« ⵢⵉⵡⵉ ⴷ ⵓⵙⵏⴼⵍ ⴰⵎⵓⵟⵟⵓⵏ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴽⵉⴳⴰⵏ ⵏ ⵉⵙⴼⴽⴰ ⵉⵎⴰⵢⵏⵓⵜⵏ ⴳ ⵓⵢⵏⵏⴰ ⵉⵣⴷⵉⵏ ⵙ ⵉⵎⵥⵍⵉ ⴷ ⵜⴷⵔⴼⵉⵜ ⵏ ⵓⵡⵏⵏⵉ ⴷ ⵡⴰⴷⴰⴼ ⵖⵔ ⴰⵙⵏⵖⵎⵙ, ⵎⴰⵛⴰ ⴷⵉⵖ, ⵖⵔ ⴽⵉⴳⴰⵏ ⵏ ⵉⵎⵉⵣⴰⵏ ⴳ ⵉⵍⵍⴰ ⴳⴰⵔⴰⵙⵏⵖⵎⵙ ⵉⴳⴰⵏ ⴰⵎⴷⵢⴰ ⴰⵅⴰⵜⴰⵔ » ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵓⴷⵡⴰⵍ ⴳ ⵉⴼⵉⵍⵉ ⵏⵏⴰ ⵜⵙⵏⵎⴰⵍⴰ ⴰⵙⵙ ⵏ 31 ⵎⴰⵕⵚ 2022 ⵜⵎⵙⴷⵓⵙⵜ ⵜⴰⴳⵔⴰⵖⵍⴰⵏⵜ ⵏ ⵜⴼⵔⴰⵏⴽⵓⴼⵓⵏⵉⵜ ⵙ ⵓⵣⵎⵣⵣⵓ ⵏ ⵓⵏⵏⵓⵕⵥⵎ ⵏ ⵜⵙⵉⵍⴰ ⵜⴰⴼⵔⴰⵏⴽⵓⴼⵓⵏⵉⵜ ⵏ ⵜⵎⵙⵙⵏⵜⵉⵢⵉⵏ ⵏ ⵓⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ (ODIL).

ⵜⴰⵏⵏⴰⵢ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵉⵙ ⵉⵔⴰ ⵓⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⴳ ⵢⴰⵜ ⵜⵉⴽⴽⵍⵜ, ⵉⵎⴰⵙⵙⵏ ⵏ ⵓⵙⵏⵖⵎⵙ, ⵉⵎⵙⵏⴰⵎⵏ, ⵉⵎⴰⵣⵣⴰⵍⵏ ⵉⵖⵔⵎⴰⵏⵏ ⴷ ⵓⴳⴷⵓⴷ, ⵎⴰⵛⴰ ⵉⵇⵇⴰⵏ ⵏ ⴰⴷ ⵉⵜⵜⵢⴰⵔⴰ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵏⵎⵏ ⴰⵔ ⵣⵔⵔⴽⵏⵜ ⵜⵉⴷⵔⴼⵉⵏ ⴰⵛⴽⵓ « ⴳⴰⵔⴰⵙⵏⵖⵎⵙ ⴷⴰ ⴷ ⵉⵜⵜⴰⵡⵉ ⵉⵕⵥⴰⵏ ⵉ ⵓⴳⴷⵓⴷ ⴳ ⵓⵙⵡⵉⵔ ⵏ ⵜⵏⴼⵔⵓⵜ, ⵏ ⵜⴷⵓⵙⵉ, ⵏ ⵓⵙⵡⵓⵔⵉ ⴰⴷⵉⵎⵓⵇⵔⴰⵟⵉ, ⵏ ⵜⴰⵎⵓⵏⵜ ⵜⴰⵏⴰⵎⵓⵏⵜ ⴷ ⵜⵓⴷⵔⵜ ⵜⴰⴳⵔⴰⵡⴰⵏⵜ »

ⵜⵔⵏⵓ ⴰⵔ ⵜⵜⵉⵏⵉ : « ⵏⵥⵕⴰ ⴰⴽⴽⵯ ⴰⵎⴽ ⵍⵍⴰⵏ ⵣⵔⵔⵉⵏ ⵉⵏⵖⵎⵉⵙⵏ ⵅⴼ ⵡⴰⵟⵟⴰⵏ ⴳ ⵓⵢⵏⵏⴰ ⵉⵣⴷⵉⵏ ⴰⵎⵏⵏⵓⵖ ⵎⴳⴰⵍ ⴰⴽⵓⴼⵉⴷ 19 ⵍⵍⵉⴳ ⵍⵍⴰⵏ ⵉⵏⵖⵎⵉⵙⵏ ⵏⵏⴰ ⴷⴰ ⵉⵙⴽⵉⵔⴽⵉⵙⵏ ⵅⴼ ⵓⴳⴷⵓⴷ ⴰⴼⴰⴷ ⴰⴷ ⵓⵔ ⵉⵎⵓⵏ ⴷ ⵜⵙⵔⵜⵉⵜ ⵜⴰⴷⵓⵙⴰⵏⵜ ⴷ ⵜⵙⵟⵕⴰⵜⵉⵊⵉⵏ ⵏ ⵓⵛⵕⴰⴹ ».

ⴰⵔ ⵜⵜⵔⴰⵔⴰ ⵅⴼ ⵢⴰⵏ ⵓⵙⵇⵙⵉ ⵉⵣⴷⵉⵏ ⴷ ⵜⵉⵍⴰⵍⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵜⵙⴰⵡⵍ ⵎⴰⵙⵙⴰ ⴰⵅⴰⵔⴱⴰⵛ ⵅⴼ ⵜⵢⴰⴼⵓⵜ ⵜⴰⵍⵓⴳⴰⵏⵜ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵜⵖⵜⴰⵙⵉⵏ ⵜⵉⵍⵓⴳⴰⵏⵉⵏ ⵉⵍⵍⴰⵏ ⴳ ⵡⴰⵍⵓⴳ ⵏ ⵡⴰⴳⴳⵯⴰⵜⵏ ⵏ ⵉⵎⵡⵓⵔⴰ ⵉⵎⵣⵔⴰⴳ ⵏ ⵜⵏⴰⴼⵓⵜⵉⵏ ⵏ ⵓⵏⵣⵡⴰⵢ ⴷ ⵓⵜⵉⵍⵉⴼⵉⵣⵢⵓⵏ ⴰⴼⴰⴷ ⴰⴷ ⴹⵎⵏⵏ ⴰⵣⵔⴰⴽ ⴷ ⵜⵏⵓⵎⵉ ⴷ ⵜⵖⴰⵔⵉⵡⵉⵏ ⵏ ⵓⵙⵏⵖⵎⵙ. ⵜⴼⴽⴰ ⴷⵉⵖ ⴰⵎⴷⵢⴰ ⵏ ⵓⵙⵖⵍⴼ ⵉⵣⴷⵉⵏ ⴷ ⵉⵙⵜⴰⵢⵏ ⵓⵣⵔⵉⴼⵏ, ⵉⵏⵎⵏⴰⴹⵏ ⴷ ⵉⴳⵔⴰⵡⴰⵏⵏ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵛⵜⴰⵎⴱⵉⵔ 2021 ⴳ ⵜⵎⵓⵔⵜ ⵏ ⵍⵎⵖⵔⵉⴱ ⴷ ⵏⵏⴰ ⵉ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ, ⵜⵙⴰⵡⵍ ⵅⴼ ⵓⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⵉⴳⴰⵏ ⵜⵉⴹⴰⴼ ⵏⵏⴰ ⵏ ⵉⵇⵇⴰⵏⵏ ⵉⵎⵥⵕⴰⴳ ⵏ ⵓⵏⵣⵡⴰⵢ ⴷ ⵓⵜⵉⵍⵉⴼⵉⵣⵢⵓⵏ.

ⴳ ⵡⴰⵡⴰⵍ ⵏⵏⵙ, ⵜⵏⵏⴰ ⵜⵏⵙⵙⵉⵅⴼⵜ ⵉⵙ ⴷ ⴳ ⵓⵣⵎⵣ ⵏ ⵡⴰⵟⵟⴰⵏ, ⵉⵙⵏⵖⵎⵙⵏ ⵉⵙⵍⵉⵥⵕⵏ ⵉⵎⵖⵔⴰⴱⵉⵢⵏ ⴽⴽⵔⵏ ⴰⴽⴽⵯ ⴰⴼⴰⴷ ⴰⴷ ⵙⴱⴷⴷⵏ ⴳⴰⵔ ⵉⵏⵖⵎⵉⵙⵏ ⴷ ⵜⴽⵔⴽⴰⵙ ⵉⵣⴷⵉⵏ ⴷ ⵓⴽⵓⴼⵉⴷ19.

ⵉⵙⵎⵓⵏ ⵓⴷⵡⴰⵍ ⴰⴷ ⵜⵉⵎⵔⵙⴰⵍ ⵏ ⵓⵙⵏⴰⵎ ⴷ ⵉⵙⵏⵖⵎⵉⵙⵏ, ⵉⵎⵓⵣⴰⵢⵏ, ⵉⵎⵔⵣⴰ, ⵉⵏⵖⵎⴰⵙⵏ ⴷ ⵉⵎⴰⵣⵣⴰⵍⵏ ⵉⵎⵙⵎⵓⵏⵏ ⵅⴼ ⵜⵖⴰⵡⵙⵉⵡⵉⵏ ⵏ « ⴰⵣⵣⵔⴰⵢ ⵏ ⵜⵉⴳⴰⵡⵉⵏ ⴳ ⵓⵙⴰⵢⵔⴰⵔ ⴰⴼⵔⵓⵏⴽⵓⴼⵓⵏⵉ », « ⴰⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⴷ ⵜⵔⵣⵉ », « ⴰⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⴷ ⵓⵙⴳⵎⵉ ⴳ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵓⵙⵏⵖⵎⵙ », ⴷ « ⴰⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ».

ⴰⴷ ⵏⵙⵙⴽⵜⵉ ⵉⵙ ⴷ ⵜⴰⵙⵉⵍⴰ ODIL (www.odil.org) ⵜⴳⴰ ⵢⴰⵜ ⵜⵡⵡⵓⵔⵜ ⵏ ⵓⵙⵏⵖⵎⵙ ⴷ ⵓⵙⵏⵉⴼⵍ ⵅⴼ ⵜⵎⵉⵔⵉⵏ, ⵉⵙⵏⵜⵉⵢⵏ, ⵉⵙⵏⵓⵍⴼⵓⵜⵏ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵢⵉⴳⵔ ⵏ ⵓⵎⵏⵏⵓⵖ ⵎⴳⴰⵍ ⴳⴰⵔⴰⵙⵏⵖⵎⵙ ⴷ ⵓⵙⴳⵎⵉ ⵅⴼ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵓⵙⵏⵖⵎⵙ ⴰⴳⵓⵏⵙ ⵏ 88 ⵏ ⵜⵎⵓⵔⴰ ⴷ ⵜⵏⴱⴰⴹⵉⵏ ⵏ ⵜⴼⵔⵓⵏⴽⵓⴼⵓⵏⵉⵜ.