ⴳ ⵓⵙⴰⵜⵉ ⵏ ⵓⵏⵏⵓⵕⵥⵎ ⵏⵏⵙ ⵅⴼ ⵓⵎⴰⴹⴰⵍ ⴰⵎⵙⵎⵓⵏ, ⵉⵙⵏⵓⴱⴳ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴰⵙⵙ ⵏ 19 ⴷⵓⵊⴰⵎⴱⵉⵔ 2023, ⵢⴰⵏ ⵓⴽⴰⴱⴰⵕ ⵏ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵢⵜ ⵏ ⵜⵓⵏⵏⵓⵏⵜ ⴷ ⵜⴳⵎⵉ ⵎⵉ ⵜⵣⵡⴰⵔ ⵜⵏⵙⵙⵉⵅⴼⵜ ⵏⵏⵙ ⵎⴰⵙⵙⴰ ⵏⴰⵡⴰⵍ ⵍⵎⵓⵜⴰⵡⴰⴽⴽⵉⵍ, ⵜⴰⵏⴱⵔⴰⵣⵜ ⵜⴰⵓⵍⴰⵎⴱⵉⵜ ⴷ ⵓⴳⵎⴰⵎ ⵏ ⵜⵙⵇⵇⵉⵎⵜ ⵜⴰⵎⵣⵣⴳⵔⵜ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⵓⵍⴰⵎⴱⵉ (CIO).
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⵉⴷ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵉⴳⵎⴰⵎⵏ ⵏ ⵜⵎⵙⵎⵓⵏⵜ ⴰⴷ ⵉⵛⴰⵕⵉⴹⵏ ⵉⵅⴰⵜⴰⵔⵏ ⵏ ⵜⵡⵓⵔⵉⵡⵉⵏ ⵜⵉⵎⵔⵙⴰⵍⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵎⵔⵙⵍⵜ ⵜⴰⴷⵓⵙⵜⵓⵔⵉⵜ ⵜⴰⵙⵏⵉⵎⴰⵏⵜ ⵏ ⵜⵉⵏⵏⵓⴹⴰ ⵉⵀⵢⵢⴰⵏ ⴷ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ. ⵙ ⵓⵢⴰ, ⵜⵎⵍ ⵜⵉⵍⴰⵍⵜ ⵏ ⵜⵎⵔⵙⵍⵜ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵡⴰⵜⵉⴳⵏ ⵏ ⵓⵙⴳⵎⵉ ⴷ ⵓⵙⵡⵉⵏⴳⵎ ⵏ ⵜⵓⵏⵏⵓⵏⵜ ⴰⴳⵓⵏⵙ ⵏ ⵜⵓⵎⴰⵢⵉⵏ ⵜⵉⵖⵎⵙⴰⵏⵉⵏ ⴷ ⵢⵉⵎⵥ ⵏ ⵜⵎⵖⴰⵔⵉⵏ ⵉ ⵉⴷⵖⴰⵔⵏ ⵏ ⵜⵏⴱⴰⴹⵜ ⵙ ⵉⵎⵥⵍⵉ ⴳ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⴰⵏⵓⵏ.
ⵉⵡⵏⴰⵏ ⵏ ⵓⵔⵣⴰⴼ ⵏ ⵜⵏⵎⵀⴰⵍ ⴷ ⵡⴰⵍⵍⴰⵍⵏ ⵉⵜⵉⵇⵏⵉⵢⵏ  ⵏ ⵜⵎⵔⵙⵍⵜ ⵏ ⵓⵙⵍⴳⵏ, ⵃⴰⴹⵕⵏ ⵉⴳⵎⴰⵎⵏ ⵏ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵢⵜ ⵏ ⵜⵓⵏⵏⵓⵏⵜⴷ ⵜⴳⵎⵉ ⵉ ⵓⵙⵎⵏⵉⴷ ⵅⴼ ⵜⵙⵎⵉⴳⴰⵍ, ⵜⵉⵎⴰⵙⴰⵢⵉⵏ, ⴰⵙⵏⵎⴰⵍⴰ ⴷ ⵓⵙⵡⵓⵔⵉ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ. ⴰⵎⵥⵏ ⵉⵏⵖⵎⵉⵙⵏ ⵅⴼ ⵉⵎⴰⵙⵙⵏ ⴷ ⵜⵖⴰⵔⴰⵙⵉⵏ ⵏⵏⴰ ⵉⵜⵜⵓⵙⴽⵔⵏ ⴳ ⵓⴳⵓⵏⵙ ⴰⴼⴰⴷ ⴰⴷ ⴰⴳⴳⵏ ⵅⴼ ⵉⵖⴰⵡⴰⵙⵏ, ⵙ ⵉⵎⵥⵍⵉ ⴰⴳⵓⵏⵙ ⵏ ⵓⵙⴰⵜⵉ ⵏ ⵜⵙⵎⵉⴳⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⴹⵎⴰⵏ ⵏ ⵜⴰⵏⵏⴰⵢⵜ ⴳ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ ⵉⴳⴷⵓⴷⴰⵏⵏ ⴷ ⵡⵓⵙⵍⵉⴳⵏ, ⴳ ⵓⵣⵎⵣ ⵓⵏⵣⵉⵍ ⴷ ⵡⵉⵏ ⵉⵣⵜⴰⵢⵏ.
ⴰⴷ ⵏⵙⵙⴽⵜⵉ ⵉⵙ ⵜⵜⵓⵙⴽⵔ ⵜⵎⵙⵎⵓⵏⵜ ⵜⴰⵎⵖⵔⴰⴱⵉⵢⵜ ⵏ ⵜⵓⵏⵏⵓⵏⵜ ⴷ ⵜⴳⵎⵉ ⴰⵙⵙ ⵏ 3 ⵎⴰⵕⵚ 2002 ⴳ ⵓⵡⵜⵜⴰⵙ ⵏ ⴰⴷ ⵜⵙⵎⵓⵙⵙⵓ ⵜⵙⵙⴳⵎ ⵜⴰⵡⵓⵔⵉ ⵏ ⵜⵓⵏⵏⵓⵏⵜ ⵙ ⵜⵖⴰⵔⴰⵙⵜ ⵜⴰⵙⵓⵍⴰⵏⵜ ⵜⴰⵖⵢⴰⵙⵜ ⵉ ⵓⴱⵖⵓⵔ ⵏ ⵜⴷⵓⵙⵉ ⴷ ⵓⴱⵓⵖⵍⵓ ⵏ ⵜⵓⴷⵔⵜ ⵖⵓⵔ ⵉⵄⵔⵔⵉⵎⵏ.