ⵜⵙⵏⵓⴱⴳ ⵎⴰⵙⵙⴰ ⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴰⵙⵙ ⴰⵎⵣⵡⴰⵔⵓ ⵏ ⵛⵜⴰⵎⴱⵉⵔ 2022, ⴳ ⵓⵙⵖⵉⵎ ⵏ ⵓⴳⵔⴰⵡ ⴰⵎⴰⵜⵜⴰⵢ, ⵎⴰⵙⵙ ⵄⵓⵎⴰⵔ ⴼⴰⵕⵓⵇ ⴹⵓⴳⴰⵏ, ⴰⵎⵙⵇⴰⴷ ⵏ ⵜⵓⵕⴽⵢⴰ ⴳ ⵍⵎⵖⵔⵉⴱ.
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⵜⵙⵎⵏⴷ ⵜⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉ ⵓⴷⵉⴱⵍⵓⵎⴰⵙⵉ ⴰⵜⵓⵕⴽⵉ ⵜⵉⵙⵎⵉⴳⴰⵍ ⵜⵎⵇⵔⴰⵏⵉⵏ ⵉⵜⵜⵢⴰⵔⴰⵏ ⴳ ⵜⵎⴰⵙⴰⵢⵜ ⵜⴰⴷⵓⵙⵜⵓⵔⵉⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⴳⴰⵏ ⵜⴰⵎⵔⵙⵍⵜ ⵜⴰⵙⵏⵉⵎⴰⵏⵜ ⵢⵓⵙⵉⵏ ⴰⴳⴳⵯⴰ ⵏ ⵓⵙⵏⴰⵎ ⵏ ⵓⵎⵢⴰⵡⴰⴹ ⴰⵙⵍⵉⵥⵕ.
ⵜⵙⵔⵙ ⵜⵏⵙⵙⵉⵅⴼⵜ ⴷⵉⵖ ⴰⵛⴰⵕⵉⴹ ⴷⴷⴰⵡ ⵜⵖⴰⵔⴰ ⵏ ⵉⵣⴷⴰⵢⵏ ⵏⵏⴰ ⵉⵍⵍⴰⵏ ⴳⵔ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⵢⵉⴽⵏ ⵏⵏⵙ ⴰⵜⵓⵕⴽⵉ, ⴰⵙⵇⵇⵉⵎ ⴰⵎⴰⵜⵜⴰⵢ ⵏ ⵕⴰⴷⵢⵓ-ⵜⵉⵍⵉⴼⵉⵣⵢⵓⵏ ⴰⵜⵓⵕⴽⵉ. ⵜⵏⵏⴰ ⴷⵉⵖ ⵎⴰⵙⵙⴰ ⴰⵅⴰⵔⴱⴰⵛ « ⴰⵎⵙⴳⵔⴰⵡ ⵏ ⵡⴰⵙⵙ ⵏ 22 ⵉⴱⵔⵉⵔ 2022 ⴳ ⵕⵕⴱⴰⵟ, ⵏ ⵓⴳⵔⴰⵡ ⴰⵎⵣⵡⴰⵔⵓ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ, ⵙ ⵢⵉⵍⵉ ⵏ ⵓⴳⵔⴰⵡ ⴰⵜⵓⵕⴽⵉ ⵉⵍⴰⵏ ⵜⵉⵣⵉ ⵎⵇⵇⵓⵔⵏ, ⵎⵉ ⵉⴳⴰ ⴰⵏⵙⵙⵉⵅⴼ ⵎⴰⵙⵙ ⴱⵓⴱⴽⵔ ⵙⴰⵀⵉⵏ, ⵢⵉⵡⵉ ⵖⵔ ⵓⵏⵏⵓⵕⵥⵎ ⴷⵉⵖ ⵏ ⵉⵙⵏⵉⴼⵉⵍⵏ ⴳⵔ ⵙⵏⴰⵜ ⵜⵎⵔⵙⴰⵍ ⴰⴷ ⵏ ⵓⵙⵏⴰⵎ ».
ⵉⵡⵏⴰⵏ ⵏ ⵓⵎⵙⴳⵔⴰⵡ ⴰⴷ, ⴳ ⵢⴰⵎⵓ ⵎⴰⵙⵙ ⴱⵏⵄⵉⵙⵙⴰ ⴰⵙⵍⵓⵏ, ⴰⵏⵎⵀⴰⵍ ⴰⵎⴰⵜⴰⵢ ⴷ ⵎⴰⵙⵙ ⴰⵎⵉⵏ ⵄⵣⵣⵉⵎⴰⵏ, ⴰⵏⵎⵀⴰⵍ ⵏ ⵜⵎⴰⵡⴰⵙⵜ ⵜⴰⴳⵔⴰⵖⵍⴰⵏⵜ, ⵜⵙⵙⴽⵜⵉ ⴷ ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⵉⵙ ⵙⵏⴰⵜ ⵜⵎⵔⵙⴰⵍ ⴰⴷ ⵖⵉⵢⵏⵜ ⴰⴷ ⵙⴷⵓⵙⵏⵜ ⴰⵎⵢⴰⵡⴰⵙ ⴰⴳⵓⵏⵙ ⵏ ⵉⵥⴹⵡⴰⵏ ⵉⴳⵔⴰⵖⵍⴰⵏⵏ ⴰⵎⵎ ⵓⵥⵟⵟⴰ ⵏ ⵜⵎⵔⵙⴰⵍ ⵏ ⵓⵙⵏⴰⵎ ⵉⴳⵔⴰⴽⴰⵍⵏ ⵏⵖ ⴰⴳⵔⴰⵡ ⵏ ⵉⵎⵙⵏⴰⵎⵏ ⵉⵙⵍⵉⵥⵕⵏ ⵏ ⵉⵡⴰⵏⴽⵏ ⵏ ⵜⵎⵙⴷⵓⵙⵜ ⵏ ⵓⵎⵢⴰⵡⴰⵙ ⴰⵏⵙⵍⵎ ⵏⵏⴰ ⴳ ⵍⵍⴰⵏⵜ 39 ⵏ ⵜⵎⵔⵙⴰⵍ ⵏ ⵓⵙⵏⴰⵎ ⴷ ⵉⵡⵔⵉⴽⵏ ⵉⵙⵏⵖⵎⴰⵙⵏ ⴰⵄⵔⴰⴱⵏ, ⵉⴼⵔⵉⵇⵉⵢⵏ ⴷ ⵉⵙⵢⴰⵡⵉⵢⵏ.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵎⵙⵇⴰⴷ ⵄⵓⵎⴰⵔ ⴼⴰⵕⵓⵇ ⴹⵓⴳⴰⵏ ⵉⵙ ⵉⴼⵔⵃ ⴽⵉⴳⴰⵏ ⵙ ⵉⵣⴷⴰⵢⵏ ⵉⵙⵔⵜⴰⵏⵏ ⴷ ⵉⴷⴰⵎⵙⴰⵏⵏ ⴷ ⵉⴷⵍⵙⴰⵏⵏ ⴷ ⵉⵏⴼⴳⴰⵏⵏ ⵉⵍⵍⴰⵏ ⴳⵔ ⵍⵎⵖⵔⵉⴱ ⴷ ⵜⵓⵕⴽⵢⴰ, ⵉⵏⵏⴰ ⴷⵉⵖ ⵉⵙ « ⵜⴰⴷⵉⵏⴰⵎⵉⵢⵜ ⵏ ⵉⵙⵏⵉⴼⵉⵍⵏ ⴳⵔ ⵙⵉⵏ ⵉⵎⵙⵏⴰⵎⵏ ⵔⴰⴷ ⵙⴱⵓⵖⵔⵏ ⵉⵣⴷⴰⵢⵏ ⴰⵛⴽⵓ ⴰⵙⵏⵖⵎⵙ ⵖ ⵢⵉⵡⵙ ⵙ ⵡⵓⴷⵎ ⴰⴷⵙⵍⴰⵏ ⴳ ⵓⵎⵢⴰⵡⴰⴹ ⴰⴷⵍⵙⴰⵏ ⴳⵔ ⵉⴳⴷⵓⴷⵏ ».
