“ⵙ ⵢⵉⴽⵣ ⵏ ⵉⵙ ⵏ ⵉⵇⵇⴰⵏ ⵓⴼⵔⴰⴳ ⴳⵔ ⵜⵍⴻⵍⵍⵉ ⵏ ⵉⵡⵔⵉⴽⵏ ⵉⵙⵏⵖⵎⴰⵙⵏ ⴷ ⵉⵣⵔⴼⴰⵏ ⵏ ⵉⵎⵙⵡⵓⵔⴰ, ⴰⵏⴰⵡ ⴰⵎⵖⵔⴰⴱⵉ ⵏ ⵓⵙⵍⴳⵏ ⵏ ⵓⵙⵏⵖⵎⵙ ⵉⵜⵜⵓⵣⵎⵎⴻⵎ ⴳ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⴰⴷ ⵙ ⵜⵖⵓⵔⵉ ⵉ ⵉⵎⵙⵡⵓⵔⴰ ⵉⵎⵓⵟⵟⵓⵏⵏ ⵉⵎⴰⵜⴰⵢⵏ ⴰⴷ ⴼⴽⵏ ⵜⴰⵖⴹⴼⵜ ⵉ ⵉⵎⵥⵍⵉⵢⵏ ⵏ ⵡⴰⵎⵓⵏ ⴰⵎⵖⵔⴰⴱⵉ ⴷ ⵜⵎⵢⴰⵏⴰⵡⵜ ⵜⴰⴷⵍⵙⴰⵏⵜ ⴷ ⵜⵏⴼⴳⴰⵏⵜ ⴳ ⵓⵎⴰⴹⴰⵍ” ⴰⵢ ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⵏ 17 ⴷⵓⵊⴰⵎⴱⵉⵔ ⴳ ⴱⴰⴽⵓ. ⴳ ⵡⴰⵡⴰⵍ ⵏⵏⵙ ⵉⵡⵏⴰⵏ ⵏ ⵜⵙⵓⵜⵍⵜ ⵏ ⵓⵕⵥⵥⵓⵎ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵎⴰⵍⴰ ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵓⵙⵏⵖⵎⵙ ⴷ ⵓⵙⵇⵇⵉⵎ ⵏ ⵓⵙⵍⵉⵥⵕ ⵏ ⴰⵣⵉⵔⴱⴰⵢⴷⵊⴰⵏ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ “ⴳ ⵜⵉⵍⴰⵡⵜ ⵜⴰⵎⴰⵢⵏⵓⵜ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵏⵖⵎⴰⵙ ⵏⵏⴰ ⵙⵏⴼⵍⵏ ⵉⵎⵙⵡⵓⵔⴰ ⵉⵎⴰⵜⴰⵢⵏ ⵉⴳⴰⵏ ⴱⵉⴳⵜⵉⴽ, ⴰⵙⴳⵎⵉ ⵅⴼ ⵓⵏⵖⵎⵉⵙ ⵉⴳⴰ ⵢⴰⵏ ⵓⵣⵓⵛⵛⵍ ⴰⴷⵍⵙⴰⵏ, ⴰⵙⵔⵜⴰⵏ, ⴰⴷⴰⵎⵙⴰⵏ ⴷ ⵡⵉⵏ ⵍⴰⵎⴰⵏ”. ⵜⵙⵔⵙ ⴰⵛⴰⵔⵉⴹ ⴷⴷⴰⵡ “ⵉⵡⵔⵉ ⵏ ⵜⵉⵖⵉⵢⵜ ⵏ ⵉⵏⵎⵓⵔⵉⵏ ⴰⴷ ⵙⵜⵍⵏ ⵙ ⵍⴰⵎⴰⵏ ⴰⴷⴼⵏ ⵙ ⵡⵓⴷⵎ ⵓⵣⵖⵉⵏ ⴷ ⵓⵎⵙⵜⴳⴳⴰⵔ ⴰⴳⵓⵏⵙ ⵏ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵙⵏⵖⵎⴰⵙ, ⴰⵏⴰⵎⵓⵔ ⴷ ⵓⵎⴰⵜⴰⵢ, ⴰⵙⴳⵎⵉ ⵢⴰⴷ ⵉⴳⴰ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⵉ ⵓⵙⵏⵉⵎⴰⵏ ⴰⵎⵓⵙⵙⵏⴰⵡ ⴷ ⵓⴷⵍⵙⴰⵏ ⵏ ⵎⴷⴷⵏ, ⴷ ⵡⵉⵏ ⵡⴰⴷⴰⴼ ⴰⵏⴰⵎⵓⵏ, ⴷ ⵡⵉⵏ ⵓⵙⵍⵍⵡⵓ ⴰⴷⴰⵎⵙⴰⵏ, ⵡⵉⵏ ⵡⵓⵎⵓ ⴰⴷⵉⵎⵓⵇⵔⴰⵟⵉ, ⴰⵜⴳ”. ⴳ ⵓⵎⵏⵉⴷ ⴰⴷ, ⵜⵥⵕⴰ ⵜⵏⵙⵙⵉⵅⴼⵜ ⵏ ⵜⵎⵔⵙⵍⵜ ⵜⴰⵎⵖⵔⴰⴱⵉⵢⵜ, ⵉⵙ ⴰⵙⴳⵎⵉ ⵅⴼ ⵓⵏⵖⵎⵉⵙ ⴷ ⵓⵎⵓⵟⵟⵓⵏ ⵉⵇⵇⴰⵏ ⵏ ⴰⴷ ⴳⵏ ⴰⵣⵔⴼ ⵉ ⵉⵏⵎⵓⵔⵉⵏ ⴰⴽⴽⵯ ⴳ ⵡⴰⵎⵓⵏⵏ ⴰⴽⴽⵯ ⵏ ⵓⵎⴰⴹⴰⵍ.

ⴳ ⵜⴳⵉⵔⴰ ⵏ ⵡⴰⵡⴰⵍ ⵏⵏⵙ ⴳ ⵜⵉⵏⴰⵡⵜ ⴰⴷ ⴳ ⵍⵍⴰⵏ ⴽⵉⴳⴰⵏ ⵏ ⵉⵎⵓⵣⴰⵢ, ⵉⵎⵔⵣⴰ ⴷ ⵉⵙⵍⴳⴰⵏⵏ ⵏ ⴽⵉⴳⴰⵏ ⵏ ⵜⵎⵓⵔⴰ ⵏ ⵜⵎⵏⴰⴹⵜ ⵏ ⵍⴽⵓⴽⴰⵣ, ⵏ ⵜⵎⵓⵔⴰ ⵏ ⵍⴱⴰⵍⴽⴰⵏ ⴷ ⵜⵉⵏ ⴰⵙⵉⵢⴰ ⵜⴰⵎⵥⵢⴰⵏⵜ ⴷ ⵓⵔⵓⴱⴱⴰ, ⵜⵏⵏⴰ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵏ ⵉⵇⵇⴰⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵉ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵓⵙⵍⴳⵏ ⴳ ⵢⵉⴳⵔ ⵏ ⵓⴹⴼⴼⵓⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵓⵙⴳⵎⵉ  ⵅⴼ ⵓⵙⵏⵖⵎⵙ. ⵜⵉⴳⴰⵡⵜ ⵏ ⵓⵙⵍⴳⴰⵏ ⵜⵣⵎⵔ ⴰⴷ ⵜⴰⵡⵙ ⴳ ⵜⵎⵣⵍⵜ ⵏ ⵢⴰⵏ ⵜⵏⵎⵓⵔⵉ ⵜⴰⵎⵓⵟⵟⵓⵏⵜ ⵜⴰⵎⴰⴼⴰⵡⵜ, ⵉⵥⴹⴰⵔⵏ ⴰⴷ ⵖⵓⵔⵙ ⵉⵍⵉⵏ ⵉⵎⴰⵙⵙⵏ ⵏ ⵜⴷⵍⵙⴰ ⵏ ⵓⵎⵓⵟⵟⵓⵏ ⵙ ⵢⵉⴽⵣ ⴷ ⵜⵎⵙⵜⴳⴳⴰⵔⵜ ⴷ ⵜⵓⵙⵓⵔⵜ ⴰⴳⵓⵏⵙ ⵏ ⵡⴰⵎⵓⵏⵏ.

ⵜⴰⵎⴷⵔⴰⵡⵜ ⵏ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴳ ⵜⵉⵏⴰⵡⵜ ⴰⴷ ⵜⴰⵏⵎⵏⴰⴹⵜ ⵢⵓⵙⴰ ⴷ ⴳ ⵓⵙⴰⵜⵉ ⵏ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵖⵓⵔ ⵓⵙⵇⵇⵉⵎ ⴰⵙⵍⵉⵥⵕ ⵏ ⵜⴳⴷⵓⴷⴰⵏⵜ ⵏ ⴰⵣⵉⵔⴱⴰⵢⴷⵊⴰⵏ (ⴰⴽⵔⴰ) ⵓⵙⵙⴰⵏ ⵏ 17 ⴷ 18 ⴷⵓⵊⴰⵎⴱⵉⵔ 2024. ⴰⴽⴰⴱⴰⵕ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵍⵍⴰ ⴷⵉⴳⵙ ⴰⵡⴷ ⵎⴰⵙⵙ ⵄⴱⴷⵍⵍⴰⵟⵉⴼ ⵄⴰⴷⵉⵍ ⴷ ⵎⴰⵙⵙ ⵄⴰⴷⵉⵍ ⴱⵏⵃⴰⵎⵣⴰ, ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵎⴰⵙⵙ ⵟⴰⵕⵉⵇ ⴽⴰⵔⵉⵎⵉ, ⴰⵙⴰⵜⵉ ⴰⵎⴰⵜⵜⴰⵢ ⵏ ⵜⵣⵓⵏⵉ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ.