ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 23 ⵢⵏⵏⴰⵢⵔ 2025 ⴳ ⵓⵙⵖⵉⵎ ⵏ ⵜⵎⵔⵙⵍⵜ, ⵜⵉⴼⵓⴳⵍⵉⵡⵉⵏ ⵏ ⵓⵙⴳⵎⴹ ⵏ ⵡⴰⵍⵓⴳⵏ ⵉⵎⴰⵢⵏⵓⵜⵏ ⵏ ⵡⴰⴳⴳⵯⴰⵜⵏ ⵉ ⴽⴰⴱ ⵕⴰⴷⵢⵓ, ⵎⵉⴷⵉⵏⴰ ⵉⴼⵉⵎ, ⵕⴰⴷⵢⵓ ⵎⴰⵕⵚ ⴷ ⵎⵉⴷ ⵕⴰⴷⵢⵓ. ⴰⵙⴽⴰⵔ ⵏ ⵡⴰⵍⵓⴳⵏ ⴰⴷ ⵉⵎⴰⵢⵏⵓⵜⵏ ⵏ ⵡⴰⴳⴳⵯⴰⵜⵏ ⵢⵓⵙⴰ ⴷ ⴳ ⵓⵙⴰⵜⵉ ⵏ ⵓⵙⵎⴰⵢⵏⵓ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵏ ⵜⵓⵔⴰⴳⵉⵏ ⵏ ⴽⵓⵥ ⵏ ⵉⵕⴰⴷⵢⵓⵜⵏ ⴰⴷ ⵏⵏⴰ ⵎⵉ ⵉⵙⴰⵍⴰ ⵓⵙⵡⵓⵔⵉ.
ⵜⵓⵎⴰⵢⵉⵏ ⵏ ⵡⴰⵍⵓⴳⵏ ⵉⵎⴰⵢⵏⵓⵜⵏ ⵏ ⵡⴰⴳⴳⵯⴰⵜⵏ ⴷⴰ ⵙⴷⵓⵙⵏⵜ ⵜⵉⵎⵔⵉⵙⵉⵏ ⵏ ⴽⵓⵥ ⵏ ⵉⵎⵡⵓⵔⴰ ⴳ ⵢⵉⴳⵔ ⵏ ⵓⵣⵔⴰⴽ ⵏ ⵉⵍⵓⴳⵏⵏ ⵉⵣⵣⵓⵍⴰⵏⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵉⵏⴼⴳⴰⵏⵏ ⵉⴷⵙⵍⴰⵏⵏ, ⴰⵎ ⵓⵣⵔⴰⴽ ⵏ ⵡⴰⴷⴷⵓⵔ ⴰⵏⴼⴳⴰⵏ ⴷ ⵜⵓⴷⵔⵜ ⵜⵓⵙⵍⵉⴳⵜ, ⴰⵎⵏⵏⵓⵖ ⵎⴳⴰⵍ ⵜⵉⵡⵍⴰⴼⵉⵏ ⵉⵚⴽⴰⵏ ⵅⴼ ⵓⵙⵏⵓⵃⵢⵓ ⵏ ⵡⴰⵏⴰⵡ, ⴰⴼⵔⴰⴳ ⵏ ⵓⴳⴷⵓⴷ ⴰⵎⵥⵢⴰⵏ ⴷ ⵓⵣⵔⴰⴽ ⵏ ⵉⵎⵏⵣⴰⵢ ⵏ ⵜⴰⵖⴰⵍⵜ ⵏ ⵜⵣⵣⵉⴷⴳⴰ... ⴰⵔ ⵙⵙⵉⴽⵣⵏ ⵓⴳⴰⵔ ⵉⵣⵓⵛⵛⵍⵏ ⵏ ⵉⵎⵡⵓⵔⴰ ⴳ ⵢⵉⴳⵔ ⵏ ⵓⵙⵢⴰⴼⵓ ⴰⵏⵣⵡⴰⵢ, ⵏ ⵓⵎⵢⴰⵡⴰⴹ ⴰⵙⵓⵙⵙⴰⵏ ⴷ ⵉⵣⵓⵛⵛⵍⵏ ⵉⴷⵙⵍⴰⵏⵏ ⵉⵣⴷⵉⵏ ⴷ ⵍⴰⵎⴰⵏ ⵏ ⵉⵙⵉⵜⵏ ⴷ ⵉⵙⵔⵓⵙⵏ ⵏ ⵜⵙⵢⴰⴼⵓⵜ ⴷ ⵓⵣⵓⵣⵣⵔ.
ⵜⵜⵓⵙⵏⵎⴰⵍⴰⵏⵜ ⵜⴼⵓⴳⵍⵉⵡⵉⵏ ⵏ ⵓⵙⴳⵎⴰⴷ ⵙ ⵓⵃⵉⴹⵕ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵓⵏⵎⵀⴰⵍ ⴰⵎⴰⵜⴰⵢ ⴷ ⵉⵏⵎⵀⴰⵍⵏ ⵏ ⵜⵎⵔⵙⵍⵜ, ⴷ ⵎⴰⵙⵙ ⵉⵍⵢⴰⵙ ⵍⵄⵓⵎⴰⵔⵉ, ⴰⵏⵙⵙⵉⵅⴼ ⴰⵏⵎⵀⴰⵍ ⵏ ⴽⴰⴱ ⵕⴰⴷⵢⵓ, ⵎⴰⵙⵙ ⵎⵉⵍⵓⴷ ⵍⴰⵅⴹⴰⵔ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵎⵉⴷⵉⵏⴰ ⵉⴼⵉⵎ, ⴷ ⵎⴰⵙⵙ ⵀⵉⵛⴰⵎ ⵍⴰⵅⵍⵉⴼⵉ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵕⴰⴷⵢⵓ ⵎⴰⵕⵚ, ⴷ ⵎⴰⵙⵙ ⵎⵓⵍⴰⵢ ⴰⵃⵎⴷ ⵛⴰⵔⵄⵉ, ⴰⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵎⵉⴷ ⵕⴰⴷⵢⵓ.
ⵙ ⵓⵣⵎⵣⵣⵓ ⵏ ⵜⴼⵓⴳⵍⵉⵡⵉⵏ ⴰⴷ, ⵜⵙⵙⴱⵖⵙ ⵎⴰⵙⵙⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵎⴰⵙⴰⵢⵏ ⵏ ⴽⵓⵥ ⵏ ⵉⵕⴰⴷⵢⵓⵜⵏ ⴰⴷ ⵅⴼ ⵜⵣⵎⵎⴰⵔ ⵏⵏⵙⵏ ⵜⵉⵙⵓⵍⴰⵏⵉⵏ ⴳ ⵢⵉⴳⵔ ⵏ ⵓⵙⵅⵉⵜⵔ ⵏ ⵜⴷⵓⵍⵉ ⵜⴰⵎⵓⵔⴰⵏⵜ ⵏ ⵉⵥⴹⵡⴰⵏ ⵏⵏⵙⵏ ⵏ ⵓⵣⵓⵣⵣⵔ. ⵜⵙⵙⵉⴽⵣ ⴷⵉⵖ ⴰⵙⵎⵎⵓⴷ ⵏ ⵉⵕⴰⴷⵢⵓⵜⵏ ⵓⵙⵍⵉⴳⵏ ⴷ ⵓⵙⵏⵖⵎⵙ ⴰⴳⴷⵓⴷⴰⵏ ⴳ ⵜⵙⵎⵉⴳⵍⵜ ⵏ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ, ⵙ ⵉⵎⵥⵍⵉ ⴳ ⵓⵣⵎⵣ ⵏ ⵜⴰⵙⵙⴰⵙⵜ ⴰⵎ ⵓⵢⵏⵏⴰ ⵉⵣⵔⵉⵏ ⵉⵡⵏⴰⵏ ⵏ ⵉⵏⴳⵢⴰⵏ ⵉⴽⴽⴰⵏ ⵜⴰⵎⵏⴰⴹⵜ ⵏ ⵓⵢⴼⴼⵓⵙ ⵏ ⵜⴳⵍⴷⵉⵜ ⵏⵖ ⴰⵏⴷⵓⴷⵉ ⵉⵡⵜⴰⵏ ⵍⵃⵓⵣ ⵏⵖ ⴰⵟⵟⴰⵏ ⵏ ⴽⵓⴼⵉⴷ-19. ⴳ ⵜⵙⴳⴰ ⵢⴰⴹⵏ, ⵜⵖⵔⴰ ⵎⴰⵙⵙⴰ ⴰⵅⴰⵔⴱⴰⵛ ⵉ ⵓⴳⴰⵔ ⵏ ⵜⵣⵎⵎⴰⵔ ⴰⴼⴰⴷ ⴰⴷ ⵏⴰⵡⴹ ⵜⵉⵏⵥⴰⵕ ⵏ ⵡⴰⵙⵙⴰ ⴷ ⵜⵉⵏ ⵉⵎⴰⵍ ⴳ ⵢⵉⴳⵔ ⴰⴷ, ⵙ ⵉⵎⵥⵍⵉ ⵜⵉⵏⵏⴰ ⵉⵣⴷⵉⵏ ⵙ ⵓⵎⵓⵜⵜⵉ ⴰⵎⵓⵟⵟⵓⵏ ⵏ ⵜⵎⵙⵙⵏⵜⵉⵢⵉⵏ ⵜⵉⵙⵍⵉⵥⵕⵉⵏ ⴷ ⵓⵙⵏⴰⵎ ⵏ ⵓⵣⵓⵔⵜ ⵏⵏⵙⵏ ⴰⴷⴰⵎⵙⴰⵏ. ⵜⵏⵏⴰ ⴷⵉⵖ ⵉⵙ ⵜⴳⴰ ⵜⵏⵥⵕⵜ ⵜⴰⴷⵙⵍⴰⵏⵜ ⴰⴳⵓⵏⵙ ⵏ ⵓⵏⴳⵔⴰⵡ ⴰⵙⵍⵉⵥⵕ ⴰⵎⵖⴰⵔⴱⵉ ⵜⵉⵏ ⵓⵙⴷⵓⵙ ⵏ ⵉⵙⵖⵓⵏⵏ ⵏ ⵜⵎⵢⴰⵎⴰⵏⵜ ⴳⵔ ⵉⵏⵎⵓⵔⵉⵏ ⴷ ⵓⵙⵏⵖⵎⵙ ⵙ ⵡⴰⵏⴰⵡⵏ ⵏⵏⵙ ⴰⴽⴽⵯ. “ⴳ ⵓⵎⵏⴰⴹ, ⴰⴷ ⴰⵢ ⵜⵏⵏⴰ, ⵜⵇⵇⴰⵏ ⵏ ⵢⴰⵜ ⵜⵎⵔⵉⵙⵜ ⵜⴰⵅⴰⵜⴰⵔⵜ ⵏ ⵓⵙⵏⵖⵎⵙ ⴰⵎⵖⵔⴰⴱⵉ ⴳ ⵓⵙⵉⵍⵉ ⵏ ⵢⴰⵏ ⵓⵎⵙⴰⵡⴰⵍ ⴰⴳⴷⵓⴷⴰⵏ ⴰⵎⴰⴳⵓⵜ ⵉⵕⵥⵎⵏ ⵅⴼ ⵜⵓⵎⴰⵢⵉⵏ ⴰⴽⴽⵯ ⵏ ⵡⴰⵎⵓⵏ. ⴰⵎⵙⴰⵡⴰⵍ ⴰⴷ ⴰⴳⴷⵓⴷⴰⵏ ⵉⵍⴻⵍⵍⵉ ⴰⵎⴰⴷⴰⴼ ⵉⵇⵇⴰⵏ ⵏ ⴰⴷ ⴷ ⵢⴰⵡⵉ ⵅⴼ ⵉⵙⴳⵓⵎⵏ ⵉⵎⵉⵔⵉⵏ ⴷ ⵉⵙⵇⵙⵉⵜⵏ ⴰⴽⴽⵯ ⵏ ⵓⴱⴰⵖⵓⵔ ⴰⵎⴰⵜⴰⵢ”. ⵙ ⵓⵎⴷⵢⴰ, ⵎⴰⵙⵙ ⴰⵅⴰⵔⴱⴰⵛ ⵜⵙⴰⵡⵍ ⵅⴼ ⵓⴹⴼⴼⵓⵕ ⴰⵖⵎⵙⴰⵏ ⵉⵍⴰⵏ ⴰⵜⵉⴳ, ⵉⵏⵎⴰⵍⴰⵏ, ⵉ ⵓⵎⵓⵔⵙ ⵏ ⵉⵙⵏⴰⵎⵏ ⵉⴷⵉⵎⵓⵇⵕⴰⵟⵉⵏ, ⵉⵏⴰⵎⵓⵏⵏ ⴷ ⵉⴷⴰⵎⵙⴰⵏⵏ ⵉⵅⴰⵜⴰⵔⵏ ⵉⵣⵣⵉⴳⵉⵣⵏ ⴳ ⵜⵎⵓⵔⵜ ⴰⵎ ⵓⵣⵣⵔⴰⵢ ⵅⴼ ⵓⵙⵍⴳⵏ ⵏ ⵜⴰⵡⵊⴰ, ⵉⵙⵜⴰⵢⵏ ⵏ 2026, ⴰⵙⵡⵓⴷⴷⵓ ⵏ ⵜⴷⵔⵙⵉ ⵏ ⵡⴰⵎⴰⵏ, ⵜⴰⴷⵓⵍⵉ ⵜⴰⴷⵓⵙⴰⵏⵜ ⴷ ⵓⴼⵔⴰⴳ ⴰⵏⴰⵎⵓⵏ, ⴰⵙⴷⵓⵙ ⵏ ⵜⵣⵔⴼⵜ ⵏ ⵡⴰⵔⴳⴰⵢ, ⵏⵖ ⴷⵉⵖ ⴰⵎⵓⵔⵙ ⴳ ⵓⵙⵏⵎⴰⵍⴰ ⵏ ⵉⵣⵎⵣⵣⵓⵜⵏ ⵏ ⵜⵓⵏⵏⵓⵏⵜ ⵉⵍⴰⵏ ⵜⴰⵙⴳⴰ ⵜⴰⵎⵇⵔⴰⵏⵜ ⴳ ⵜⴷⴰⵎⵙⴰ, ⵜⴰⴷⵍⵙⴰ ⴷ ⵜⴷⵉⴱⵍⵓⵎⴰⵙⵉⵜ ⴰⵎⵎ ⵓⵏⵎⵓⴳⴰⵔ ⴰⵎⴹⵍⴰⵏ ⵏ ⵜⴽⵓⵔⵜ ⵏ ⵓⴹⴰⵕ 2030.
ⴳ ⵜⵙⴳⴰ ⵏⵏⵙⵏ, ⵙⵏⵉⵎⵔⵏ ⵉⵎⴰⵙⴰⵢⵏ ⵏ ⴽⵓⵥ ⵏ ⵜⵏⵣⵡⴰⵢⵉⵏ ⴰⵣⴷⴰⵢ ⵏ ⵜⵎⴷⵔⴰⵡⵜ ⴷ ⵜⵎⵢⴰⵖⵜ ⵉⵕⵡⴰⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵉⵎⵡⵓⵔⴰ ⵉⵙⵍⵉⵥⵕⵏ. ⵙⵎⴰⵢⵏⵓⵏ ⴰⵙⵎⵓⵙⵙ ⵏⵏⵙⵏ ⴳ ⵜⵏⴰⴼⵓⵜ ⵏ ⵓⵙⵉⵍⵉ ⵙ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵏⵎⵓⵔⵉⵜ ⵉⵍⴰⵏ ⵉⵎⴰⵙⵙⵏ ⴷ ⵜⵣⵎⵔⵜ ⴰⴼⴰⴷ ⴰⴷ ⵙⵙⴽⵔⵏ ⵜⵉⵍⴰⵍⵜ ⵏⵏⵙⵏ ⴳ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ ⴷ ⵜⴰⵎⵓⵏⵜ ⵜⴰⵏⴰⵎⵓⵏⵜ ⴷ ⵓⵎⵢⴰⵏⴰⵡ ⴰⴷⵍⵙⴰⵏ ⵏ ⵜⵎⵓⵔⵜ.