ⵜⵙⴳⵎⴹ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵏⵜⵜⴰⵜ ⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⵏ ⵍⴳⴰⴱⵓⵏ, ⵎⴰⵙⵙ ⵊⵉⵔⵎⴰⵏ ⵏⴳⵓⵢⵓ ⵎⵓⵙⵙⴰⴼⵓ, ⴰⵙⵙ ⵏ 16 ⵎⴰⵢⵓ 2023 ⴳ ⵜⵎⴷⵉⵏⵜ ⵏ ⵍⵉⴱⵔⵓⴼⵉⵍ ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⵉⵎⵎⵔⵡⴰⵙⵏ. 

ⵜⴰⵏⵜⴰⵎⵜ ⴰⴷ ⵔⴰⴷ ⵜⵕⵥⵎ ⴰⴱⵔⵉⴷ ⵉ ⵓⵙⵔⵔⵓⵙ ⵏ ⵢⴰⵜ ⵜⵎⵙⴽⵜⵉⵜ ⵉⵛⵛⴰⵔⵏ ⵏ ⵓⵎⵢⴰⵡⴰⵙ ⴳⵔ ⵙⵏⴰⵜ ⵜⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴰⴼⴰⴷ ⴰⴷ ⵙⴷⵓⵙⵏ ⵜⵓⵙⵓⵔⵜ ⴷ ⵜⵕⵡⵉ ⵏ ⵜⵡⵓⵔⵉ ⵏ ⵓⵙⵏⴰⵎ ⴳ ⵓⵙⵡⵉⵔ ⵙ ⵉⵎⵥⵍⵉ ⵏ ⵓⵙⴷⵓⵙ ⵏ ⵓⵡⵏⵏⵉ ⴰⵎⴰⴳⵓⵜ ⴰⵙⵔⵜⴰⵏ ⴷ ⵓⵏⴰⵎⵓⵏ ⴰⴳⵓⵏⵙ ⵏ ⵓⵙⵏⵖⵎⵙ, ⴰⵙⴷⵓⵙ ⵏ ⵓⵙⵎⴷⵢⴰ ⵏ ⵜⵎⵢⴰⵏⴰⵡⵜ ⵜⴰⴷⵍⵙⴰⵏⵜ ⴷ ⵜⵙⵏⵍⵙⴰⵏⵜ ⴷ ⵓⴼⵔⴰⴳ ⵏ ⵓⴳⴷⵓⴷ ⴰⵎⵥⵢⴰⵏ ⴰⴳⵓⵏⵙ ⵏ ⵓⵎⵏⴰⴹ ⵏ ⵓⵙⵡⵓⵔⵉ ⴰⵎⴰⵢⵏⵓ ⵏ ⵓⵙⵏⵖⵎⵙ ⵅⴼ ⵉⵔⵏⴰ ⵓⵙⵏⴼⵍ ⴰⵎⵓⵟⵟⵓⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ.

ⵉⵡⵏⴰⵏ ⵏ ⵜⴼⵓⴳⵍⴰ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥ : « ⵜⴰⵎⵢⴰⵇⵇⴰⵏⵜ ⴰⴷ ⵔⴰⴷ ⵜⴳ ⴰⵏⵏⵓⵕⵥⵎ ⵏ ⵢⴰⵏ ⵢⵉⵎⵉⵔ ⵏ ⵓⵙⵏⵉⴼⵍ ⵉⵕⵡⴰⵏ ⴳⵔ ⵜⵎⵔⵙⴰⵍ ⵙ ⵙⵏⴰⵜ, ⴰⵎ ⵜⵎⵔⵙⴰⵍ ⴰⴽⴽⵯ ⵏ ⵓⵙⵏⴰⵎ ⵏ ⵜⵎⵓⵔⴰ ⵏ ⵓⵎⵏⵥⴰⵡ, ⵉⵇⵇⴰⵏ ⵏ ⴰⴷ ⵔⴰⵔⵏⵜ ⵅⴼ ⵜⴳⴰⵏⵏⵉⵜⵉⵏ ⵜⵉⵎⴰⵢⵏⵓⵜⵉⵏ ⵉⵣⴷⵉⵏ ⴷ ⵓⵙⵏⴰⵎ ⵏ ⵓⵙⵏⵖⵎⵙ ⴰⴼⴰⴷ ⴰⴷ ⴹⵎⵏⵏ ⵜⵉⵍⴻⵍⵍⵉ ⵏ ⵓⵡⵏⵏⵉ, ⵜⵉⵍⴻⵍⵍⵉ ⵏ ⵜⵉⵔⵔⴰ ⴷ ⵓⵣⵔⴼ ⵏ ⵉⵏⵎⵓⵔⵉⵏ ⴳ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ, ⵜⵉⴽⵍⴰⵙⵉⴽⵉⵏ ⴷ ⵜⵎⵓⵟⵟⵓⵏⵉⵏ, ⵉⵜⵜⵣⵔⴰⴽⵏ ⴰⵜⵉⴳⵏ ⵉⴷⵉⵎⵓⵇⵕⴰⵟⵉⵢⵏ ⴷ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵉⵏⴼⴳⴰⵏⵏ. »

ⴳ ⵜⵙⴳⴰ ⵏⵏⵙ, ⵉⵙⵙⵎⵖⵓⵔ ⵓⵏⵙⵙⵉⵅⴼ ⵊⵉⵔⵎⴰⵏ ⵏⴳⵓⵢⵓ ⵎⵓⵙⵙⴰⴼⵓ ⴰⵏⵏⵓⵕⵥⵎ ⵏ ⵜⵎⴷⵔⴰⵡⵜ ⵜⴰⵙⵉⵏⵔⴰⵏⵜ ⵉⵔⵡⴰⵏ ⵏⵏⴰ ⵔⴰⴷ ⵉⵙⴷⵓⵙ ⴰⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⵉⵙⴷⵓⵙ ⵉⵔⵎⵏ ⵏ ⵜⵎⵓⵔⴰ ⵙ ⵙⵏⴰⵜ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵏⴰⵎ. ⵉⵔⵏⵓ ⵉⵏⵏⴰ ⵉⵙ ⵔⴰⴷ ⵜⵙⴷⵓⵙ ⵜⵎⴷⵔⴰⵡⵜ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⵏ ⵍⴳⴰⴱⵓⵏ ⴷ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥ ⵏ ⵍⵎⵖⵔⵉⴱ ⵉⵏⵢⴰⵍⴽⴰⵎⵏ ⴷ ⵉⵣⴷⴰⵢⵏ ⵉⵕⵡⴰⵏ ⵉⵚⴽⴰⵏ ⵅⴼ ⵓⵣⵔⴰⴽ ⴳⵔ ⵜⵎⵓⵔⴰ ⵙ ⵙⵏⴰⵜ.

ⵍⵍⵉⴳ ⵜⵙⴰⵡⵍ ⴷⵉⵖ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵙ ⵢⵉⵙⵎ ⵏ ⵜⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ (RIARC), ⵜⵙⵙⵎⵖⵓⵔ ⵙ ⵜⵣⵎⵎⴰⵔ ⵏⵏⴰ ⵉⵙⵙⴽⴰⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⵏ ⵍⴳⴰⴱⵓⵏ ⴰⴼⴰⴷ ⴰⴷ ⵉⵙⴷⵓⵙ ⵓⵎⵓ ⵏⵏⵙ ⴳ ⵜⵡⵓⵔⵉⵡⵉⵏ ⴷ ⵉⵙⵡⵉⵏⴳⵉⵎⵏ ⵏ ⵜⵙⵉⵍⴰ ⵢⴰⴷ ⵜⴰⴼⵔⵉⵇⵜ ⴳ ⵎⵓⵏⵏⵜ ⴰⴽⴽⵯ ⵜⵎⵔⵙⴰⵍ ⵏ ⵓⵙⵏⴰⵎ ⵏ 37 ⵏ ⵜⵎⵓⵔⴰ ⵜⵉⴼⵔⵉⵇⵉⵏ. « ⴰⵎⴷⵢⴰ ⴰⵜⵔⴰⵔ ⵏ ⵜⴷⵉⵏⴰⵎⵉⵢⵜ ⴰⴷ ⵜⴰⵎⴰⵢⵏⵓⵜ ⵎⵉ ⴳⴳⵓⵜⵏⵜ ⵜⵖⵎⵔⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⵏ ⵍⴳⴰⴱⵓⵏ ⵉⴳⴰ ⵓⵎⵓ ⵏ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵎⵓⵙⵙⴰⴼⵓ ⴳ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥ ⵓⵙⵙⴰⵏ ⵏ 27 ⴷ 28 ⵉⴱⵔⵉⵔ 2023 ⴳ ⴼⴰⵙ ⵅⴼ ⵓⵙⴳⵓⵎ « ⵉ ⵢⴰⵏ ⵓⵙⵏⴰⵎ ⵏ ⵜⵖⴰⵔⵉⵡⵉⵏ ⴷ ⵓⵙⵓⵎⵓ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ », ⴰⵢ ⵜⵔⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ. ⵜⵏⵏⴰ ⴷⵉⵖ ⵉⵙ ⵓⵎⵓ ⵏ ⵍⴳⴰⴱⵓⵏ ⴳ ⵜⵉⵏⴰⵡⵜ ⴰⴷ ⵉⵙⵎⵓⵏⵏ ⵉⵎⵙⵏⴰⵎⵏ ⵏ 20 ⵏ ⵜⵎⵓⵔⵜ ⵜⴰⴼⵔⵉⵇⵜ ⵜⵓⵙⴰ ⴷ ⴳ ⵓⵣⵓⵛⵛⵍ ⵏ ⵓⵎⵛⴰⵡⴰⵕ ⴳⵔ ⵓⵥⵟⵟⴰ ⴰⴼⵔⵉⵇ ⵏ ⵉⵎⵙⵏⴰⵎⵏ ⴷ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ ⵏⵏⴰ ⵜⵇⵇⴰⵏ ⵜⵎⵔⵉⵙⵜ ⵏ ⵉⵎⵙⵏⴰⵎⵏ ⴰⴽⴽⵯ ⵏ ⵓⵎⵏⵥⴰⵡ.

ⵉⵡⵏⴰⵏ ⵏ ⵓⵔⵣⴰⴼ ⵏⵏⵙ ⵏ ⵜⵡⵓⵔⵉ ⵖⵔ ⵍⴳⴰⴱⵓⵏ, ⵜⵍⵍⴰ ⵜⵎⵓⵏ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⴽⴷ ⴱⵏⵄⵉⵙⵙⴰ ⵄⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ  ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙ ⵊⴰⵄⴼⵕ ⵇⴰⵏⵙⵓⵙⵙⵉ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ ⴰⵎⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ, ⵉⵙⵏⵓⴱⴳ ⵜⵏ ⵓⵎⴰⵡⵙⴰⵙ ⵏ ⵓⵎⵢⴰⵡⴰⴹ, ⵎⴰⵙⵙ ⵕⵓⴷⵔⵉⴳ ⵎⴱⵓⵎⴱⴰ ⴱⵉⵙⵙⴰⵡⵓ. ⴳ ⵓⵎⵙⴳⵔⴰⵡ ⴰⴷ ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⴰⴷ ⵉ ⵓⵎⴰⵙⴰⵢ ⴰⴳⴰⴱⵓⵏⵉ ⵉⵙⴳⵓⵎⵏ ⵉⵎⵇⵔⴰⵏⵏ ⵏ ⵜⵡⵓⵔⵉ ⵏ RIARC ⵉⴳⴰⵏ ⵜⴰⵙⵉⵍⴰ ⵜⴰⴼⵔⵉⵇⵜ, ⵉⵔⴰⵏ ⵙ ⵓⵙⴷⵓⵙ ⵏ ⵡⴰⴷⴷⴰⴷ ⴷ ⵜⵎⵓⵣⴰⵢⵜ ⵏ ⵉⴳⵎⴰⵎⵏ ⵏⵏⵙ, ⴰⴷ ⵜⵙⵔⵙ ⵢⴰⵏ ⵓⵣⵓⵔⵜ ⴰⴼⵔⵉⵇ ⵏ ⵓⵙⵏⴰⵎ ⴰⵏⵉⵎⴰⵏ ⵏ ⵓⵙⵏⵖⵎⵙ ⵉⵖⵉⵢⵏ ⴰⴷ ⵉⴼⵔⴳ ⵉ ⵡⴰⵎⵓⵏⵏ ⵙⴳ ⵉⵎⵉⵣⵉⵢⵏ ⴷ ⵉⵙⴷⵉⴷⴷⵢⵏ ⵉⵙⵏⵖⵎⴰⵙⵏ ⴱⵍⴰ ⴰⴷ ⵜⴹⴰⵙ ⵜⵉⵍⴻⵍⵍⵉⵢⵉⵏ ⵜⵉⴷⵙⵍⴰⵏⵉⵏ.