ ⴰⵙⴼⵔⴽ ⴰⵏⴰⴳⵔⴰⵡ ⵏ ⵉⵙⵓⵔⵙⵏ ⵉⴷⵉⵎⵓⵇⵕⴰⵟⵉⵢⵏ, ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ ⵏⵏⴰ ⴷ ⵢⵉⵡⵉ ⵓⵙⵎⴰⴹⴰⵍ ⴷ ⵓⵙⵎⵓⵟⵟⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ, ⴷ ⵉⵇⵇⴰⵏ ⴰⴷ ⵏⵙⵔⵙ ⵜⵉⵖⴰⵔⴰⵙⵉⵏ ⴷ ⵡⴰⵍⵍⴰⵍⵏ ⵏⵏⴰ ⵜⵏ ⵉⵜⵜⵏⴰⵍⵏ, ⵉⴳⴰ ⴰⵖⵉⵡⵍ ⴰⴷ ⵉⵜⵜⵓⵙⴽⵔ ⵢⴰⵏ ⵓⵙⵎⵓⵜⵜⴳ ⵅⴼ ⵓⵙⵏⵖⵎⵙ ⴷ ⵜⴷⵍⵙⴰ ⵜⴰⵖⵎⵙⴰⵏⵜ ». ⴳ ⵓⴱⵔⵉⴷ ⴰⴷ, ⵜⵏⵏⴰ ⵉⵙ ⴷⴰ ⵉⵙⵙⵓⵜⵓⵔ ⵓⴳⵔⴰⵡ ⴰⵎⴰⵜⵜⴰⵢ ⴰⵙⵙⵏⵜⵉ ⵏ ⵜⵙⵏⵜⴰⵢⵉⵏ ⵜⵉⴽⵎⴰⵎⵉⵏ ⵜⵉⵙⵓⵍⴰⵏⵉⵏ ⴳ ⵢⵉⴳⵔⴰⵏ ⵏ ⵓⵙⴳⵎⵉ ⵅⴼ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵉ ⵓⴱⵖⵓⵔ ⵏ ⵉⵅⴰⵜⴰⵔⵏ.

ⵉⴳⴰ ⴰⵙⵔⵓⵙ ⴰⵎⵇⵔⴰⵏ, ⴰⵢ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ «  ⴳ ⵓⵎⴰⴹⴰⵍ ⵏ ⵡⴰⵙⵙⴰ, ⵜⴰⴷⵉⵎⵓⵇⵕⴰⵟⵉⵜ ⵓⵔ ⵜⵏⵏⵉ ⴰⴷ ⵜⵣⵣⵉⴳⵣ ⵙ ⵜⵏⵓⵎⵉ ⴱⵍⴰ ⵉⵏⵎⵓⵔⵉⵏ ⵢⵓⴽⵉⵏ, ⵉⵏⵎⵓⵔⵉⵏ ⵉⵙⵙⵏⵏ, ⵉⵎⵎⵓⵜⴳⵏ ⴰⴼⴰⴷ ⴰⴷ ⴼⵔⴳⵏ ⵉ ⵢⵉⵎⴰⵏ ⵏⵏⵙⵏ ⵎⴳⴰⵍ ⵉⵎⵉⵀⵉ ⴷ ⵜⴽⵏⴷⴰⵡⵜ ⴷ ⵉⵏⵖⵎⵉⵙⵏ ⵏ ⵜⴽⵔⴽⴰⵙ».

ⴰⵎⵙⴳⵔⴰⵡ ⴰⴷ, ⵜⵙⵏⵎⴰⵍⴰ ⵜ ⵍⵓⵏⵉⵙⴽⵓ, ⵜⵉⵎⵔⵙⴰⵍⵉⵏ ⵜⵉⵎⵏⴰⴱⴰⴹⵉⵏ ⴷ ⵉⵡⵔⵉⴽⵏ ⵉⵎⴷⵖⴰⵔⵏ ⵏ ⵜⵎⵏⴰⴹⵜ ⵏ ⵛⴼⵛⴰⵡⵏ ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵓⵎⵏⵏⵓⵖ ⵎⴳⴰⵍ ⵡⴰⵔ ⵜⴰⵖⵓⵔⵉ ⴳ ⵓⵙⴰⵜⵉ ⵏ ⵓⵙⵙⵓⵊⴷ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵜⵉⵙⵙ ⵙⴰ ⵅⴼ ⵓⵙⴳⵎⵉ ⵏ ⵉⵅⴰⵜⴰⵔⵏ ⵏⵏⴰ ⵔⴰⴷ ⵉⵜⵜⵓⵙⵏⵎⴰⵍⴰ ⵓⵙⵙⴰⵏ ⵏ 15 ⴰⵔ 17 ⵢⵓⵏⵢⵓ 2022 ⴳ ⵎⵕⵕⴰⴽⵛ ⵙ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴷ ⵡⵉⵙⵙ ⵙⴹⵉⵙ ⵕⴱⴱⵉ ⴰⴷ ⴰⵙ ⵢⴰⵡⵙ.