ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⵙⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵜⵏⵥⵕⵉⵏ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⵟⵕⴰⴱⵍⵓⵙ 18 ⵖⵓⵛⵜ
ⵙ ⵓⵙⵏⵓⴱⴳ ⵏ ⵜⵏⴱⴰⴹⵜ ⵜⴰⵎⴰⵜⴰⵢⵜ ⵏ ⵓⴹⴼⴼⵓⵕ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ, ⵜⴰⵎⵔⵙⵍⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵍⵉⴱⵢⴰ, ⵢⴰⵎⵓ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ 18 ⵖⵓⵛⵜ 2022 ⴳ ⵟⵕⴰⴱⵍⵓⵙ ⴷⴷⴰⵡ ⵏ ⵓⵙⴳⵓⵎ « ⵜⵉⵏⵥⵕⵉⵏ ⵏ ⵉⵇⵇⴰⵏ ⴰⴷ ⵏⵏⴰⵍⵏ ⵉⴳⵔⴰⵡⵏ ⵏ ⵓⵙⵏⴰⵎ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ».
ⴳ ⵡⴰⵡⴰⵍ ⵏⵏⵙ ⵙ ⵢⵉⵙⵎ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⵏⵏⴰ ⵎⴰⵙⵙ ⵄⵉⵎⴰⴷ ⵍⵎⵏⵢⴰⵕⵉ, ⴰⵎⴰⵔⵉ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⴰⵎⵢⴰⵏⴰⵡ ⴷ ⵜⵉⴳⵓⵜ ⵏ ⵜⵎⵓⴽⵔⵉⵙⵉⵏ ⵉⵣⴷⵉⵏ ⴷ ⵓⵙⵏⴰⵎ ⵏ ⵓⵙⵏⵖⵎⵙ ⴰⴳⵓⵏⵙ ⵏ ⵓⵎⵏⴰⴹ ⵏ ⵜⵖⵣⵓⵔⴰⵏⵜ ⴷ ⵜⵎⵓⵟⵟⵓⵏⵜ ⵏ ⵜⴻⵜⵉⴽⵏⵓⵍⵓⵊⵉⵏ ⵏ ⵓⵎⵢⴰⵡⴰⴹ ⴳⴰⵏⵜ ⵛⵛⵉⵍ ⵉ ⵜⵎⵔⵙⴰⵍ ⵏ ⵓⵙⵏⴰⵎ ⵙ ⵉⵎⵥⵍⵉ ⴳ ⵜⵎⵏⴰⴹⵜ ⴰ, ⴰⴷ ⵔⵣⵓⵏⵜ ⵅⴼ ⵜⵙⵓⴳⴰⵔ ⵜⵉⵎⴰⵢⵏⵓⵜⵉⵏ. ⵉⵏⵏⴰ ⴷⵉⵖ ⵉⵙ ⴰⵙⵡⵉⵏⴳⵎ ⴰⵎⴳⵔⴰⵡ ⴷ ⵓⵎⵛⴰⵡⴰⵕ ⴰⵙⵓⵍⴰⵏ ⴳⵔ ⵜⵎⵔⵙⴰⵍ ⵣⵎⵔⵏ ⴰⴷ ⴰⵡⵉⵏ ⵙ ⴷⴰⵜ ⵜⵓⵙⵙⵏⴰ ⴷ ⵜⵎⵙⴽⴰⵔ ⴳ ⵢⵉⴳⵔ ⴰⴷ.
ⴳ ⵜⵙⴳⴰ ⵏⵏⵙ, ⵉⵙⵙⴽⵏ ⵎⴰⵙⵙ ⴰⵃⵎⴷ ⵣⴰⵀⵉⴷ, ⴰⵎⴰⵙⴰⵢ ⵅⴼ ⵓⵚⴰⴹⴰⴼ ⵏ ⵓⵎⵢⴰⵏⴰⵡ ⵏ ⵓⵙⵏⵖⵎⵙ ⴳ ⵍⴰⵀⴰⴽⴰ (ⴰⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ), ⵜⵉⵣⵎⵎⴰⵔ ⵏⵏⴰ ⵉⵙⵙⴽⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⴱⵔⵉⴷ ⵏ ⵓⵙⴷⵓⵙ ⵏ ⵜⵎⵓⵖⵍⵉ ⵜⴰⵙⵍⵉⵥⵕⵜ ⵜⴰⵎⵢⴰⵏⴰⵡⵜ ⵜⴰⵎⴰⴳⵓⵜ. ⵉⵙⵙⴽⵏ ⴷⵉⵖ ⴳ ⵜⵙⴳⴰ ⵢⴰⴹⵏ, ⵜⵉⵣⵎⵎⴰⵔ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵏ ⵓⵙⵏⴰⵎ, ⴳ ⵓⵙⴷⵓⵙ ⵏ ⵓⵣⵔⴰⴽ ⴰⴳⵓⵏⵙ ⵏ ⵜⵓⵎⴰⵢⵉⵏ ⴷ ⵉⵖⴰⵡⴰⵙⵏ ⵉⵙⵍⵉⵥⵕⵏ ⵏ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵣⵓⵏⴷ ⴰⵣⵔⴰⴽ ⵏ ⵡⵓⴷⴷⵓⵔ ⴰⵏⴼⴳⴰⵏ, ⴰⵙⵉⴽⵙⵍ ⴳⵔ ⵡⴰⵏⴰⵡⵏ, ⵏ ⵜⵓⴷⵔⵜ ⵜⵓⵙⵍⵉⴳⵜ, ⵏ ⵓⵎⵢⴰⵏⴰⵡ ⴰⴷⵍⵙⴰⵏ, ⵏ ⵓⵎⵏⵏⵓⵖ ⵎⴳⴰⵍ ⵉⵏⴰⵡⵏ ⵏ ⵓⵙⵏⵓⵃⵢⵓ ⴷ ⵓⴽⵙⴰⵏ… ⴰⵜⴳ.
ⵙⴰⵡⵍⵏ ⵉⵎⴷⵔⴰⵡⵏ ⵏ ⵓⵙⴳⵔⴰⵡ ⴰⴷ, ⴳ ⵉⵍⵍⴰⵏ ⵙ ⵉⵎⵥⵍⵉ ⵉⴳⵏⵙⴰⵙ ⵏ ⵜⵏⴱⴰⴹⵜ ⵜⴰⵎⴰⵜⵜⴰⵢⵜ ⵜⴰⵙⵉⵎⴰⵏⵜ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵓⵏⵙ ⴷ ⴽⵉⴳⴰⵏ ⵏ ⵉⵎⵔⵣⴰ ⴷ ⵉⵎⵓⵣⴰⵢ ⵏ ⵓⵙⵏⵖⵎⵙ ⵉⵜⵓⵏⵙⵉⵢⵏ ⴷ ⵉⵍⵉⴱⵉⵢⵏ, ⵅⴼ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⵉⵣⴷⵉⵏ ⴷ ⵓⵎⵎⵓⵜⵢ ⴰⵣⵔⴼⴰⵏ ⴷ ⵡⵉⵏ ⵓⵙⵍⴳⵏ ⵏⵏⴰ ⵉⵇⵇⴰⵏ ⴰⴷ ⵏⵏⴰⵍⵏ ⵉⵎⵙⵏⴰⵎⵏ ⵏ ⵓⵙⵏⵖⵎⵙ, ⵙ ⵉⵎⵥⵍⵉ ⵡⵏⵏⴰ ⵉⵣⴷⵉⵏ ⴷ ⵓⵣⵣⵔⴰⵢ ⵅⴼ ⵉⵏⵖⵎⵉⵙⵏ ⴷ ⵓⵙⴱⴷⴷⵉ ⵏ ⵉⵅⵔⵔⵉⵇⵏ.
ⵜⴰⵏⴱⴰⴹⵜ ⵜⴰⵎⴰⵜⴰⵢⵜ ⵏ ⵓⴹⴼⴼⵓⵕ ⵏ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵜⴼⴼⵖ ⴷ ⵙ ⵜⵖⵜⴰⵙⵜ ⵏ ⵓⵎⴰⵡⵙⴰⵙ ⴰⵎⵣⵡⴰⵔⵓ ⵏ ⵜⵏⴱⴰⴹⵜ ⵏ ⵜⴰⵎⵓⵏⵜ ⵜⴰⵏⴰⵎⵓⵔⵜ ⵏ ⵍⵉⴱⵢⴰ, ⵙ ⵓⵙⵖⵍⴼ ⵏ ⵜⴳⵔⴰⵡⵜ ⵏ ⵜⵓⵚⴽⴰ ⵏ ⵓⵙⵏⵖⵎⵙ ⵏⵏⴰ ⵎⵉ ⵉⴳⴰ ⴰⵏⵙⵙⵉⵅⴼ ⵓⵏⵖⵎⴰⵙ ⵊⴰⵍⴰⵍ ⵎⵓⵃⴰⵎⴷ ⵄⵜⵎⴰⵏ.
