ⵜⵙⵏⵓⴱⴳ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⴰⵙⵙ ⵏ 28 ⵢⵓⵏⵢⵓ 2022 ⴳ ⵓⵙⵖⵉⵎ ⵏ ⵜⵎⵔⵙⵍⵜ ⴳ ⵕⵕⴱⴰⵟ, ⵎⴰⵙⵙ ⵡⵉⵜⵓⵍⴷ ⴽⵓⵜⵓⵙⵓⵣⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⵏ ⴱⵓⵍⵓⵏⵉⵢⴰ ⴳ ⵓⵙⴰⵜⵉ ⵏ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵏⵏⴰ ⵉⵙⵙⴽⵔ ⵉ ⵍⵎⵖⵔⵉⴱ ⵓⵙⵙⴰⵏ ⵏ 28, 29, 30 ⵢⵓⵏⵢⵓ  ⵙ ⵜⵖⵓⵔⵉ ⵏ ⵜⴽⵏⵉⵡⵜ ⵏⵏⵙ ⵜⴰⵎⵖⵔⴰⴱⵉⵢⵜ.

ⵉⵡⵉⵏ ⴷ ⵉⵎⵛⴰⵡⴰⵕⵏ ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ ⴰⵙⵉⵏⴰⵏ, ⴰⵎⵣⵡⴰⵔⵓ ⴳ ⵡⴰⵏⴰⵡ ⵏⵏⵙ ⴳⵔ ⵙⵏⴰⵜ ⵜⵎⵔⵙⴰⵍ ⵏ ⵓⵙⵍⴳⵏ, ⵅⴼ ⵜⵎⵙⴰⵔ ⵜⵉⵅⴰⵜⴰⵔⵉⵏ ⵉⵍⵍⴰⵏ ⴳ ⵓⵙⴳⵍⵎ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ, ⵙ ⵉⵎⵥⵍⵉ ⴳ ⵓⵢⵏⵏⴰ ⵉⵣⴷⵉⵏ ⴷ ⵓⵙⵎⵙⴰⵙⴰ ⵏ ⵓⵙⵍⴳⵏ ⴰⴽⴷ ⵉⵎⵓⵜⵜⵓⵢⵏ ⵓⵅⴰⵜⴰⵔⵏ ⵉⵍⵍⴰⵏ ⴳ ⵓⵏⴳⵔⴰⵡ ⴰⴷⴰⵎⵙⴰⵏ ⴷ ⵓⵣⵣⵓⵍⴰⵏ ⴷ ⵓⵙⵎⴰⵜⴰ ⵏ ⵓⵙⵏⵖⵎⵙ.

ⴳ ⵉⵎⵛⴰⵡⴰⵕⵏ ⴰⴷ ⴳ ⵢⴰⵎⵓ ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ ⴰⵎⴰⵜⵜⴰⵢ, ⴷ ⵎⴰⵙⵙⴰ ⵉⵡⴰ ⵎⵓⵕⴰⵡⵙⴽⴰ, ⵜⴰⵎⴰⵔⴰⵢⵜ ⵏ ⵓⵏⵎⵀⴰⵍ ⵏ ⵜⵏⵎⵀⴰⵍⵜ ⵏ ⵜⵙⵟⵕⴰⵜⵉⵊⵉⵜ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ, ⵜⴰⵙⴳⴰ ⵏ ⴽⵉⴳⴰⵏ ⵏ ⵉⵏⵎⵀⴰⵍⵏ ⴷ ⵉⵎⴰⵙⴰⵢⵏ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ, ⴳ ⵉⵎⵛⴰⵡⴰⵕⵏ ⴰⴷ, ⵍⵍⴰⵏ ⴽⵉⴳⴰⵏ ⵏ ⵜⵎⵙⴽⴰⵏⵉⵏ ⵅⴼ ⵜⵡⵓⵔⵉⵡⵉⵏ ⴷ ⵜⵎⵥⵍⵉⵢⵉⵏ ⴷ ⵓⵙⵏⵎⴰⵍⴰ ⵏ ⵜⵎⵔⵙⴰⵍ ⵏ ⵓⵙⵍⴳⵏ ⴰⴽⴷ ⴰⵙⴰⵜⵉ ⴰⵣⵔⴼⴰⵏ ⵉⵙⵏⵎⴰⵍⴰⵏ ⵉⴳⵔ ⵏ ⵓⵎⵢⴰⵡⴰⴹ ⴰⵙⵉⵍⵥⵕ ⴳ ⵙⵏⴰⵜ ⵜⵎⵉⵣⴰⵔ ⴰⴷ.

ⵜⵙⵙⵉⴽⵣ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉ ⵓⴽⵏⵉⵡ ⵏⵏⵙ ⴰⴱⵓⵍⵓⵏⵉ ⵜⴰⵣⵎⵔⵜ ⵏ ⵓⴳⵔⴰⵡ ⴰⵎⴰⵜⵜⵢ ⵅⴼ ⵓⵏⵏⵓⵕⵥⵎ ⵅⴼ ⵢⵉⵔⵎⵏ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵓⵙⵍⴳⵏ, ⴰⵔ ⵜⵜⵉⵏⵉ ⵉⵙ ⴷ ⴰⵏⵏⵓⵕⵥⵎ ⴰ ⵉⴳⴰ ⵓⵛⵛⵉⵍ ⴷⴰⵜ ⵓⵣⵉⴳⴳⵉⵣ ⴰⵎⵖⵉⵡⵍ ⵏ ⵉⵎⵓⵜⵜⵓⵢⵏ ⵏⵏⴰ ⵉⵥⵕⴰ ⵓⵎⵢⴰⵡⴰⴹ ⴷ ⵓⵙⵏⵖⵎⵙ, ⵙ ⵉⵎⵥⵍⵉ ⵉⵡⵏⴰⵏ ⵏ ⵜⴳⵔⴰⵡⵍⴰ ⵜⴰⵜⵉⴽⵏⵓⵍⵓⵊⵉⵜ ⴷ ⵓⵙⵡⵓⵔⵉ ⴰⵎⵓⵟⵟⵓⵏ.

ⵉⵡⵏⴰⵏ ⵏ ⵓⵔⵣⴰⴼ ⵏⵏⵙ ⴳ ⵍⵎⵖⵔⵉⴱ, ⵉⵎⵛⴰⵡⴰⵕ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⴰⴽⴷ ⵎⴰⵙⵙ ⵙⵍⵉⵎ ⵛⵛⵉⵅ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵚⵓⵕⵉⵢⴰⴷ ⵜⴰⴷⴰⴱⵓⵜ ⵜⵉⵙⵙ ⵙⵏⴰⵜ ⴷ ⵎⴰⵙⵙ ⵎⵓⵕⴰⴷ ⵓⴽⴰⵙⵎ, ⴰⵎⴰⵔⴰⵢ ⵏ ⵓⵏⵎⵀⴰⵍ ⴰⵎⴰⵜⴰⵢ ⵏ ⵀⵉⵜ ⵕⴰⴷⵢⵓ. ⵉⵡⵏⴰⵏ ⵏ ⵉⵎⵙⴰⴳⴰⵔⵏ ⴰⴷ, ⵉⵥⵕⴰ ⵓⴽⴰⴱⴰⵕ ⴰⴱⵓⵍⵓⵏⵉ ⵉⵔⵎ ⴷ ⵉⵙⵏⵜⴰⵢⵏ ⵏ ⵉⵎⴷⵔⴰⵡⵏ ⵉⵎⵖⵔⴰⴱⵉⵢⵏ, ⵢⴰⵏ ⴷⵉⴳⵙⵏ ⵉⴳⵏⵙⴻⵙ ⵉⴳⵔ ⴰⴳⴷⵓⴷⴰⵏ ⴷ ⵡⴰⵢⴹ ⵉⴳⵏⵙⴻⵙ ⵉⴳⵔ ⵓⵙⵍⵉⴳ.

ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⵢⴰⵏ ⵓⴳⵔⴰⵡ ⴰⴷⵓⵙⵜⵓⵔⵉ ⴰⵏⵉⵎⴰⵏ ⵢⵓⵙⵉⵏ ⴰⴳⴳⵯⴰ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⵙⵍⵉⵥⵕ ⴳ ⴱⵓⵍⵓⵏⵉⵢⴰ. ⵉⴳⴰ ⴰⵍⵜⵓ ⴰⴳⵎⴰⵎ ⴳ ⵙⵉⵏ ⵉⵥⴹⵡⴰⵏ ⵉⵕⵓⴱⴱⵉⵢⵏ, ⵜⴰⵎⵓⵏⵜ ⵏ ⵉⴳⵔⴰⵡⵏ ⵏ ⵓⵙⵍⴳⵏ ⵏ ⵜⵏⴰⴼⵓⵜⵉⵏ ⵏ ⵓⵙⵏⵖⵎⵙ ⴰⵙⵍⵉⵥⵕ ⵓⵕⵓⴱⴱⵉ ⴷ ⵜⵙⵉⵍⴰⵡⵉⵏ ⵜⵉⵕⵓⴱⴱⵉⵢⵉⵏ ⵏ ⵉⴳⵔⴰⵡⵏ ⵏ ⵓⵙⵍⴳⵏ, ⴰⵔ ⵉⵙⵎⴷⵢⴰ ⴱⵓⵍⵓⵏⵢⴰ ⴳ ⵓⵙⴰⴹⴰⴼ ⵓⵕⵓⴱⴱⵉ ⵏ ⵓⵙⵍⵉⵥⵕ.