ⵜⵙⵙⴳⵎⴹ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ ⵓⵙⵉⵎⵡⴰⵙ 27 ⵎⴰⵢⵓ 2022, ⴰⴽⴷ ⵎⴰⵙⵙⴰ ⴰⵕⵎⵉⵏⴷⴰ ⴱⴰⵕⵓⵙ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⴳ ⵉⵅⴼ ⴰⵣⴳⵣⴰⵡ, ⵢⴰⵏ ⵓⵎⵙⴰⵙⴰ ⵏ ⵓⵎⵢⴰⵡⴰⵙ ⵉⴳⴰⵏ ⴰⵎⵣⵡⴰⵔⵓ ⴳ ⵡⴰⵏⴰⵡ ⵏⵏⵙ ⵏⵏⴰ ⵉⵙⵎⵓⵏⵏ ⴳⵔ ⵉⴳⵔⴰⵡⵏ ⵏ ⵓⵙⵍⴳⵏ ⴰⵎⵖⵔⴰⴱⵉ ⴷ ⵉⴽⵏⵉ ⵏⵏⵙ ⴳ ⵢⴰⵜ ⵜⵎⴰⵣⵉⵔⵜ ⵏ ⵉⴼⵔⵉⵇⵢⴰ ⵉⵙⴰⵡⴰⵍⵏ ⵜⵓⵜⵍⴰⵢⵜ ⵜⴰⴱⵓⵔⵜⵓⵖⴰⵍⵉⵜ.

ⵣⵔⵉⵏ ⵉⵏⵙⴰⵢⵏ ⵏ ⵓⵙⴼⵓⴳⵍⴰ ⵙ ⵓⵙⴳⵎⴹ ⵅⴼ ⵓⵎⵙⴰⵙⴰ ⵢⴰ ⴳ ⵓⵙⵖⵉⵎ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⴳ ⵜⵎⴰⵥⵓⵏⵜ ⴱⵕⴰⵢⴰ ⵙ ⵓⵃⵉⴹⵕ ⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ, ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ, ⴷ ⴽⵉⴳⴰⵏ ⵏ ⵉⵎⴰⵙⴰⵢⵏ ⵏ ⵜⵎⵔⵙⴰⵍ ⵜⵉⵙⵏⵖⵎⴰⵙⵉⵏ ⴳ ⵉⵅⴼ ⴰⵣⴳⵣⴰⵡ. ⵙ ⵓⵎⵢⴰⵡⴰⵙ ⴰⴷ, ⵎⵙⴰⵙⴰⵏ ⵉⴳⵔⴰⵡⵏ ⵉⵍⴻⵍⵍⵉⵢⵏ ⵢⵓⵙⵉⵏ ⴰⴳⴳⵯⴰ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵅⴼ ⵓⵙⴷⵓⵙ ⵏ ⵉⵙⵏⵉⴼⵉⵍⵏ ⴷ ⴱⵟⵟⵓ ⵏ ⵢⵉⵔⵉⵎⵏ ⴳ ⵓⵢⵏⵏⴰ ⵉⵣⴷⵉⵏ ⴷ ⵉⵙⵔⵓⵙⵏ ⵉⵅⴰⵜⴰⵔⵏ ⵏ ⵓⵙⵍⴳⵏ ⴰⵎ ⵓⵙⴷⵓⵙ ⵏ ⵜⵍⴻⵍⵍⵉ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⴷⵓⵙ ⵏ ⵓⵡⵏⵏⵉ ⴰⵎⴰⴳⵓⵜ ⴰⵙⵔⵜⴰⵏ ⴷ ⵓⵏⴰⵎⵓⵏ ⴳ ⵓⵙⵏⵖⵎⵙ, ⴰⴹⵎⴰⵏ ⵏ ⵓⵙⵎⴷⵢⴰ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵡⵓⵜⵍⴰⵢ, ⴰⴼⵔⴰⴳ ⵏ ⵉⵎⵥⵢⴰⵏⵏ ⵙ ⵉⵎⵥⵍⵉ ⴰⴳⵓⵏⵙ ⵏ ⵜⵖⴰⵔⴰⵙⵉⵏ ⵜⵉⵙⵏⵖⵎⴰⵙⵉⵏ ⵜⵉⵎⴰⵢⵏⵓⵜⵉⵏ ⴷ ⵉⵍⵓⵍⴰⵏ ⵙⴳ ⵓⵙⵏⴼⵍ ⴰⵎⵓⵟⵟⵓⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ.

ⵢⵉⵡⵉⴷ ⵓⵎⵇⵇⵓⵏ ⵏⵏⴰ ⵉⵜⵜⵓⵙⴳⵎⴹⵏ ⴰⵡⴷ ⵅⴼ ⵜⵓⴳⴳⴰ ⵏ ⵓⴳⵔⴰⵡ ⵏ ⵓⵙⵍⴳⵏ ⴳ ⵉⵅⴼ ⴰⵣⴳⵣⴰⵡ ⵅⴼ ⵓⵙⵖⵉⵡⵙ ⴰⵎⵓⵟⵟⵓⵏ ⵉⵥⵍⵉⵏ ⵙ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵉⵙⵍⵉⵥⵕⵏ "HACA Media Solutions"(HMS)  ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵣⵎⵎⴻⵎ ⴰⵙⵍⵍⵡⵓ ⵏⵏⵙ ⴳ ⵓⵙⴷⵓⵙ ⴰⵎⴰⴹⵍⴰⵏ ⵏ ⵡⴰⵢⵍⴰ ⴰⵡⵏⴳⵉⵎ. ⵙ ⵓⵣⵎⵣⵣⵓ ⵏ ⵓⵙⴳⵎⴰⴹ ⵅⴼ ⵓⵎⵇⵇⵓⵏ, ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉ ⵜⴽⵏⵉⵡⵜ ⵏⵏⵙ ⴳ ⵉⵅⴼ ⴰⵣⴳⵣⴰⵡ “ⵜⴰⴷ ⵜⴳⴰ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⵏⵏⴰ ⴳ ⵉⵙⵔⵙ ⵓⴳⵔⴰⵡ ⴰⵎⴰⵜⵜⴰⵢ ⵓⴷⵎ ⵏ ⵓⵖⴰⵡⴰⵙ ⴰⵎⵓⵟⵟⵓⵏ HMS ⵙ ⵜⵓⵜⵍⴰⵢⵜ ⵜⴰⴱⵓⵔⵜⵓⵖⴰⵍⵉⵢⵜ ⴰⴼⴰⴷ ⴰⴷ ⵜⵙⵙⵓⵀⵏ ⴰⵙⵎⵔⵙ ⵏⵏⵙ ⵖⵓⵔ ⵉⵜⵉⵇⵏⵉⵢⵏ ⵏ ⵉⵅⴼ ⴰⵣⴳⵣⴰⵡ. ⴳ ⵜⵙⴳⴰ ⵏⵏⵙ, ⵜⵙⵙⵎⵖⵓⵔ ⵎⴰⵙⵙⴰ ⴱⴰⵕⵓⵙ ⵙ ⵡⴰⵏⴰⵡ ⴰⵎⵙⵡⵓⵔⵉ ⵏ ⵓⵎⵢⴰⵡⴰⵙ ⵏⵏⴰ ⵅⴼ ⵎⵙⴰⵙⴰⵏ ⵉⴳⵔⴰⵡⵏ. ⵜⵙⵙⴽⵏ ⴰⵎⴷⴰⵣ ⵏⵏⵙ ⵙ ⵜⵓⴽⴽⵉ ⵏ ⵓⵖⴰⵡⴰⵙ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⵢ ⵉ ⵓⴳⵔⴰⵡ ⵏ ⵓⵙⵍⴳⵏ ⴳ ⵉⵅⴼ ⴰⵣⴳⵣⴰⵡ, ⴰⵔ ⵜⵜⴰⴷⴷ ⵉⵙ “ⴰⵖⴰⵡⴰⵙ ⴰⴷ ⴰⵎⵓⵟⵟⵓⵏ ⵔⴰⴷ ⵢⴰⵡⵙ ⴰⴳⵔⴰⵡ ⵏⵏⵖ ⴳ ⵓⵙⵔⵔⵓⵙ ⵏ ⵢⴰⵏ ⵓⵙⵏⵎⴰⵍⴰ ⵏ ⵓⴹⴼⴼⵓⵕ ⵉⴷⵓⵙⵏ, ⵉⵍⴰⵏ ⴰⵜⵉⴳ, ⵉ ⵉⵖⴰⵡⴰⵙⵏ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⵙⵍⵉⵥⵕ ⵏⵏⴰ ⵉⵜⵓⵣⵓⵣⵣⵓⵔⵏ ⴳ ⵜⵎⵓⵔⵜ ⵏ ⵜⴳⵣⵉⵔⵉⵏ ⵏ ⵉⵅⴼ ⴰⵣⴳⵣⴰⵡ, ⴳ ⵜⴳⵣⵉⵔⵜ ⵏ ⵙⴰⵏⵜⵉⵢⴰⴳⵓ ⴷ ⵜⵎⴰⵥⵓⵏⵜ ⴱⵕⴰⵢⴰ ⴷ ⵜⴳⵣⵉⵔⵉⵏ ⴰⵙ ⵉⵏⵏⴹⵏ ⴰⵎ ⵙⴰⵍ, ⴱⵡⴰⴼⵉⵙⵟⴰ ⴷ ⵙⴰⵡⴼⵙⴰⵏⵜⵉ”.

ⴳ ⵡⴰⵡⴰⵍ ⵏⵏⵙⵏⵜ ⵙ ⵓⵣⵎⵣⵣⵓ ⵏ ⵜⴳⵉⵔⴰ ⵏ ⵓⵙⴼⵓⴳⵍⴰ ⵏ ⵓⵙⴳⵎⴹ, ⵓⵙⵉⵏⵜ ⵜⵏⵙⵙⵉⵅⴼⵉⵏ ⵜⴰⵖⵜⵙⵜ ⵏ ⴰⴷ ⵙⴷⵓⵙⵏⵜ ⵉⵎⵛⴰⵡⴰⵕⵏ ⴳ ⵓⵙⴰⵜⵉ ⵏ ⵜⵡⵓⵔⵉ ⵉⵛⵛⴰⵔⵏ ⴰⴳⵓⵏⵙ ⵏ ⵓⵥⵟⵟⴰ ⵏ ⵉⴳⵔⴰⵡⵏ ⵏ ⵉⴼⵔⵉⵇⵉⵢⴰ ⵉ ⵓⵙⵍⴳⵏ ⵏ ⵓⵎⵢⴰⵡⴰⴹ ⵏⵏⴰ ⵎⵉ ⵔⴰⴷ ⵉⴳ ⵓⴳⵔⴰⵡ ⴰⵎⴰⵜⵜⴰⵢ ⴰⵏⵙⵙⵉⵅⴼ ⵙⵉⵏ ⵉⵙⴳⴳⵯⴰⵙⵏ ⵙⴳ ⵜⵉⵣⵡⵉⵔⵉ ⵏ ⵛⵜⴰⵎⴱⵉⵔ ⴷ ⵢⵓⵙⴰⵏ.

ⵉⵍⵍⴰ ⴳ ⵓⴽⴰⴱⴰⵔ ⵏ ⵓⴳⵔⴰⵡ ⴰⵎⴰⵜⵜⴰⵢ, ⴳ ⵓⵔⵣⴰⴼ ⵏⵏⵙ ⵏ ⵜⵡⵓⵔⵉ ⵖⵔ ⴱⵕⴰⵢⴰ, ⵎⴰⵙⵙ ⵏⴰⵊⵉⴱ ⴱⵓⵢⵣⵎⴰⵔⵏⵉ, ⴰⵏⵎⵀⴰⵍ ⵏ ⵉⵖⴰⵡⴰⵙⵏ ⵉⵎⵓⵟⵟⵓⵏⵏ, ⵎⴰⵙⵙ ⵄⴰⴷⵉⵍ ⴱⵓⵕⴱⴰⵟ ⴰⵏⵙⵙⵉⵅⴼ ⵏ ⵓⴼⵔⴷⵉⵙ ⵏ ⵓⵙⵢⴰⴼⴰ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃ ⴷⴷⵉⵏ ⴰⵏⵙⵙⵉⵅⴼ ⵏ ⵓⴼⵔⴷⵉⵙ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴷ ⵜⵎⴰⴹⵍⴰⵏⵉⵏ.

ⵜⴰⵙⴳⴰ ⵏ ⵓⵕⵥⵥⵓⵎ ⵓⵏⵚⵉⴱ ⵏ ⵜⵡⵓⵔⵉⵡⵉⵏ ⵏ ⵓⵙⵔⵔⵓⵙ ⵏ ⵓⵖⴰⵡⴰⵙ HMS ⴳ ⵜⵏⵎⵀⵍⵜ ⵜⴰⵜⵉⵇⵏⵉⵢⵜ ⴷ ⵜⵎⵓⵟⵟⵓⵏⵜ ⵉⵣⴷⵉⵏ ⴷ ⵓⴳⵔⴰⵡ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴳ ⵉⵅⴼ ⴰⵣⴳⵣⴰⵡ, ⵉⵍⵍⴰ ⴳ ⵓⵖⴰⵡⴰⵙ ⵏ ⵓⵔⵣⴰⴼ ⴽⵉⴳⴰⵏ ⵏ ⵉⴳⵔⴰⵡⵏ ⵏ ⵜⵡⵓⵔⵉ ⴰⴽⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ ⵎⴰⵙⵙⴰ ⴰⵕⵎⵉⵏⴷⴰ ⴱⴰⵕⵓⵙ, ⵉⵍⵉⵏ ⵉⵔⵣⴰⴼⵏ ⵉ ⵓⵙⵖⵉⵎ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⴰⴳⴷⵓⴷⴰⵏ Radiotélévision do Cabo Verde  ⴷ ⵓⵙⵖⵉⵎ ⵏ ⵜⵎⵔⵙⵍⵜ ⵜⴰⴳⴷⵓⴷⴰⵏⵜ ⵏ ⵓⵣⵓⵣⵣⵔ Cabo Verde Broadcast.