ⵉⵣⴷⴰⵢⵏ ⵏ ⵓⵎⵢⴰⵡⴰⵙ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ (ⵀⴰⴽⴰ) ⵏ ⵍⵎⵖⵔⵉⴱ ⴰⴽⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⵏ ⵜⴰⵎⵓⵏⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⵏ ⴱⵍⵊⵉⴽⴰ, ⴳⴰⵏ ⵜⴰⵔⵙⵍⵜ ⵏ ⵉⵙⵏⵉⴼⵉⵍⵏ ⵉⴽⴽⴰⵏ ⴰⵙⵙ ⵏ 16 ⴽⵜⵓⴱⵕ 2023 ⴳⵔ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙⴰ ⵛⵉⵕⴰⵣ ⵍⴼⴰⵙⵙⵉ, ⵜⴰⵏⵖⵍⴰⴼⵜ ⵜⴰⵎⴰⵜⴰⵢⵜ ⵜⴰⵎⴰⵢⵏⵓⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⴳ ⵍⵎⵖⵔⵉⴱ.

ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ, ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⴰⵖⴰⵔⴰ ⵏ ⵜⴷⵉⵏⴰⵎⵉⵢⵜ ⵏ ⵓⵎⵢⴰⵡⴰⵙ ⴳⵔ ⵀⴰⴽⴰ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⵏ ⵜⵎⵓⵏⵜ ⵡⴰⵍⵓⵏⵉ-ⴱⵔⵓⴽⵙⵉⵍ, ⵜⵏⵏⴰ ⵉⵙ ⵉⵣⴷⴰⵢⵏ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⵏ ⵓⵙⵍⴳⵏ ⴷⴰ ⵜⴻⵜⵜⵉⵏⵜ ⵅⴼ ⵓⵙⵏⵉⴼⵍ ⵏ ⵢⵉⵔⵎⵏ ⴳ ⵓⵢⵏⵏⴰ ⵉⵣⴷⵉⵏ ⵜⴰⵎⵙⵙⴰⵏⵓⵏⵜ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⴷ ⵓⵙⵡⵉⵏⴳⵎ ⵉⵛⵛⴰⵔⵏ ⵅⴼ ⵉⵙⴳⵓⵎⵏ ⵣⵓⵏⴷ ⴰⵙⴳⵎ ⵏ ⵓⵙⵉⴽⵙⵍ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ ⴰⴳⵓⵏⵙ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵏⵖ ⴰⵙⴱⴷⴷⵉ ⵏ ⵓⵡⵏⵏⵉ ⵏ ⵓⴽⵙⴰⵏ, ⵉⵙⴳⵓⵎⵏ ⵏⵏⴰ ⵔⴰⴷ ⵉⵣⵔⵉⵏ ⴰⵔ ⵉⵙⵇⵙⵉⵜⵏ ⵣⵓⵏⴷ ⴰⵙⵏⴼⵍ ⴰⵎⵓⵟⵟⵓⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⴷ ⵜⵙⵓⴳⴰⵔ ⵜⵉⵎⴰⵢⵏⵓⵜⵉⵏ ⵏ ⵉⵇⵇⴰⵏⵏ ⵉ ⵜⵎⵔⵙⴰⵍ ⵏ ⵓⵙⵍⴳⵏ ⴰⴳⵓⵏⵙ ⵏ ⵜⵡⵏⵏⴰⴹⵜ ⵜⴰⵎⵓⵟⵟⵓⵏⵜ ⵜⴰⵎⴰⵜⴰⵢⵜ.

ⴳ ⵜⵙⴳⴰ ⵢⴰⴹⵏ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵉⵖⵉⵢ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴷ ⵉⵙⴷⵓⵙ ⵉⵙⵏⵉⴼⵉⵍⵏ ⵉⵙⵉⵏⵔⴰⵏ ⴳⵔ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⴷ ⵢⵉⴽⵏ ⵏⵏⵙ ⴰⵡⴰⵍⵓⵏⵉ ⴰⴳⵓⵏⵙ ⵏ ⵓⵥⵟⵟⴰ ⴰⴼⵔⴰⵏⴽⵓⴼⵓⵏⵉ ⵏ ⵉⵎⵙⵏⴰⵎⵏ ⵏ ⵓⵙⵏⵖⵎⵙ.

ⴳ ⵜⵙⴳⴰ ⵏⵏⵙ, ⵜⵏⵏⴰ ⵎⴰⵙⵙⴰ ⵍⴼⴰⵙⵙⵉ ⵉⵙ ⵉⴳⴰ ⵓⵎⵢⴰⵡⴰⵙ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⵏ ⵜⴰⵎⵓⵏⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⵢⴰⵏ ⵢⵉⵔⵎ ⵉⴱⵓⵖⵍⴰⵏ ⴰⴳⵓⵏⵙ ⵏ ⵓⵙⴰⵜⵉ ⵏ ⵓⵎⵢⴰⵡⴰⵙ ⴰⵎⴰⵜⴰⵢ ⴳⵔ ⵍⵎⵖⵔⵉⴱ ⴰⴽⴷ ⵡⴰⵍⵓⵏⵉ ⴱⵔⵓⴽⵙⵉⵍ. ⵜⴰⴷⵉⴱⵍⵓⵎⴰⵙⵉⵢⵜ ⵜⴰⴱⵍⵊⵉⴽⵜ ⵜⵏⵏⴰ ⵉⵙ ⵜⵖⵉⵢ ⴰⴷ ⵜⵙⵙⵓⵀⵏ ⵉⵣⴷⴰⵢⵏ ⴷ ⵜⵉⴳⴰⵡⵉⵏ ⵉⵛⵛⴰⵔⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⵏ ⵜⴰⵎⵓⵏⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⵙ ⵓⴱⵔⵉⴷ ⵏ ⵓⵣⵔⴰⴽ ⵏ ⵜⵙⵏⵉⵎⴰⵏⵜ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⵙ ⵙⵏⴰⵜ.

ⵜⵔⵣⴼ ⴷⴼⴼⵉⵔ ⴰⵢ ⵜⵏⵖⵍⴰⴼⵜ ⵜⴰⵎⴰⵜⴰⵢⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⵜⴰⵣⵓⵏⵉⵏ ⴷ ⵜⵏⴰⴼⵓⵜⵉⵏ ⵜⵉⵜⵉⵇⵏⵉⵢⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵍⵍⴰ ⵙ ⵉⵎⵥⵍⵉ ⵜⵏⵎⵀⴰⵍⵜ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⴷ ⵜⵏⵎⵀⴰⵍⵜ ⵏ ⵉⵏⴳⵔⴰⵡⵏ ⵏ ⵓⵙⵏⵖⵎⵙ.

ⵉⵇⵇⴰⵏ ⴰⴷ ⵏⵙⵎⴽⵜⵉ ⵉⵙ ⴰⴹⴼⴼⵓⵕ ⵏ ⵜⵎⵙⵙⴰⵏⵓⵏⵜ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ, ⵉⵍⵍⴰ ⵖⵓⵔ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵙⵍⵉⵥⵕ ⵏ ⵜⴰⵎⵓⵏⵜ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ, ⵙⴳ ⵓⵙⴳⴳⵯⴰⵙ ⵏ 2021 ⵓⵖⴰⵡⴰⵙ HMS (ⵀⴰⴽⴰ ⵎⵉⴷⵢⴰ ⵙⵓⵍⵓⵜⵉⵢⵓⵏ), ⵏⵏⴰ ⵙⵙⴽⵔⵏ ⵉⵎⵓⵣⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵜⴻⵜⵜⵓⵙⵔⵙ ⵜⵏⴼⵓⵍⵜ ⵏ ⵓⵙⵏⵓⵍⴼⵓ ⵏⵏⵙ ⵖⵓⵔ ⵜⵎⴰⴷⴷⴰⵙⵜ ⵜⴰⵎⴰⴹⵍⴰⵏⵜ ⵏ ⵡⴰⵢⵍⴰ ⴰⵡⵏⴳⵉⵎ.

ⵉⵃⴰⴹⵕ ⵉ ⵓⵎⵙⴰⴳⴰⵔ ⴰⴷ ⴰⵡⴷ ⵎⴰⵙⵙ ⴽⵔⵉⵙⵜⵉⵍ ⵛⵓⵖⵉⵍⵉⵢⵉ, ⵜⴰⵏⵙⴼⴰⵡⵜ ⵜⴰⴷⵙⵍⴰⵏⵜ ⵖⵓⵔ ⵓⴽⴰⴱⴰⵕ ⴰⵎⴰⵜⴰⵢ ⵏ ⵡⴰⵍⵓⵏⵉ-ⴱⵔⵓⴽⵙⵉⵍ ⴳ ⵍⵎⵖⵔⵉⴱ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⴰⵙⴰⵢ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⴳⵔⴰⵖⵍⴰⵏⵉⵏ ⵖⵓⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.