ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵉⴳⴰⵏ ⴰⵡⴷ ⵜⴰⵏⵙⵙⵉⵅⴼⵜ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⴼⵔⵉⵇⵉⵏ ⵏ ⵓⵙⵍⴳⵏ ⵏ ⵓⵎⵢⴰⵡⴰⴹ, ⴰⵙⵙ ⵏ 16 ⵏⵓⵡⴰⵏⴱⵉⵔ 2023 ⴳ ⵏⵡⴰⴽⵛⵓⵟ, ⵜⵏⵏⴰ ⵉⵙ « ⵎⵇⵇⴰⵔ ⵉⵕⵥⵎ ⵓⵙⵏⵖⵎⵙ ⴰⵎⵓⵟⵟⵓⵏ ⵏⵜⵜⴰ ⴷ ⵉⵥⴹⵡⴰⵏ ⵉⵏⴰⵎⵓⵏⵏ ⴽⵉⴳⴰⵏ ⵏ ⵜⵡⵓⵔⴰ ⵏ ⵡⴰⴷⴰⴼ ⵖⵔ ⴰⵙⵏⵖⵎⵙ ⴷ ⵜⵓⵙⵙⵏⴰ ⴷ ⵓⵙⴷⵉⵎⵓⵇⵕⴰⵟ ⵏ ⵜⵍⴻⵍⵍⵉ ⵏ ⵓⵡⵏⵏⵉ, ⵜⵉⵍⴰⵍⵜ ⵏ ⵓⵙⵏⵖⵎⵙ ⴰⵙⵍⵉⵥⵕ ⵙ ⵉⵎⵥⵍⵉ ⴰⵙⵏⵖⵎⵙ ⴰⴳⴷⵓⴷⴰⵏ, ⵉⵙⵓⵍ  ⵉⴳⴰ ⴰⴷⵙⵍⴰⵏ ⵉ ⵜⴷⵓⵙⵉ ⵜⴰⴷⵉⵎⵓⵇⵕⴰⵟ ⵏ ⵡⴰⵎⵓⵏⵏ, ⴰⵙⵎⵓⵙⵙⵓ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ, ⴰⵡⵏⵏⵉ ⵏ ⵜⵎⴰⴳⵓⵜ ⴷ ⵓⵙⴷⵓⵙ ⵏ ⵜⴰⵎⵓⵏⵜ ⵜⴰⵏⴰⵎⵓⵏⵜ ». ⴰⵡⴰⵍ ⴰⴷ ⵏⵏⵙ ⵉⵜⵜⵓⵏⴰ ⴳ ⵓⵕⵥⵥⵓⵎ ⵓⵏⵚⵉⴱ ⵏ ⵜⵙⵓⵜⵍⵜ ⵏ ⵓⵙⴳⵔⴰⵡ ⴰⴳⵔⴰⵖⵍⴰⵏ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵜⵖⴰⵎⵙⴰ ⴷ ⵓⵙⵍⵉⵥⵕ ⵏ ⵎⵓⵕⵉⵟⴰⵏⵢⴰ ⵏⵜⵜⴰ ⴷ ⵓⵥⵟⵟⴰ ⴰⴼⵕⴰⵏⴽⵓⴼⵓⵏ ⵏ ⵉⵙⵍⵓⴳⵏⵏ ⵏ ⵓⵙⵏⵖⵎⵙ, ⵜⵙⵙⴽⵜⵉ ⴷ ⵎⴰⵙⵙⴰ ⴰⵅⴰⵔⴱⴰⵛ ⴰⵣⵣⵉⴳⵣ ⵏ ⵓⵙⴽⴰⵏ ⴰⵙⵍⵉⵥⵕ ⴰⵏⴰⵎⵓⵔ ⴷ ⵡⵉⵏ ⵓⵏⵎⴰⵍⴰ ⵉⴳⴰ ⵢⴰⵜ ⵜⵖⴰⵡⵙⴰ ⵜⴰⵎⵇⵔⴰⵏⵜ ⵉ ⵡⴰⵎⵓⵏⵏ ⵉⴼⵔⵉⵇⵏ, ⵜⴰⵙⵉ ⵙ ⵓⵎⴷⵢⴰ ⴰⵣⵣⵉⴳⵣ ⵏ ⵜⵎⴳⵓⵔⵉⵏ ⵜⵉⴷⵍⵙⴰⵏⵉⵏ ⴷ ⵜⵉⵏ ⵓⵙⵏⵓⵍⴼⵓ ⵅⴼ ⵜⵎⵏⵥⴰⵡⵜ. « ⵎⵛ, ⵙ ⵓⵢⵏⵏⴰ ⴷ ⵉⵡⵉⵏ ⵉⵣⵡⵉⵍⵏ ⵏ ⵍⴱⴰⵏⴽⴰ ⵜⴰⵎⴰⴹⵍⴰⵏⵜ ⵉ ⵓⵙⴳⴳⵯⴰⵙ 2023, ⵓⵔ ⵜⵓⵣⵉⵏ ⵜⴼⵔⵉⵇⵜ ⴰⵙⵙⴰ ⵖⴰⵙ 5% ⵏ ⵜⵎⴳⵓⵔⵉⵏ ⵜⵉⴷⵍⵙⴰⵏⵉⵏ ⴳ ⵓⵎⴰⴹⴰⵍ, ⵜⴰⵣⵎⵔⵜ ⵏ ⵜⵎⵏⵥⴰⵡⵜ ⴳ ⵢⵉⴳⵔ ⴰⴷ ⵉⵎⵇⵇⵓⵔ, ⵉⵣⵣⵉⴳⵣⵏ ⵉⵅⴰⵜⴰⵔⵏ ⵍⵍⴰⵏ. ⵜⵏⵏⴰ ⴳ ⵜⴳⵉⵔⴰ: ⴰⴼⴰⴷ ⴰⴷ ⵜⵉⵍⵉ ⵢⴰⵜ ⵜⴳⵎⵉ ⵜⴰⵙⵓⵍⴰⵏⵜ ⵏ ⵜⵡⵏⵏⴰⴹⵉⵏ ⴰⴷ ⵜⵉⴷⵍⵙⴰⵏⵉⵏ ⵜⵉⵙⵏⵓⵍⴼⴰⵏⵉⵏ, ⵉⵇⵇⴰⵏ ⵏ ⵢⴰⵏ ⵓⵙⵏⵖⵎⵙ ⴰⵣⵣⵓⵍⴰⵏ ⵙ ⵉⵎⵥⵍⵉ ⴰⵙⵍⵉⵥⵕ, ⵏⵜⵜⴰ ⴰⵢ ⴳⴰⵏ ⴰⵎⴰⵡⴰⵢ ⵏ ⵓⵙⵏⵓⵍⴼⵓ ⴷ ⵜⵡⵓⵔⵉ, ⵉⵎⴰⵙⵙⵏ ⵏ ⵓⵙⴰⴷⴰⴼ ⴷ ⵓⵙⵏⵉⵎⴰⵏ”.

ⵜⵉⵎⵔⵙⴰⵍ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⴰⴼⵕⴰⵏⴽⵓⴼⵓⵏ ⵢⴰⵎⵓⵏ ⴳ ⵓⵎⵙⴳⵔⴰⵡ ⴰⴷ, ⵎⵙⴰⵡⴰⵍⵏ ⵅⴼ ⴽⵉⴳⴰⵏ ⵏ ⵜⵎⵙⴰⵔⵉⵏ ⴳ ⵍⵍⴰⵏⵜ ⵜⵏⵥⵕⵉⵏ ⵜⵉⵅⴰⵜⴰⵔⵉⵏ ⵜⵉⵜⵉⵇⵏⵉⵢⵉⵏ, ⵜⵉⴷⴰⵎⵙⴰⵏⵉⵏ ⴷ ⵜⴷⵍⵙⴰⵏⵉⵏ ⵏⵏⴰ ⵉⵏⵏⴰⵍⵏ ⴰⵙⵏⵖⵎⵙ ⴰⵙⵍⵉⵥⵕ ⴳ ⵓⵣⵎⵣ ⵏ ⵓⵎⵓⵟⵟⵓⵏ, ⵜⵉⵎⵓⴽⵔⵉⵙⵉⵏ ⵏ ⵓⵣⵓⵣⵣⵔ ⴷ ⴱⵟⵟⵓ ⵏ ⵜⵓⵎⴰⵢⵉⵏ ⵜⵉⵙⵍⵉⵥⵕⵉⵏ ⴷⴰⵜ ⵉⵡⵔⵉⴽⵏ ⵉⵅⴰⵜⴰⵔⵏ ⵏ ⵓⵎⵓⵟⵟⵓⵏ, ⵜⵉⵙⵟⵕⴰⵜⵉⵊⵉⵏ ⵏⵏⴰ ⵉⵇⵇⴰⵏⵏ ⴰⴷ ⵜⵜⵓⵙⴽⵔⵏⵜ ⵉ ⵓⵙⵡⵓⴷⴷⵓ ⵏ ⵓⵙⴰⵢⵔⴰⵔ ⴰⵙⵍⵉⵥⵕ ⴰⵎⴰⴳⵓⵜ ⴷ ⵓⵎⵣⴰⵣⵣⴰⵍ ⴷⴰⵜ ⵓⵣⵣⵉⴳⵣ ⵏ ⵓⵙⴽⴰⵏ ⴰⵎⵓⵟⵟⵓⵏ, ⴰⵜⴳ.

ⴰⵥⵟⵟⴰ ⴰⴼⵕⴰⵏⴽⵓⴼⵓⵏ ⵏ ⵉⵎⵙⵏⴰⵎⵏ ⵏ ⵓⵙⵏⵖⵎⵙ ⵉⵍⵓⵍⴰ ⴷ ⴳ ⵡⴰⴳⴰⴷⵓⴳⵓ ⴰⵙⴳⴳⵯⴰⵙ ⵏ 2007.  ⵢⵓⵎⴰ 31 ⵏ ⵜⵎⵔⵙⴰⵍ ⵜⵉⴳⵎⴰⵎⵉⵏ ⵏ ⵜⴼⵔⵉⵇⵜ, ⵏ ⵎⴰⵔⵉⴽⴰⵏ ⵏ ⵓⴳⴰⴼⴰ ⴷ ⵓⵕⵓⴱⴱⴰ. ⴰⵡⵜⵜⴰⵙ ⵏⵏⵙ ⴰⴷⵙⵍⴰⵏ ⵉⴳⴰ ⵜⴰⵡⵓⵔⵉ ⵅⴼ ⵓⵙⴷⵓⵙ ⵏ ⵉⵣⵔⴼⴰⵏ, ⵜⴰⴷⵉⵎⵓⵇⵕⴰⵟⵉⵢⵜ ⴷ ⵉⵣⵔⴼⴰⵏ ⵏ ⵓⵎⴷⴰⵏ.

ⴰⴽⴰⴱⴰⵕ ⴰⵎⵖⵔⴰⴱⵉ ⴳ ⵓⵎⵙⴳⵔⴰⵡ ⴰⴷ ⵉⵍⵍⴰ ⴷⵉⴳⵙ ⴰⵡⴷ ⵎⴰⵙⵙⴰ ⴼⴰⵟⵉⵎⴰ ⴱⴰⵕⵓⴷⵉ ⴷ ⵎⴰⵙⵙ ⵅⴰⵍⵉⵍ ⵄⴰⵍⴰⵎⵉ ⵉⴳⴰⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵎⴰⵙⵙ ⵟⴰⵍⴰⵍ ⵚⴰⵍⴰⵃⴷⴷⵉⵏ, ⴰⵎⵙⵙⴰⵏⵓⵏ ⵏ ⵜⵖⴰⵡⵙⵉⵡⵉⵏ ⵜⵉⴼⵔⵉⵇⵉⵏ ⴰⴳⵓⵏⵙ ⵏ ⵜⵎⵔⵙⵍⵜ ⵏ ⵓⵙⵍⴳⵏ ⴰⵎⵖⵔⴰⴱⵉ.