ⴰⴼⴰⴷ ⴰⴷ ⵉⵙⵜⵍ ⴰⴷⴷⴰⴷ ⵏ ⵜⴷⵓⵍⵉ ⵜⴰⵏⵣⵡⴰⵢⵜ ⵉⴼⵉⵎ ⴷ ⵜⴷⵓⵍⵉ ⵜⴰⵜⴻⵍⴼⴰⵣⵜ ⵜⴰⵎⵓⵟⵟⵓⵏⵜ ⵜⴰⵏⴰⴽⴰⵍⵜ (ⵜⵉⵏⵜⵉ) ⴳ ⵜⵎⵏⴰⴹⵉⵏ ⵏⵏⴰ ⵉⵜⵜⵓⴹⴰⵙⵏ ⵙ ⵉⵏⴳⵢⴰⵏ ⵏ ⵉⵙⴰⴼⴼⵏ ⵉⵣⵔⵉⵏ ⴳ ⵡⴰⵢⵓⵔ ⵏ ⵛⵜⴰⵎⴱⵉⵔ ⵉⵣⵔⵉⵏ, ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵢⴰⵏ ⵓⵎⵣⵉⵣⵣⵍ ⴰⵅⴰⵜⴰⵔ ⵏ ⵓⵙⵖⴰⵍ ⴷ ⵓⵏⵎⴰⵜⴰⵔ ⴰⵜⵉⵇⵏⵉ ⵅⴼ ⵓⴱⵔⵉⴷ ⵉⵍⴰⵏ ⵜⴰⵖⵣⵉ ⵏ 2715 ⵏ ⵉⴽⵉⵍⵓⵎⵉⵟⵔⵏ.

ⵉⵏⵎⴰⵜⴰⵔⵏ ⵉⵎⴳⴳⵓⵍⵍⴰ ⵏ ⵓⴳⵔⴰⵡ ⵏ ⵓⵙⵍⴳⵏ ⵓⴳⴳⴰⵏ ⴳⵔ 03 ⴷ 16 ⴽⵜⵓⴱⵕ 2024, ⵅⴼ ⵜⵓⵚⴽⵉⵡⵉⵏ ⵏ ⵓⵣⵓⵣⵣⵔ ⵏ ⵜⵏⵣⵡⴰⵢⵜ ⴳ 18 ⵏ ⵉⴹⵖⴰⵔⵏ: ⴼⵓⵎ ⵍⴰⵃⵙⵏ, ⴰⵇⵇⴰ, ⵟⴰⵟⴰ, ⴼⵓⵎ ⵥⴳⵉⴷ, ⵣⴰⴳⵓⵔⴰ, ⵜⴰⴳⵓⵏⵉⵜ, ⵎⵃⴰⵎⵉⴷ ⵍⵖⵣⵍⴰⵏ, ⵏⵇⵓⴱ, ⵜⴰⵣⴰⵔⵉⵏ, ⴰⵍⵏⵉⴼ, ⴰⵔⴼⵓⴷ, ⴰⵡⴼⵓⵙ, ⵕⵕⴰⵛⵉⴷⵢⴰ, ⴳⵓⵍⵎⵉⵎⴰ, ⵜⵉⵏⵖⵉⵔ, ⴱⵓⵎⴰⵍⵏ ⴷⴰⴷⵙ, ⵇⵍⵄⴰ ⵏ ⵎⴳⵓⵏⴰ ⴷ ⵡⴰⵔⵣⴰⵣⴰⵜ.

ⴳ ⵜⴳⵉⵔⴰ ⵏ ⵓⵎⵣⴰⵣⵣⵍ ⴰⴷ, ⵜⴻⵜⵜⵓⵙⴽⵔ ⵜⴰⵏⴰⴹⵜ ⵏ ⵉⵥⵕⵉ ⵢⴰⴷ:

• ⵉⵎⴰⵙⵙⵏ ⵏ ⵜⵙⴰⵍⵉⵡⵉⵏ ⵏ ⵓⵣⵓⵣⵣⵔ ⵓⵔ ⵜⵏⵜ ⵢⴰⵖ ⵓⵎⵢⴰ ⵉⵖⵉⵢⵏ ⴰⴷ ⵉⴱⴱⵉ ⵉⵡⴹ ⵏ ⵜⵏⵣⵡⴰⵢⵜ ⵉⴼⵉⵎ ⵉ ⵉⵎⵣⴷⴰⵖ, ⴰⴽⵓ ⴷⵓⵙⵏ ⵉⵎⴰⵙⵙⵏ ⴷ ⵜⵓⵚⴽⵉⵡⵉⵏ ⴰⴷ, ⴷ ⵜⵉⵏ ⵉⴹⵖⴰⵔⵏ ⴳ ⴷⴰ ⵉⵜⵜⵉⵍⵉ ⵓⵣⵓⵣⵣⵔ;
• ⵜⵉⵙⵓⵙⵍⵉⵜⵉⵏ ⵏⵏⴰ ⵉⵜⵜⵓⵢⴰⵣⴰⵏⵏ ⵙ ⵓⴱⵔⵉⴷ ⵏ ⵜⵉⵏⵜⵉ ⵙⴳ ⵖⵓⵔ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⴷ ⵙⴳ ⵖⵓⵔ ⵉⵎⵙⵙⵉⴼⴹⵏ ⵏ ⵕⴰⴷⵢⵓ ⵉⴼⵉⵎ, ⵉⴷⵔⵓⵙ ⴽⵉⴳⴰⵏ ⴷⵉⵏⵏⴰ ⴳ ⵉⴱⴱⵉ ⵓⵣⵓⵣⵣⵔ ⵎⵇⵇⴰⵔ ⵉⴳⴳⵓⵜ ⵓⵏⵥⴰⵕ ⴳ ⵜⵎⵉⵣⴰⵔ ⵏⵏⴰⵖ. ⵉⵏⵎⴰⵜⴰⵔⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵓⴳⴳⴰⵏ ⵅⴼ ⵙⴰ (07) ⵏ ⵉⴹⵖⴰⵔⵏ ⴳ ⵉⴱⴱⵉ ⵉⵎⵙⵍⵉ ⴳⵔ 134 ⵏ ⵉⵎⵙⵙⵉⴼⴹⵏ ⵏ ⵕⴰⴷⵢⵓ ⵉⴼⵉⵎ ⴷ ⴽⵔⴰⴹ (03) ⵏ ⵉⴷⵖⴰⵔⵏ ⵙⴳ 36 ⵏ ⵉⵎⵙⵉⴼⴹⵏ ⵏ ⵜⵉⵏⵜⵉ. ⵜⵉⵔⵓⴱⴱⴰ ⵜⵉⵜⵉⵇⵏⵉⵢⵉⵏ ⵜⵉⵏⵎⵏⴰⴹⵉⵏ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ, ⵓⴳⴳⴰⵏ ⵅⴼ ⵓⵙⴽⴰⵔ ⵏ ⵜⵉⵎⵓⴽⵔⵉⵙⵉⵏ ⴰⴷ ⴰⵍⵍⵉⴳ ⵢⴰⵖⵓⵍ ⵉⵎⵙⵍⵉ ⵉ ⵓⵥⵟⵟⴰ.

ⵢⵓⴳⴳⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵅⴼ ⵜⴰⵏⴰⴹⵜ ⵏ ⵉⵥⵕⵉ ⵏ ⵜⵙⵎⵉⴳⵍⵜ ⴰⴷ ⴳ ⵢⴰⵏ ⵓⵎⵙⴳⵔⴰⵡ ⵉⵏⵏⵓⵕⵥⵎⵏ ⴰⵙⵙ ⵏ 10 ⴷⵓⵊⴰⵎⴱⵉⵔ 2024, ⴰⵔ ⵉⵙⵙⵎⵖⵓⵔ ⵙ ⵜⵣⵎⵎⴰⵔ ⵜⵉⵎⵇⵔⴰⵏⵉⵏ ⵏ ⵓⴳⵊⴷⵉ ⴰⴳⴷⵓⴷⴰⵏ ⵏ ⵓⵙⵍⵉⵥⵕ ⴷ ⴰⵡⴷ ⵉⵎⵡⵓⵔⴰ ⵓⵙⵍⵉⴳⵏ ⵏ ⵜⵏⵣⵡⴰⵢⵜ ⵅⴼ ⵓⴹⵎⴰⵏ ⵏ ⵓⴷⵓⵙ ⵏ ⵜⵓⵚⴽⵉⵡⵉⵏ ⵏ ⵓⵣⵓⵣⵣⵔ ⴷ ⵓⵙⴷⵓⵙ ⵏ ⵜⴷⵓⵍⵉ ⵜⴰⵙⵍⵉⵥⵕⵜ ⵅⴼ ⵡⴰⴽⴰⵍ ⴰⵏⴰⵎⵓⵔ ⵙ ⵉⵎⵥⵍⵉ ⴳ ⵜⵎⵏⴰⴹⵉⵏ ⵢⴰⴳⴳⵓⴳⵏ.

ⵉⵥⵕⵉ ⴷⵉⵖ ⵉⵙ ⴰⴱⵟⵟⵓ ⵏ ⵜⵓⵚⴽⵉⵡⵉⵏ ⴷ ⵉⵎⴰⵙⵙⵏ ⵏ ⵓⵣⵓⵣⵣⵔ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⵣⵡⴰⵢⵜ ⴷ ⵓⵜⵉⵍⵉⴼⵉⵣⵢⵓⵏ ⴰⴽⴷ ⵉⵎⵡⵓⵔⴰ ⵓⵙⵍⵉⴳⵏ ⵏ ⵓⵕⴰⴷⵢⵓ ⴷ ⵓⵜⵉⵍⵉⴼⵉⵣⵢⵓⵏ ⴳⴰⵏ ⵢⴰⵏ ⵓⴱⵖⵓⵔ ⵉ ⵉⵏⵎⵓⵔⵉⵏ ⵉⵎⵖⵔⴰⴱⵉⵢⵏ ⵉⵙⵡⵓⵔⵉⵏ ⴰⵙⵏⵖⵎⵙ ⵉⴳ ⴷⵉⵖ ⵢⴰⵏ ⵓⴱⵖⵓⵔ ⴳ ⵓⴹⵎⴰⵏ ⵏ ⵡⴰⴷⴰⴼ ⵖⵔ ⵉⵏⵖⵎⵉⵙⵏ.

ⵉⵏⵏⴰ ⵓⵙⵇⵇⵉⵎ ⴰⵎⴰⵜⵜⴰⵢ ⵉⵙ ⵙⵙⴽⵜⵉⵏ ⵉⵏⴳⵢⴰⵏ ⵏ ⵛⵜⴰⵎⴱⵉⵔ 2024 ⵜⵉⵍⴰⵍⵜ ⵏ ⵓⵙⵏⵖⵎⵙ ⴰⴳⴷⵓⴷⴰⵏ ⴷ ⵡⴰⵜⵉⴳ ⵏ ⵉⵎⵡⵓⵔⴰ ⵓⵙⵍⵉⴳⵏ ⴳ ⵜⵏⴰⴼⵓⵜ ⵏ ⵓⵙⵏⵖⵎⵙ ⴳ ⵓⴱⵖⵓⵔ ⴰⵎⴰⵜⴰⵢ ⴰⴳⵓⵏⵙ ⵏ ⵡⴰⴷⴷⴰⴷⵏ ⵏ ⵓⵖⵉⵡⵍ, ⵙ ⵉⵎⵥⵍⵉ ⴳ ⵓⵎⵏⴰⴹ ⵏ ⵜⵡⴰⵖⵉⵜⵉⵏ ⵜⵉⴳⴰⵎⴰⵏⵉⵏ.