ⵢⵓⵎⵥ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ  ⴰⵙⵍⵉⵥⵕ ⴽⵉⴳⴰⵏ ⵏ ⵜⵏⵓⵔⵣⵉⵜⵉⵏ ⵉⵣⴷⵉⵏ ⵙ ⵉⵜⵙ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ ⵏⵏⴰ ⵉⵜⵜⵓⵣⵓⵣⵣⵔⵏ ⴳ ⵢⴰⵢⵓⵔ ⵏ ⵕⵎⴹⴰⵏ 2022 ⴳ ⵜⴷⴰⴱⵓⵜⵉⵏ ⵏ ⵓⵜⵉⵍⵉⴼⵉⵣⵢⵓⵏ ⴰⴳⴷⵓⴷⴰⵏ, ⵙ ⵉⵎⵥⵍⵉ ⵜⵉⵡⵓⵔⵉⵡⵉⵏ ⵏ ⵓⵎⴰⵔⵓⵔ (ⵉⵎⵙⴷⴷⵉⵢⵏ, ⵉⵙⵉⵜⴽⵓⵎⵏ ⴷ ⵉⵙⴷⴷⵉⵢⵏ ⵏ ⵜⴰⴹⵚⴰ).

ⴷⴼⴼⵉⵔ ⵜⴰⵖⵓⵔⵉ ⵏ ⵜⵏⵓⵔⵣⵉⵜⵉⵏ ⴰⴽⴽⵯ, ⵢⵓⵙⵉ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴳ ⵓⴳⵔⴰⵡ ⵏⵏⵙ ⵏ ⵡⴰⵙⵙ 29 ⵉⴱⵔⵉⵔ 2022, ⴳ ⵓⵢⵏⵏⴰ ⵉⵣⴷⵉⵏ ⵙ ⵜⵍⴻⵍⵍⵉ ⵏ ⵓⵙⵏⵓⵍⴼⵓ, ⵉⵙ ⵜⵣⴷⵉ ⵙ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵙ ⵓⵢⵏⵏⴰ ⴷ ⵢⵉⵡⵉ ⵓⵙⵍⴳⵏ ⴰⵣⵔⴼⴰⵏ 77-03 ⵢⵓⴳⵍⵏ ⵙ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵍⴳⵏ ⴰⵣⵔⴼⴰⵏ 11-15 ⵉⵣⴷⵉⵏ ⴷ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.

ⴰⵔ ⵉⵙⵙⴽⵜⴰⵢ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⴷ ⵜⵉⵔⵔⴰ ⵏ ⵉⵙⵉⵏⴰⵕⵢⵓⵜⵏ, ⵉⴷ ⵍⴽⴰⵙⵜⵉⵏⴳ, ⴰⵙⵜⴰⵢ ⵏ ⵉⵡⵔⵉⴽⵏ, ⴰⵙⵡⵍⴼ ⵏ ⴽⵔⴰ ⵏ ⵡⴰⴷⴷⴰⵏ ⵏ ⵜⵉⴷⵜ ⵏⵖ ⵡⵉⵏ ⵓⵙⵎⴷⵢⴰ, ⴰⵍⵍⴰⵙ ⵏ ⵜⵎⵊⵕⵉⵢⵉⵏ ⴷ ⵉⵣⵎⵣⵏ ⵏ ⵓⵎⵣⵔⵓⵢ ⴳ ⵜⵡⵓⵔⵉⵡⵉⵏ ⵏ ⵓⵎⴰⵔⵓⵔ, ⴰⵎⵓⵏⵜ ⴳ ⵜⵍⴻⵍⵍⵉ ⵏ ⵓⵎⴰⵔⴰ, ⵙ ⵓⵢⵏⵏⴰ  ⵉⵎⵓⵏⵏ ⴷ ⵓⵣⵣⵉⴳⵣ ⵏ ⵜⴰⵏⵏⴰⵢⵜ ⵜⴰⵥⵓⵕⴰⵏⵜ  ⵜⴰⵏⵉⵎⴰⵏⵜ ⵏⵏⵙ. ⵓⴳⴰⵔ, ⵜⵉⵍⴻⵍⵍⵉ ⵜⴳⴰ ⵢⴰⵜ ⵜⵔⵙⵍⵜ ⵏ ⵡⴰⵜⵉⴳ ⴰⵥⵓⵕⴰⵏ ⴰⵙⵏⵓⵍⴼⴰⵏ ⵏ ⵜⵡⵓⵔⵉⵡⵉⵏ ⵏ ⵓⵎⴰⵔⵓⵔ. ⵙ ⵓⵢⴰ, ⵓⵔ ⴰⴷ ⵜⵉⵍⵉ ⵖⴰⵙ ⵙ ⵓⵡⵏⵏⵉ ⴷ ⵓⵙⴽⴰⵏ ⴳ ⵉⵙⵡⵉⵔⵏ ⴰⴽⴽⵯ ⵏ ⵜⵍⴰⵍⵉⵜ ⵏⵏⵙ, ⵙⴳ ⵓⵙⵎⴽⵍ ⴷ ⵓⵙⵏⵓⵍⴼⵓ ⵏ ⵜⵡⵓⵔⵉ.

ⵉⵥⵕⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⴷ ⴰⵎⴷⵉⵡⴰⵍ ⵅⴼ ⵜⵎⵙⴰⵔⵜ ⵏ ⵜⵍⴻⵍⵍⵉ ⴷ ⵡⴰⵜⵉⴳ ⵏ ⵜⵡⵓⵔⵉⵡⵉⵏ ⵏ ⵓⵎⴰⵔⵓⵔ ⵉⵜⵜⵓⵣⵓⵣⵣⵔⵏ, ⴳⴰⵏⵜ ⵉⵙⵉⵔⵎⵏ ⵓⵎⵏⵉⴳⵏ ⵉⵎⴰⴱⵖⵓⵔⵏ, ⴰⵛⴽⵓ ⴰⵎⵓⵏ ⴳ ⵓⵙⵙⴳⵎ ⴷ ⵓⵣⵣⵉⴳⵣ ⵏ ⵜⵖⴰⵔⴰ ⴰⴳⵓⵏⵙ ⵏ ⵜⵙⵢⴰⴼⵓⵜⵉⵏ ⵏ ⵜⵡⵓⵔⵉⵡⵉⵏ ⵏ ⵓⵎⴰⵔⵓⵔ, ⴷ ⵙ ⵓⵎⴰⵜⴰ, ⴰⴳⵓⵏⵙ ⵏ ⵓⵙⵍⵍⵡⵓ ⵏ ⵜⵙⵔⵜⵉⵡⵉⵏ ⵜⵉⴳⴷⵓⴷⴰⵏⵉⵏ ⵉⵣⴷⵉⵏ ⴷ ⵓⵙⵏⵓⵍⴼⵓ  ⴰⵙⵍⵉⵥⵕ. ⴰⵎⴷⵉⵡⴰⵍ ⴰⴷ, ⵉⴳⴰⵏ ⴰⴱⴰⵖⵓⵔ ⴰⴳⴷⵓⴷⴰⵏ, ⵉⵜⵜⵓⵙⴷⵓⵙ ⵙ ⵓⵣⵖⴰⵏ ⴰⵏⴰⵥⵓⵕ ⴰⵎⵓⵣⴰⵢ ⴷ ⵓⵣⵖⴰⵏ ⴰⵏⵖⵎⴰⵙ ⵉⵥⵍⵉⵏ ⴷ ⵜⴰⵏⵏⴰⵢⵉⵏ ⵡⵏⴰⵡⵏ ⵏ ⵓⴳⴷⵓⴷ.

ⵉⵥⵕⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵙⴳⴰ ⵢⴰⴹⵏ ⵉⵙ ⵉⵙⵓⵜⵓⵔⵏ ⵉⵜⵜⵓⵡⴰⵣⵏⵏ ⵉ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵔ, ⵏⵏⴰ ⴷⴰ ⴷⵉⴳⵙ ⵙⵙⵓⵜⵓⵔⵏ ⴰⴷ ⵉⴳ ⴱⴰⴱ ⵏ ⵉⵙⵜⴰⵢⵏ ⵏ ⵓⵙⵖⵉⵡⵙ ⵏ ⵉⵕⴰⴷⵢⵓⵜⵏ ⴷ ⵉⵜⵉⵍⵉⴼⵣⵢⵓⵏⵏ, ⵙ ⵓⵙⴳⴷⵍ ⵏ ⵓⵣⵓⵣⵣⵔ ⵏⵖ ⵙ ⵓⵙⵏⵉⴼⵍ ⵏ ⵜⵓⵎⴰⵢⵉⵏ, ⴰⵢⴰ ⵉⴳⴰ ⵎⴳⴰⵍ ⵜⴰⵡⵓⵔⵉ ⵏⵏⵙ ⵜⴰⵎⵔⵙⴰⵍⵜ ⵉⴳⴰⵏ ⴰⵙⵏⴰⵎ. ⵜⴰⵙⵎⵉⴳⵍⵜ ⵏⵏⵙ ⵜⴰⵎⵣⵡⴰⵔⵓⵜ  ⵜⴳⴰ ⴰⴹⵎⴰⵏ ⴷ ⵓⵣⵔⴰⴽ ⵏ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵔ ⴷ ⵜⵍⴻⵍⵍⵉ ⵏ ⵓⵡⵏⵏⵉ. ⴰⵎⵙⵏⴰⵎ, ⴷⴰ ⵉⵜⵜⴹⵎⴰⵏ ⵜⵉⵍⴻⵍⵍⵉ ⵏ ⵓⵙⵏⵓⵍⴼⵓ ⵉ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ, ⵉⴳⴷⵓⴷⴰⵏⵏ  ⴷ ⵉⵎⵥⵍⵉⵢⵏ ⵏ ⴰⴷ ⴼⴰⵔⵙⵏ ⵣⵓⵣⵣⵔⵏ ⵉⵖⴰⵡⴰⵙⵏ ⵏⵏⵙⵏ. ⵜⵉⵍⴻⵍⵍⵉ ⵢⴰⴷ, ⵜⴳⴰ ⵜⵉⵏ ⵉⵖⴰⵡⴰⵙⵏ ⵉⵜⵜⵓⵙⵏⵓⵍⴼⴰⵏ ⴳ ⵓⴳⵯⵏⵙ, ⵖⵓⵔ ⵉⵎⵡⵓⵔⴰ ⵉⵙⵍⵉⵥⵕⵏ  ⴷ ⵙ ⵜⵎⴷⵔⴰⵡⵜ ⵏ ⵉⵎⵡⵓⵔⴰ ⵏ ⴱⵕⵕⴰ, ⴷ ⴰⵡⴷ ⵉⵖⴰⵡⴰⵙⵏ ⵉⵜⵜⵓⵙⵎⴷⵏ ⵉⴳⴰⵏ ⵡⵉⵏ ⵓⵣⵓⵣⵣⵔ . ⵉⵡⵜⵜⴰ ⵏⵏⴰ ⴷ ⵢⵉⵡⵉ ⵓⵙⵍⴳⵏ ⵉ ⵜⵍⴻⵍⵍⵉ ⴳⴰⵏ ⵡⵉⵏⵏⴰ ⵉⵣⴷⵉⵏ ⴷ ⵓⵣⵔⴰⴽ ⵏ ⵡⴰⵜⵉⴳⵏ ⵏ ⵜⴷⵉⵎⵓⵇⵕⴰⵟⵉⵢⵏ ⴷ ⵉⵣⵔⴼⴰⵏ ⵏ ⵓⵎⴷⴰⵏ, ⵣⵓⵏⴷ ⴰⵣⵔⴰⴽ ⵏ ⵡⵓⴷⴷⵓⵔ ⵏ ⵓⴼⴳⴰⵏ, ⴰⵣⵔⴰⴽ ⵏ ⵓⵎⵏⵣⴰⵢ ⵏ ⵜⵉⵣⵣⵉⴷⴳⴰ, ⵡⴰⵔ ⵜⵉⵖⵔⵉ ⵉ ⵜⵙⵙⵥⴰⵕⵓⵜ, ⵉ ⵓⴽⵕⴰⴷ, ⵉ ⵜⵉⵖⵔⵉ ⵏ ⵓⵙⵏⵓⵃⵢⵓ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ ⴷ ⵡⴰⵔ ⴰⵣⵔⴰⴽ ⵏ ⵡⴰⴷⴷⵓⵔ…

ⵜⵉⵍⴻⵍⵍⵉ ⵏ ⵓⵙⵏⵓⵍⴼⵓ ⵜⴳⴰ ⵜⴰⵎⴰⵜⴰⵔⵜ ⵏ ⵜⵍⴻⵍⵍⵉⵡⵉⵏ ⵢⴰⴹⵏ ⴳ ⵢⵉⴳⵔ ⴰⴳⴷⵓⴷⴰⵏ. ⴷⵉⵖ, ⵜⴳⴰ ⵜⵉⵍⴻⵍⵍⵉ ⵏ ⵓⵡⵏⵏⵉ ⴳ ⵓⵙⴰⵢⵙ ⵏ ⵓⵣⵖⴰⵏ ⵏ ⵜⵡⵓⵔⵉⵡⵉⵏ ⵏ ⵓⵎⴰⵔⵓⵔ ⵙ ⵉⵎⵥⵍⵉ d ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⵙ ⵓⵎⴰⵜⴰ, ⴳⴰⵏⵜ ⴰⵣⵓⵛⵛⵍ ⵉ ⵓⵣⵣⵉⴳⵣ ⵏ ⵜⵖⴰⵔⴰ ⵏ ⵜⵡⵓⵔⵉⵡⵉⵏ ⴷ ⵜⵓⵎⴰⵢⵉⵏ ⵉⵜⵜⵓⵣⵓⵣⵣⵔⵏ ⵣⵓⵏ ⴷ ⵉⵙⵡⵉⵏⴳⵉⵎⵏ ⵏ ⵓⴳⴷⵓⴷ ⵖⵉⴼⵙⵏⵜ. ⵜⴰⴷⵉⵏⴰⵎⵉⵜ ⴰ, ⵓⵔ ⵜⵖⵉⵢ ⴰⴷ ⵜⵎⵖⵓⵔ ⵙ ⵓⵣⵖⴰⵏ ⵖⴰⵙ ⵎⴽ ⵜⵙⴰⵡⵍ ⴱⵕⵕⴰ ⵏ ⵉⵏⴰⵡⵏ ⵏ ⵓⵙⵏⵓⵃⵢⵓ ⴷ ⵜⵔⴳⴳⴰⵎ.

ⴰⵙⵏⴰⵎ ⴰⵙⵉⵎⴰⵏ ⵏ ⵓⵙⵏⵖⵎⵙ ⵉⴳⴰ ⵓⵡⵜⵜⴰⵙ ⵏⵏⵙ ⴰⵙⵙⵎⵖⵓⵔ ⵏ ⵉⵎⵏⵣⴰⵢⵏ ⵉⴷⵉⵎⵓⵇⵔⴰⵟⵉⵢⵏ ⴳ ⵓⵎⵣⵡⴰⵔⵓ ⵏⵏⴰ ⴳ ⵜⵍⵍⴰ ⵙ ⵉⵎⵥⵍⵉ ⵜⵍⴻⵍⵍⵉ, ⵜⴰⵎⴰⴳⵓⵜ ⴷ ⵓⵎⵢⴰⵏⴰⵡ. ⴰⵡⵜⵜⴰⵙ ⴰⴷ ⵉⴳⴰ ⵜⴰⵔⵙⵍⵜ ⵏ ⵓⵙⵏⴰⵎ ⵏ ⵜⵍⴻⵍⵍⵉⵡⵉⵏ ⵏ ⵓⵙⵏⵓⵍⴼⵓ, ⵏ ⵜⵎⴰⴳⵓⵜ ⴷ ⵜⴰⵏⵏⴰⵢⵉⵏ ⵜⵉⵥⵓⵕⴰⵏⵉⵏ ⴷ ⵓⵎⵢⴰⵏⴰⵡ ⵏ ⵡⴰⴷⴷⴰⴷⵏ ⵉⴷⵍⵙⴰⵏⵏ ⴰⴳⵓⵏⵙ ⵏ ⵉⵙⵏⵓⵍⴼⵓⵜⵏ ⵏ ⵓⵎⴰⵔⵓⵔ.