« ⴰⵙⵎⵓⵜⵜⴳ ⵉ ⵜⵏⵎⵓⵔⵉ ⵜⴰⵎⵓⵟⵟⵓⵏⵜ ⵉⵇⵇⴰⵏ ⵏ ⴰⴷ ⵖⵓⵔⵙ ⵢⵉⵍⵉ ⵡⴰⴷⴷⴰⴷ ⵏ ⵓⵣⵔⴼ ⴰⵎⴷⴰⵏ ⴷ ⵓⵎⴳⵔⵓ ⴳ ⵜⵡⵏⵏⴰⴹⵜ ⵜⴰⵎⴰⵢⵏⵓⵜ ⵜⴰⵖⴰⵎⵙⴰⵏⵜ », ⴰⵢ ⵜⵏⵏⴰ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ (ⵀⴰⴽⴰ) ⵉⵡⵏⴰⵏ ⵏ ⵜⵉⵏⴰⵡⵜ ⵏⵏⴰ ⵜⴼⴽⴰ ⴰⵙⵙ ⵏ 04 ⵎⴰⵢⵓ 2023 ⴳ ⵜⵙⴷⴰⵡⵉⵜ ⵏ ⴰⵍⴰⵅⴰⵡⴰⵢⵏ ⴳ ⵉⴼⵔⴰⵏ.
ⵉⵡⵏⴰⵏ ⵏ ⵜⵉⵏⴰⵡⵜ ⴰⴷ ⵏⵏⴰ ⵜⵙⵏⵢⵓⴷⴷⴰ ⵎⴰⵙⵙⴰ ⴽⵏⵣⴰ ⵓⵎⵍⵉⵍ, ⵜⴰⵙⵍⵎⴰⴷⵜ ⵜⴰⵎⵙⵔⴰⵏⵜ ⵏ ⵓⵎⵢⴰⵡⴰⴹ ⴳ ⵜⵙⴷⴰⵡⵉⵜ ⵏ ⴰⵍⴰⵅⴰⵡⴰⵢⵏ, ⵜⵙⵙⵉⴽⵣ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ ⵉⵙ « ⴰⵙⵙⵎⵖⵔ ⵏ ⵉⵣⵔⴼⴰⵏ ⵏⵏⴰ ⵓⵙⵉⵏ ⵉⵎⵙⵡⵓⵔⴰ ⵏ ⵓⵥⵟⵟⴰ ⵏ ⵍⴰⵏⵜⵉⵔⵏⵉⵜ ⵜⴳⴰ ⵢⴰⵜ ⵜⵎⴰⵙⴰⵢⵜ ⵜⴰⵎⴳⵔⴰⵡⵜ. ⵉⵣⵔⴼⴰⵏ ⴰⴷ ⵏ ⵜⵙⵓⵜⴰ ⵜⴰⵎⴰⵢⵏⵓⵜ ⵉⵇⵇⴰⵏ ⵏ ⴰⴷ ⵜⵜⵓⵢⴰⵙⵙⵏⵏ ⴷ ⴰⴷ ⵜⵜⵓⵣⵔⴳⵏ ⵖⵓⵔ ⵉⵏⵎⵓⵔⵉⵏ ⵏⵏⴰ ⵉⵙⵡⵓⵔⵉⵏ ⴷ ⵖⵓⵔ ⵉⵎⴰⵣⵣⴰⵍⵏ ⴷ ⵉⵎⵡⵓⵔⵉⵏ ⵏ ⵜⵎⵓⵟⵟⵓⵏⵜ ⴷ ⵉⵇⵇⴰⵏ ⵏ ⴰⴷ ⵉⵜⵜⵓⴹⵎⵏ ⵖⵓⵔ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵙⵔⵜⴰⵏⵉⵏ ».
ⴳ ⵡⴰⵡⴰⵍ ⵏⵏⵙ ⵅⴼ ⵓⵣⵣⵉⴳⵣ ⵏ ⵓⵙⵏⴰⵎ ⵏ ⵓⵙⵏⵖⵎⵙ ⴳ ⵓⵣⵎⵣ ⵏ ⵜⵎⵓⵟⵟⵓⵏⵜ, ⵜⵏⵏⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵍⵍⴰⵏ ⴽⵉⴳⴰⵏ ⵏ ⵉⵎⵙⴰⵔⴰⵙⵏ ⴷ ⵜⴰⵙⵙⴰⵙⵉⵏ ⵏ ⵓⵙⵏⴰⵎ ⴰⴷ ⵉⴳⴰⵏ ⵜⴰⵡⵓⵔⵉ ⵜⴰⴳⴷⵓⴷⴰⵏⵜ ⵏⵏⴰ ⵏ ⵉⵇⵇⴰⵏ ⴰⴷ ⵜⴼⵔⴳ ⴰⵎⵓⵏ ⴱⵍⴰ ⴰⴷ ⵜⴽⵔⴼ ⵜⵉⵍⴻⵍⵍⵉ ⵏ ⵓⵡⵏⵏⵉ. « ⵜⵉⵍⴰⵡⵜ ⵜⴰⵎⴰⵢⵏⵓⵜ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵜⴻⵜⵜⵓⵢⴰⵙⵙⵏ ⵙ ⵢⴰⵏ ⵡⴰⴷⴷⴰⴷ ⵉⵎⵣⴰⵔⴰⵢⵏ ⴳ ⵢⵉⴳⵔ ⵏ ⵓⵙⵏⴰⵎ ⴰⵛⴽⵓ ⵣⴷⵖⵏⵜ ⴷⵉⴳⵙ ⴽⵉⴳⴰⵏ ⵜⵙⴳⴳⵯⵉⵏ ⵏ ⵓⵙⵏⵖⵎⵙ ⴰⴽⵍⴰⵙⵉⴽⵉ ⴰⵙⵍⵉⵥⵕ ⵏⵏⴰ ⵉⵜⵜⵓⵙⵍⴳⵏⵏ ⴳ ⵓⵖⴰⵡⴰⵙ ⴰⴷⴰⵎⵙⴰⵏ ⴷ ⵓⵖⴰⵡⴰⵙ ⵏ ⵜⵓⵎⴰⵢⵉⵏ, ⴷ ⵉⵡⵔⵉⴽⵏ ⵉⵎⵓⵟⵟⵓⵏⵏ ⵉⵎⴰⴷⵓⵙⵏ ⵉⵙⵡⵓⵔⵉⵏ ⴳ ⵓⵙⴰⵢⵔⴰⵔ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵎⵓⵟⵟⵓⵏ ⵏⵏⴰ ⵓⵔ ⵉⵜⵜⵓⵙⵏⵉⵎⵏ ». ⴰⵢ ⵜⵔⵏⴰ ⵎⴰⵙⵙⴰ ⴰⵅⴰⵔⴱⴰⵛ.
ⵙ ⵓⴱⴷⴰⵔ ⵏ ⵢⵉⵜⵙ ⵏ ⵉⵎⴷⵢⴰⵜⵏ ⵉⵍⵍⴰⵏ ⴳ ⵓⵕⵓⴱⴱⴰ ⴷ ⵓⵙⵟⵕⴰⵍⵉⵢⴰ ⴳ ⵓⵏⵏⴰⵔ ⵏ ⵓⵙⴰⵜⵉ ⵓⵣⵔⵉⴼ ⵏ ⵜⵡⵓⵔⵉⵡⵉⵏ ⵏ ⵜⵙⵉⵍⴰⵡⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵜⴰⵢⵉⵏ, ⵜⵙⵙⴽⵏ ⵎⴰⵙⵙⴰ ⴰⵅⴰⵔⴱⴰⵛ ⵉⵙ ⵉⵙⵏⴰⵎⵏ ⴰⴷ ⵙⵓⵍ ⵓⵔ ⵜⵜⵓⵙⵓⵜⵍⵏ ⴷ ⵓⵏⵢⵓⴷⴷⵓ ⵏ ⵜⵓⵎⴰⵢⵉⵏ ⵜⵉⵎⵓⵟⵟⵓⵏⵉⵏ ⵜⵉⵎⴰⵕⵥⴰⴳⵉⵏ ⵓⵔ ⴷⵔⵓⵙⵏⵜ ⴰⵛⴽⵓ ⵍⵍⴰⵏⵜ ⵜⴰⵙⵙⴰⵙⵉⵏ ⵜⵉⵙⵔⵜⴰⵏⵉⵏ ⴷ ⵜⵖⴰⵔⴰⵙⵉⵏ ⵏ ⵓⵙⵏⴰⵎ ⵏⵏⴰ ⵉⵜⵜⵓⵙⵓⵔⵙⵏ ⵙⴳ ⵖⵓⵔ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ.
ⵜⵉⵏⴰⵡⵜ ⴰⴷ ⵜⴻⵜⵜⵓⵣⵎⵎⴻⵎ ⴳ ⵓⵙⴰⵜⵉ ⵏ ⵢⴰⵏ ⵉⵎⵉⵔ ⵏ ⵜⵉⵏⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⵏⵏⴰ tⵙⵏⵎⴰⵍⴰ ⵜⵙⴷⴰⵡⵉⵜ ⵏ ⴰⵍⴰⵅⴰⵡⴰⵢⵏ ⵃⵉⴹⵕⵏ ⴷⵉⴳⵙ ⴽⵉⴳⴰⵏ ⵏ ⵉⵎⴷⴰⵏⵏ ⵉⵎⵖⵔⴰⴱⵉⵢⵏ ⴷ ⵉⴱⵕⵕⴰⵏⵉⵢⵏ ⵏ ⵓⵎⴰⴹⴰⵏ ⴰⵎⴰⵙⵙⴰⵏ, ⴰⴷⴰⵎⵙⴰⵏ ⴷ ⵓⴷⵍⵙⴰⵏ ⵙⴳ ⵉⵎⵏⵉⴷⵏ ⴰⴽⴽⵯ.
