ⴳ ⵓⵙⴰⵜⵉ ⵏ ⵓⵙⵡⵓⵔⵉ ⵏ ⵜⵎⵇⵇⵓⵏⵉⵏ ⵉⵍⵍⴰⵏ ⴳ ⵜⵙⴳⵓⵔⵉ ⵏ ⵎⵕⵕⴰⴽⵛ ⵉ ⵓⵙⴱⴷⴷⵉ ⵏ ⵜⴽⵕⴷⵉ ⵎⴳⴰⵍ ⵜⵉⵎⵖⴰⵔⵉⵏ, ⵜⴰⵙⴳⵓⵔⵉ ⵏⵏⴰ ⵜⵙⴳⵎⴹ ⵍⴰⵍ ⵏ ⵡⴰⴷⴷⵓⵔ ⴰⴳⵍⴷⴰⵏ ⵜⴰⴳⵍⴷⵓⵏⵜ ⵜⴰⵎⵇⵔⴰⵏⵜ ⵍⴰⵍⵍⴰ ⵎⴰⵔⵢⴰⵎ ⴰⵙⵙ ⵏ 08 ⵎⴰⵕⵚ 2020, ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⵜⴰⵢ ⵢⴰⵜ ⵜⵙⴰⵡⵔⵜ ⵉ ⵓⴱⴰⵖⵓⵔ ⵏ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⴰⵙⵙ ⵏ ⵓⵙⵉⴹⵢⴰⵙ 11 ⵢⵓⵏⵢⵓ 2022, ⴳ ⵜⴷⴰⵍⴰ ⵏⵏⵙ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⴰⵡⵜⵜⴰⵙ ⵏ ⵜⵙⴰⵡⵔⵜ ⵉⴳⴰ ⵜⵉⴳⵎⵉ ⵏ ⵓⵙⴼⵔⴽ ⴰⵎⵣⵖⴰⵏ ⵖⵓⵔ ⵉⵎⵥⵢⴰⵏⵏ ⴷⴰⵜ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ ⵉⵙⵙⵉⵣⴷⵉⵔⵏ ⵙ ⵜⵎⵖⴰⵔⵜ. ⵜⴰⵙⴰⵡⵔⵜ ⴰⴷ ⵜⵓⵙⴰ ⴷ ⴳ ⵢⴰⵏ ⵓⵙⴷⴷⵉ ⵏ ⵜⵙⴰⵡⵔⵉⵏ ⵏⵏⴰ ⵉⵜⵜⵓⵙⴽⵔⵏ ⴳ ⵜⴷⴰⵍⴰ ⵏ ⵜⵎⵔⵙⵍⵜ ⵉⵡⵏⴰⵏ ⵏ ⵓⵙⴼⵙⵔ ⵉ ⵓⵙⴼⵔⴽ ⵏ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⵅⴼ ⵓⵙⵉⴽⵙⵍ ⴳⵔ ⵜⵎⵖⴰⵔⵜ ⴷ ⵓⵔⴳⴰⵣ ⴳ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ.
ⵉⵡⵏⴰⵏ ⵏ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰ, ⵥⵕⴰⵏ ⴷ ⵙⵙⴼⵍⴷⵏ ⵉⵎⴷⵔⴰⵡⵏ ⵉ ⵜⵓⵙⵙⵉⴼⵉⵏ ⵙⴳ ⵉⵙⴰⵢⵙⵏ ⵏ ⵜⵏⵣⵡⴰⵢⵉⵏ ⴷ ⵉⵜⵉⵍⵉⴼⵉⵣⵢⵓⵏⵏ, ⴷ ⵉ ⵡⴰⵏⴰⵡⵏ ⵙⴳ ⵜⵓⵎⴰⵢⵉⵏ ⵜⵉⵎⵓⵟⵟⵓⵏⵉⵏ ⴰⴼⴰⴷ ⴰⴷ ⴰⵔⵎⵏ ⵜⵉⵣⵎⵎⴰⵔ ⵏⵏⵙⵏ ⵅⴼ ⵜⵉⴹⴰⴼ ⴷ ⵓⵙⵡⵓⵜⵜⵓ ⵏ ⴽⵔⴰ ⵏ ⵜⴰⵏⵏⴰⵢⵉⵏ ⵜⵓⵔⵙⵉⵍⵉⵏ ⵉⵚⴽⴰⵏ ⵅⴼ ⵡⴰⵏⴰⵡ ⴳ ⵜⵓⵎⴰⵢⵉⵏ ⵜⵉⵙⵏⵖⵎⴰⵙⵉⵏ, ⴷ ⵓⵙⵃⵓⵕⵕⵛ ⵏ ⵉⵙⵇⵙⵉⵜⵏ ⵏⵏⵙⵏ ⴷ ⵜⵎⵙⴽⴰⵔⵉⵏ ⵏⵏⵙⵏ ⴳ ⵓⵡⵜⵜⴰⵙ ⵏ ⵓⵙⴳⵎⵉ ⵏ ⵓⴼⵔⴰⴽ ⵏⵏⵙⵏ ⴰⵎⵙⵖⴰⵏ ⴷⴰⵜ ⵜⴳⵓⵔⵉⵡⵉⵏ ⴷ ⵜⵡⵍⴰⴼⵉⵏ ⴷ ⵜⴱⵔⴰⵜⵉⵏ ⵉⵙⵙⵉⵣⴷⵉⵔⵏ ⵙ ⵜⵎⵖⴰⵔⵜ, ⴳ ⵓⵙⵉⵜⵎ ⵏ ⵓⵙⵙⵉⴷⵔ ⵏ ⵜⴷⵍⵙⴰ ⵏ ⵓⵙⵉⴽⵙⵍ ⴳⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵖⵓⵔ ⵉⵎⵥⵢⴰⵏⵏ.
ⴳ ⵜⵙⴰⵡⵔⵜ ⴰⴷ, ⵙⵙⵏⵏ ⵉⵎⵥⵢⴰⵏⵏ ⵉⵎⴷⵔⴰⵡⵏ ⵜⵉⵙⵎⵉⴳⵍⵉⵏ ⵏ ⵓⴳⵔⴰⵡ ⴰⵎⴰⵜⵜⴰⵢ ⴷ ⵡⴰⵜⵉⴳⵏ ⵉⵣⵔⴼⴰⵏⵏ ⴷ ⵉⵎⵏⵣⴰⵢⵏ ⵉⴷⵉⵎⵓⵇⵕⴰⵟⵉⵢⵏ ⵏⵏⴰ ⵉⵇⵇⴰⵏ ⴰⴷ ⵣⵔⴽⵏ ⵉⵎⴰⵙⵙⵏ ⵏ ⵓⵙⵏⵖⵎⵙ, ⵙ ⵉⵎⵥⵍⵉ ⴰⵢⵏⵏⴰ ⵉⵣⴷⵉⵏ ⵙ ⵓⵙⴱⴷⴷⵉ ⵏ ⵓⵡⵏⵏⵉ ⵏ ⵓⴽⵙⴰⵏ ⴷ ⵓⵙⴱⴷⴷⵉ ⵏ ⵓⵙⵙⵉⵣⴷⵔ ⵏ ⵜⵎⵖⴰⵔⵜ ⴷ ⵜⴰⵏⵏⴰⵢⵉⵏ ⵜⵓⵔⵙⵉⵍⵉⵏ ⵉⵚⴽⴰⵏ ⵅⴼ ⵡⴰⵏⴰⵡ, ⴷ ⵓⴼⵔⴰⴳ ⵏ ⵓⴳⴷⵓⴷ ⴰⵎⵥⵢⴰⵏ, ⴷ ⵓⵣⵔⴰⴽ ⵏ ⵡⴰⴷⴷⵓⵔ ⴰⵏⴼⴳⴰⵏ, ⴷ ⵓⴼⵔⴰⴳ ⵏ ⵉⵎⵙⵡⵓⵔⴰ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⵙⴳ ⵜⴽⵏⴷⴰⵡⵜ ⴷ ⵜⴽⵔⴽⴰⵙ…
ⵜⵜⵓⵙⴽⵔⵏⵜ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰⴷ ⴳ ⵓⵙⴰⵜⵉ ⵏ ⵜⵣⵎⵎⴰⵔ ⵏ ⵜⵎⵔⵙⵍⵜ ⴳ ⵓⵙⵎⵓⵙⵙ ⴷ ⵓⵙⵉⵙⵙⵏ ⵏ ⵜⴷⵍⵙⴰ ⵏ ⵜⵓⵙⵙⵏⴰ ⵜⴰⵙⵏⵖⵎⴰⵙⵜ, ⴷ ⵜⵙⵏⵜⴰⵢⵜ ⵏⵏⵙ ⴳ ⵓⵙⴷⵓⵙ ⵏ ⵓⵏⵏⵓⵕⵥⵎ ⵓⴳⴰⵔ ⵅⴼ ⵉⵏⵎⵓⵔⵉⵏ ⵙ ⵓⵎⵙⴰⵙⴰ ⴷ ⵜⴰⵏⵏⴰⵢⵜ ⵏⵏⵙ ⵜⴰⵎⴰⵢⵏⵓⵜ ⴳ ⵜⵙⵟⵕⴰⵜⵉⵊⵉⵜ ⵏ ⵓⵎⵢⴰⵡⴰⴹ. ⵜⵃⴰⴹⵔ ⵎⴰⵙⵙⴰ ⵍⴰⵟⵉⴼⴰ ⴰⵅⴰⵔⴱⴰⵛ, ⵜⴰⵏⵙⵙⵉⵅⴼⵜ ⵏ ⵓⴳⵔⴰⵡ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ, ⴷ ⵓⵏⵎⵀⴰⵍ ⴰⵎⴰⵜⴰⵢ ⵎⴰⵙⵙ ⴱⵏⵄⵉⵙⵙⴰ ⵄⵙⵍⵓⵏ, ⴷ ⵎⴰⵙⵙⴰ ⴰⵎⵉⵏⴰ ⴰⴼⵕⵓⵅⵉ, ⵜⴰⵎⵣⴷⴰⵢⵜ ⵜⴰⵎⴰⵜⴰⵢⵜ ⵏ ⵜⵙⴳⵓⵔⵉ ⵏ ⵎⵕⵕⴰⴽⵛ ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵉⵎⵖⴰⵔⵉⵏ, ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ ⴰⵎⴰⵜⵜⴰⵢ ⵏ ⵓⵎⵢⴰⵡⴰⴹ ⴰⵙⵍⵉⵥⵕ ⴷ ⴽⵉⴳⴰⵏ ⵏ ⵉⵙⴰⵜⵉⵏ ⴷ ⵉⵏⵎⵀⴰⵍⵏ ⵏ ⵓⴳⵔⴰⵡ ⴰⵎⴰⵜⵜⴰⵢ.
ⵉ ⵜⵎⵓⵍⵉ, ⵜⴳⴰ ⵜⵙⴳⵓⵔⵉ ⵏ ⵎⵕⵕⴰⴽⵛ ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵉⵎⵖⴰⵔⵉⵏ, ⵏⵏⴰ ⵙⴳⵎⴹⵏ ⴽⵉⴳⴰⵏ ⵏ ⵉⵎⴷⵔⴰⵡⵏ, ⵜⴳⴰ ⵢⴰⵏ ⵓⵙⴰⵜⵉ ⵉⵜⵜⵓⵙⵎⴰⵢⵏⵓⵏ ⵏ ⵓⵙⵎⵓⵙⵙ ⴰⴳⵔⴰⵡⴰⵏ ⵉ ⵓⵙⴱⴷⴷⵉ ⵏ ⵜⵉⴽⵕⴹⵉ ⵎⴳⴰⵍ ⵜⵉⵎⵖⴰⵔⵉⵏ ⵙ ⵓⵙⵡⵓⵔⵉ ⵏⵏⵙ ⴷ ⵉⵍⵓⴳⵏⵏ ⵏⵏⵙ, ⴷⵉⴳⵙ ⵜⴰⵙⴳⴰ ⵜⵓⵎⵀⵉⵍⵜ ⵉⵣⴷⵉⵏ ⴷ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⴳ ⵢⵉⴳⵔ ⵏ ⵓⴹⵎⴰⵏ, ⴷ ⵜⵙⴳⴰ ⵏ ⵓⵎⵢⴰⵡⴰⴹ ⵏⵏⴰ ⵎⵉ ⵉⴳⴰ ⵓⵡⵜⵜⴰⵙ ⴰⵙⵡⵓⵔⵉ ⵏ ⵜⵏⴱⴰⴹⵜ ⵜⴰⵎⴰⵙⵙⴰⵙⵜ ⵏ ⵓⵙⵏⵖⵎⵙ ⵉ ⵜⵎⴷⵔⴰⵡⵜ ⴳ ⵡⵓⵣⵓⴼ ⵅⴼ ⵡⴰⵏⴰⵡⵏ ⵏ ⵜⴽⵕⴹⵉ ⵎⴳⴰⵍ ⵜⵉⵎⵖⴰⵔⵉⵏ ⴷ ⵉⴷⵔⵉⵣⵏ ⵏⵏⵙ, ⴷ ⵜⵓⵚⴽⴰ ⵏ ⵉⵙⵎⴷⵢⴰⵜⵏ ⵉⴳⵔⴰⵡⴰⵏⵏ ⵏⵏⴰ ⵉⵙⴱⴷⴰⴷⵏ ⴰⵙⵏⵓⵃⵢⵓ ⴰⵔ ⵜⵜⴰⵎⵏ ⵙ ⵉⵣⵔⴼⴰⵏ ⴷ ⵡⴰⴷⴷⵓⵔ ⴰⵏⴼⴳⴰⵏ.
.
