ⴰⵙⵓⵙⵙⵏ ⴰⵙⵍⵉⵥⵕ ⵓⵙⵙⴰⵏ ⵏ ⵕⵎⴹⴰⵏ: ⵉⵙⵙⴽⵜⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵜⵉⴳ ⵏ ⵓⵎⵜⴰⵡⴰ ⵏ ⵉⵣⵔⴼⴰⵏ ⵏ ⵓⴳⴷⵓⴷ ⴷ ⵡⴰⵏⴰⴹⵏ ⵉⴷⴰⵎⵙⴰⵏⵏ ⵏ ⵉⵎⵡⵓⵔⴰ
ⵙ ⵓⵢⵏⵏⴰ ⵉⵜⵜⵓⵙⵏⵎⵍⵏ ⴳ ⵜⵙⵎⵉⴳⵍⵜ ⵏⵏⵙ, ⴰⵙⵍⴳⵏ ⵏ ⵜⵓⵎⴰⵢⵉⵏ ⵜⵉⵙⵓⵙⵙⴰⵏⵉⵏ ⵏⵏⴰ ⵉⵙⵙⴽⴰⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵖⵓⵔⵙ ⴰⵡⵜⵜⴰⵙ ⵏ ⵓⴹⵎⴰⵏ ⵏ ⵢⴰⵏ ⵓⵎⵢⴰⵙ ⴳⵔ ⵉⵣⵔⴼⴰⵏ ⵏ ⵉⵏⵎⵓⵔⵉⵏ ⵉⵎⵙⵡⵓⵔⴰ ⵏ ⵓⵙⵏⵖⵎⵙ ⴷ ⵉⴱⵖⵓⵔⵏ ⵉⴷⴰⵎⵙⴰⵏⵏ ⵏ ⵉⵎⵡⵓⵔⴰ ⵉⵙⵍⵉⵥⵕⵏ.
ⴳ ⵓⵙⴰⵜⵉ ⵢⴰⴷ, ⵙ ⵡⴰⵜⵜⴰⴳ ⵅⴼ ⵉⵍⵓⴳⵏⵏ ⵉⵣⵣⵉⴳⵉⵣⵏ ⴳ ⵢⵉⴳⵔ ⵏ ⵓⵙⵙⵓⵜⵉ ⵏ ⵓⵙⵖⵉⵡⵙ ⴰⵙⵓⵙⵙⴰⵏ ⴷ ⵓⵙⵍⴳⵏ ⵏ ⵜⵓⵎⴰⵢⵉⵏ, ⵉⵖⵜⵙ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⴳⵔⴰⵡ ⵏⵏⵙ ⵓⵙⵎⵉⴷ ⵏ 25 ⵎⴰⵕⵚ 2025 ⴰⴷ ⵉⵙⵙⴽⵜⵉ ⵉⵙⴽⴽⵉⵏⵏ ⴰⴷ:
- ⴰⵢⵓⵔⵏ ⵏ ⵕⵎⴹⴰⵏ ⴳⴰⵏ ⴳ ⵜⵎⵢⵓⵔⵜ ⵉⵅⴼ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵙⵙⵓⵔⵓ ⴰⵙⵓⵙⵙⴰⵏ. ⴰⵜⵉⴳ ⵖⵓⵔ ⵉⵎⵡⵓⵔⴰ ⵉⴳⴰ ⴰⴷ ⴰⴳⵎⵏ ⵉⵖⴱⵓⵍⴰ ⵏⵏⵙ ⴳ ⵓⵣⵎⵣ ⴰⴷ ⴳ ⵉⵍⵍⴰ ⵓⵎⵓⵙⵙⵓ ⴰⵅⴰⵜⴰⵔ, ⵉⵢⴰ ⵉⴳⴰ ⵢⴰⵏ ⵓⵙⴽⴽⵉⵏ ⵏ ⵜⵉⴷⵜ, ⵉⴳ ⵢⴰⵏ ⵡⴰⵏⴰⴹ ⵉⵜⵜⵓⵡⴰⴽⵣⵏ. ⵎⴰⵛⴰ, ⴰⵙⵓⵔⵙ ⴰⴷ ⵉⵇⵇⴰⵏ ⵏ ⴰⴷ ⵜⵎⵓⵏ ⴷ ⵜⵖⴹⴼⵜ ⵉ ⵓⴱⵖⵓⵔ ⴰⵎⵇⵔⴰⵏ ⵏ ⵓⴳⴷⵓⴷ, ⵍⵓⵎⵕ ⵉⵜⵙ ⵏ ⵡⴰⵏⴰⵡⵏ ⴷⵉⴳⵙ ⵣⵓⵏⴷ ⴰⵔⵔⴰⵡ ⴷ ⵓⴳⴷⵓⴷ ⴰⵎⵥⵢⴰⵏ, ⵏⵏⴰ ⵉⵡⵀⵏⵏ ⵉ ⵓⵣⵣⵔⴰⵢ ⵏ ⴽⵉⴳⴰⵏ ⵏ ⵓⵣⵎⵣ ⴷⴰⵜ ⵉⵎⵢⴰⵡⴰⴹⵏ ⵉⵙⵓⵙⵙⴰⵏⵏ.
- ⵣⵓⵏⴷ ⴰⵢⵏⵏⴰ ⵏⵎⵢⴰⵔ, ⴰⵙⵖⵉⵡⵙ ⵏ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⵎⵖⵔⴰⴱⵉⵢⵏ ⵉⵜⵜⵓⵕⵛⵎ ⴳ ⵡⴰⵢⵓⵔ ⵏ ⵕⵎⴹⴰⵏ ⵏ ⵓⵙⴳⴳⵯⴰⵙ ⴰⴷ ⵙ ⵢⴰⵜ ⵜⵓⵎⴰⵏⵜ ⵏ ⴽⵉⴳⴰⵏ ⵏ ⵓⵙⵓⵙⵙⵏ, ⵙ ⵉⵎⵥⵍⵉ ⴳ ⵓⵣⵎⵣ ⵏ ⵓⵙⵙⵖⴷ ⴰⵅⴰⵜⴰⵔ. ⴰⴳⴳⵯⴰ ⴰⵙⵓⵙⵙⴰⵏ ⴰⴷ ⴰⵅⴰⵜⴰⵔ ⴷⴰ ⵉⵜⵜⴰⵖⵓⵍ ⵙ ⵡⵓⵣⴷⵉⵔ ⵅⴼ ⵢⵉⵔⵎ ⵏ ⵓⴳⴷⵓⴷ ⴰⵔ ⵉⵜⵜⴹⴰⵚ ⴰⵜⵉⴳ ⵏ ⵜⵓⵎⴰⵢⵉⵏ ⵜⵉⵜⵍⴼⴰⵣⵉⵏ ⴳⴰⵏⵜ ⴰⵙⵏⵓⵍⴼⵓ ⵏ ⵓⵎⴰⵔⵓⵔ ⵏⵖ ⵡⵉⵏ ⵉⵏⵖⵎⵉⵙⵏ ⵏⵖ ⵡⵉⵢⴰⴹ.
- ⴰⵎⵙⴽⵛⴰⵎ ⴰⵙⵓⵙⵙⴰⵏ ⵉⵖⵉⵢ ⴰⴷ ⵉⵟⵟⴰⵙ ⴰⵡⴷ ⵜⴰⵎⵔⵉⵙⵜ ⵏ ⵓⴳⴷⵓⴷ ⴳ ⵓⵢⵏⵏⴰ ⵉⵣⴷⵉⵏ ⵙ ⵉⵖⴰⵡⴰⵙⵏ, ⴰⵔ ⵉⵙⵙⵉⵣⴷⵉⵔ ⵙ ⵜⵡⵍⴰⴼⵜ ⵏ ⵓⵙⵏⵖⵎⵙ ⵍⵓⵎⴰⵕ ⵡⵉⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ.
- ⵜⵉⵏⵉⵔⵣⵉⵏ ⵜⵉⵏⵉⵎⴰⵏⵉⵏ ⵣⵓⵏⴷ ⵜⵉⵏⵉⵔⵣⵉⵏ ⵏ ⵉⵏⵎⵓⵔⵉⵏ ⵏⵖ ⵜⵉⵎⵙⵎⵓⵏⵉⵏ ⵏⵏⴰ ⴷ ⵉⵜⵜⴰⵡⴹⵏ ⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷⴰ ⵙⵙⴽⴰⵏⵏⵜ ⵢⴰⵏ ⵓⵏⵎⵔⵉ ⴰⵎⵇⵔⴰⵏ ⵏ ⵓⵙⴷⵓⵙ ⵏ ⵓⵙⵍⴳⵏ ⴰⵏⵉⵎⴰⵏ ⵏ ⵉⵎⵡⵓⵔⴰ ⴳ ⵢⵉⴳⵔ ⵏ ⵓⵎⵢⴰⵡⴰⴹ ⴰⵙⵓⵙⵙⴰⵏ. ⴰⵙⵓⵙⵙⵏ ⵓⵔ ⵉⵜⵜⵓⵏⴰⵏ ⵏⵖ ⴰⵙⵓⵙⵙⵏ ⵉⵜⵜⵓⵙⴳⴷⵍⵏ, ⴰⵎⵙⴽⵛⴰⵎ ⴳⵔ ⵜⵓⵎⴰⵢⵜ ⴰⵎⵙⴷⴷⵓⵍ ⴷ ⵓⵖⴰⵡⴰⵙ ⵉⵣⴷⵉⵏ ⵙ ⵜⵉⵔⵔⴰ, ⴰⵎⵙⴽⵛⴰⵎ ⴳⵔ ⵓⵙⵓⵙⵙⵏ ⴷ ⵜⴽⵙⵙⴰ, ⴰⵏⵏⴳⵣⴰ ⵏ ⵓⵎⴰⴼⴰⵡ ⴳ ⵢⵉⴳⵔ ⵏ ⵓⵙⵔⵓⵙ ⵏ ⵉⵢⴰⴼⵓⵜⵏ, ⵜⵉⵎⵙⴽⴰⵔⵉⵏ ⴰⴷ ⴰⴽⴽⵯ ⵉⵇⵇⴰⵏ ⵏ ⴰⴷ ⵜⵜⵓⵡⴰⴽⵙⵏⵜ ⴳ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵙ ⵢⵉⵙⵎ ⵏ ⵓⵣⵔⴼ ⵏ ⵓⵏⵎⵓⵔⵉ ⴷ ⵡⵉⵏ ⵓⴳⴷⵓⴷ ⴰⵎⵖⵔⴰⴱⵉ ⴳ ⵉⵖⴰⵡⴰⵙⵏ ⵉⵍⴰⵏ ⴰⵜⵉⴳ ⴷ ⵜⵎⵢⵉⵎⴰⵏⵜ.
- ⵉⵡⵔⵉⵏ ⵏ ⵜⵏⴱⴰⴹⵜ ⵏⵏⵙ ⴳ ⵜⵓⴽⴽⵉ ⵏ ⵉⵣⵎⴰⵣ, ⵉⵔⵓⵔⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴰⵖⴹⴼⵜ ⵉ ⵉⵎⵉⵣⴰⵏ ⵏ ⵓⴼⵔⵓⵔⵉ ⵏ ⵜⵏⵓⵎⵉ ⵏ ⵜⵖⴰⵔⴰⵙⵜ ⵏ ⵜⵉⵔⵔⴰ ⵏ ⵓⵙⵍⵉⵥⵕ ⴰⵎⵖⵔⴰⴱⵉ ⵏⵏⴰ ⴷⴰ ⵙⵙⵔⴽⴰⵜ ⵜⵎⵙⴽⴰⵔⵉⵏ ⴰⴷ ⵜⵉⵙⵓⵙⵙⴰⵏⵉⵏ, ⴰⵢⴷ ⵓⵔ ⴰⴷ ⵢⴰⴼ ⴰⵕⵥⵥⵓⵎ ⵖⴰⵙ ⵙ ⵓⴽⵛⵛⵓⵎ ⵏ ⵓⵎⵙⵍⴳⵏ.
- ⴷⴰ ⵉⵇⵇⴰⵔ ⵓⵙⵇⵇⵉⵎ ⴰⵎⴰⵜⵜⴰⵢ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⵢⴰⴷ ⵖⵔ ⵓⵙⵔⵓⵙ ⵏ ⵜⵎⵙⴽⴰⵔⵉⵏ ⵜⵉⵙⵓⵙⵙⴰⵏⵉⵏ ⵜⵉⵎⵙⵙⵍⵡⴰ, ⵜⵉⵏⵏⴰ ⵉⵍⴰⵏ ⵜⴰⵖⴰⵔⴰ, ⵜⵉⵏⵏⴰ ⵉⴼⵔⵔⴳⵏ ⵉ ⵜⵙⵏⵉⵎⴰⵏⵜ ⵏ ⵜⵖⴰⵔⴰⵙⵜ ⵏ ⵜⵉⵔⵔⴰ ⴼⵔⴳⵏⵜ ⴰⵡⴷ ⵉ ⵓⴱⵖⵓⵔ ⵏ ⵉⵎⵡⵓⵔⴰ ⵉⵙⵍⵉⵥⵕⵏ. ⴰⵢⴰ ⵓⵔ ⵉⵥⴹⴰⵕ ⴰⴷ ⵢⵉⵍⵉ ⵖⴰⵙ ⴳ ⵓⵖⴰⵡⴰⵙ ⵏ ⵢⴰⵏ ⵓⵣⵓⵔⵜ ⴰⴷⴰⵎⵙⴰⵏ ⴰⵙⵓⵍⴰⵏ ⵉ ⵓⵙⵏⵖⵎⵙ ⴰⵙⵍⵉⵥⵕ. ⴰⵢⴰ ⵉⴳⴰ ⴰⵖⵉⵡⵍ ⴳ ⵓⵣⵎⵣ ⴳ ⵉⵍⵍⴰ ⴽⵉⴳⴰⵏ ⵏ ⵓⵎⵓⵜⵜⵢ ⴳ ⵜⵡⵏⵏⴰⴹⵜ ⵜⴰⵖⵎⵙⴰⵏⵜ ⵜⴰⵎⴰⴹⵍⴰⵏⵜ ⴳ ⵉⴳⴰ ⵓⵎⵙⴰⵔⴰⵙ ⵏ ⵜⵉⴷⵜ ⵡⵉⵏ ⵉⵙⵇⵙⵉⵜⵏ ⵏ ⵓⴱⴰⴹ ⴰⵖⵎⵙⴰⵏ ⴷ ⵓⴷⵍⵙⴰⵏ.