« ⴰⵎⵢⴰⵏⴰⵡ ⵏ ⵓⵎⴰⴹⴰⵍ ⵉⵇⵇⴰⵏ ⴰⴷ ⵉⵙⵙⴽⵏ ⵙ ⵢⴰⵜ ⵜⵖⴰⵔⴰⵙⵜ ⵏ ⵓⵙⵓⵎⵓ ⴷ ⵜⵎⵙⵜⴳⴳⴰⵔⵜ, ⴰⵎ ⵉⵡⵏⵏⴰ ⵢⴰⴹⵏ ⵏ ⵓⵎⵢⴰⵏⴰⵡ ⵏⵏⴰ ⵙ ⵉⵇⵇⴰⵏ ⴰⴷ ⵉⵏⴽⵔ ⵓⵙⵏⵖⵎⵙ. ⴰⴷⴷⴰⴷ ⵏ ⵜⵖⴰⵔⵉⵡⵉⵏ ⴰⴷ ⵉⵇⵇⴰⵏ ⴰⴷ ⵢⵉⵍⵉ ⵍⵓⵎⴰⵕ ⴰⴳⵓⵏⵙ ⵏ ⵜⵉⵍⴰⵡⵜ ⵜⴰⵎⴰⵢⵏⵓⵜ ⵜⴰⵎⴰⵜⴰⵢⵜ ⵏ ⵓⵎⵢⴰⵡⴰⴹ ⵉⵜⵜⵓⵔⵏⴰⵏ ⵉ ⵉⵏⴳⵉⵔⵉⴼⵏ ⵉⵎⵣⵔⵓⵢⵏ ⴳⵔ ⵓⵙⵏⵖⵎⵙ ⵏ ⵓⵢⴼⴼⵓⵙ ⴷ ⵡⵉⵏ ⵓⵥⵥⵍⵎⴹ, ⵜⵉⵅⵉⵜⵔⵜ ⵏ ⵜⵓⴽⴽⵉ ⵏ ⵜⵓⵎⴰⵢⵉⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⵇⵔⴰⵏⵉⵏ » ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵡⵏⴰⵏ ⵏ ⵡⵓⵎⵓ ⵏⵏⵙ ⴳ ⵓⵙⴼⵙⵔ ⴰⵣⵣⵓⵍⴰⵏ ⴱⴰⵔⵉⵙ ⵕⴰⴷⵢⵓ ⵛⵓⵡ ⵉⵜⵜⵓⵙⵏⵎⴰⵍⴰⵏ ⵓⵙⵙⴰⵏ ⵏ 6 ⴷ 7 ⴼⴱⵕⴰⵢⵕ 2024 ⴳ ⴱⴰⵔⵉⵣ. ⵜⵔⵏⵓ ⴳ ⵡⴰⵡⴰⵍ ⵏⵏⵙ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ ⵏ ⵓⵙⵍⴳⵏ ⵜⵏⵏⴰ « ⴰⵎⵢⴰⵏⴰⵡ ⵏ ⵓⵎⴰⴹⴰⵍ, ⵙ ⵜⵖⵎⵔⵉⵏ ⵏⵏⵙ ⴷ ⵉⵡⵏⵏⴰ ⵏⵏⵙ, ⵓⵔ ⵉⵜⵜⵓⵙⴽⵉⵏ ⵙ ⵡⵓⴷⵎ ⵉⵀⵢⵢⴰⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵙⵏⵖⵎⴰⵙ ⴰⵎⴰⵜⴰⵢ, ⵢⴰⵖⵓⵍⵏ ⵉⴳⴰ, ⵙ ⵉⵙⵏⵉⴼⵉⵍⵏ ⵉⵎⵓⵟⵟⵓⵏⵏ ⵏ ⵓⵎⵢⴰⵡⴰⴹ, ⵜⴰⵡⵏⵏⴰⴹⵜ ⵏ ⴽⵓⵢⴰⵙⵙ ⵏ ⵎⴷⴷⵏ ⴰⴽⴽⵯ, ⴳ ⴽⵓⵥ ⵏ ⵜⵙⴳⴳⵯⵉⵏ ⵏ ⵓⵎⴰⴹⴰⵍ ».

ⵜⵙⴰⵡⵍ ⴳ ⵜⵙⵇⵇⴰⵢⵎⵓⵜ “ⵎⴰⵎⴽ ⵔⴰⴷ ⵏⵙⵙⵉⵡⴹ ⴰⵎⵢⴰⵏⴰⵡ ⴳ ⵜⵏⵣⵡⴰⵢⵜ ⴷ ⵉⴱⵓⴷⴽⴰⵙⵜⵏ?”, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⴰⵙⴷⵓⵙ ⵏ ⵓⵙⵎⴷⵢⴰ ⵏ ⵓⵎⵢⴰⵏⴰⵡ ⴰⴳⵔⴰⵖⵍⴰⵏ ⴰⴳⵓⵏⵙ ⵏ ⵓⵙⵏⵖⵎⵙ ⵉⵣⴷⵉ ⵙ ⵓⴼⴰⵔⵙ ⴰⵖⵎⵙⴰⵏ ⴷ ⵓⴷⵍⵙⴰⵏ ⴰⴷⵖⵔⴰⵏ. ⵎⴰⵛⴰ ⴰⵢⴰ ⵉⵔⴰ “ⴰⵙⵏⴼⵍ ⵏ ⵡⴰⴷⴷⴰⴷ ⵖⵓⵔ ⵓⵙⵏⵖⵎⵙ ⵏ ⵜⵎⵓⵔⴰ ⵏ ⵓⵥⵥⵍⵎⴹ ⴳ ⵓⵢⵏⵏⴰ ⵉⵣⴷⵉⵏ ⵙ ⵜⴷⵓⵍⵉ ⴷ ⵓⴹⴼⴼⵓⵕ ⴰⵖⵎⵙⴰⵏ ⵏ ⵉⵏⵖⵎⵉⵙⵏ ⴰⴳⵓⵏⵙ ⵏ ⵜⵎⵓⵔⴰ ⵏ ⵓⵢⴼⴼⵓⵙ ⵙ ⵓⵎⴰⵜⴰ ⴷ ⵜⵉⵏ ⵜⴼⵔⵉⵇⵜ ⵙ ⵉⵎⵥⵍⵉ”. ⵙ ⵓⵢⴰⴷ, ⵜⵏⵏⴰ ⵉⵙ “ⵙ ⵡⴰⵔ ⵜⴰⴽⵏⴷⴰⵡⵜ ⵉ ⵜⵍⴻⵍⵍⵉ ⵏ ⵜⵉⵔⵔⴰ ⴷ ⵓⵣⵔⴼ ⵏ ⵓⵣⵖⴰⵏ, ⴰⵙⵏⵖⵎⵙ ⵏ ⵜⵎⵓⵔⴰ ⵏ ⴳⵔⵡ ⵉⵇⵇⴰⵏ ⵜⵏⵜ ⵙ ⵢⵉⵙⵎ ⵏ ⵓⵎⵏⵣⴰⵢ ⵏⵏⴰ ⴳ ⵓⵎⵏⵏⵜ, ⴰⴷ ⵏⴽⵔⵏⵜ ⵙ ⵜⵓⵙⵙⵏⴰ ⵏ ⵜⴷⵍⵙⵉⵡⵉⵏ ⵢⴰⴹⵏ ⴷ ⵜⵎⵥⵍⵉⵢⵉⵏ ⵜⵉⵎⵔⵙⴰⵍⵉⵏ ⴷ ⵜⵖⵔⵎⴰⵏⵉⵏ ⵏ ⵜⵎⵓⵔⴰ ⵢⴰⴹⵏ, ⴰⴼⴰⴷ ⴰⴷ ⵜⵎⵣⴰⵔⴰⵢ ⴷ ⴳⴰⵔ ⴰⴱⵔⵉⴷ, ⵜⴽⴽ ⵜⴰⵙⴳⴰ ⵏ ⵜⵓⴳⵜ ⵏ ⵉⵏⴰⵡⴰⵢⵏ ⴷ ⵡⴰⵍⴰⵙⵏ ⵉⵎⴰⵏⴰⵡⵏ, ⵓⴷⵎⴰⵡⴰⵏⵏ ⴷ ⵡⵉⵏ ⵜⴰⴽⴰⵢⵜ ⴽⵔⴰ ⵏ ⵜⵉⴽⴽⴰⵍ”.

ⵜⵙⵙⴽⵜⵉ ⵜⵉⵍⴰⵍⵜ ⵜⵉⵎⵥⵍⵉⵜ ⵏ ⵉⵎⵙⵏⴰⵎⵏ ⵏ ⵓⵙⵏⵖⵎⵙ ⴳ ⵓⵢⵏⵏⴰ ⵉⵣⴷⵉⵏ ⵙ ⵓⴼⵔⴰⴳ ⵏ ⵓⵙⵙⵉⵍⵉ ⵙ ⵓⵎⵢⴰⵏⴰⵡ, ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⵜⴰⵎⵅⵙⵜ ⴷ ⵜⵎⵔⵉⵙⵜ ⵉⵙⵓⵍⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⴱⵖⵓⵔ ⵏ ⵓⵙⴱⴷⴷⵉ ⵏ ⵢⴰⵜ ⵜⴷⵍⵙⴰ ⵏ ⵓⵎⵣⴰⵔⴰⵢ ⴷ ⵡⵉⵏ ⵜⵖⴹⴼⵜ ⴷⴰⵜ ⵉⵎⵉⵣⴰⵏ ⵏ ⵜⴰⵎⵙⵏⴰⴹⵜ ⵏ ⵜⴷⵍⵙⴰ, ⵏ ⵜⵖⴰⵔⵉⵡⵉⵏ, ⵏ ⴷⴷⵉⵏ ⴷ ⵜⵙⵔⵜⵉⵜ. ⵜⵔⵏⵓ ⵜⵏⵏⴰ “ⵉⵎⵉⵣⴰⵏ ⴰⴷ ⴷⴰ ⵜⴳⴳⵓⵜⵏ ⴰⵔ ⵜⵜⵎⵖⵓⵔⵏ ⴽⵉⴳⴰⵏ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⵖⵎⵙⴰⵏ ⴰⵎⵓⵟⵟⵓⵏ ⴰⵎⴰⵜⴰⵢ”.

ⴱⴰⵔⵉⵣ ⵕⴰⴷⵢⵓ ⵛⵓⵡ ⵉⴳⴰ ⵢⴰⵏ ⵓⵏⵎⵓⴳⴳⴰⵔ ⴰⴷⵙⵍⴰⵏ ⴰⵣⵣⵓⵍⴰⵏ ⵉⵣⴷⵉⵏ ⵙ ⵜⵏⵣⵡⴰⵢⵜ ⴷ ⵉⵎⵙⵍⵉ ⴰⵎⵓⵟⵟⵓⵏ ⴳ ⵓⵕⵓⴱⴱⴰ. ⵜⴰⵥⵕⵉⴳⵜ ⵏ ⵓⵙⴳⴳⵯⴰⵙ ⴰⴷ ⵜⵙⵓⵎⵔ ⵙⵎⵎⵓⵙ ⵏ ⵜⵎⵔⴰⵡⵉⵏ ⵏ ⵜⵉⵏⴰⵡⵉⵏ ⵅⴼ ⴽⵉⴳⴰⵏ ⵏ ⵉⵙⴳⵓⵎⵏ: (ⵜⴰⵏⵣⵡⴰⵢⵜ ⴷ ⵜⵉⵖⵉⵙⵜ ⵜⵉⵎⵍⵥⵉⵜ, ⵜⴰⴷⴰⵎⵙⴰ ⵏ ⵉⴱⵓⴷⴽⴰⵙⵜⵏ, ⵜⵉⵍⴰⵍⵜ ⵏ ⵜⵏⵣⵡⴰⵢⵜ ⴳ ⵓⵙⴳⵎⵉ ⵅⴼ ⵓⵙⵏⵖⵎⵙ, ⵜⴰⴼⵕⴰⵏⴽⵓⴼⵓⵏⵉⵜ ⴷ ⵓⵙⵏⵖⵎⵙ, ⴷ DAB+ ⴳ ⵜⴼⵔⵉⵇⵜ...).

ⴰⴽⴰⴱⴰⵕ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⴱⴰⵔⵉⵣ ⵕⴰⴷⵢⵓ ⵛⵓⵡ ⵉⵍⵍⴰ ⴷⵉⴳⵙ ⵎⴰⵙⵙ ⵄⵍⵉ ⴱⴰⵇⵇⴰⵍⵉ ⵃⴰⵙⵙⴰⵏⵉ, ⴰⴳⵎⴰⵎ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⵎⴰⵙⵙ ⵅⴰⵍⵉⴷ ⵡⴰⵔⵢⵉ, ⴰⵎⵖⴰⵔ ⵏ ⵓⴱⵔⵙⵉⵔⴰ ⵏ ⵜⵏⵙⵙⵉⵅⴼⵜ ⴷ ⵎⴰⵙⵙⴰ ⵕⴰⵛⵉⴷⴰ ⵍⴼⴰⴹⵉⵍ, ⴰⵙⴰⵜⵉ ⴰⵎⴰⵜⵜⴰⵢ ⴳ ⵜⵣⵓⵏⵉ ⵏ ⵓⴹⴼⴼⵓⵕ ⵏ ⵉⵖⴰⵡⴰⵙⵏ.